‘Tolembetshiya Ɔtɛkɛta wa Nzambi dimɛna’

‘Osale tshɛ dia ndjakimɔ le Nzambi oko onto lambolowana, oko ose olimu laha la dikambo dia mbotshama sɔnyi ndo lalembetshiya ɔtɛkɛta w’akambo wa mɛtɛ dimɛna.’​—2 TIMOTE 2:15.

1, 2. (a) Lande na kele ekambi l’ohomba wa dihomɔ? (b) Olimu akɔna wahomba Akristo kamba ndo ngande wɛnyawɔ dia vɔ nyangaka ntondo Diolelo?

EKAMBI wekɔ l’ohomba wa dihomɔ diakoka mbâkimanyiya dia kamba olimu awɔ. Koko aha monga tsho l’ehomɔ mbata dikambo. Okambi ekɔ l’ohomba w’ehomɔ kahombama ndo nde pombaka kamba latɔ lo yoho ya dimɛna. Ɛnyɛlɔ, etena kakayɛ okole l’ekimanyielo ka sɛti la abaya, ko wɛ ambolanga kakatanya sambe hiende kâmɛ, wɛ ayonga l’ohomba wa maditɔ la sɛti. Wɛ pombaka mbeya woho wa kɔkɔla lɔsɛti lo dibaya lo yoho yahalakoke minama. Nyanga dia kɔkɔla lɔsɛti lo dibaya aha la mbeya woho wa kamba la maditɔ koka monga wolo efula ndo dikambo sɔ koka mbisha ndo okiyanu. Koko dihomɔ diakambema lo yoho ya dimɛna tokimanyiyaka dia kamba elimu aso lo yoho yatondja etombelo w’ɔlɔlɔ.

² Oko weso Akristo, tekɔ l’olimu ɔmɔtshi wahombaso kamba. Ɔsɔ ekɔ olimu woleki tshɛ ohomba. Yeso Kristo akatɛ ambeki ande dia ‘nyanga ntondo diolelo.’ (Mateu 6:33) Ngande wakokaso sala dikambo sɔ na? Ntondotondo, ele lo monga l’ohetoheto l’olimu w’esambishelo ka Diolelo ndo wa mbetɛ anto ambeki. Dikambo dia hende ele lo sala woho w’esambishelo kaso tombaka paka oma l’Ɔtɛkɛta wa Nzambi. Ndo dikambo dia sato ele lo monga la lɔkɛwɔ la dimɛna. (Mateu 24:14; 28:19, 20; Etsha 8:25; 1 Petero 2:12) Dia kondja etombelo w’amɛna ndo ɔngɛnɔngɛnɔ l’olimu w’Okristo, tekɔ l’ohomba wa monga la dihomɔ diahombama ndo mbeya woho wa kamba la dihomɔ diakɔ dimɛna. Lo dikambo sɔ, ɔpɔstɔlɔ Paulo akasha ɛnyɛlɔ ka dimɛna k’Okristo wakamba olimu, ndo nde akakeketsha asekande ambetawudi dia mbôkoya. (1 Koreto 11:1; 15:10) Lâsɔ, wetshelo akɔna wakokaso kondja oma le Paulo laki okambi oko sho na?

