Akristo wekɔ l’ɔkɛndɛ wa kokɛ esombe w’anto
“Edja ndu esumbi anyu. Layunyusukelaka, edja ndu lam’ayunyuyala esumbi wa lukusumbi.”—ISAYA 46:4.
1, 2. Ngande wotshikitanyi woho wakokɛ Jehowa anto la woho wâkokɛ ambutshi w’ana w’anto?
AMBUTSHI wele la ngandji kokɛka anawɔ tatɛ lam’ekewɔ ashashi, tɔkɛndakɛnda polo ndo lam’akotshawɔ ɛnɔnyi dikumi l’ɛmɔtshi. Kânga etena kakomawɔ epalanga ndo kôngawɔ la nkumbo yawɔ hita, ambutshi awɔ tetemalaka la mbadja yimba ndo mbasukɛ la ngandji tshɛ.
2 Etena kele ambutshi w’ana w’anto wekɔ l’elelo lo kɛnɛ kakokawɔ salɛ anawɔ, Shɛso lele l’olongo ekɔ nshi tshɛ l’akoka wa mbidjaka yimba ndo sukɛka la ngandji tshɛ ekambi ande wa kɔlamelo. Lam’akandatɛkɛtaka l’ekambi ande wakandasɔnɛ lo nshi y’edjedja, Jehowa akate ate: “Edja ndu esumbi anyu. Layunyusukelaka, edja ndu lam’ayunyuyala esumbi wa lukusumbi.” (Isaya 46:4) Ɔsɔ mɛtɛ ekɔ ɛtɛkɛta w’ekeketshelo le Akristo waya esombe! Jehowa hakasha wanɛ wele la kɔlamelo le nde. Koko nde ndakaka dia mbasukɛ, ndo mbalɔmbɔla lo lɔsɛnɔ lawɔ, polo ndo lam’akomawɔ esombe.—Osambu 48:14.
3. Kakɔna kayotɔsɛdingola lo wekelo ɔnɛ?
3 Ngande wakokaso mbokoya woho wayakiyanya Jehowa la ngandji tshɛ dikambo di’esombe w’anto? (Efeso 5:1, 2) Nyɛsɔ tɔsɛdingole toho takoka ana, emendji wa l’etshumanelo, ndo Akristo akina kotsha ehomba w’esombe wa lo nkumbo kaso ka l’andja w’otondo k’onto l’ɔnango.
Ɔkɛndɛ wakiso sho ana
4. Ɔkɛndɛ akɔna wele l’ana wele Akristo otsha le ambutshi awɔ?
4 “Olemia sho la nyo.” (Efeso 6:2; Etumbelu 20:12) Oma l’ɛtɛkɛta wa wɔdu koko w’ohomba efula ɛsɔ wakandashile oma l’Afundelo wa lo Hɛbɛru, ɔpɔstɔlɔ Paulo akohola ana ɔkɛndɛ wele lawɔ otsha le ambutshi awɔ. Ko ngande wendana ɛtɛkɛta ɛsɔ la okokelo w’esombe w’anto na? Ɛnyɛlɔ kɛmɔtshi kasalanganya otema ka lo nshi ya la ntondo ka tena di’Akristo tokimanyiyaka dia kadimola lo wombola ɔsɔ.
5. (a) Kakɔna kɛnya dia Yɔsɛfu kombohɛ ɔkɛndɛ waki lande otsha le ombutshi ande? (b) Nɛmiya ambutshi aso kɛdikɛdi na, ndo ɛnyɛlɔ kakɔna ka dimɛna kakasha Yɔsɛfu lo dikambo sɔ?
