Tayɔkɛndakɛnda lo lokombo la Jehowa Nzambi kaso
‘Sho, lo wedi aso, tayɔkɛndakɛnda lo lokombo la Jehowa Nzambi kaso pondjo pondjo.’—MIKA 4:5.
1. Ngande waki lɔkɛwɔ l’anto lo nshi ya Nɔa, ndo ngande wakatshikitana Nɔa la wɔ?
ONTO la ntondo lakakɛndakɛnda la Nzambi lɔtɛkɛtshiwɔ lo Bible aki Ɛnɔka. Onto la hende aki Nɔa. Ɔkɔndɔ totɛka ɔnɛ: “Noa aki ololo la uluwanyi l’atei w’antu wa lolonga landi. Ndi akakendakendaka la [“Nzambi ka mɛtɛ,” NW].” (Etatelu 6:9) Lo nshi ya Nɔa, anto lo tshɛ kawɔ wakayanganya oma lo ɔtɛmwɛlɔ wa pudipudi. Andjelo waki komonga la kɔlamelo mbakaleke mbetɛ awui kɔlɔ ndo wakayotshukaka wamato ndo wakote ana wakawelɛka ɔnɛ waa Nefilimɛ “akunguti w’antu,” kana “antu a waki,” wa lo nshi shɔ. Aha la tâmu, nkɛtɛ kakalole mɛtɛ la awui wa ngala! (Etatelu 6:2, 4, 11) Koko, Nɔa aki olowanyi ndo aki “umvutshi w’akambu w’ololo.” (2 Petero 2:5) Etena kakawodjangɛ Nzambi dia nde sɛla wato dia kokɛ lɔsɛnɔ lande, la okitanyiya tshɛ Nɔa ‘akasale kɛnɛ tshɛ kakawodjangɛ Nzambi. Nde akasale ɔsɔku.’ (Etatelu 6:22) Lo mɛtɛ, Nɔa akakɛndakɛnda la Nzambi.
2, 3. Ɛnyɛlɔ kakɔna ka dimɛna kakatotshikɛ Nɔa ɛlɔ kɛnɛ?
2 Paulo akadje Nɔa lo ɔlɔndji w’ɛmɛnyi wa kɔlamelo etena kakandafunde ate: “Dia mbetawo, mbakenyama Noa akambu wahatayi uma le [Nzambi]; dia woma a [Nzambi], mbakandalongosola watu a luudu dia nshimbela khumbu kandi. Dia dikambu ne, mbakandamia wa la kete, mbakandayala ukito w’akambu w’ololo wa lu mbetawo.” (Heberu 11:7) Ɔsɔ ekɔ mɛtɛ ɛnyɛlɔ ka dimɛna efula! Nɔa aki l’eshikikelo ɔnɛ ɛtɛkɛta wa Jehowa wayokotshama, diakɔ diakandakambe la wenya, wolo ndo la lomombo lande dia nde kotsha wadjango wa Nzambi. Woho akɔ wâmɛ ɛlɔ kɛnɛ, anto efula mbokaka eyango wa lomombo la lo andja ɔnɛ ɔkɔngɔ ndo vɔ kambaka la wenya, wolo, ndo la lomombo lawɔ dia kitanyiya wadjango wa Jehowa. Mbetawɔ kawɔ mandɔmaka ndo tɔ kayowakondjiyɛ vɔ la anto akina panda.—Luka 16:9; 1 Timote 4:16.