Paulo aki opandjudi wa Diolelo w’ohetoheto

3. Lande na kakoka mbuta ɔnɛ ɔpɔstɔlɔ Paulo aki okambi wa Diolelo w’ohetoheto?

³ Woho akɔna w’okambi waki Paulo na? Nde aki mɛtɛ okambi w’ohetoheto. Ndamɛ akasale la wolo tshɛ dia pandjola lokumu l’ɔlɔlɔ l’ɛtshi ka nkɛtɛ ka woke ka lo lɛkɛ la l’omamu wa ndjale ka Mediteraneya. Dia mɛnya lande na kakandayasha dia pandjola lokumu la Diolelo lɔsɔ, ɔpɔstɔlɔ w’etete ɔsɔ akate ate: “Naka dimi lambusambisha lukumu l’ololo, dimi kema la dikambu dia ndjatumbula, ne dia okende weko ladiku diami. Fono keko le mi, naka dimi halasambisha lukumu l’ololo!” (1 Koreto 9:16) Onde Paulo akonaka dia pandja paka lɔsɛnɔ lande loto? Kema. Nde komonga onto la lokaki. Koko, nde akalange dia ndo anto akina vɔ la wɔ kondja wahɔ oma lo lokumu l’ɔlɔlɔ. Nde akafunde ate: ‘Dimi latotshaka akambo tshɛ dia lokumu l’ɔlɔlɔ, dia dimi liewoya ndo le anto akina.’​—1 Koreto 9:23.

4. Ehomɔ kakɔna kahomba ekambi w’Akristo ndeka mbɔsa la nɛmɔ?

⁴ Ɔpɔstɔlɔ Paulo aki okambi waki la ndjâkitshakitsha wakeyaka dia nde hakoke ndjaɛkɛ lo diewo diande hita to. Oko wele otshudi w’abaya l’ohomba wa maditɔ, mbele ndo Paulo aki l’ohomba w’ehomɔ kahombama dia mbɔtshiya akambo wa mɛtɛ waki Nzambi l’etema w’ampokami ande. Ehomɔ kakɔna kakakambe lande ntondo na? Aki Ɔtɛkɛta wa Nzambi, mbut’ate Afundelo w’Ekila. Woho akɔ wâmɛ mbele, Bible k’otondo ekɔ ehomɔ ka ntondo kakamba laso l’olimu wa mbetɛ anto ambeki.

5. Dia monga ekambi wakondja etombelo w’amɛna, ahombaso sala lâdiko wa shila kɛnɛ kele l’avɛsa?

⁵ Paulo akeyaka ɔnɛ kamba l’Ɔtɛkɛta wa Nzambi dimɛna, nɔmbaka akambo efula koko aha tsho shila awui w’oma lɔkɔ. Nde akakambe la ‘yewo ya mbetawoya.’ (Etsha 28:23) Lo woho akɔna na? Paulo akakambe l’Ɔtɛkɛta wa Nzambi wakafundama lo yoho ya dimɛna dia mbetawoya anto efula awui wa mɛtɛ wa Diolelo. Nde akakanaka la wɔ yimba. L’edja ka ngɔndɔ shato lo shinangɔnga ka l’Ɛfɛsɔ, Paulo “akateketa la wo dia mbaetawuya akambu wa diulelu dia [Nzambi].” Kânga mbele ‘amɔtshi wakakeketsha etema ndo kombetawɔ,’ akina wakahokamɛ. Etombelo waki l’esambishelo ka Paulo l’Ɛfɛsɔ ele ‘ɔtɛkɛta wa Jehowa wakatetemala pama ndo ndeka wolo.’​—Etsha 19:8, 9, 20.

6, 7. Ngande wakatombola Paulo olimu ande ndo ngande wakokaso sala woho akɔ wâmɛ?

⁶ Oko wakinde opandjudi wa Diolelo w’ohetoheto, Paulo ‘akatombola olimu ande.’ (Romo 11:13) Lo woho akɔna na? Nde komona dia ndjayangɛ lokumu kana mboka sɔnyi dia mbeyama lo sɛkɛ oko ɔmɔtshi wa l’atei w’anto wakamba kâmɛ la Nzambi. Koko, nde akɔsaka olimu ande oko dikambo dioleki nɛmɔ tshɛ. Paulo akakambe l’Ɔtɛkɛta wa Nzambi la diewo ndo lo yoho ya dimɛna. Olimu w’ɔlɔlɔ wakandakambe ɔsɔ waki la shɛngiya le anto akina ndo akâtshutshuya dia vɔ nyomoleka kamba olimu awɔ. Ndo lo yoho shɔ mbakatombwama olimu ande nto.