5 L’edja k’ɛnɔnyi ndekana 20, Yɔsɛfu kombeyaka nsango yendana l’osombe wa she, owandji wa nkumbo Jakɔbɔ. Koko, Yɔsɛfu koshisha ngandji konga l’ɔna otsha le she kaki lande otsha le Jakɔbɔ. Ɔnkɔnɛ, etena kakandayashola le anango nde akawambola ate: “Papa eki la lumu ntu?” (Etatelu 43:7, 27; 45:3) L’etena kɛsɔ, wodja wa Kanana wakadiɛnɛka la ndjala ka kasha. Ɔnkɔnɛ, Yɔsɛfu akatome dui otsha le she ate: “Usamanya, uhulo uya lindu le mi, tutshimbatshimbaki. Kuyudjase lu kete ya Ngoshena dia we ndjala lasuki la mi, . . . Dimi layukushaka mbu ya nde.” (Etatelu 45:9-11; 47:12) Eelo, nɛmiya ambutshi waya esombe nembetshiyaka nto mbakokɛ ndo mbasha diangɔ dia l’emunyi diele lawɔ ohomba etena kahawayokoka vɔamɛ ndjakotshiyɛ ehomba awɔ. (1 Samuele 22:1-4; Joani 19:25-27) Yɔsɛfu aketawɔ ɔkɛndɛ ɔsɔ l’ɔngɛnɔngɛnɔ.
6. Ngande wakɛnya Yɔsɛfu ngandji ka mɛtɛ otsha le she, ndo ngande wakokaso mbokoya ɛnyɛlɔ kande?
6 L’ekimanyielo ka Jehowa, Yɔsɛfu akayokoma ɔmɔtshi l’atei w’apami wakaleke ɔngɔnyi ndo lokumu l’Edjibito. (Etatelu 41:40) Koko nde kondjaɔsa la nɛmɔ diamboleka ndo kɔmɛna dia nde ekɔ la wesanu efula dia nɛmiya osombe wa she waki l’ɛnɔnyi 130. Lam’akandoke dia Jakɔbɔ (kana Isariyɛlɛ) aya suke, “Josefu akalongosola pusupusu kandi, akatshu utsha la Ngoshena la ntuhumana la Isariyele, shi. Lam’akandawenyi, ndi akûkhumbatela lu kingu, akaleli edja ûkhumbatedi.” (Etatelu 46:28, 29) Oyaywelo ɔsɔ komonga dilɛmiɛlɔ dia l’ɛlɔmɔ. Yɔsɛfu akalangaka osombe wa she efula ndo nde komboka sɔnyi dia kɛnɛmɔla ngandji kɛsɔ lo sɛkɛ. Naka tekɔ l’ambutshi waya esombe, onde sho lawɔ mbakɛnɛmɔlɛka ngandji kawaokaso la lokaho tshɛ?
7. Lande na kakakombola Jakɔbɔ dia tokundɛma la Kanana?
7 Jakɔbɔ akatshikala la kɔlamelo ya wolo otsha le Jehowa polo lo nyɔi ka nde. (Heberu 11:21) L’ɔtɛ wa mbetawɔ kande l’alaka waki Nzambi, Jakɔbɔ akalɔmbɛ dia weka ande tokundɛma la Kanana. Yɔsɛfu akalɛmiya she lo kitanyiya dikambo diakandɔlɔmbɛ sɔ, kânga mbele dikambo sɔ diakalɔmbaka falanga efula ndo sala la wolo w’efula.—Etatelu 47:29-31; 50:7-14.
8. (a) Kakɔna koleki totshutshuya dia kokɛ ambutshi aso waya esombe? (b) Kakɔna kakasale okambi ɔmɔtshi waki Jehowa wa lo tena tshɛ dia kokɛ ambutshi ande waya esombe? (Enda kiombo ya lo lɛkɛ 15.)
8 Kakɔna kakatshutshuya Yɔsɛfu dia kokɛ kana kimanyiya she? Kânga mbele ngandji ndo lowando lele l’onto otsha le ɔnɛ lakawote ndo lakawôdia aki akambo amɔtshi wakôtshutshuya, aha la tâmu, Yɔsɛfu aki la nsaki k’efula ka ngɛnyangɛnya Jehowa. Sho lawɔ pombaka monga la nsaki ka ngasɔ. Paulo akafunde ate: “Naka wadi aki udu eko la ana kana ekana, vo wateki dia menya khumbu kawo ngandji ndu dia nkaluya ololo le ambutshi awo, ne dia dikambu diako dieko ololo lu ashu a [Nzambi].” (1 Timote 5:4) Mɛtɛ, ngandji kokaso Jehowa, ndo wɔma woludi la dilɛmiɛlɔ wawôkaso, ayototshutshuya dia kokɛ ambutshi aso waya esombe, oyadi ekakatanu wayohomana laso dia sala dikambo sɔ.a
