Ekɔ ohomba dia sho ndeka sungukala

‘Nyosungukalake, nɛ dia nyu hanyeye lushi layoya Nkumɛnyu.’​—MATEU 24:42.

1, 2. Kakɔna kɛnya dia tekɔ lo sɛna l’ekomelo ka dikongɛ nɛ di’akambo?

“OFUNDJI ɔmɔtshi welɛwɔ Bill Emmott akate ate: “Otshikitanyi la tena dikina tshɛ, ntambe k’akumi ahende akalole tɔɔ l’ata.” Kânga mbakandetawɔ dia tena tshɛ dia l’ɔkɔndɔ w’ana w’anto diakonge l’ata ndo l’awui wa ngala, nde akate nto ate: “Ntambe k’akumi ahende kekɔ oko ntambe kina, koko awui wa weke wakete lɔkɔ mbakitshikitanya la ntambe kina. Tɔ kaki ntambe ka ntondo kakalɔma mɛtɛ ta di’andja w’otondo . . . Ndo dia mɛnya woke woke wa dikambo sɔ, lo ntambe k’akumi ahende aha ta ɔtɔi to dia l’andja w’otondo mbakalɔma koko ata ahende w’etondo.”

² Yeso akatatshi dia ata wayonga lam’asa ‘wodja la wodja ndo diolelo la diolelo.’ Koko, ata asɔ wekɔ paka dikambo ɔtɔi to l’atei wa ‘djembetelo ya eongelo ka Kristo ndo k’ekomelo ka dikongɛ di’akambo nɛ.’ Lo prɔfɛsiya kɛsɔ ka woke, Yeso akatɛkɛta nto dia ndjala, elando, ndo adidimu wa nkɛtɛ. (Mateu 24:3, 7, 8; Luka 21:6, 7, 10, 11) Lo toho efula, asui wa woho ɔsɔ wamboleka fulanɛ ndo monga wolo. Kɔlɔ k’ɔna onto kaya efula, oko wɛnamatɔ lo dionga diele lande otsha le Nzambi ndo le asekande anto. Olanelo wa lɔkɛwɔ ndo ehamelo k’awui wa ngala ekɔ lo mɛnama hwe. Anto waya anangi wa falanga oleki wa Nzambi, ndo wamboleka ndjasha efula l’ɛngɛnɔngɛnɔ. Awui asɔ tshɛ mɛnyaka dia tekɔ lo sɛna lo “tena dia wulu.”​—2 Timote 3:1-5.

3. Shɛngiya yakɔna yahomba monga la “tulimbitelu la tena” le so?

³ Ngande wɔsayɛ woho wataleke nâna awui w’ana w’anto? Efula hawodje yimba, ndo wekɔ l’etema wolo la ntondo k’awui wa lonyangu wasalema nshi nyɛ. Anto wa lokumu wa l’andja ɔnɛ ndo ambewi wa mukanda hawoshihodia kitshimudi ya “tulimbitelu la tena;” kânga ewandji w’ɛtɛmwɛlɔ hawosha olembetshiyelo w’oshika lo dikambo sɔ. (Mateu 16:1-3) Koko Yeso akewola ambeki ande ate: ‘Nyosungukalake, nɛ dia nyu hanyeye lushi layoya Nkumɛnyu.’ (Mateu 24:42) Lanɛ Yeso hatokeketsha tsho dia sungukala koko dia ‘sungukalaka.’ Dia sungukalaka, sho pombaka mangemɛka ndo sɛnaka wolo. Kɛsɔ halɔmbɛ tsho dia mbetawɔ ɔnɛ tekɔ lo sɛna lo nshi y’ekomelo, kana mbeya tsho ɔnɛ tena diekɔ wolo. Sho pombaka monga l’eshikikelo ka wolo k’ɔnɛ: “Ekumelu k’akambu tshe kaya suki.” (1 Petero 4:7) Paka l’eshikikelo ka ngasɔ mbayotosungukalaka ndo mbayotosalaka awui la shamanya. Lâsɔ, wombola wahombaso kana lawɔ yimba vɔ ɔnɛ: ‘Kakɔna kayotokimanyiya dia keketsha eshikikelo kele laso k’ɔnɛ ekomelo kaya suke?’

