Esambelo k’oma l’ewo k’oshika kaki Nzambi

LE ANTO amɔtshi, kɛnɛ kata Bible lo dikambo dia ngandji ndo dia kɛtshi kaki Nzambi monyiyaka wembola watshindja wɛɔngɔ. Vɔ mimbolaka ɔnɛ: Naka Nzambi nangaka minya akambo wa kɔlɔ, mbeyaka woho wa sala dikambo sɔ ndo ekɔ la nkudu ka disala, lande na kahomba awui wa kɔlɔ tetemala la fulanɛ? Vɔ wekɔ l’okakatanu dia mbɔtɔnganyiya awui asato anɛ: (1) Nzambi ekɔ kanga-nkudu-tshɛ; (2) Nzambi ekɔ kanga ngandji ndo ɔlɔlɔ; ndo (3) awui wa mpokoso wekɔ lo tetemala la tomba. Vɔ mbutaka dia lam’ele dikambo dia sato nɛ diekɔ lo mɛnama, lâsɔ ndoko onyake dikambo dimɔtshi l’atei w’akambo akina ahende hadiohombe monga mɛtɛ. Lo kanyi yawɔ, akambo anɛ ahende mbekɔ, naka Nzambi kema la dikoka dia shidiya akambo wa kɔlɔ, kete nde hayakiyanya dikambo di’anto.

Nshi efula l’ɔkɔngɔ w’olanyelo wa mvudu hiende y’etajɛ yakawelɛka World Trade Center yaki l’osomba wa New York, owandji ɔmɔtshi w’ɔtɛmwɛlɔ wa lokumu wa lo wodja w’États-unis akate ate: “Lamboyambola . . . mbala nkama lo lɔsɛnɔ lami dia mbeya lande na katshika Nzambi mpokoso ndo asui. Lo mbuta mɛtɛ, dimi takondja okadimwelo w’oshika wakoka kitshakitsha otema ami.”

L’ɔkɔngɔ wa nde mboka ɛtɛkɛta ɛsɔ, prɔfɛsɛrɛ kɛmɔtshi ka teoloji akafunde dia nde akambe efula lo mɛna awui waki Nzambi w’amɛna wakasɛmaka ewandji w’ɛtɛmwɛlɔ ɛsɔ dia sambisha. Nde lawɔ aketawɔ kanyi yaki nomb’ewo kɛmɔtshi kakafunde ate: “Oko wele ekɔ wolo dia mana asui fundo mbele ndo ekɔ wolo dia mana Nzambi fundo.” Ko onde mɛtɛ ekɔ wolo shihodia lande na katshika Nzambi akambo wa kɔlɔ?

Kiɔkɔ y’akambo wa kɔlɔ

Otshikitanyi la kɛnɛ kakoka ewandji w’ɛtɛmwɛlɔ mbuta, Bible hɛnya dia woho watshika Nzambi awui wa kɔlɔ ekɔ dikambo diahakoke manema fundo. Kɛnɛ kokoki ndeka kimanyiya anto dia shihodia dikambo di’awui wa kɔlɔ ele mbeya dia Jehowa kotonga andja wa kɔlɔ. Nde akatonge atshukanyi wa ntondo anto wa kokele, w’aha la pɛkato. Jehowa akende olimu ande w’etongelo ko akɛnyi ate “ukuku kawo.” (Etatelu 1:26, 31) Sangwelo diande aki dia Adama l’Eva nanula Paradiso k’Ɛdɛna lo nkɛtɛ k’otondo ndo kilodja l’anto wele l’ɔngɛnɔngɛnɔ ndo lo ekokelo k’oma le lowandji lande loludi la ngandji.​—Isaya 45:18.

Kɔlɔ kakatatɛ oma le etongami kɛmɔtshi ka lo nyuma kele, kânga mbakinde la kɔlamelo otsha le Nzambi oma l’etatelo, nde akayonga la nsaki ka tɛmɔma. (Jakoba 1:14, 15) Ɔtɔmbɔkwɛlɔ ande wakɛnama lanɛ la nkɛtɛ etena kakandatshutshuya atshukanyi wa ntondo dia mbôyela l’ɔtɔmbɔkwɛlɔ ande otsha le Nzambi. Lo dihole dia kitanyiya ɔlɛmbɛ wa shikaa waki Nzambi w’aha ndɛ kana munanda olowa w’oma l’otamba w’ewo k’akambo w’ɔlɔlɔ la wa kɔlɔ, Adama l’Eva wakɔshi elowa ɛmɔtshi ndo wakale. (Etatelu 3:1-6) Lo sala dikambo sɔ, vɔ komonga tsho l’ohedia otsha le Nzambi koko wakɛnya nto dia vɔ wakatone dia nde mbâlɔmbɔla.