3 Monga la mbetawɔ akahombe monga dikambo dia wolo efula le Nɔa la nkumbo kande oko wakidiɔ le Ɛnɔka, tshɛ aki Nɔa lakatasawola dikambo diande lo sawo diakete. Oyadi lo nshi ya Ɛnɔka kana ya Nɔa, atɛmɔdi wa mɛtɛ waki yema tshitshɛ tsho, ndo paka anto enanɛi ato mbaki la kɔlamelo ndo mbakake lo Mvula k’elola. Nɔa akasambishaka akambo wosembwe lo andja wa ngala ndo wa akambo wa kɔlɔ. Ndo nto, nde la nkumbo kande wakasɛlɛ wato a luudu dia ndjalɔngɔsɔla dikambo dia mvula k’elola kakahombe ndɔ lo andja w’otondo, kânga mbaki ndoko onto lambɛnaka woho wa dikambo dia ngasɔ ntondo. Dui sɔ diakahombe mɛtɛ monga dui diahatasalemaka le wanɛ wakawaendaka.
4. Munga kakɔna kakasale anto wakasɛnaka lo nshi ya Nɔa kakatɔtɔmiya Yeso?
4 Etena kakatɛkɛtaka Yeso dikambo dia nshi ya Nɔa, nde kɔtɛkɛta dikambo dia awui wa ngala, dia ɔtɛmwɛlɔ wa kashi kana dia awui wa mindo, kânga mbakasalemaka awui asɔ wa kɔlɔ ndo wa sɔnyi. Koko munga kakatɔtɔmiya Yeso ele woho wakatone anto dia kitanyiya ɛhɛmwɛlɔ wakawawasha. Nde akate dia anto “wakalekaka, wakanokaka, wakatshukanaka, wakatshukamaka, edja ndu lushi lakoto Noa lu watu a luudu.” Naa kɔlɔ kaki la ndɛ, nnɔ, tshuka ndo tshukama? Vɔ wakafɔnyaka dia waki lo sɛna yoho ya lɔsɛnɔ ya dimɛna! Koko elola kakahombe ndja ndo Nɔa akasambishaka akambo wosembwe. Ɛtɛkɛta ande ndo lɔkɛwɔ lande akahombe monga ɔhɛmwɛlɔ le wɔ. Koko, vɔ “kumbeya, edja ndu lam’akayi elula, akawakhumela tshe.”—Mateu 24:38, 39.
5. Nɔa la nkumbo kande waki la ohomba wa waonga akɔna?
5 Naka sho kanyiya yema kɛnɛ kaketaka lo nshi shɔ, kete tayɛna mɛtɛ dia Nɔa akasɛnɛ la lomba. Koko, lo nshi ya la ntondo ka Mvula k’elola, akalɔmbaka dia onto monga la dihonga dia nde monga la lɔkɛwɔ lotshikitanyi la l’anto akina. Nɔa la nkumbo kande wakahombe monga la mbetawɔ ka nge dia sɛla wato wa luudu wa woke efula ndo ndodja wato akɔ la nyama ya weho tshɛ. Onde anto amɔtshi l’atei w’anto angana wa kɔlamelo asɔ wakakombola tena dimɔtshi dia ndjasha yema lo akambo asɔ ndo nsɛna lɔsɛnɔ lelɛ anto ɔnɛ lɔsɛnɔ la dimɛna? Oyadi tokanyi ta ngasɔ takakoke mbayɛ lo yimba lo tshanda mɔtshi, vɔ koshisha olowanyi awɔ kânga yema. L’ɔkɔngɔ wa ɛnɔnyi efula, mbuta ate lo edja koleki ɛnɔnyi wahombaso mbikikɛ lo dikongɛ nɛ di’akambo, mbetawɔ kaki Nɔa kakokonya dia nde shimbamɛ oma lo Mvula k’elola. Koko, Jehowa akalanya wanɛ tshɛ wakasɛnaka lɔsɛnɔ lakelɛka anto ɔnɛ lɔsɛnɔ la dimɛna ndo waki kombidja yimba lo kitshimudi ya nshi yakawasɛnaka.
