Lande na? ‘Nzambi le, lande na ketawɔyɛ dia sui nɛ komɛmi?’
RICARDO âkohɔ woho wakandadjasɛ nde la wadɛnde Mariya lo luudu latowokongɛka dɔkɔtɛlɛ.a Vɔ akɔ ahende ndoko laki la dihonga dia mbadia etombelo w’ɛgzamɛ wa komelo wakawasale Mariya la lopitadi. Oma lâsɔ, lam’akafola Ricardo divɔlɔpɛ, vɔ akɔ ahende wakoke sso esadi eto lo fishi dia mbeya kɛnɛ kakafundji dɔkɔtɛlɛ. Vɔ wakɛnyi tshɛkɛta “kansɛrɛ,” ko vɔ akɔ ahende wakatatɛ ndela lam’akaweye kitshimudi ya tshɛkɛta shɔ.
Ricardo mbutaka ate: “Dɔkɔtɛlɛ sɔ aki onto l’ɔlɔlɔ efula, ko lam’akandɛnyi mɛtɛ dia dikambo dia kandji efula diambotokomɛ, nde akatetemala la totɛ dia sho pombaka ndjaɛkɛ le Nzambi.”
La ntondo ka vɔ sakɛ Mariya la rayon X, dɔkɔtɛlɛ akɛnyi lokolo lande la lomi ladidima lɔamɛ. Lâdiko dia lâsɔ, ɛgzamɛ wakawosale wakɛnya dia kansɛrɛ kambokoma polo lo wɔɔngɔ. L’ɔkɔngɔ wa lumingu ɔtɔi l’osakelo, wakayemɛka esakelo ka la rayon X kɛsɔ. Mariya akayɔkɔka lo kɔma ndo l’ɔkɔngɔ wa ngɔndɔ hiende nde akavu. Ricardo mbutaka ate: “Dimi lakangɛnangɛna nɛ dia asui ande wakakomɛ, koko laki la kandji efula lo woho wakamavusha wadɛmi ɔsɔ ndo lakakombola dia dimi lawɔ mvɔ. Lakalelɛka Nzambi mbala la mbala nte: ‘Lande na kakayetawɔ dia sui nɛ komɛmi?’”
Wembola efula mimbɔmaka etena katomba mpokoso kɛmɔtshi
L’ɛnyɛlɔ ka Ricardo, l’andja w’otondo anto efula wekɔ lo diɛnɛ l’asui. Mbala efula, wanɛ waha l’onongo mbadiɛnɛ, ɛnyɛlɔ lam’alɔma ata ndo lam’atomba awui akina. Ohokanyiya dikambo di’ɔkɛyi wele l’anto l’ɔtɛ w’ata waha pe wambosoya anto woho w’anyanya. Ohokanyiya nto asui wele la wanɛ wakɔ l’anya wa dengalenga, ana wahɛnyahɛnyawɔ, ɛhɛnyɔhɛnyɔ wa l’atei wa nkumbo ndo awui akina wa kɔlɔ wasala anto. L’ɔkɔndɔ w’otondo wa lɔsɛnɔ l’anto, mɛnamaka di’anto wekɔ lo tetemala la mɛngiyana ndo la soyana lam’asawɔ. (Undaki 4:1-3) Oma lâsɔ, anto wekɔ lo diɛnɛ la mpokoso y’oma lo diangɔ diakatongama, hemɔ ya lo wɔɔngɔ ndo ya lo demba. Diakɔ diambola anto efula ɔnɛ, “Lande na ketawɔ Nzambi weho w’asui wa nganɛ na?”
Kânga le wanɛ wele la mbetawɔ le Nzambi, asui mongaka nshi tshɛ wolo mbikikɛ. Wɛ lawɔ koka ndjambola bonde ketawɔ Nzambi ka ngandji ndo kanga nkudu di’anto diɛnɛka l’asui. Tana okadimwelo w’ɔlɔlɔ ndo wa mɛtɛ lo wombola ɔnɛ watshindja anto wɔɔngɔ ekɔ ohomba efula dia sho monga la ki ka lo yimba. Bible mbishaka okadimwelo w’ɔlɔlɔ ndo wa mɛtɛ. Lam’alangayɛ, ɛsɔ tende kɛnɛ kata Bible lo dikambo sɔ lo sawo diayela.
[Nɔte ka l’ɛse ka dikatshi]
a Wakatshikitanya nkombo.
[Esato wa lo lɛkɛ 3]
Dɔkɔtɛlɛ akatetemala la totɛ dia sho pombaka ndjaɛkɛ le Nzambi