4, 5. (a) Kakɔna kayokeketsha eshikikelo kele laso k’ɔnɛ ekomelo ka dikongɛ nɛ dia kɔlɔ kaya suke, ndo lande na? (b) Dikambo diakɔna dia lo nshi ya Nɔa diafɔna la eongelo k’Ɔna onto na?

⁴ Tɔsɛdingole awui wakasalemaka la ntondo ka dui dimɔtshi diotshikitanyi l’awui akina tshɛ wa l’ɔkɔndɔ w’ana w’anto, mbut’ate la ntondo k’Elola ka woke ka lo nshi ya Nɔa. Anto waki kɔlɔ efula ko Jehowa “akanyangi efula.” Nde akate ate: “Dimi layushila antu wakamatungi la kete.” (Etatelu 6:6, 7) Ndo nde akasale dui sɔ. Etena kakandatɛkɛtaka di’awui wakasalemaka lo nshi ya Nɔa wafɔna la wa nshi nyɛ, Yeso akate ate: “Uku aki lu nshi ya Noa, mbayuyala eyelu ka On’a untu.”​—Mateu 24:37.

⁵ Ekɔ ɔlɔlɔ fɔnya ɔnɛ Jehowa ndjaokaka lo kɛnɛ kendana l’andja ɔnɛ oko wakandayaokaka lo dikambo di’andja waki la ntondo ka Mvula k’Elola. Oko akandakumiya andja wa kɔlɔ wa lo nshi ya Nɔa, nde mɛtɛ ayolanya andja wa kɔlɔ wa nshi nyɛ. Eokelo ka shikaa k’awui wakasalemaka nshi shɔ wafɔna la wa nshi yaso nyɛ pombaka keketsha eshikikelo kele laso k’ɔnɛ ekomelo k’andja ɔnɛ kaya suke. Lâsɔ, awui akɔna wafɔna na? Ekɔ oko awui atanu. Dui dia ntondo ele ɔhɛmwɛlɔ wendana l’oyelo w’elanyelo wakashama l’ɛtɛkɛta wokɛma hwe.

Wakawewola “akambu wahatayi”

6. Ɔhɛmwɛlɔ akɔna wele ondo Jehowa akasha ntondo lo nshi ya Nɔa?

⁶ Lo nshi ya Nɔa, Jehowa akate ate: “Nyuma kami hutshikala le untu pundju, ne dia untu eko paka emunyi etu. Nshi ya lumu l’untu yayuyalaka deku lukama la akumi ahendi.” (Etatelu 6:3) Otombelo w’ɔlɛmbɛ ɔsɔ wakadje Nzambi l’ɔnɔnyi 2490 N.T.D. mbaki etatelo k’ekomelo k’andja wa kɔlɔ ɔsɔ. Ohokanyiya kɛnɛ kakalembetshiyaka dikambo sɔ le wanɛ wakasɛnaka l’etena kɛsɔ! Ɛnɔnyi 120 eto oma lâsɔ mbakahombe Jehowa toma “elula k’ashi la kete, dia nanya engo tshe keli la lumu l’esi ulungu.”​—Etatelu 6:17.

7. (a) Ngande wakasale Nɔa l’ɔkɔngɔ wa nde mboka ɔhɛmwɛlɔ lo kɛnɛ kendana la Mvula k’Elola? (b) Ngande wahombaso sala etena kokaso ɛhɛmwɛlɔ wendana l’ekomelo ka dikongɛ nɛ di’akambo?