Anto wakadiɛnɛ nto la awui wa ngala
6. Akambo akɔna wakatetemala monga l’ɔkɔngɔ wa Mvula k’elola?
6 L’ɔkɔngɔ w’ashi wa Mvula k’elola moma, anto wakatatɛ lɔsɛnɔ l’oyoyo. Koko, anto waki paka lo eongelo k’anto wele kema kokele ndo “tukanyi t’utema w’untu” takatetemala monga “kolo umaka nshi yandi ya dikenda.” (Etatelu 8:21) Ndo nto, kânga mbaki ɛdiɛngɛ kokoka ndɔta alemba w’anto nto, vɔ wakatetemala kamba olimu awɔ la ohetoheto tshɛ. Andja w’anto wa kɔlɔ wakɛnya esadi eto dia vɔ waki “lu wulu wa kanga kolo,” ndo nshi nyɛ nto, atɛmɔdi wa mɛtɛ pombaka ndɔshana la “kesu tshe yaki uhimbanyi.”—1 Joani 5:19; Efeso 6:11, 12.
7. Ngande wakahame awui wa ngala lo andja wa l’ɔkɔngɔ wa Mvula k’elola?
7 Tatɛ oma lo nshi ya Nimɛrɔdɛ, mbuta ate andja wa l’ɔkɔngɔ wa Mvula k’elola, nkɛtɛ kakalole nto l’awui wa ngala. Lo menda woho wambofulanɛ anto ndo wambowohama lo awui wa tshulatshula, awui wa ngala wamboleka fulanɛ nshi nyɛ. Lo ɛnɔnyi wa etatelo, anto wakakambaka la yɔɔmbɔ, dikɔnga, ota, pito, ndo pusupusu. Oma lâsɔ, anto wakatatɛ kamba la ekoma wa dja, ekoma watondja ashashi esadi esadi ndo lo etatelo ka ntambe ka 20 anto wakatatɛ kamba la dihomɔ dikina dia wolo dia ta. Lo Ta dia ntondo di’andja w’otondo, anto wakatatɛ kamba la weho wa dihomɔ dia ta di’eyoyo dia wɔma heyama oko aviyɔ w’ata, mituka w’ata, masuwa w’ata wakɛndakɛnda l’etei k’ashi kana weho w’ekoma walanya hiɛlɛlɛ. Lo ta sɔ, ekoma ɛsɔ wakadiake miliyɔ y’anto. Onde anto wakalongamɛka dui sɔ? Kema.
8. Ngande wambokotshama Enyelo 6:1-4?
8 Lo ɔnɔnyi 1914, Yeso akahenyama l’okudi oko Nkumekanga ka lo Diolelo diaki Nzambi dia l’olongo ndo “lushi la Khumadiondjo” lakatatɛ etena kɛsɔ. (Enyelo 1:10) Lo ɛnɛlɔ kɛmɔtshi kɔtɛkɛtshiwɔ lo dibuku dia Enyelo, Yeso mɛnyama oko Nkumekanga kahemi lâdiko dia falasa ka wɛma dia tɔlɛmbia. Ambahemi akina wa falasa wekɔ lo ndjoyele, ndo ombahemi tshɛ ekɔ didjidji dia sui dimɔtshi diasoya anto. Ɔmɔtshi l’atei awɔ mbahema lâdiko dia falasa ka beela ndo wakakisha lotshungɔ la “[minya] ki uma la kete, ndu dia vo ndjakana. Wakawusha yombo ya wuki.” (Enyelo 6:1-4) Falasa kɛsɔ ndo ombahemi atɔ ekɔ didjidji dia ta, ndo yɔɔmbɔ ya woke ekɔ didjidji dia ata wa nshi nyɛ wa lɔnyɔi loleki kâmɛ la ekoma wa wolo efula wakamba la anto nshi nyɛ. L’atei w’ekoma ɛsɔ mbele waa bɔmbɛ nikliyɛrɛ yakoka ndjaka nunu akumi di’anto ndo waa rɔkɛtɛ yakokawɔ kanda l’etale ka nunu dia waa kilɔmɛtɛlɛ ndo bɔmbɛ shimikɛ la biolojikɛ yakoka ndjaka nyemba y’anto mbala kakɔ ɔtɔi.
