Woho wakayaoke wamato ahende wakavusha waomi

SANDRA ekɔ wadi aki odo ɔmɔtshi la lo wodja wa Australie. Ambeta ɛnɔnyi ɛmɔtshi, lam’akavu omende, Sandra akandama la shɔkɛ ya wolo mbala kakɔ ɔtɔi. “Woho wakamɛnyi dia lamboshisha ɔngɛnyi ami woleki tshɛ ndo olonganyi ami lo shashimoya akakiyanya wolo efula. Halokoke ndo mbohɔ mɛtɛ woho wakamamɔ oma lo lopitadi polo la ngelo kana kɛnɛ kakamasale nto lushi lakɔ l’ɔkɔngɔ wa nyɔi k’omɛmi. Lo mingu ngana yakayele, esasesase kaki lami akayombishaka pâ kahashile lo demba.”

Sandra ekɔ l’ɔngɛnyi ande ɔmɔtshi w’edjedja, Elaine, ɔnɛ lakavusha omɛnde aya oko ɛnɔnyi esamalo. La ntondo ka Davidi di’omɛnde ndjovɔ la kansɛrɛ, Elaine akotatsha mbut’ate akakokɛkokɛ Davidi ngɔndɔ shamalo y’etondo. Elaine aki la lonyangu la mamba woho ɔnɛ wele yema tshitshɛ l’ɔkɔngɔ wa nyɔi k’omɛnde, nde akayongaka tshungu tshanda mɔtshi. Ɛnɔnyi ehende l’ɔkɔngɔ, nde akakite la shɔkɛ l’atei w’anto. Dɔkɔtɛlɛ diande kombotana ndoko la hemɔ lo demba. Koko, nde akashola dia Elaine akatashindanɛka la pâ kande l’etei k’otema aha la kikɛnɛmɔla lo sɛkɛ, diakɔ diakandawotɛ dia nde kalola la ngelo ndo tohemba sala la wolo dia ndela. Elaine ekɔ lo suya ate: “Akahombama nshi efula dia dimi ndɔshana la pâ kaki lami l’asolo,” nde ekɔ lo mbuta nto ate lamakamayaokaka oko etshike, “dimi lakatshɔka lo luudu la ndala ko dimi toyafɛ ɔtɛ l’ahɔndɔ waki Davidi.”

Eelo, nyɔi k’olonganyi wa ngandji kokaka tondja akambo efula, nɛ dia monga wadi aki odo halembetshiyaka tsho sɛna aha la monga l’omi. Ɛnyɛlɔ, l’etena kɛmɔtshi Sandra akayaokaka dia nde aya bu oko nde. L’ɛnyɛlɔ ka wanɛ wêke kavusha waomɛwɔ, nde lawɔ akonge la pâ ndo kombeyaka le na ahombande ndjaɛkɛ. Sandra ekɔ lo mbohɔ ate: “Monga l’omi lakahombaka mbɔsa tɛdikɔ ta komelo, ko mvusha om’akɔ la shashimoya akayombishaka ndo wɔma wa dimi mbɔsaka tɛdikɔ ta ngasɔ. Dimi kondalaka djɔ nto dimɛna. Lakakɔmɔ ndo lakalɛmbɛ demba. Komonga yana ya dikambo dia mbeya ahombama sala.”

Lushi la lushi l’andja w’otondo, kɛnɛ kakakomɛ Sandra la Elaine kekɔ lo komɛ anto efula. Hemɔ, aksida, ata, woho wadiakana anto wele kema dioho kana lokoho ɔtɔi, ndo awui wa ngala mbaleka mbidiya lofulo la wadi waki edo.a Efula l’atei wa wamato asɔ wekɔ lo tashindanɛ la kandji kawɔ l’etei k’etema, aha la mbeya kɛnɛ kahombawɔ sala. Kakɔna kakoka angɛnyi, kana ase nkumbo sala dia kimanyiya wadi waki edo dia vɔ mbekesanɛ la kɛnɛ kambâkomɛ? Sawo diayela dekɔ l’alako amɔtshi wakoka mbâkimanyiya efula lo dikambo sɔ.

[Nɔtɛ ka l’ɛse ka dikatshi]