⁷ Nɔa akalongola ɔhɛmwɛlɔ wendana l’oyelo w’elanyelo ɛnɔnyi efula la ntondo. Ɔnkɔnɛ, nde akakambe l’etena kakatshikala dimɛna dia ndjalɔngɔsɔla woho wa nde ndjokondja eko. Ɔpɔstɔlɔ Paulo akate ate: “Noa [akɛnyama] akambu wahatayi uma le [Nzambi]; dia woma a [Nzambi], mbakandalongosola watu a luudu dia nshimbela khumbu kandi.” (Heberu 11:7) Kakɔna kayotota lo dikambo diaso na? Ɛnɔnyi oko 90 wambeta oma lam’akatatɛ nshi y’ekomelo ya dikongɛ nɛ di’akambo l’ɔnɔnyi 1914. Tekɔ mɛtɛ l’“etena k’ekumelu.” (Danyele 12:4) Ngande wahombaso sala la ntondo k’ɛhɛmwɛlɔ wakawatotɛ na? Bible mbutaka ate: “One latutshaka lulangu la [Nzambi], atuyalaka pundju.” (1 Joani 2:17) Diakɔ diele, etena kahombaso sala lolango la Jehowa la shamanya tɔ kɛnɛ.

8, 9. Ɛhɛmwɛlɔ akɔna washama lo nshi yaso nyɛ, ndo ngande wewoyama awui asɔ?

⁸ Lo nshi yaso nyɛ, ambeki w’eshika wa Bible wambeka oma l’Afundelo wakasambiyama oma le Nzambi dia dikongɛ nɛ di’akambo diambɛlɛ otsha l’elanyelo. Onde sho mbetawɔka dikambo sɔ? Lembetɛ kɛnɛ kakate Yeso Kristo ate: “Fono ka wulu kayuya, wuhu wahatayala uma k’etatelu k’andja edja ndu kakiane, ndu wuhu wahayalaki pundju.” (Mateu 24:21) Yeso akate nto dia nde ayoya oko Shushi yakasɔnama oma le Nzambi ndo ayoyokakitola anto oko atokakitolaka olami ɛkɔkɔ la mbudi. Wanɛ wahatotanema l’akoka wahombama ‘wayonyama lo pondjo, kele anto w’ɔlɔlɔ lo lɔsɛnɔ la pondjo.’​—Mateu 25:31-33, 46.

⁹ Jehowa ekɔ lo tetemala la kotola yambalo y’ekambi ande lo ɛhɛmwɛlɔ ɛsɔ oma lo waohwelo waya lo tena diahombama l’ekimanyiyelo ka mbo ya ndɛ ya lo nyuma yasha ‘ɔhɔmbɔ wa kɔlamelo ndo wa kɛsɔ.’ (Mateu 24:45-47) Ndo nto, wekɔ lo nɔmba anto wa lo wedja tshɛ, waoho tshɛ, ndo w’ɛtɛkɛta tshɛ ɔnɛ: “Nyuki [Nzambi] woma, nyûtumbuli, ne dia unya andi w’elumbwelu ambukuka.” (Enyelo 14:6, 7) Etenyi ka woke ka losango la Diolelo lasambishama lo nkɛtɛ k’otondo oma le Ɛmɛnyi wa Jehowa mbewolaka anto ɔnɛ kem’edja Diolelo diaki Nzambi dianga nanya mandji y’ana w’anto. (Danyele 2:44) Ɔhɛmwɛlɔ ɔsɔ hahombe mbɔsama oko anyanya. Nzambi Kanga-Nkudu-Tshɛ tokotshaka ɔtɛkɛta ande. (Isaya 55:10, 11) Nde akakotsha ɔtɛkɛta ande lo nshi ya Nɔa ndo ayowokotsha lo nshi yaso nyɛ.​—2 Petero 3:3-7.