Sho mbidjaka yimba lo ɛhɛmwɛlɔ waki Jehowa
9. Ngande wafɔna andja wa nshi nyɛ la wa la ntondo ka Mvula k’elola?
9 Lo nshi ya Nɔa, Jehowa akadiake anto l’ɔtɛ w’awui wa ngala wakaleke fulanɛ oma le anto wa kɔlɔ lo ekimanyielo ka waa Nefilimɛ. Ko kayotota ɛlɔ kɛnɛ? Onde awui wa ngala wasalema la nkɛtɛ ɛlɔ kɛnɛ wekɔ yema tshitshɛ lo mbaɛdika la wanɛ wakasalemaka lo nshi shɔ? Ndooko! Ndo nto, oko wakidiɔ lo nshi ya Nɔa, ɛlɔ kɛnɛ anto ndjashaka lo elimu awɔ wa lushi la lushi, lo nsɛna lɔsɛnɔ lelɛ anto ɔnɛ lɔsɛnɔ la dimɛna ndo vɔ tonaka kitanyiya ɛhɛmwɛlɔ wawashawɔ. (Luka 17:26, 27) Onde tekɔ la ɔkɔkɔ ɔmɔtshi wa mbidja tâmu ɔnɛ Jehowa ayolanya anto wa kɔlɔ nto? Ndooko.
10. a) Ɔhɛmwɛlɔ akɔna watosha prɔfɛsiya ya lo Bible mbala ko mbala? b) Naa yoho tshɔi ya lɔsɛnɔ ya lomba yahombaso nsɛna ɛlɔ kɛnɛ?
10 Ɛnɔnyi nkama la ntondo ka Mvula k’elola, Ɛnɔka akatatshi dia elanyelo kahomba ndja lo nshi yaso nyɛ. (Jude 14, 15) Yeso nde lawɔ akatɛkɛta dikambo dia oyelo wa ‘fɔnu ka woke.’ (Mateu 24:21) Aprɔfɛta akina wakatɛkɛta dia etena kɛsɔ. (Ezekiyele 38:18-23; Danyele 12:1; Joele 2:31, 32) Ndo lo dibuku dia Enyelo, sho mbadiaka ɛtɛkɛta wahahanya asolo wendana la elanyelo ka komelo. (Enyelo 19:11-21) L’onto ndo l’onto, sho mbokoyaka Nɔa ndo tekɔ esambisha w’akambo wosembwe wele la ohetoheto. Sho mbidjaka yimba lo ɛhɛmwɛlɔ waki Jehowa ndo la ngandji tshɛ sho kimanyiyaka asukanyi aso dia vɔ lawɔ sala ngasɔ. Ɔnkɔnɛ, lo ɛnyɛlɔ ka Nɔa, sho kɛndakɛndaka la Nzambi. Lo mɛtɛ, ekɔ ohomba efula dia onto tshɛ lele la nsaki ka nsɛna tetemala kɛndakɛnda la Nzambi. Ngande wakokaso sala dui sɔ kânga mbalɔshanaso la ehemba lushi tshɛ? Sho pombaka monga la mbetawɔ ka nge lo okotshamelo wa sangwelo diaki Nzambi.—Heberu 11:6.
Totetemale kɛndakɛnda la Nzambi lo tena dia ofukutanu
11. Lo yoho yakɔna yokoyaso Akristo wa lo ntambe ka ntondo?
11 Lo ntambe ka ntondo, wakatɛkɛta dikambo di’Akristo w’akitami w’esɔ ɔnɛ vɔ waki lo “Mbuka.” (Etsha 9:2) Lɔsɛnɔ lawɔ l’otondo lakahikama lo mbetawɔ kaki lawɔ le Jehowa ndo le Yeso Kristo. Vɔ wakayele mboka ka Owandji awɔ. Ɛlɔ kɛnɛ, Akristo wa kɔlamelo wekɔ lo sala woho akɔ wâmɛ.