⁷ L’ɛnyɛlɔ ka Paulo, sho koka tombola olimu aso oko weso ekambi lo kambaka l’Ɔtɛkɛta wa Nzambi mbala la mbala ndo lo yoho ya dimɛna. Lo toho tshɛ t’olimu aso w’esambishelo, oyango aso pombaka monga wa mbewoya dikambo dimɔtshi di’oma l’Afundelo le anto efula. Ngande wakokaso sala dikambo sɔ la yewo ya mbetawoya na? Tɔsɛdingole toho tosato t’ohomba: (1) Kotola yambalo y’anto oya l’Ɔtɛkɛta wa Nzambi lo yoho yahomba anto mbɔsa ɔtɛkɛta akɔ la nɛmɔ. (2) Nembetshiya ndo mɛnya woho wa kamba la kɛnɛ kata Bible la yêwo tshɛ. (3) Kana l’onto yimba oma l’Afundelo lo yoho yetawoya.

8. Dihomɔ diakɔna di’olimu w’esambishelo ka Diolelo diele laso ɛlɔ kɛnɛ ndo ngande wakambayɛ ladiɔ?

⁸ Apandjudi wa nshi nyɛ wa Diolelo wekɔ la dihomɔ diele Paulo komonga ladiɔ lo nshi yakandakambaka olimu ande. Dihomɔ diakɔ ko abuku, periodikɛ, akatshi wa leeta, traktɛ, bandɛ y’aradiyo ndo ya vidɛo. L’ɛnɔnyi wa 1900, wakakambaka ndo la kartɛ yakawalɔtaka dia tɛnyaka anto awui wakafundama lɔkɔ, waa fɔnɔ, mituka waki la wɛndjɔ, ndo stasiɔ y’aradiyo. Koko, ehomɔ kaso koleki tshɛ dimɛna ele Bible ndo sho pombaka kamba l’ehomɔ k’ohomba kɛsɔ lo yoho ya dimɛna ndo yahombama.

Esambishelo kaso pombaka tomba oma l’Ɔtɛkɛta wa Nzambi

9, 10. Lo kɛnɛ kendana l’okambelo wa l’Ɔtɛkɛta wa Nzambi, wetshelo akɔna wakokaso kondja oma lo dako diakasha Paulo Timɔtɛ?

⁹ Ngande wakokaso kamba l’Ɔtɛkɛta wa Nzambi oko ehomɔ k’ohomba na? Ele lo kitanyiya ɛtɛkɛta ɛnɛ wakatɛ Paulo Timɔtɛ laki ɔngɛnyi ande wakakambaka la nde olimu ate: ‘Osale tshɛ dia ndjakimɔ le Nzambi oko onto lambolowana, oko ose olimu laha la dikambo dia mbotshama sɔnyi ndo lalembetshiya ɔtɛkɛta w’akambo wa mɛtɛ dimɛna.’ (2 Timote 2:15) Kakɔna kahombama dia ‘nembetshiya ɔtɛkɛta w’akambo wa mɛtɛ dimɛna’ na?

¹⁰ Tshɛkɛta ya lo Grɛkɛ yokadimɔmi ɔnɛ ‘nembetshiya dimɛna’ nangaka mbuta lo mɛtɛ mɛtɛ ɔnɛ “pembola dimɛna” kana “mbata lo yoho yosembwe tɔɔ.” Paka lo dako diakasha Paulo Timɔtɛ to mbakawakambe la tshɛkɛta shɔ l’Afundelo w’Akristo wa lo Grɛkɛ. Tshɛkɛta yakɔ yâmɛ koka kambema dia nembetshiya woho wâtawɔ emunda l’ekambɔ lo tayelaka oshidi wakashilami dimɛna. Okambi wa manamana mbeyaka mboka yɛnyi naka omunda wambɛngama. Diakɔ mbele, dia monga ‘ose olimu laha la dikambo dia mbotshama sɔnyi,’ wakohola Timɔtɛ di’aha nde mbetawɔ dia mɛnganya wetshelo w’akambo wa mɛtɛ wa l’Ɔtɛkɛta wa Nzambi. Nde takandahombe tshika tokanyi tande hita dia monga la shɛngiya lo wetshelo ande. Nde akahombe tondjaka esambishelo ndo wetshelo ande paka oma l’Afundelo. (2 Timote 4:2-4) Yoho shɔ mbakakoke anto wele l’etema w’ɛlɔlɔ mɛna akambo oko awaɛna Jehowa aha la ndjela filozofi ya l’andja ɔnɛ. (Kolosai 2:4, 8) Kɛsɔ mbahombama salema ndo ɛlɔ kɛnɛ.