Awui wa dieyanelo dia kɔlɔ wambokokanɛ

10. Kakɔna kakoka mbutama lo dikambo di’awui wa dieyanelo dia kɔlɔ lo nshi ya Nɔa?

¹⁰ Tena diaso fɔnaka la nshi ya Nɔa lo yoho kina ya hende. Jehowa akadjangɛ pami la womoto la ntondo dia ‘ndodia nkɛtɛ’ la ana awɔ, lo kamba la losha lakandawasha la dieyanelo lo yoho ya dimɛna l’atei wa diwala. (Etatelu 1:28) Lo nshi ya Nɔa, andjelo wakatɔmbɔkɔ wakɛnya anto lokolo dia salaka awui wa dieyanelo dia kɔlɔ. Vɔ wakaholɔ la nkɛtɛ, wakalɔtɛ alemba wa l’emunyi, ndo wakayeyanaka la wamato w’amɛna, ko wakayotaka la wɔ ana waki etenyi anto, etenyi ɛdiɛngɛ ndo ana asɔ wakelamɛka ɔnɛ waa Nefilimɛ. (Etatelu 6:2, 4) Pɛkato k’andjelo asɔ wa kɔlɔ mbɛdikamaka l’awui wa sɔnyi wakasalemaka la Sɔdɔma la Ngɔmɔra. (Jude 6, 7) Oma lɔkɔ mbele, awui wa dieyanelo dia kɔlɔ wakakokanɛ lo nshi shɔ tshɛ.

11. Awui akɔna wendana la lɔkɛwɔ wele l’anto wa lo nshi yaso nyɛ wafɔna la wa lo nshi ya Nɔa na?

¹¹ Akoka mbutama lo kɛnɛ kendana la lɔkɛwɔ ɛlɔ kɛnɛ na? Lo nshi y’ekomelo nyɛ, nsɛnɔ y’anto efula yendanaka paka l’awui wa dieyanelo. Paulo mbutaka dikambo di’anto wa ngasɔ ɔnɛ: “Wambuyala akanga a lunyu”; ndo efula wamboyakimɔ vɔamɛ “lu akambu wa sonyi, dia ntsha akambu tshe wa mindu la saki ka wulu.” (Efeso 4:19) Wendelo w’awui a mindo, dieyanelo dia lam’asa anto wahatatshukana, olanyelo w’ana w’akɛnda ndo dieyanelo dia lam’asa pami la pami ekɔ awui wasalema lushi tshɛ. Amɔtshi ‘wambolongolaka difuto diawɔ’ oko hemɔ yasambemɛ oma lo dieyanelo, ohandjwelo wa nkumbo, ndo efukutanu ekina wa lo tshunda di’anto.​—Romo 1:26, 27.

12. Lande na kahombaso petsha kɛnɛ kele kɔlɔ?

¹² Lo nshi ya Nɔa, Jehowa akatome Mvula k’Elola ndo akakomiya andja ɔsɔ waki l’ofukutanu l’awui wa dieyanelo. Sho hatokoke mbohɛ pondjo dia nshi yasɛnaso nyɛ yekɔ mɛtɛ oko waki nshi ya Nɔa. “Fono ka wulu” kayɛdia nkɛtɛ lo minya ‘akanga wa loseka, amonanyi, anto watsha ditshelo dia dieyanelo diahetawɔma, ndo apami weyana l’apami.’ (Mateu 24:21; 1 Koreto 6:9, 10; Enyelo 21:8) Ekɔ mɛtɛ ohomba efula sho petsha kɛnɛ kele kɔlɔ ndo mbewɔ oseka kiambokambo tshɛ yakoka ndjotokonya l’awui wa mindo!​—Osambu 97:10; 1 Koreto 6:18.

Nkɛtɛ “yakaluli too la akambu wa ngala”