12. Kakɔna kakatombe l’ɔkɔngɔ wa Yeso ndesha olui w’anto lo dihindo?
12 Ohomba wa mbetawɔ akɛnama lo dui dimɔtshi diakasalema lo nshi yakasambishaka Yeso. Lo diaaso dimɔtshi, Yeso akalesha yɛdikɔ y’apami oko 5000 lo dihindo. Anto wakambe heyama ndo wakangɛnangɛna. Tende kɛnɛ kakatombe oma lâsɔ. Sho mbadiaka ɔnɛ: “Lam’akenyi antu djimbitelu sho yakandatshi, vo wakati vati: Mete, umvutshi a wuhu one mbahumba ndja la kete. Lam’akeyi Jesu ati: Vo wuyanga mundami dia mbidjami lu khum’ekanga la wulu, ndi akatshu lu dikuna ntu ndame.” (Joani 6:10-15) L’otsho ɔsɔ nde akatshu otsha lo dihole dikina. Anto efula kɔngɛnangɛna woho wakatone Yeso dia monga nkumekanga. Nde akakoke mɛtɛ monga nkumekanga nɛ dia nde akɛnya dia nde aki la lomba l’efula ndo aki la wolo wa kotshiyɛ anto ehomba awɔ wa l’emunyi. Koko ɔsɔ komonga etena kakashikikɛ Jehowa dia nde mbolɛ oko Nkumekanga. Ndo nto, Diolelo diaki Yeso diakahombe monga dia l’olongo, koko aha dia la nkɛtɛ.
13, 14. Kanyi yakɔna yaki la anto efula ndo ngande wakahembama mbetawɔ kawɔ?
13 Koko, olui w’anto wakayashikikɛ dia ndjela Yeso ndo oko wata Joani, vɔ wakatotanaka la “wedi w’uduwa.” Lande na kakawoyele l’ɔkɔngɔ wa nde tona dia vɔ mbodja nkumekanga? Efula wakɛnaka akambo lo yoho ya lo demba ndo vɔ wakaleke mbidja yimba lo diangɔ dia l’emunyi diakasha Jehowa anto l’oswe wa shɛnga lo nshi ya Mɔsɛ. Vɔ wakafɔnyaka ɔnɛ Yeso akahombe tetemala la mbasha mbo ya ndɛ ya l’emunyi. Yeso akashihodia tokanyi tawɔ ta kɔlɔ ko nde akatatɛ mbaetsha akambo wa mɛtɛ wa lo nyuma wakakoke mbakimanyiya dia tshikitanya ekanelo kawɔ ka yimba. (Joani 6:17, 24, 25, 30, 31, 35-40) L’ɔtɛ wa dikambo sɔ, amɔtshi wakongunɛngunɛ, djekoleko lam’akasha Yeso wɛɛla ɔnɛ ate: “Mete, mete, kanyutelami nti: Nyu hanyuyala la lumu la pundju l’etema anyu, naka hanyuli dimba dia On’a untu, ndu hanyonwe dikila diandi. One lale dimba diami, ndu lano dikila diami, ndjalaka la lumu la pundju. Dimi layuwulula lushi l’ekumelu.”—Joani 6:53, 54.
