Tayotatɛ mbeka Yasukanya la Jehowa lo lomingu la Ngɔndɔ ka ntondo 6
1. Ntatɛ lomingu la Ngɔndɔ ka ntondo 6, diaaso diakɔna diayonga la so dia ndeka ndjasukanya la Jehowa?
1 Jehowa nangaka dia sho ndjasukanya la nde. (Jak. 4:8) Dia tokimanyia dia sho nsala dui sɔ, tayotatɛ mbeka dibuku Yasukanya la Jehowa lo Wekelo wa Bible wa l’etshumanelo oma lo lomingu la Ngɔndɔ ka ntondo 6. Oko wɛnyamidiɔ lo dikatshi dia mbɔtwɛlɔ, oyango wa dibuku sɔ ele wa tokimanyiya dia sho: “Kana yimba lo woho wakɛnɛmɔla Jehowa ɔmɔmɔ a l’atei wa waonga ande, sɛdingola yoho ya kokele yakokoya Yeso Kristo waonga akɔ ndo shihodia woho wakokaso sho lawɔ monga la waonga asɔ ayoleka tosukanya la Nzambi.” Tambekaka dibuku nɛ l’etshumanelo lo 2004 ndo 2005. Koko, le apandjudi suke la miliyɔ hiende wamboyokoma Ɛmɛnyi wa Jehowa l’ɔkɔngɔ wa laasɔ, ɔsɔ ayonga mbala ka ntondo le wɔ ka nsɛdingola waonga wa Jehowa w’amɛna ɔtɔi l’ɔtɔi. Le wanɛ wambekaka dibuku sɔ, ovuswelo adiɔ ayowakimanyiya dia vɔ ndeka monga la lowando lo waonga wa Jehowa.—Osam. 119:14.
2. Ngande wayekamaka Yasukanya la Jehowa?
2 Woho wayodiekamaka: Ɔnɔmbɔdi ayotatɛka la mbɔtwɛlɔ ka lo tshena pe k’ɔnɔngɔ ɔtɔi kana ehende. Lo dibuku diakɔ hawoshikike avɛsa wahomba mbadiema, diakɔ diele wonya wa wekelo ɔnɔmbɔdi mbahomba nsɔna avɛsa woleki ohomba wakoka mbadiema. Dimbola ɔtɔi kana ahende koka mbokama l’ekomelo ka wekelo tshɛ dia mvusola. Naka wekelo wayekama wekɔ la kiombo yele l’ɔtɛ adui ɔnɛ: “Awui wa kana yimba,” kete tayokamba la kiombo yakɔ oko ovuswelo. Naka etena kekekɔ, ɔnɔmbɔdi koka nɔmba ampokami dia mbadia avɛsa amɔtshi woshilami lo kiombo ndo oma laasɔ ko nde mboka ambola akina.
3. Etena katatasɛdingola dibuku nɛ, kakɔna kahombaso nsala ndo lande na?
3 Woho wa nkondja wahɔ tshɛ lo tshɛ: Ekɔ ohomba ndjalɔngɔsɔlaka la ntondo oyadi kaanga tambekaka dibuku nɛ. Ekɔ ohomba mbishaka kɔmatɛrɛ nɛ dia dui sɔ tombolaka Jehowa, tokimanyiyaka dia sho mbohɔ akambo akɔ ndo kɛsɔ kondjiɛka anto akina wakaye lo losanganya wahɔ. (Osam. 35:18; Hɛb. 10:24, 25) Naka wɛ nkana yimba lo waonga w’amɛna waki Jehowa, kete wɛ ayoyasukanya la nde. (Osam. 77:11-13) Lo wedi okina, wɛ ayoleka ndjashikikɛ dia nkitanyiya wadjango ande ndo dui sɔ diayokotshutshuya dia mbutɛ anto akina awui wendana la nde.—Osam. 150:1-6.