13. Lo nshi ya Nɔa, lande na kakalole nkɛtɛ “too la akambu wa ngala”?

¹³ Bible mbutaka nto dikambo dikina diendana la nshi ya Nɔa ɔnɛ: “Kete yakayala kolo lu ashu a [Nzambi], yakaluli too la akambu wa ngala.” (Etatelu 6:11) Awui wa ngala komonga mɛtɛ eyoyo. Kɛna k’ɔn’aki Adama akadiake ɔnango laki kanga ɔlɔlɔ. (Etatelu 4:⁠8) Dia mɛnya yimba ya ngala yaki lo nshi yande, Lamɛka akalɔngɔsɔla lembo lɔmɔtshi dia funa woho wakandadiake ɔlɔngɔlɔngɔ a pami ɔmɔtshi l’oyango wa ndjakokɛ. (Etatelu 4:23, 24) Kɛnɛ kaki oyoyo lo nshi ya Nɔa ele awui wa ngala wakaleke salema lo yoho y’efula. Oko wakayotshukaka andjelo wakatɔmbɔkɔ waki ntondo ana wa Nzambi wamato lanɛ la nkɛtɛ ko vɔ mbota la wɔ wa Nefilimɛ, awui wa ngala wakaleke pama lo yɛdikɔ yaki komongaka ntondo. Akongote asɔ wa ngala waki “Akɔshanyi” mbut’ate “wanɛ wakɔsha anto akina.” (Etatelu 6:4) Etombelo wakonge ele nkɛtɛ yakalole “too la akambu wa ngala.” (Etatelu 6:13) Ohokanyiya okakatanu wakahombe monga la Nɔa dia nɔmbɔla nkumbo kande l’atei w’anto wa ngasɔ! Koko, Nɔa akayaɛnya ‘kanga ɔlɔlɔ la ntondo ka Jehowa l’atei wa lɔlɔnga lɔsɔ.’​—Etatelu 7:1.

14. Polo lo yɛdikɔ yakɔna yele ɛlɔ kɛnɛ, andja wambolola “too la akambu wa ngala”?

¹⁴ Awui wa ngala salemaka l’ɔkɔndɔ w’otondo w’ana w’anto. Koko, oko wakidiɔ lo nshi ya Nɔa, tena diaso nɛ diambolola l’awui wa ngala lo yɛdikɔ yahatasalemaka. Mbala la mbala tekɔ lo mboka awui wa ngala l’atei wa nkumbo, totshelo ta terɔrismɛ, odiakanelo wa l’asa waoho, oyakelo w’anto efula oma le dengalenga waheyama tshondo ya dikambo. Lâdiko di’awui asɔ tshɛ tekɔ lo mboka nto otshulwelo wa dikila w’efula wonga oma l’ata. Nkɛtɛ yambolola to tɔɔ l’awui wa ngala. Lande na? Kakɔna kamboleka pamia awui asɔ? Okadimwelo wa dimbola sɔ mɛnyaka dui dikina diafɔna nshi nyɛ la ya Nɔa.

15. (a) Kakɔna kamboleka pamia awui wa ngala lo nshi y’ekomelo? (b) Sho kokaka monga l’eshikikelo l’okotshamelo wa dikambo diakɔna?

¹⁵ Lam’akashikikɛma Diolelo diaki Mɛsiya waki Nzambi lo 1914, Nkumekanga kakahema l’okudi Yeso Kristo, akɔshi yɛdikɔ ya wolo efula. Satana Diabolo l’ɛdiɛngɛ ande wakatshanyema oma l’olongo ko mbikashema suke l’emamu wa nkɛtɛ. (Enyelo 12:9-12) La ntondo ka Mvula k’Elola, andjelo wakatɔmbɔkɔ wakatshike ahole awɔ wa l’olongo la lolango lawɔ; koko, lo nshi yaso nyɛ vɔ wakakashema la wolo. Lâdiko dia lâsɔ, kakianɛ vɔ waya bu la dikoka dia mbɔsa alemba w’anto wa la nkɛtɛ l’oyango wa ngɛnyangɛnya nsaki ya mindo ya demba. Ɔnkɔnɛ, oko wewɔ la yɛnyi ndo la kɛlɛ, ndo la wɔma w’elombwelo kawakongɛ, vɔ wekɔ lo tshutshuya anto ndo ɛlɔngɔswamelo dia pamia awui wa ngala l’atei w’anto lo yoho yoleki kânga lo nshi ya Nɔa. Jehowa akalanya andja waki la ntondo ka Mvula k’Elola tshɛ l’ɔkɔngɔ w’andjelo wakatɔmbɔkɔ l’ana awɔ ndodia andja ɔsɔ tɔɔ l’awui wa kɔlɔ. Wɛ kokaka monga l’eshikikelo dia nde ayosala woho akɔ wâmɛ lo nshi yaso nyɛ! (Osambu 37:10) Ɔnkɔnɛ, wanɛ wasungukala nshi nyɛ mbeyaka di’etshungwelo kawɔ kaya suke.