14 Wɛɛla waki Yeso wakatshutshuyaka anto mbala efula dia vɔ mɛnya kana vɔ wakakombolaka mɛtɛ kɛndakɛnda la Nzambi. Ndo wɛɛla ɔnɛ waki l’oyango akɔ wâmɛ. Wɛɛla ɔsɔ wakatololaka kɛlɛ k’anto. Sho mbadiaka ɔnɛ: “Ambeki wa Jesu efula lam’akawuki diui so, wakati vati: Diui so wulu. Eya dietawo na?” Yeso akalembetshiya dia vɔ wakahombe nyanga kitshimudi ya lo nyuma y’ɛtɛkɛta ande. Nde akate ate: “Nyuma katushanaka lumu; dimba hatshi dikambu. Aui wakamanyutedi mbeli [n]yuma la lumu.” Koko, efula konanga mbohokamɛ, ndo ɔkɔndɔ mbutaka ɔnɛ: “L’okongo a dikambu so, ambeki wa Jesu efula wakakalula ekongokongo, [vɔ] kumengola la ndi ntu.”—Joani 6:60, 63, 66.
15. Kanyi yakɔna y’ɔlɔlɔ yaki la ambeki waki Yeso amɔshi?
15 Koko, aha ambeki waki Yeso tshɛ mbakasale ngasɔ. Ekɔ mɛtɛ dia ambeki ande wa kɔlamelo koshihodia dimɛna kɛnɛ kakalange Yeso mbuta. Koko, vɔ wakatetemala ndjaɛkɛ le nde la wolo tshɛ. Petero, ɔtɔi ɔmɔtshi l’atei wa ambeki asɔ wa kɔlamelo akakɛnɛmɔla nsaki yaki la ambeki akina tshɛ etena kakandate ate: “Khumadiondjo, le na atshosu? We keli la aui wa lumu la pundju.” (Joani 6:68) Ɔsɔ aki mɛtɛ dionga ndo ɛnyɛlɔ ka dimɛna efula!
16. Ngande wakokaso pembama ndo kanyi yakɔna y’ɔlɔlɔ yahombaso monga la yɔ?
16 Ɛlɔ kɛnɛ, sho koka pembama oko wakahembama ambeki wa ntondo waki Yeso asɔ. Le so, sho mbeyaka kɔmɔ otema lo woho ɔnɛ wele alaka wa Jehowa watakotshama esadi lo yoho yakombolaso l’onto ndo l’onto. Sho mbeyaka fɔnya dia elembetshiyelo ɛmɔtshi w’Afundelo wele lo ekanda aso walembetshiya Bible wekɔ wolo shihodia. Lɔkɛwɔ l’osekaso Okristo ɔmɔtshi mbeyaka tonyangiya. Onde ayonga dimɛna sho tshika kɛndakɛnda la Nzambi l’ɔtɛ wa ɛkɔkɔ ɛsɔ kana l’ɔtɛ wa ekina wa woho akɔ wâmɛ? Kema! Ambeki waki Yeso wakatone dia tetemala kɛndakɛnda la nde waki la ekanelo ka yimba ka lo demba. Sho pombaka mbewɔ dia sala oko vɔ.
“Shu kema l’atei a wane watsho ekongokongo”
17. Ngande wakokaso kimanyiyama dia tetemala kɛndakɛnda la Nzambi?
17 Ɔpɔstɔlɔ Paulo akafunde ate: ‘Afundelo tshɛ wakasambiyama oma le Nzambi.’ (2 Timote 3:16) Lo Bible, Jehowa totɛka hwe ɔnɛ: “Mbuka keku, nyokendekende loko!” (Isaya 30:21) Kitanyiya Ɔtɛkɛta wa Nzambi tokimanyiyaka dia ‘menda dimɛna woho wakɛndakɛndaso.’ (Efeso 5:15) Mbeka Bible ndo kana yimba la kɛnɛ kekaso tokimanyiyaka dia ‘kɛndakɛnda lo akambo wa mɛtɛ.’ (3 Joani 3) Lo mɛtɛ, oko wakate Yeso, ‘nyuma mbasha lɔsɛnɔ; demba diekɔ anyanya.’ Tshɔi ya ɛlɔmbwɛlɔ k’oshika kahomba nɔmbɔla ekolo aso, ele ɛlɔmbwɛlɔ ka lo nyuma katosha Jehowa lo tshimbo y’Ɔtɛkɛta ande, ya nyuma kande, ndo ya okongamelo ande.