Woho washa emendji ekimanyielo
9. Jehowa waa na wakandasɔnɛ dia namaka ɛkɔkɔ, kâmɛ ndo Akristo w’esombe?
9 Oya l’ekomelo ka lɔsɛnɔ lande l’otale, Jakɔbɔ akatɛkɛta dikambo dia Jehowa ate nde ekɔ “[Nzambi ka mɛtɛ] latundeshaka nshi tshe ya lumu lami edja ndu elo.” (Etatelu 48:15) Ɛlɔ kɛnɛ, Jehowa ekɔ lo nama ekambi ande wele la nkɛtɛ lo tshimbo y’emendji w’Akristo kana dikumanyi, l’ɛlɔmbwɛlɔ k’Ɔnande Yeso Kristo, “ulami a wuki.” (1 Petero 5:2-4) Ngande wakoka emendji mbokoya Jehowa etena kakimanyiyawɔ esombe w’anto wele l’atei w’ɛkɔkɔ walamawɔ?
10. Kakɔna kakasalema dia kimanyiya esombe w’Akristo la diangɔ dia l’emunyi? (Enda lo kiombo ya lo lɛkɛ 17.)
10 Yema tshitshɛ l’ɔkɔngɔ w’etshumanelo k’Akristo kengama, apɔstɔlɔ wakasɔnɛ “apami esambeli akanga a lukumu l’ololo . . . wuludiami la [nyuma k’ekila la lomba]” dia vɔ mendaka olimu ‘w’okahanyelo wa diangɔ dia ndɛ wa lushi la lushi’ l’atei w’Akristo wa wadi waki edo waki lo dihombo. (Etsha 6:-6) L’ɔkɔngɔ diko, Paulo akayolakaka Timɔtɛ laki omendji dia mbidja wadi waki edo lo listɛ l’anto wakasunganaka nongola ekimanyielo ka l’emunyi. (1 Timote 5:3, 9, 10) Woho akɔ wâmɛ, emendji wa l’etshumanelo ɛlɔ kɛnɛ mbetawɔka dia nɔngɔsɔla ekimanyielo ka dimɛna otsha le Akristo waya esombe etena kele dikambo sɔ ohomba. Koko, ekɔ akambo efula walɔmbama dia kimanyiya esombe w’anto wele la kɔlamelo.
11. Kakɔna kakate Yeso lo dikambo dia wadi aki odo laki ose wola lakakimɔ woshasha wa tshitshɛ?
11 Oya l’ekomelo k’olimu ande wa lanɛ la nkɛtɛ, Yeso akadjasɛ lo tɛmpɛlɔ ndo “akendaka lam’akadjaka antu weshasha lu ekitshelu.” Oma lâsɔ, onto ɔmɔtshi akakotola yambalo yande. Ɔkɔndɔ mbutaka ɔnɛ: “Wadi aki udu omotshi, kanga wula, akayi, akayudja ekinga ehendi loko waki yediko ya sushi.” Yeso akete ambeki ande ko akawatɛ ate: “Mete kanyutelami nti: Wadi aki udu one, kanga wula, ambudja ushasha wuleki wudjisha akina tshe lu ekitshelu. Ne dia vo tshe wakadjisha eshasha uma l’efula ka diango dieli la wo; keli ndi, uma lu wula andi, mbudjishandi kene kaki la ndi, kakandahumbi ndjakimanyia.” (Mako 12:41-44) Lo menda falanga yakandadje, woshasha wa wadi aki odo waki tshitshɛ efula, koko Yeso akeyaka woho wele She lele l’olongo akɔsaka la nɛmɔ ɔkɛnɛmwɛlɔ wa ngasɔ wa ngandji ka l’otema ɔtɔi. Woho waki wadi aki odo ɔsɔ aya osombe kokonya Yeso di’aha nde mbidja yimba lo kɛnɛ kakandasale.