Losango lakasambishama

16, 17. Naa dui dia nɛi diafɔna nshi ya Nɔa la nshi yaso nyɛ?

¹⁶ Dui dia nɛi diafɔna nshi yaso nyɛ la andja waki la ntondo ka Mvula k’Elola ele olimu wakalongola Nɔa dia sala. Nɔa akasɛlɛ wato wa luudu wa woke efula. Nde aki nto ‘osambisha.’ (2 Petero 2:⁠5) Losango lakɔna lakandasambishaka? Lo mɛtɛ, Nɔa akasambishaka anto dia vɔ kadimola etema ndo akawaewolaka dikambo di’oyelo w’elanyelo. Yeso akate di’anto wa lo nshi ya Nɔa “kumbeya edja ndu lam’akayi elula, akawakhumela tshe.”​—Mateu 24:38, 39.

¹⁷ Woho akɔ wamɛ mbele Ɛmɛnyi wa Jehowa wekɔ lo sala tshɛ dia kotsha ɔkɛndɛ awɔ wa sambisha. Losango la Diolelo dia Nzambi lekɔ lo sambishama l’andja w’otondo. Suke l’ahole tshɛ wa l’andja, anto kokaka mboka ndo mbadia losango la Diolelo l’ɔtɛkɛta awɔ hita. Periodikɛ Tshoto y’Etangelo, mbewoyaka Diolelo dia Jehowa tombaka lo yɛdikɔ yolekanyi 25 000 000 l’ɛtɛkɛta ndekana 140. Mɛtɛ, lokumu l’ɔlɔlɔ la Diolelo dia Nzambi lekɔ lo sambishama “lu kete tshe, uku omenyi le wedja tshe.” Lam’ayokambema olimu ɔsɔ polo lo yɛdikɔ yangɛnyangɛnya Nzambi, ekomelo ayoya ndoko onyake.​—Mateu 24:14.

18. Ngande wele kɛnɛ kasala anto efula etena kâsambishaso fɔnaka l’anto efula wa lo nshi ya Nɔa?

¹⁸ Lo menda woho wakanya anto yimba tshɛ oma l’awui wa lo nyuma ndo wakiwɔ komonga la lɔkɛwɔ l’ɔlɔlɔ lo nshi yaki la ntondo ka Mvula k’Elola, sho kokaka mboka lande na kele Nɔa la nkumbo kande wakasɔkama efula oma le asukanyi awɔ waki komonga ambetawudi, wakahɛnyahɛnyama ndo wakɔlama. Kânga mbakiwɔ la dionga sɔ, ekomelo kakaye. Woho akɔ wâmɛ mbele “asoki la soko yawo” wambofulanɛ lo nshi y’ekomelo nyɛ. Koko, Bible mbutaka ate: “Keli lushi la [Jehowa] layuya uku uvi.” (2 Petero 3:3, 4, 10) Lɔ layoya l’etena kakashikikɛma. Lɔ halokoma l’ɔkɔngɔ. (Habakuka 2:3) Ekɔ mɛtɛ ohomba efula sho tetemala la sungukala!

Anto yema tshitshɛ tsho mbakake

19, 20. Wɛdikelo akɔna wakokaso sala lam’asa Mvula k’Elola la elanyelo ka dikongɛ nɛ di’akambo na?

¹⁹ Ɔfɔnɛlɔ wele lam’asa nshi ya Nɔa la nshi yaso nyɛ hakomɛ tsho lo kɔlɔ kaki l’anto ndo l’elanyelo kawɔ. Oko wakake anto amɔtshi lo Mvula k’Elola, anto amɔtshi wayoka l’ekomelo ka dikongɛ nɛ di’akambo. Wanɛ wakake lo Mvula k’Elola waki akanga wa ndjakitshakitsha waki kɔsɛnaka oko anto akina. Vɔ wakayele kɛnɛ kakawaewola Nzambi dia ndjanganya l’andja wa kɔlɔ wa l’etena kɛsɔ. Bible mbutaka ɔnɛ: “Noa aki ololo lu ashu wa [Jehowa]. Noa aki ololo la uluwanyi l’atei w’antu wa lolonga landi.” (Etatelu 6:8, 9) L’atei w’anto tshɛ, nkumbo ɔtɔi keto, mbut’ate “antu tshitshe mbakashimbamela loko l’ashi: antu enanei atu.” (1 Petero 3:20) Ndo Jehowa Nzambi akawadjangela ate: “Nyutani, nyufulaneli, nyuludia kete.”​—Etatelu 9:1.