18. a) Kakɔna kasala anto amɔtshi aha la lomba? b) Woho akɔna wa mbetawɔ kahomba monga laso?
18 Ɛlɔ kɛnɛ, anto wambɔkɔmɔ etema l’ɔtɛ wa tokanyi tawɔ ta lo demba kana l’ɔtɛ wɛnawɔ dia kɛnɛ kalongamɛwɔ katakotshama toyakimɔka mbala efula dia ndjayangɛ ɛngɛnɔngɛnɔ washa andja ɔnɛ. Oko wambowoshisha ɛnɛlɔ ka sala awui la shamanya, vɔ hawɛnyi ohomba wa ‘tetemala sungukala,’ ndo vɔ sɔnaka dia mbesa eyango wa lokaki wa lo demba lo dihole dia mbetsha wahɔ wa Diolelo lo dihole dia ntondo. (Mateu 24:42) Kɛndakɛnda lo yoho shɔ kema dui dia lomba. Tende ɛtɛkɛta waki ɔpɔstɔlɔ Paulo wata ɔnɛ: “Keli shu kema l’atei a wane watsho ekongokongo edja ndu l’eshishwelu, keli teko l’atei a wane weli la mbetawo ka nshimbela nyumu yawo.” (Heberu 10:39) Lo ɛnyɛlɔ kaki Ɛnɔka ndo ka Nɔa, tekɔ lo nsɛna lo tena dia ofukutanu, koko tekɔ la diɛsɛ dia kɛndakɛnda la Nzambi. Etena kasalaso ngasɔ, sho mongaka la elongamelo ka shikaa ɔnɛ alaka wa Jehowa wayokotshama, akambo wa kɔlɔ wayonyɛma ndo ɔnɛ andja w’oyoyo wa losembwe wayanga shikikɛma. Ɔsɔ mɛtɛ ekɔ elongamelo ka diambo!
19. Ngande wakɔndɔla Mika yoho ya lɔsɛnɔ ya atɛmɔdi wa mɛtɛ?
19 Mika ɔprɔfɛta waki Nzambi akate lo dikambo dia wedja wa lo andja dia ‘wodja la wodja wayɔkɛndakɛnda lo lokombo la jambizambi yawɔ.’ Oma lâsɔ, ko nde akatɛkɛta dikambo diande ndamɛ ndo dia atɛmɔdi akina wa kɔlamelo ate: ‘Sho, lo wedi aso tayɔkɛndakɛnda lo lokombo la Jehowa Nzambi kaso pondjo pondjo.’ (Mika 4:5) Naka wɛ amboyashikikɛ dia sala oko wakasale Mika, kete tetemala ndjasukanya la Jehowa oyadi lo tena dia ofukutanu dia ngande diasɛnayɛ. (Jakoba 4:8) Nyɛsɔ sho tshɛ tokombole l’otema ɔtɔi dia kɛndakɛnda la Jehowa Nzambi kaso oma ko kakianɛ ndo pondjo pondjo!
Ngande wayoyokadimola?
• Woho akɔna wafɔna nshi ya Nɔa la nshi nyɛ?
• Woho akɔna wa lɔsɛnɔ wakayele Nɔa nde la nkumbo kande ndo ngande wakokaso mbokoya mbetawɔ kawɔ?
• Kanyi yakɔna ya kɔlɔ yaki la ambeki waki Yeso amɔtshi?
• Kakɔna kamboyashikikɛ Akristo wa mɛtɛ dia sala?
[Esato wa lo lɛkɛ 30]
Oko wakidiɔ lo nshi ya Nɔa, anto wa nshi nyɛ ndjashaka tshɛ lo elimu awɔ wa lushi la lushi
[Osato wa lo lɛkɛ 31]
Oko weso esambisha wa Diolelo, “shu kema l’atei a wane watsho ekongokongo”