“Nyusukani le [Nzambi], ku ndi ayusukana le nyu”
La ntondo ndo l’ɔkɔngɔ—Nde akatane wolo wa tshikitanya yoho yande ya lɔsɛnɔ
SANDRA, womoto ɔmɔtshi la lo wodja wa Mexique, akakɔndɔla ndamɛ dia nde konangemaka lo nkumbo kawɔ. Woho wakawokalɛ ndo wakinde kombokamaka ngandji akonge l’etombelo wa kɔlɔ lo ɛnɔnyi wakinde eke dikɛnda. Nde ekɔ lo mbuta ate: “Lo nshi tshɛ yakimi osekaseka, lakayaɔsaka oko ɛngɔ kɛmɔtshi k’anyanya ndo lakayambolaka bonde kemi la lɔsɛnɔ.”
Etena kakandakome lo kalasa ka sekɔndɛrɛ, nde akatatɛ nɔka wanu wakatshikaka she la ngelo. L’edjedja wonya, nde akayomɛka somba ɛlɔndɔ ande wa wanu ndo akayokomaka omunga a wanu. Nde ekɔ lo mbuta ate: “Dimi komonga ndoko l’ɔkɔkɔ ɔtɔi wa tshikala la lɔsɛnɔ.” Oko wakinde komonga nto l’elongamelo lo lɔsɛnɔ, Sandra akayakimɔ lo nɔnɔ dia wolo. Nde ekɔ lo mbuta ate: “Ɛngɔ ɔtɔi kakakimanyiyaka dia mbohɛ ekakatanu ami, aki kɛnɛ kakatanemaka lo tshapatapa yami ya l’anya, mbut’ate ɔlɔndɔ a wanu, amuka amɔtshi w’ekanga, kana yema ya marijuana.”
L’ɔkɔngɔ wa Sandra shidiya kalasa k’onganga, nde akayoyakimɔka tshɛ l’ɔnwɛlɔ a wanu. Nde akayange dia ndjadiaka. Koko nde akake.
Sandra aketeta l’ɛtɛmwɛlɔ efula dia kondja ekimanyielo ka lo nyuma ndo ka lo yimba koko welo ande tshɛ wakɔtɔ l’ashi. Lam’akinde bu ndoko l’elongamelo nde akalɛlaka Nzambi mbala la mbala ate: “Lende eyɛ na Nzambi le? Lande na kahayakimanyiya?” Etena kakandaleke ndjaoka oko ɛngɔ k’anyanya mbakandayongaka la diɛsɛ dia kadiyɛso kɛmɔtshi mbosambisha. Dui sɔ diakôkonya dia nde mbeka Bible. Sandra aki l’ɔngɛnɔngɛnɔ wa mamba lam’akandeye ɔnɛ: “[Jehowa] eko lasuki la wane weli la etema wambate.”—Osambu 34:18.
Kadiyɛso kakekaka la nde Bible akakimanyiya Sandra dia shihodia ɔnɛ Jehowa Nzambi mbeyaka dia sho tekɔ la wɛɔdu l’ɔtɛ wa pɛkato ndo wa eongelo kaso k’anto wele bu kokele kakatahowɔ oma le Adama. Sandra akashihodia dia Nzambi mbeyaka dia sho hatokoke kitanyiya ɛlɛmbɛ ande wa losembwe lo yoho ya kokele. (Osambu 51:5; Romo 3:23; 5:12, 18) Nde aki l’ɔngɛnɔngɛnɔ dia mbeka ɔnɛ Jehowa hadje yambalo yande tshɛ paka lo wɛɔdu aso, ndo nde hatɔlɔmbɛ dia sala kɛnɛ kahatakoke sala. Omembi w’esambo akambola ate: “[Jehowa], utunduyala we ali efula ka kolo, we [Jehowa], akona ututshikala?”—Osambu 130:3.
Dikambo dimɔtshi dia mɛtɛ di’ohomba di’oma lo Bible diakasalanganya otema waki Sandra aki olambo wa tshungo waki Yeso Kristo. Oma l’ekimanyielo k’olambo ɔsɔ, la kɛtshi tshɛ Jehowa akasha anto w’okitanyiya diɛsɛ dia vɔ mbɔsama oko anto w’ɔlɔlɔ koyanga mbewɔ atshi wa kɔlɔ. (1 Joani 2:2; 4:9, 10) Eelo, sho kokaka kondja “edimanyelu ka kolo yasu” ndo kimanyiyama dia sho tondoya tokanyi ta nanga ndjaɔsa oko ɛngɔ k’anyanya.—Efeso 1:7.