12. Ngande wakoka dikumanyi mɛnya lowando lele lawɔ lo kɛnɛ kasala Akristo waya esombe?
12 L’ɛnyɛlɔ ka Yeso, emendji w’Akristo hawonya yimba lo kɛnɛ kasala esombe w’anto dia tɔla ɔtɛmwɛlɔ wa mɛtɛ otsha la ntondo. Dikumanyi wekɔ l’ɛkɔkɔ w’eshika wa mandola esombe w’anto l’ɔtɛ w’olimu wakambawɔ, woho washawɔ kɔmatɛrɛ lo nsanganya, lo shɛngiya ya dimɛna yele lawɔ l’etshumanelo ndo l’ɔtɛ w’ekikelo kawɔ. Tshɛkɛta y’oma k’ɛse otema y’ekeketshelo mbeyaka kimanyiya esombe w’anto dia vɔ monga ‘l’ɔngɛnɔngɛnɔ’ l’olimu awɔ w’ekila. Kɛsɔ ayowakimanyiya dia vɔ mbewɔ dia kɔmɔ otema lo mbɛdika kɛnɛ kasalawɔ la kɛnɛ kasala Akristo akina kana la kɛnɛ kakawasalaka ntondo.—Ngalatiya 6:4.
13. Lo toho takɔna takoka dikumanyi tɛkɛtaka dikambo dia diewo ndo di’akambo wakakomɛ esombe w’anto?
13 Dikumanyi koka mɛnya lowando lele lawɔ lo kɛnɛ kasala Akristo waya esombe lo tɛkɛtaka dikambo di’akambo wakakomɛ Akristo waya esombe ndo dia diewo diawɔ. Vɔ mbeyaka kambaka mbala mɔtshi l’esombe w’anto washa ɛnyɛlɔ ka dimɛna lo wɛnyɛlɔ kana l’ɛkɔnya. Ekumanyi kɛmɔtshi akate ate: “Ampokami ndjelaka ndo mpokamɛka la yambalo y’efula mbala tshɛ kakɔnyami ɔnangɛso kana kadiyɛsɔ kɛmɔtshi kaya osombe, lakodia ana l’akambo wa mɛtɛ.” Dikumanyi dia l’etshumanelo kekina wakate dia kadiyɛso kɛmɔtshi kaya l’ɛnɔnyi 71 kele ombatshi mboka akakimanyiya efula apandjudi wa Diolelo dia vɔ ndjashaka mbala la mbala l’olimu w’esambishelo. Nde mbakeketshaka nto dia sala “akambo w’ohomba,” wele oko wadielo wa Bible, wa divɛsa dia lushi la lushi ndo dia vɔ kanaka yimba la kɛnɛ kadiawɔ.
14. Ngande wakɛnya olui ɔmɔtshi wa dikumanyi lowando laki lawɔ otsha le osekawɔ omendji laki aya osombe?
14 Dikumanyi mbɔsaka nto la nɛmɔ olimu wakamba asekawɔ dikumanyi waya esombe w’anto. José, laya l’ɛnɔnyi 70 l’ɛmɔtshi ndo lambokamba l’edja k’ɛnɔnyi akumi oko ekumanyi, oma la sala epaso ka wolo efula. L’etena k’otale kakandalongalongaka demba, nde akalange dia tshika ɔkɛndɛ ande w’omendji walɔmbɔla. José mbutaka ate: “Kɛnɛ kakasale dikumanyi dikina akamambia. Lo dihole dia vɔ mbetawɔ kanyi yami, vɔ wakamimbola ekimanyielo kemi latɔ mɛtɛ ohomba dia dimi tetemala mɛmba ɛkɛndɛ ami.” Oma l’ekimanyielo k’ekumanyi kɛmɔtshi kakaleke dikɛnda, José aki l’akoka wa tetemala kamba l’ɔngɛnɔngɛnɔ oko omendji walɔmbɔla, ndo dikambo sɔ diaki tshondo y’ɔtshɔkɔ le etshumanelo. Ekumanyi kɛmɔtshi k’osekande akate ate: “Etshumanelo k’otondo ngɛnangɛnaka efula woho wakamba José oko ekumanyi. Anangɛso l’akadiyɛso wakôlangaka ndo wakɔ̂lɛmiyaka l’ɔtɛ wa woho wambondohokɔ akambo ndo l’ɔtɛ w’ɛnyɛlɔ kande ka mbetawɔ. Nde akahamia etshumanelo kaso.”