Dionga diaso pombaka monga dimɛna

11, 12. Naa shɛngiya yele la dionga diaso lam’alembetshiyaso Ɔtɛkɛta wa Nzambi dimɛna?

¹¹ Dia sambisha akambo wa mɛtɛ, sho hatohombe tsho komɛ lo nembetshiya Ɔtɛkɛta wa Nzambi dimɛna. Dionga diaso pombaka mbɔtɔnɛ l’awui wa l’ɔtɛkɛta akɔ. Oko weso “ekambi kame la [Nzambi],” sho hatohombe monga ekambi wa dungi pende. (1 Koreto 3:9) Ɔtɛkɛta wa Nzambi mbutaka ɔnɛ: “Ndu we atetshaka akina, okoko wa na wahayayaetsha weme? We latetshaka untu wati: Tuvaki, ku weme mvuaka? We latutelaka akina wati: Tanyunanaki, ku weme munanaka? We latenaka dikishi wononyi, ku weme mingulaka diango di’ekila?” (Romo 2:21, 22) Lâsɔ, oko weso ekambi waki Nzambi wa nshi nyɛ, yoho mɔtshi ya nembetshiya Ɔtɛkɛta wa Nzambi dimɛna ele ndjela dako nɛ diata ɔnɛ: “Ekamaki [Jehowa] l’utema aye tshe, tekamaki yimba yaye hita. Uwetawoki lu akambu aye tshe, ku ndi ayukolongoswela mbuka yaye.”​—Tukedi 3:5, 6.

¹² Etombelo akɔna wakokaso nongamɛ naka sho nembetshiya Ɔtɛkɛta wa Nzambi dimɛna? Tende wolo wakoka monga l’Ɔtɛkɛta wa Nzambi wakafundama lo nsɛnɔ y’anto wele l’etema w’ɛlɔlɔ.

Ɔtɛkɛta wa Nzambi wekɔ la wolo wa tshikitanya onto

13. Etombelo akɔna wakoka okambelo wa l’Ɔtɛkɛta wa Nzambi monga lawɔ le onto?

¹³ Lam’etawɔ onto dia nɔmbwama la losango la l’Ɔtɛkɛta wa Nzambi, lɔ mongaka la shɛngiya ya wolo yakimanyiya anto dia sala etshikitanu wa weke efula lo nsɛnɔ yawɔ. Paulo akɛnyi wolo wele l’ɔtɛkɛta wa Nzambi ndo akalembetɛ shɛngiya y’ɔlɔlɔ yaki l’ɔtɛkɛta ɔsɔ le wanɛ wakakome Akristo la Tɛsalɔnika ka lo nshi y’edjedja. Diakɔ diakandawatɛ ate: “Dia dikambu ne, mbatutukaka [Nzambi] lusaka aha mpeko. Ne dia lam’akanyalungula diui dia [Nzambi] diakatanyutela, nyu kudietawo uku diui di’antu, keli nyakadietawo uku diui dia mete, diatukambaka l’etema anyu, nyu wane wetawo.” (1 Tesalonika 2:13) Le Akristo asɔ, mbidja ndo ambeki tshɛ wa mɛtɛ wa Kristo, tokanyi ta totshitshɛ taki onto hɛdimi kânga yema la lomba loleki tshɛ laki Nzambi. (Isaya 55:9) Ase Tɛsalɔnika ‘waketawɔ ɔtɛkɛta l’atei w’asui efula l’ɔngɛnɔngɛnɔ wa nyuma k’ekila’ ndo wakakome bɛnyɛlɔ le ambetawudi akina.​—1 Tesalonika 1:5-7.