Sandra akakondja wetshelo w’oshika oma l’ɛnyɛlɔ kaki ɔpɔstɔlɔ Paulo. Nde akangɛnangɛna efula lo menda ɔlɔlɔ wa Nzambi lo yoho nyɛ yakandodimanyiya pɛkato yande yambetaka ndo lo yoho yakandôsukɛ lo welo wakandadjaka dia nɛndja wɛɔdu wa demba wakawokama oko losondjo. (Romo 7:15-25; 1 Koreto 15:9, 10) Paulo akatshikitanya yoho yande ya lɔsɛnɔ, mbut’ate nde ‘akayakɔmɔlaka tɔmbɔ lo demba ndo akalɛmbiaka demba diakɔ’ dia nde tshikala lo mboka kɛnɛ ketawɔma le Nzambi. (1 Koreto 9:27) Nde kombetawɔ dia tɔsɛngiya tande ta kɔlɔ mbowahemɛ.
Wɛɔdu waki Sandra wakawosha pâ efula l’asolo, koko nde akatetemala ndɔshana la wɔ. Nde akalɔmbaka Jehowa l’otema ɔtɔi dia nde mbokimanyiya dia mbatondoya ndo nde akɔlɔmbaka nto dia Nzambi mboka kɛtshi. (Osambu 55:22; Jakoba 4:8) Lo menda yoho yakayashaka Nzambi le nde, Sandra akonge l’akoka wa tshikitanya yoho yande ya lɔsɛnɔ. Nde ekɔ lo mbuta ate: “Dimi lekɔ l’ɔngɛnɔngɛnɔ wa mbetsha anto akina Bible lo tena tshɛ.” Sandra aki la diɛsɛ dia kimanyiya enondo ande la womoto ndo kosɛnde ka womoto dia vɔ mbeya Jehowa. Oko ‘wasalande kɛnɛ kele ɔlɔlɔ,’ nde kambaka la lolango lande ndamɛ l’akoka ande w’onganga lo nsanganya ya weke y’Ɛmɛnyi wa Jehowa.—Ngalatiya 6:10.
Kakɔna kayotota dikambo dia nɔnɔ dia wolo diakanɔka Sandra na? Nde ndamɛ ekɔ lo mbuta ate: “Wɔɔngɔ ami wekɔ pudipudi. Handjɔnɔ wanu, mfɔka, kana nɔnɔ dia wolo nto. Laya bu l’ohomba adiɔ nto. Lambotana kɛnɛ kakamatayangaka.”
[Efundelo wa l’etei w’odingɔ wa lo lɛkɛ 9]
“Lambotana kɛnɛ kakamatayangaka”
[Kiombo ya lo lɛkɛ 9]
Woho wakamba atɔndɔ wa lo Bible olimu
Atɔndɔ amɔtshi w’oma lo Bible wayela anɛ wakakimanyiya anto efula dia vɔ tshika nɔnɔ dia wolo:
“Tuya[ɛdia] uma lu mindu tshe ya dimba ndu y’etema, tuluwanya akambu w’ekila la woma wa [Nzambi].” (2 Koreto 7:1) Nzambi tshɔkɔlaka wanɛ wamboyaɛdia oma lo mindo, ndo wewɔ ditshelo dia mindo.
“Woma wa [Jehowa] eli dia mpetsha kolo.” (Tukedi 8:13) Wɔma wɔsɔhanyemi la dilɛmiɛlɔ wokaso Nzambi kimanyiyaka onto dia nde tshika mbekelo ya kɔlɔ, mbidja ndo ɔnwɛlɔ wa nɔnɔ dia wolo. Onto lambotshikitanya yoho yande ya lɔsɛnɔ ngɛnyangɛnyaka Jehowa ndo nde ndjakokɛka oma lo hemɔ yokiya anto wɔma.
‘Tonge l’okitshakitsha ndo l’okitanyiya otsha le mandji nd’otsha le emboledi.’ (Tito 3:1) L’ahole efula, nɔ ndo monga la nɔnɔ dia wolo ekɔ odiakelo w’ɔlɛmbɛ. Akristo wa mɛtɛ hawonge la nɔnɔ dia wolo kana kamba ladiɔ lo yoho yahetawɔma le lɛɛta.