Ekadimwelo lo ambola anyu

◼ Weho akɔna w’ahɔndɔ wakoka onto ndɔta etena katshɔnde dia tembola mvudu yakambema olimu waki Jehowa?

Lo andja w’otondo, Mbalasa ya Diolelo, Mbalasa ya nsanganya ya weke ndo mvudu ya Bɛtɛlɛ ekɔ ahole wa lânde wakalambɔma dikambo dia olimu waki Jehowa. Yɔ yekɔ amɛna, pudipudi ndo nɔngɔswama dimɛna, omalɔkɔ yɔ yekɔ la ɛnamelo ka kɛnɛmɔ efula. Yɔ tshikitana mɛtɛ la kɛnɛ kɛnaso tena efula lo dikongɛ nɛ di’akambo diaki Satana. Wanɛ wembola ahole wakambema olimu waki Jehowa pombaka vɔ lawɔ mbeyama oko anto waki Jehowa wasala lolango lande.

Oko weso Akristo, sho “tatuyaenyaka uku ekambi wa [Nzambi]” lo akambo tshɛ, mbidja ndo lo ɔlɔtɔ aso ndo lo yoho yakoka ndo ya dimɛna yalɔngɔsɔlaso divo. (2 Kor. 6:3, 4) Nɔmbamaka nto dia sho monga la ɛnamelo ka dimɛna. Tena tshɛ, ɔlɔtɔ aso ndo yoho yalɔngɔsɔlaso divo pombaka monga pudipudi ndo kɛnɛmɔla nɛmɔ diakoka monga l’ekambi waki Jehowa Nzambi. Dikambo sɔ diekɔ ohomba efula djekoleko lam’atshɔso dia tenda Mbalasa kenda olimu wa l’andja w’otondo kele l’osomba wa New York ndo Bɛtɛlɛ nkina ya l’andja w’otondo.

Dia mɛnya ohomba wa ndɔta ndo nɔngɔsɔla divo dimɛna, dibuku Tamboyakongɛ dia sala lolango la Jehowa mɛnyaka ohomba wa monga pudipudi lo demba, monga la ahɔndɔ w’amɛna ndo wa nɔngɔsɔla divo lo yoho ya dimɛna etena katshɔso l’olimu w’esambishelo ndo kɔtɔso lo nsanganya ya Akristo. Lɛkɛ 138, odingɔ 3 wa dibuku diakɔ mbutaka ɔnɛ: “Tatohɛke dia lokombo Bɛtɛlɛ nembetshiyaka ‘Luudu la Nzambi.’ Diakɔ diele, ɔlɔtɔ aso, yoho yalɔngɔsɔlaso divo ndo dionga diaso pombaka monga woho wâmɛ la kɛnɛ kalɔmbamaso etena kɔtɔso lo nsanganya dia tɛmɔla lo Mbalasa ka Diolelo.” Apandjudi wa Diolelo wele suke kana w’oma l’etale watshɔ dia tenda Bɛtɛlɛ pombaka kitanyiya tɔndɔ dia lâdiko sɔ. Lo sala ngasɔ, onto latshɔ tenda Bɛtɛlɛ mɛnyaka lowando ndo dilɛmiɛlɔ diele lande.​—Osam. 29:2.

Ɔlɔtɔ aso pombaka mɛnya dia tekɔ anto ‘wayata ɔnɛ vɔ nɛmiyaka Nzambi.’ (1 Tim. 2:10) Ndɔta ndo nɔngɔsɔla divo lo yoho ya dimɛna ekɔ la shɛngiya y’ɔlɔlɔ lo woho wɔsa anto akina ɔtɛmwɛlɔ wa mɛtɛ waki Jehowa. Koko, akɛnama dia etena katshɔwɔ dia tenda mvudu yakambema olimu waki Jehowa, anangɛso la akadiyɛso amɔtshi mongaka l’ɛlɔtɔ wa kɔlɔ, wele bu kɔmba kana waheyama heyama. Ɛlɔtɔ wa ngasɔ hakoke le Akristo oyadi wonya akɔna tshɛ. Oko wediɔ lo akambo akina tshɛ wa lo lɔsɛnɔ laso l’Okristo, lo dikambo sɔ, sho nangaka kitanyiya atɔndɔ wa lâdiko watshikitanya ekambi waki Nzambi la andja ɔnɛ, lo sala akambo tshɛ dia lotombo la Nzambi.​—Romo 12:2; 1 Kor. 10:31.

Omalɔkɔ, etena kembolaso Mbalasa kenda olimu wa l’andja w’otondo kele lo wodja wa États-Unis kana mvudu nkina ya Bɛtɛlɛ, oyadi tambokongɛka dia tembola kana tambotshɔ dia tembola etana keso lo kɔnje dihole dimɔtshi, yambola wate: ‘Onde ɔlɔtɔ ami ndo yoho yalɔngɔsɔlami divo kɛnɛmɔlaka pudipudi ndo kɛnɛmɔ kele la dihole diayangami tembola? Onde vɔ mɛnyaka dimɛna woho wa Nzambi katɛmɔlami? Onde ɛnamelo kami kayekola yimba y’anto akina kana kayowanyangiya?’ Oma lo ɔlɔtɔ aso ndo yoho yalɔngɔsɔlaso divo, nyɛsɔ ‘tɔlɛngake nshi tshɛ wetshelo waki Nzambi, Ombitshi aso l’awui tshɛ.’​—Tito 2:10.