14, 15. Naa nkudu kele la losango la l’Ɔtɛkɛta wa Nzambi ndo lande na?

¹⁴ Ɔtɛkɛta wa Nzambi wekɔ la wolo oko wele Jehowa Kiɔkɔ yawɔ. Vɔ ndja oma le ‘Nzambi kasɛna,’ ɔnɛ lele, oma l’ɔtɛkɛta ande “mbakatungama ulungu,” ndo ɔtɛkɛta ɔsɔ ‘atoshidiyaka nshi tshɛ kɛnɛ kakawatomama dia kotsha.’ (Heberu 3:12; Osambu 33:6; Isaya 55:11) Ombewi ɔmɔtshi w’akambo wa Bible akate ate: “Nzambi hayakakitola ndamɛ l’Ɔtɛkɛta ande. Nde hanguna ɔtɛkɛta akɔ wate kana oko ɔtɛkɛta ɔsɔ hendana la nde. . . . Diakɔ diele, ndoko onto lakoka shimba okotshamelo w’ɔtɛkɛta ɔsɔ oyadi kɛnɛ tshɛ kakokawɔ sala la wɔ; nɛ dia vɔ wekɔ dimama diokakatanyi la Nzambi kasɛna.”

¹⁵ Nkudu ka ngande kele la losango l’oma l’Ɔtɛkɛta wa Nzambi na? Vɔ wekɔ la wolo w’efula. Diakɔ diakafunde Paulo ate: ‘Nɛ dia ɔtɛkɛta wa Nzambi wekɔ la lomu ndo la nkudu; vɔ wekɔ la mpɛmɔ koleki yɔɔmbɔ ya mpɛmɔ wedi ehende ndo vɔ nyɔngɔmɛka polo ndo lo vɔ kakitola anima la yimba, asɔnga la ehihɔ awɔ, ndo vɔ kokaka nembetɛ tokanyi la nsaki ya l’otema.’​—Heberu 4:12.

16. Ngande wakoka Ɔtɛkɛta wa Nzambi tshikitanya onto lo yoho y’efula?

¹⁶ Losango la l’Ɔtɛkɛta wa Nzambi lekɔ ‘la mpɛmɔ koleki yɔɔmbɔ ya mpɛmɔ wedi ehende.’ Ɔnkɔnɛ, vɔ wekɔ la nkudu ka diambo kanyɔngɔmɛ lo demba di’onto efula lo yoho yoleki dihomɔ tshɛ diaki anto. Ɔtɛkɛta wa Nzambi komaka polo ndo lo tenyi dia l’etei k’otema w’onto ndo koka mbôtshikitanya l’etei ndo monga la shɛngiya lo woho wakanyiyande kana lo kɛnɛ kalangande ndo konyaka onto okambi wetawɔma ndo woka Nzambi wɔma. Ɔsɔ mɛtɛ ekɔ ehomɔ kele la nkudu k’efula!

17. Lembetshiya wolo wa tshikitanya onto wele l’Ɔtɛkɛta wa Nzambi.

¹⁷ Ɔtɛkɛta wa Nzambi kɛnɛmɔlaka dionga diele l’etei k’otema w’onto lo ndjela woho wakanyiyande ndamɛ dikambo diande kana kɛnɛ ketawɔnde di’anto akina mbuta lo dikambo diande. (1 Samuele 16:7) Kânga onto la kɔlɔ kokaka tena dimɔtshi ndjashɛ woho wende lo ndjaɛnya oko onto l’ɔlɔlɔ kana lokana kɛtshi. Anto wa kɔlɔ mongaka la dungi pende l’ɔtɛ w’eyango wa kɔlɔ. Anto wa lotamanya ndjaɛnyaka di’oko wekɔ la ndjâkitshakitsha etena kayangawɔ di’anto akina mbângɛnangɛna. Lawɔ mbele, etena kakɛnɛmɔla Ɔtɛkɛta wa Nzambi kɛnɛ kele mɛtɛ l’otema w’onto, vɔ koka monga la shɛngiya ya wolo le onto lele la ndjâkitshakitsha ko mbôkonya lo nde mbikasha lonto l’edjedja ko ‘ndɔta lonto l’oyoyo lakatongama lo ndjela lolango la Nzambi lo losembwe la mɛtɛ ndo kɔlamelo.’ (Efeso 4:22-24) Wetshelo w’oma l’Ɔtɛkɛta wa Nzambi koka nto tshikitanya anto wele l’etema wa yɔmɔma ko mbâkonya Ɛmɛnyi wa Jehowa wele la dihonga ndo apandjudi wa Diolelo w’ohetoheto.​—Jeremiya 1:6-9.