Wembola wakonyiyama lo kɛnɛ kendana la lɔkɛwɔ l’ɔlɔlɔ

Ɔtɔmbɔkwɛlɔ ɔsɔ wa l’Ɛdɛna wakonyiya wombola ɔmɔtshi wendana la lɔkɛwɔ l’ɔlɔlɔ, mbut’ate tɔfwɛfwɛ tendana l’anto wa l’andja w’otondo. Atɔmbɔki asɔ wakadje tâmu dia Jehowa hakambe la lowandji lande dimɛna lâdiko wa ditongami diande. Onde Otungi aki la lotshungɔ la nɔmba anto dia vɔ monga l’okitanyiya tshɛ otsha le nde? Onde anto koka monga la lɔsɛnɔ la dimɛna efula naka vɔ ndjalɔmbɔla vamɛ?

Jehowa akakandola tɔfwɛfwɛ tɔsɔ tendana la lowandji lande lo yoho yɛnya dia nde kambaka la ngandji, losembwe, lomba ndo nkudu kande lo yoho yɛdimi kokele. Nde akakoke kamba la nkudu kande dia nanya atɔmbɔki asɔ paka wonya akɔ wamɛ. Kɛsɔ otokoka mɛnama dia sunganaka nɛ dia nde aki la lotshungɔ la sala dikambo sɔ. Koko otondosala ngasɔ tshike ekadimwelo totowokondjama lo wembola wakonyiyama lo kɛnɛ kendana la lɔkɛwɔ l’ɔlɔlɔ. Lo wedi okina, Nzambi akakoke tsho minya yimba oma lo pɛkato kɛsɔ. Dikambo sɔ diotokoka mɛnama le anto akina ɛlɔ kɛnɛ oko yoho y’ɔlɔlɔ ya mɛnya ngandji. Koko otondosala ngasɔ nto tshike totondokoka mbisha ekadimwelo lo kɛnɛ kakafune Satana ɔnɛ anto koka monga la lɔsɛnɔ la dimɛna naka vɔ ndjalɔmbɔla vamɛ. Lâdiko wa lâsɔ, kema dikambo sɔ diotokeketsha anto akina dia tɔmbɔkwɛ Jehowa? Etombelo wotonga ele asui waha l’ekomelo.

Oma lo lomba lande, Jehowa akatshikɛ anto dihole dia vɔ ndjalɔmbɔla lo yoho yalangawɔ l’etena kɛmɔtshi. Kânga mbele dikambo sɔ diakalembetshiya tshika kɔlɔ lo tshanda mɔtshi, anto wambokondja diaaso dia mɛnya kana vɔ kokaka ndjalɔmbɔla vamɛ lo yoho ya dimɛna aha l’ekimanyielo kaki Nzambi ndo sɛna lo ndjela ɛlɛmbɛ awɔ vamɛ wendana la kɛnɛ kele ɔlɔlɔ la kɔlɔ. Etombelo akɔna wambotɛna na? Ɔkɔndɔ w’ana w’anto wambolola tɔ l’awui w’ata, la diɛngiya, l’ɛhɛnyɔhɛnyɔ ndo l’asui. Woho wayokomiyama ɔtɔmbɔkwɛlɔ otsha le Jehowa ayokadimola wembola wakonyiyama l’Ɛdɛna mbala kakɔ ɔtɔi ndo lo pondjo.

La ntondo k’ekotshamelo ka dikambo sɔ, Nzambi akɛnya ngandji kande lo toma Ɔnande, Yeso Kristo, lakalambola lɔsɛnɔ lande l’onto oko olambo wa tshungo. Dikambo sɔ mbishaka akanga w’okitanyiya diaaso dia vɔ tshungɔ oma lo pɛkato la nyɔi k’oma l’ohedia waki Adama. Tshungo ambodiholɛ anto tshɛ wele la mbetawɔ le Yeso mboka k’otsha lo lɔsɛnɔ la pondjo.​—Joani 3:16.