Tokimanyiyanake lam’asaso
15. Lande na kahomba Akristo tshɛ ndjakiyanya dikambo di’ɔlɔlɔ w’esombe w’anto wele l’atei awɔ?
15 Aha paka ana wele l’ambutshi waya esombe la ekambi wakasɔnama ato mbahomba ndjakiyanya dikambo di’esombe w’anto. Lo mbɛdika etshumanelo k’Akristo la demba di’onto, Paulo akafunde ate: “Keli [Nzambi] akasanganya beke dia dimba, akaleki nemia leke lahumba, ne dia diatanelu diatukuyala lu dimba; keli dia beke dia dimba dialamani [lam’asadiɔ].” (1 Koreto 12:24, 25) Di’etshumanelo k’Akristo kɛndakɛnda dimɛna, anto wa lɔkɔ tshɛ pombaka ndjakiyanya dikambo di’ɔlɔlɔ w’asekawɔ ambetawudi, kâmɛ ndo dikambo di’esombe w’anto.—Ngalatiya 6:2.
16. Ngande wakokaso mɛnya woho wayashaso le esombe w’anto etena kɔtɔso lo nsanganya y’Akristo?
16 Nsanganya y’Akristo toshaka waaso w’amɛna efula wa mɛnya woho wayakiyanyaso dikambo di’esombe w’anto. (Filipi 2:4; Heberu 10:24, 25) Onde sho mbɔsaka yema ya wonya dia sawola l’esombe w’anto lo waaso asɔ? Kânga mbele ekɔ ohomba nyanga dia mbeya woho wele yonge yawɔ ya demba, onde sho koka ‘mbasha woshasha ɔmɔtshi wa lo nyuma’ ondo lo mbakɔndɔlɛ dikambo dimɔtshi diakeketsha diakatahomana ladiɔ kana kanyi mɔtshi yakeketsha y’oma l’Afundelo? Lam’ele alemba w’esombe w’anto waya wotsho, ayonga dimɛna dia sho tshɔ otsha le wɔ lo dihole dia kongɛ dia vɔ ndja oye le so. Naka ɔnangɛso kana kadiyɛso kɛmɔtshi kaya osombe hayoka dimɛna, sho pombaka tɛkɛta ɔkɔkɛ ndo lo yoho yokɛma hwe. Ndo dia ‘keketshanya dimɛna,’ sho pombaka mpokamɛka dimɛna dimɛna kɛnɛ kata osombe w’onto.—Romo 1:11, 12.
17. Ngande wakokaso mɛnya woho wayakiyanyaso dikambo di’Akristo w’esombe wele baka lo mvudu?
17 Ko kayotota naka esombe ɛmɔtshi w’anto waya bu l’akoka wa mbɔtɔ lo nsanganya y’Akristo? Jakoba 1:27 mɛnyaka dia tekɔ l’ɔkɛndɛ wa “ntsho dia ntenda ana wa tshiki la wadi waki edu lu asui awo.” Kitshimudi mɔtshi ya vɛrbɛ ya lo Grɛkɛ yokadimɔmi ɔnɛ, “ntsho dia ntenda” ekɔ “membola.” (Etsha 15:36) Aha la tâmu, esombe w’anto ngɛnangɛnaka efula diembwelo diakiso! Lam’akinde lo lokanu la Rɔma oya lo 65 T.D., ‘osombe w’onto’ Paulo akayaokaka oko ɔna etshike. Nde akakombolaka mɛnana l’osekande okambi Timɔtɛ ndo akofundɛ ate: ‘Sala tshɛ dia ndja esadi oya le mi.’ (Filemona 9; 2 Timote 1:3, 4; 4:9) Kânga mbewɔ bu lo lokanu lo yoho ya mɛtɛ mɛtɛ, esombe ɛmɔtshi w’anto wekɔ lo ndihama lo mvudu l’ɔtɛ wa hemɔ. Ɔnkɔnɛ, lo yoho mɔtshi ekɔ oko vɔ wekɔ lo mbuta ɔnɛ: ‘Sala tshɛ lam’alangayɛ dia ndja ndjomenda aha la tshimbatshimba.’ Onde sho mbetawɔka dia sala dikambo sɔ?