18, 19. Lo ndjela kɛnɛ kele l’edingɔ ɛnɛ kana kɛnɛ kakakokomɛ l’esambishelo, ɛnya woho wakoka akambo wa mɛtɛ wa l’Afundelo tshikitanya dionga di’onto.

¹⁸ Wolo wa tshikitanya onto wele l’Ɔtɛkɛta wa Nzambi wekɔ la shɛngiya le anto wa l’ahole tshɛ. Ɛnyɛlɔ, apandjudi wa Diolelo wa l’osomba wa Phnom Penh lo wodja wa Cambodge wakasambishaka lo prɔvɛnsɛ ka Kompong Cham mbala hiende lo ngɔndɔ. L’ɔkɔngɔ wa vɔ mboka woho wakatɛkɛtaka waa pastɛrɛ kina kɔlɔ lo dikambo di’Ɛmɛmyi wa Jehowa, pastɛrɛ kɛmɔtshi ka womoto ka lo ngelo kɛsɔ akɔshi yɛdikɔ ya pomana l’Ɛmɛnyi wa Jehowa mbala kekina kakawahombe ndja lo prɔvɛnsɛ kɛsɔ. Nde akawaoke wembola lo kɛnɛ kendana l’osalelo wa waa fɛtɛ ndo nde akahokamɛ la yambalo tshɛ etena kakawakanaka la nde yimba oma l’Afundelo. Oma lâsɔ, nde akambe lo mbuta ate: “Lambeya kakianɛ dia kɛnɛ kakataka waa pastɛrɛ y’asekami lo dikambo dianyu kekɔ kashi! Vɔ wakataka ɔnɛ nyu hanyokambe la Bible koko la pindju kɛnɛ, paka tɔ kokambi la nyu!”

¹⁹ Womoto ɔsɔ akatetemala la sawola awui w’oma lo Bible nde l’Ɛmɛnyi wa Jehowa ndo nde kombetawɔ dia tshika mbeka l’ɔtɛ w’ɔnɛ nde ekɔ pastɛrɛ. Nde akewoya osekande ɔmɔtshi la womoto kɛnɛ kakandekaka oma l’Afundelo, ko vɔ akɔ ahende wakatatɛ mbeka Bible l’Ɛmɛnyi wa Jehowa. Osekande ɔsɔ akangɛnangɛna kɛnɛ kakandekaka efula ndo etena kakandɔtɔ l’ɔtɛmwɛlɔ lushi lɔmɔtshi, nde akakome lo mbuta ate: “Nyotshu nyoteke Bible nyu l’Ɛmɛnyi wa Jehowa!” Kombeta edja oma lâsɔ, mama kɛsɔ kaki pastɛrɛ ndo anto akina vɔ la wɔ wakatatɛ mbeka Bible l’Ɛmɛnyi wa Jehowa.

