Tɔngɛnɛngɛnɛ oma l’olimu aso wa wolo
1. Kakɔna kakoka toshishɛ ohetoheto aso l’olimu w’esambishelo?
1 Onto akatongama dia ‘ngɛnangɛnaka oma l’olimu ande wa wolo.’ (Ond. 2:24) Koko, etena kahatakondja etombelo w’ɛlɔlɔ oma l’olimu w’esambishelo, ɔkɔmwɛlɔ kokaka toshishɛ ɔngɛnɔngɛnɔ ndo nkitshakitsha ohetoheto aso. Kakɔna kakoka tokimanyiya dia mɛna akambo la sso di’ɔlɔlɔ?
2. Lande na kahombaso mɛna akambo la sso di’ɔlɔlɔ etena katona anto losango laso?
2 Tɛnyi akambo la sso di’ɔlɔlɔ: Tohɔ dia kaanga mbele anto yema tshitshɛ tsho mbaketawɔ esambishelo kaki Yeso, aha la taamu nde akakotsha olimu ande dimɛna. (Jni. 17:4) Lo wɛɛla ande w’omboki a woho, Yeso akate di’anto efula hawotetawɔ losango la Diolelo lɔsama oko lɔtɔngɔ. (Mat. 13:3-8, 18-22) Koko, naka sho ntetemala mbidja welo, kete tayokondja etombelo w’ɔlɔlɔ.
3. Ngande wakokaso ‘ntɔ elowa’ oyadi anto yema tshitshɛ mbeetawɔ losango laso?
3 Woho watɔso elowa efula: Lo ndjela wɛɛla waki Yeso, wanɛ wetawɔ losango la Diolelo ‘wayɔtɔ elowa.’ (Mat. 13:23) L’ɔkɔngɔ wa lɔsɛkɛ l’eponga ntomba ndo mbola, lɔ tondjaka aha lɔlɛngɛsɛ l’oyoyo koko lɔtɔngɔ l’oyoyo. Woho akɔ waamɛ mbele, elowa watɔ Okristo kema ambeki w’eyoyo, koko ntɔngɔ ya Diolelo y’eyoyo, mbuta ate woho wewoyaso losango la Diolelo. Dikambo sɔ toshaka ‘ɔngɛnɔngɛnɔ’ oyadi anto mbetawɔ kana ntona losango laso. Tekɔ lo mbisha lonya l’okidiamelo wa lokombo laki Jehowa. (Iza. 43:10-12; Mat. 6:9) Tekɔ la diɛsɛ dia monga ekambi kaamɛ la Nzambi. (1 Kɔr. 3:9) Ndo “elowa w’oma l’ɛlɔmɔ aso” ɛsɔ ngɛnyangɛnyaka Jehowa.—Hɛb. 13:15, 16.
4. Naa etombelo wakoka monga l’olimu aso w’esambishelo aha la sho mbeya?
4 Ndo nto, olimu aso wa wolo kokaka monga l’etombelo wahatɛnyi. Ekɔ mɛtɛ di’anto amɔtshi wakasambishama oma le Yeso wakayokomaka ambeki ande l’ɔkɔngɔ wa nde nshidiya olimu ande wa lanɛ la nkɛtɛ. Woho akɔ waamɛ mbele, lɔtɔngɔ la Diolelo lonɛso kokaka ndjɔsɔnga edio l’otema w’onto ndo ndjola l’ɔkɔngɔ, mbuta ate onto akɔ kokaka ndjokoma Okristo aha la sho mbeya. Lo mɛtɛ, olimu aso mongaka l’etombelo efula w’ɛlɔlɔ. Ɔnkɔnɛ, nyɛsɔ ‘totetemale ntɔ elowa’ ndo mɛnya dia tekɔ ambeki waki Yeso.—Jni. 15:8.