18. Ɛlɔlɔ akɔna wakoka ndja lo woho wembolaso esombe w’anto?
18 Tatɔnyɔlake pondjo etombelo w’amɛna wakoka ndja oma lo membola ɔnangɛso kana kadiyɛso ka lo nyuma kaya osombe. Etena kaki Okristo wakawelɛka Ɔnɛsifɔrɔ la Rɔma, nde akayange Paulo la wolo tshɛ, akɛnana la nde, ndo ‘akokeketsha tena efula.’ (2 Timote 1:16, 17) Kadiyɛso kɛmɔtshi kaya osombe akate ate: “Dimi nangaka mbetsha wenya kâmɛ l’akɛnda. Kɛnɛ kalekami ngɛnangɛna ele vɔ mbɔsakami oko ose nkumbo kawɔ. Kɛsɔ keketshakami efula mɛtɛ.” Okristo okina w’osombe wa womoto akate ate: “Dimi ngɛnangɛnaka efula etena katomɛ onto ɔmɔtshi yɛtshi ya mukanda, kambetande lo telefɔnɛ dia tɛkɛta la mi minitɛ ngana, kana kayande dia ndjomenda. Ekɔ oko dikɔhɔ di’ashi wa tshitshi diatutadia asolo.”
Jehowa futaka wanɛ wakimanyiyana
19. Ɛtshɔkɔ akɔna waya oma lo kokɛ esombe w’anto?
19 Ɛtshɔkɔ efula ndjaka oma lo kimanyiya esombe w’anto. Mbekesanɛ l’esombe w’anto ndo monga l’akoka wa kondja wahɔ oma lo lomba ndo lo diewo diawɔ ekɔ tshondo ya diɛsɛ. Anto wakimanyiyana kondjaka wahɔ w’efula waya oma lo lokaho, wahɔ wele oko ɔngɛnɔngɛnɔ waya oma lo kotsha dikambo dimɔtshi ndo wɔladi wa l’otema waya oma lo kotsha dimɛna ɔkɛndɛ watɔlɔmba Afundelo. (Etsha 20:35) Ndo nto, wanɛ wakokɛ esombe w’anto hawohombe mboka wɔma di’anto wayoyakalɛ lam’ayowokoma vɔ lawɔ esombe. Ɔtɛkɛta wa Nzambi toshikikɛka ɔnɛ: “Utema a lukahu atuhamaka. One latushaka antu ashi wa no, wayuwusha ndu ndi.”—Tukedi 11:25.
20, 21. Ngande wɔsa Jehowa wanɛ wakokɛ esombe w’anto, ndo yɛdikɔ yakɔna yahombaso mbɔsa?
20 Jehowa futaka ana wa woka wɔma, emendji ndo Akristo akina wakotsha la lokaho tshɛ ehomba w’asekawɔ ambetawudi waya esombe. Yimba shɔ mbɔtɔnɛka la yokedi nyɛ: “One latukaka usi wula ketshi, atosondjaka [Jehowa] diango, ndi ako layûfuta uku ololo wakandatshi.” (Tukedi 19:17) Naka ngandji totshutshuyaka dia kimanyiya wanɛ wele lo dihombo kana ase wola, kete Nzambi mbɔsaka weshasha ɛsɔ oko sɔmbɔ mbɔsɔndjaso ndo nde tofutaka lo tosha ɛtshɔkɔ efula. Nde tofutaka nto lo woho wakimanyiyaso la ngandji tshɛ asekaso atɛmɔdi, wele efula l’atei awɔ wekɔ ‘wola lo kɛnɛ kendana l’akambo wa la nkɛtɛ, koko wekɔ ɛngɔnyi lo mbetawɔ.’—Jakoba 2:5.
21 Nzambi mɛtɛ futaka anto la lokaho tshɛ! Nde ayotosha ndo lɔsɛnɔ la pondjo. Le efula k’ekambi waki Jehowa, ɔsɔ ayonga lɔsɛnɔ la pondjo lo paradiso ka la nkɛtɛ, lɛnɛ ayomɔ etombelo w’oma lo pɛkato kakatahowɔ ndo esombe w’anto wele la kɔlamelo otsha le Nzambi wayɔngɛnangɛna lo monga nto la wolo waki lawɔ lam’akiwɔ weke ɛlɔngɔlɔngɔ kana esekaseka. (Enyelo 21:3-5) Lam’akatakongɛ etena k’ɔlɔlɔ kɛsɔ, nyɛsɔ totetemalake la kotsha ɔkɛndɛ aso w’Okristo wa kimanyiyaka esombe w’anto.