Jehowa tokeketshaka l’eshikikelo tshɛ ɔnɛ asui wele l’anto wekɔ wa tshanda mɔtshi tsho. Omembi w’esambo akafunde ate: “Etenyi ka tshitshe ketu, k’untu a kolo ha[tu]tanema ntu. Kuyanga ayushishima lu dihuli diandi, ndi henama ntu. Keli akanga a memakana wayukita kete, ndu wayongenangena la etshoko efula wa ki.”​—Osambu 37:10, 11.

Nshi yayaye ya wɔladi ndo y’ɔngɛnɔngɛnɔ

Ekotshamelo ka prɔfɛsiya ya lo Bible mɛnyaka di’etena ka Nzambi komiya hemɔ, lonyangu ndo nyɔi kaya suke. Lembetɛ yema y’ɛnɛlɔ tshitshɛ ka diambo k’akambo wayosalema kakawɛnya ɔpɔstɔlɔ Joani. Nde akafunde ate: “Dimi lakenyi ulungu w’uyuyu la kete y’uyuyu; ne dia ulungu wa ntundu la kete ya ntundu wakadimana, kundjala ashi a wuki ntu. . . . [Nzambi] ndame ayuyala la [anto], ndu ayuyala [Nzambi k]awo. Ndi ayukitula asoi tshe lu ashu awo nyoi hayuyala ntu, delu hadiuyuyala ntu, kuyanga ndjawi, kuyanga kandji. Akambu wa ntundu wambushila.” Dia mɛnya mɛtɛ k’alaka asɔ, wakatɛ Joani ɔnɛ: “Ufundi, ne dia aui ako weli kolamelu la mete.”​—Enyelo 21:1-5.

Ko kayotota dikambo dia miliyɔ y’anto waha l’onongo wambovɔ tatɛ oma lam’akonge ɔtɔmbɔkwɛlɔ l’Ɛdɛna na? Jehowa akalake dia nde ayolola anto woladi kakianɛ lo djɔ ya nyɔi. Ɔpɔstɔlɔ Paulo akate ate: “Dimi lambulungamela [le Nzambi ɔnɛ], . . . : Eulwelu k’antu w’ololo la antu wa kolo uma lu nyoi kayuyala.” (Etsha 24:15) Anto asɔ wayonga l’elongamelo ka sɛna l’andja wahomba ‘akambo w’ɔlɔlɔ mbidjasɛ.’​—2 Petero 3:13.

Oko watetawɔka ombutshi wa pami wele la ngandji di’ɔnande salema epaso ka kandji efula la lopitadi nɛ dia nde mbeyaka ɔnɛ dikambo sɔ diayonga la wahɔ le nde, mbele ndo Jehowa aketawɔ di’anto monga l’asui lo tshanda mɔtshi lanɛ la nkɛtɛ. Koko, ɛtshɔkɔ wa pondjo wekɔ lo kongɛ anto tshɛ wayanga dia kotsha lolango laki Nzambi. Paulo akalembetshiya dikambo sɔ ate: “Ditungatunga diakalembiama lu akambu w’anyanya, aha ne dia lulangu ladio, keli ne dia lulangu la one lakadilembia, lakadisha elungamelu ati: Ditungatunga diayutshungwama uma lu lohombo la ehondelo, dia mboto lu ndjadjasela ka lutumbu la ana a [Nzambi].”​—Romo 8:20, 21.

Ɔsɔ mɛtɛ ekɔ losango, aha la woho wɛnaso lo televiziɔ, ladiaso lo tojurunalɛ kana lokaso l’aradiyo, koko losango l’ɔlɔlɔ. Lɔ lekɔ losango l’oleki dimɛna l’oma le ‘Nzambi lasha esambelo tshɛ’ ndo latokokɛ mɛtɛ.​—2 Koreto 1:3.

[Esato wa lo lɛkɛ 6]

Tena diambeta ambɛnya di’anto hawokoke ndjalɔmbɔla vamɛ dimɛna aha l’ɛlɔmbwɛlɔ kaki Nzambi

[Efundelo wɛnya kanga]

Nkumbo ka la Somalie: UN PHOTO 159849/M. GRANT; bɔmbɛ atomikɛ: USAF photo; pango ka lokanu: U.S. National Archives photo