20. Ngande wɛnya ɛnyɛlɔ ka womoto ɔmɔtshi la lo wodja wa Ghana nkudu kele l’Ɔtɛkɛta wa Nzambi?

²⁰ Nkudu k’Ɔtɛkɛta wa Nzambi mɛnamaka nto lo dikambo diaki womoto ɔmɔtshi la lo wodja wa Ghana lelɛwɔ Paulina. Opandjudi ɔmɔtshi wa lo tena tshɛ akatatɛ mbeka lande Bible l’ekimanyielo ka dibuku Ewo Katɔla Otsha lo Lɔsɛnɔ la Pondjo.a Paulina aki lo diwala di’ɔsɛngɛ ndo akɛnyi ohomba wa sala etshikitanu, koko omɛnde nde l’ewotɔ ande tshɛ kombetawɔ dikambo sɔ kânga yema tshitshɛ. Tshɛnde ka pami laki shushi lo tuminadi ta lâdiko ndo ekumanyi ka l’ɔtɛmwɛlɔ ɔmɔtshi akakambe la kɛnɛ kofundami lo Mateu 19:4-6 lo yoho ya kɔlɔ l’oyango wa mbɔkɔmɔla otema. Shushi shɔ akatɛkɛta l’eshikikelo k’efula, koko Paulina akɛnyi esadi eto dia dikambo sɔ fɔnaka la woho wakalembetshiya Satana Afundelo lo yoho ya kɔlɔ etena kakandahembe Yeso Kristo. (Mateu 4:5-7) Nde akohɔ elembetshiyelo wa hwe wakasha Yeso lo dikambo dia diwala ɔnɛ l’etatelo Nzambi akatonge anto pami ɔtɔi la womoto ɔtɔi koko aha pami ɔtɔi la wamato efula ndo ɔnɛ vɔ ahende, koko aha vɔ asato, wakahombe koma demba ɔtɔi. Nde kotshikitanya yɛdikɔ yande ndo akayokomɛka lo mimɔ oma lo diwala di’ɔsɛngɛ sɔ. Kombeta edja, nde akakome opandjudi wa Diolelo wambobatizama wele l’ɔngɛngɛnɔ.

Totetemale la nembetshiya Ɔtɛkɛta wa Nzambi dimɛna

21, 22. (a) Naa yɛdikɔ yahombaso mbɔsa oko weso apandjudi wa Diolelo? (b) Kakɔna kayotɔsɛdingola lo sawo diayela?

²¹ Ɔtɛkɛta wa Nzambi wakafundama ekɔ mɛtɛ ehomɔ ka wolo efula kahomba kamba laso dia kimanyiya anto akina dia vɔ tshikitanya nsɛnɔ yawɔ ndo ndjasukanya le Jehowa. (Jakoba 4:8) Oko wakamba ekambi wele la diewo la dihomɔ dia kondja etombelo w’ɔlɔlɔ, sho lawɔ tɔshi yɛdikɔ ya mbidja welo wa l’otema ɔtɔi dia kambaka la Bible, Ɔtɛkɛta wa Nzambi la diewo l’olimu wakandatosha oko weso apandjudi wa Diolelo.

²² Ngande wakokaso nembetshiya Afundelo lo yoho ya dimɛna efula l’olimu aso wa mbetɛ anto ambeki na? Yoho mɔtshi ele lo pamia akoka aso w’embetsha wele la yewo ya mbetawoya. Lam’alanganyu, nyodje yambalo yanyu lo sawo diayela nɛ dia diɔ mɛnyaka toho ta ndakanya ndo ta kimanyiya anto akina dia vɔ mbetawɔ losango la Diolelo.

[Nɔte ya l’ɛse ka dikatshi]

Onde wɛ akohɔ?

• Dihomɔ diakɔna diakamba l’apandjudi wa Diolelo?

• Lo toho takɔna takasha Paulo ɛnyɛlɔ oko wakinde okambi wa Diolelo?

• Kakɔna kalɔmbama dia nembetshiya Ɔtɛkɛta wa Nzambi dimɛna?

• Naa nkudu kele l’ehomɔ kaso, mbut’ate Ɔtɛkɛta wa Jehowa wakafundama?

[Esato wa lo lɛkɛ 10]

Dihomɔ dimɔtshi diakamba l’Akristo l’olimu w’esambishelo ka Diolelo