Lokaho la Ndjahondja

“NYU mbeyaka mbelɛmi kanga djɔmbɔ koko dui sɔ hadiotokiyanya kanga yema. Dimi lekɔ lo nɔmba l’ɔtɛ wa Yeso.” Ɛtɛkɛta waki owandji ɔmɔtshi w’ose asɔnyi ɛsɔ mɛnyaka tamanu tatomba lo woho wahomba akuta kimɔma l’ɛtɛmwɛlɔ. Mɛnamaka di’ɛtɛmwɛlɔ wa weke sukamɛka paka naka vɔ wambokondja akuta efula. Pombaka futa anto, mvudu y’ɛtɛmwɛlɔ pombaka mbikama ndo nɔngɔswama, dia tshumanya elui w’anto dia mbâsambisha lo sɛkɛ pombaka monga l’akuta. Ngande wahomba tanema akuta wahomba kɛndjakɛndja ɔtɛmwɛlɔ na?

Ɛtɛmwɛlɔ efula, kadimolaka ɔnɛ akuta asɔ ndjaka oma l’etenyi ka dikumi.a Osambisha welɛwɔ Norman Robertson akate ate: “Etenyi ka dikumi ekɔ yoho yasala Nzambi di’akuta kimɔma dia kɛndjakɛndja Diolelo Diande lanɛ la nkɛtɛ. Ɔsɔ ekɔ woho walɔmbɔlande awui wa falanga dia Evanjiliɔ sambishama.” Aha la mboka sɔnyi nde akohola ambeki ande ɔkɛndɛ wele la wɔ wa kimɔ weshasha, ndo nde akawatɛ la wolo tshɛ ate: ‘Etenyi ka dikumi kema ɛngɔ kɛmɔtshi kakimɔnyu l’ɔtɛ w’ɔnɛ nyu kokaka kikimɔ. Ɔsɔ ekɔ dikambo diɛnya dia nyekɔ l’okitanyiya. Naka hanyokimwe etenyi ka dikumi, kete mbokɛmaka hwe dia nyamboyaka ɛlɛmbɛ wa Nzambi. Ɔsɔ ekɔ oko nyambova akuta akana.’​—Tithing​—God’s Financial Plan.

Ondo mɛtɛ wɛ mbetawɔka dia weshasha pombaka monga tshelo mɔtshi ya l’ɔtɛmwɛlɔ w’Akristo. Ko, onde wɛ mɛnaka di’ɔlɔmbɛlɔ w’etete w’akuta ɔsɔ mbidjaka ofukutanu ndo ondo momadiaka ndo anto? Ombewi wa teoloji w’ose Brésil welɛwɔ Inácio Strieder akɛnya dia ɛtɛmwɛlɔ nɔmbaka etenyi ka dikumi dia “shidiya awui wa l’atshunda awɔ” ndo dia sala akambo wa “kɔlɔ, wa lokeso, ndo wa minganyiya mbetawɔ y’anto.” Etombelo wakandɛnyi ko “anto wahakambe elimu, wadi waki edo, anto wele kema l’ahole wa shikaa wa mbidjasɛ, ndo wanɛ wele kema l’akoka wa mbeya sɛdingola dikambo mɛnaka dia lam’ele Nzambi ambâkalɛ vɔ pombaka mbisha wanɛ wayata ɔnɛ esambisha mbewɔ diangɔ efula oyadi kânga nkumbo yawɔ yekɔ lo mvɔ la ndjala.”

Lâsɔ wɛ mbeyaka ndjambola wate: ‘Onde ɛtɛmwɛlɔ walɔmba etenyi ka dikumi la wolo kambaka dimɛna l’Afundelo? Kana onde ewandji ɛmɔtshi w’ɛtɛmwɛlɔ mpɔtɔlaka ase ɔtɛmwɛlɔ awɔ akuta lo mbaotsha wɔma ɔnɛ naka hawokimwe kete Nzambi ayowasha dilanya? Lo mɛtɛ, onde Nzambi kokaka mbetawɔ dia sho kaha lokaho la ndjahondja, oko wata anto amɔtshi?’

[Nɔtɛ ka l’ɛse ka dikatshi]