²⁰ Ɔtɛkɛta wa Nzambi toshikikɛka ɔnɛ: “Ului a woke w’antu wa[y]uya oma lo pa ka wuki.” (Enyelo 7:9, 14) Anto angana wayonga l’atei w’olui a woke? Yeso ndamɛ akate ate: “Suku dieli tshitshe, la mbuka keli tshitshe utsha lu lumu, antu atoi mbatukienaka.” (Mateu 7:13, 14) Naka mbɛdika la miliyara y’anto wasɛna la nkɛtɛ ɛlɔ kɛnɛ, kete wanɛ wayoka lo fɔnu ka woke kayaye wayoyala yema tshitshɛ. Koko ondo vɔ mbeyaka monga la diɛsɛ diakɔ diamɛ diakalongola wanɛ wakake lo Mvula k’Elola. Ondo wanɛ wayoka mbeyaka monga lo tshanda mɔtshi l’akoka wa mbota ana wayoyonga l’atei w’anto wa lo nkɛtɛ k’oyoyo kɛsɔ.​—Isaya 65:23.

‘Nyosungukalake’

21, 22. (a) Wahɔ akɔna wamboyokondja oma l’ɔsɛdingwelo w’ɔkɔndɔ wa Mvula k’Elola? (b) Naa divɛsa dia l’ɔnɔnyi 2004, ndo lande na kahombaso ndjela dako diatoshadiɔ?

²¹ Kânga mbele anto hawoyoleka tɛkɛta dikambo dia Mvula k’Elola lo nshi yaso nyɛ nɛ dia tɔ kambeta ɛnɔnyi efula, tɔ mbishaka wetshelo wahatakoke mbohɛ. (Romo 15:4) Woho wafɔna kɛnɛ kaketaka lo nshi ya Nɔa la kɛnɛ keta lo nshi yaso nyɛ pombaka ndeka

tɔsɛnya lo dikambo dia kitshimudi y’awui weta ndo totshutshuya dia mangemɛ oyelo wayoya Yeso oko wovi dia ndjolanya anto wa kɔlɔ.

²² Nshi nyɛ, Yeso Kristo ekɔ lo nɔmbɔla olimu a woke efula wa lo nyuma. Dia ekokelo ndo di’eko k’atɛmɔdi wa mɛtɛ, paradiso ka lo nyuma kele oko wato kekɔ lo tanema kakianɛ. (2 Koreto 12:3, 4) Dia sho shimbamɛ lo fɔnu ka woke kɛsɔ sho pombaka tetemala la tshikala lo paradiso kakɔ. Andja waki Satana wodingi paradiso ka lo nyuma kɛsɔ wekɔ suke dia nanya onto tshɛ lalala djɔ lo nyuma. Diakɔ diele, sho pombaka ‘sungukalaka’ ndo ndjalɔngɔsɔlaka dia lushi la Jehowa.​—Mateu 24:42, 44.

Onde wɛ akohɔ?

• Ɔhɛmwɛlɔ akɔna wakasha Yeso lo dikambo di’oyelo ande?

• Yeso akɛdika eongelo kande la dikambo diakɔna?

• Lo toho takɔna tafɔna tena diaso nɛ la nshi ya Nɔa?

• Ngande wele okanelo wa yimba wa l’awui wafɔna lam’asa nshi ya Nɔa la nshi yaso nyɛ totshutshuyaka dia sala awui la shamanya?

[Efundelo wa l’etei w’odingɔ wa lo lɛkɛ 14]

Divɛsa dia l’ɔnɔnyi 2004 diayonga ɔnɛ: ‘Nyosungukalake ndo Nyoyalɔngɔsɔlake.’​—Mateu 24:42, 44.