[Nɔtɛ ka l’ɛse ka dikatshi]
a Dia kondja alako w’amɛna wa woho wa kokɛ ambutshi waya esombe, enda lo Réveillez-vous! wa Ngɔndɔ ka Hende 8, 1994, lɛkɛ 3-10.
Ngande wayoyokadimola?
• Ngande wakoka ana nɛmiya ambutshi awɔ waya esombe?
• Ngande wɛnya dikumanyi lowando lele lawɔ otsha le ase etshumanelo waya esombe?
• Kakɔna kakoka Akristo sala dia mɛnya woho wayakiyanyawɔ mɛtɛ dikambo di’esombe w’anto?
• Ɛtshɔkɔ akɔna waya oma lo kokɛ Akristo waya esombe?
[Kiombo ya lo lɛkɛ 17]
Etena Kaki Ambutshi Ande l’Ohomba w’Ekimanyielo
L’ɔnɔnyi 1999, Filipɛ akakambaka olimu wa lo tena tshɛ wa wokelo wa mvudu wakandayakimɔ la lolango lande lo Liberia. Ɔnɔnyi ɔsɔ nde akalongola losango ɔnɛ she ekɔ la hemɔ wolo. Oko wakandeyaka dia ndoko kakakoke sala nyango, nde akɔshi yɛdikɔ ya kawola lakawɔ dia todja she lo lopitadi.
Filipɛ mbutaka ate: “Ɔsɔ komonga yɛdikɔ ya tshitshɛ le mi, koko lakoke dia ɔkɛndɛ ami wa ntondo aki wa kokɛ ambutshi ami.” L’ɔkɔngɔ w’ɛnɔnyi oko esato, nde akatanɛ ambutshi ande luudu la dimɛna la vɔ mbidjasɛ, ndo l’ekimanyielo k’anyande Akristo wa lo ngelo kɛsɔ, nde akalilɔngɔsɔla dia kotsha ehomba wa lânde waki she.
Wony’ɔnɛ, nyango Filipɛ ambokoka ndɔshana dimɛna l’ekakatanu wa lo demba wele l’omɛnde. Atet’edja, Filipɛ aketawɔ le eta lakawawosha dia tokamba la filialɛ k’Ɛmɛnyi wa Jehowa ka la Macédoine, oko ombiki wa mvudu wakayakimɔ la lolango.
[Kiombo ya lo lɛkɛ 17]
Vɔ Kominya Yimba l’Ehomba Ande
Etena kakadihama Ada, osombe ɔmɔtshi wa womoto w’Okristo w’ɛnɔnyi 85 lo luudu la hemɔ, dikumanyi dia l’etshumanelo wakɔshi tɛdikɔ dia mbokimanyiya. Vɔ wakasale woho w’olui ɔmɔtshi wa anyawɔ ambetawudi kimanyiyaka kadiyɛso kɛsɔ. Anangɛso la akadiyɛso asɔ wakangɛnangɛna dia mbokambɛ elimu wele oko sola luudu, mbɔ̂tsha, mbâhɛ kana tshɔ tosombɛ diangɔ.
Aya oko ɛnɔnyi dikumi wakawatatɛ la mbosha ekimanyielo kɛsɔ. Polo nd’ɛlɔ, Ɛmɛnyi wa Jehowa ndekana 30 wekɔ lo kimanyiya Ada. Vɔ wekɔ lo tetemala la tshɔ towenda, mbadiɛ ekanda ɛmɔtshi walembetshiya Bible, mbewoya ehamelo katasale as’etshumanelo amɔtshi ndo nɔmbaka Nzambi kâmɛ la nde.
Ekumanyi kɛmɔtshi ka l’etshumanelo akate ate: “Wanɛ wakimanyiya Ada mbɔsaka dia dikambo sɔ diekɔ tshondo ya diɛsɛ. Efula wambokeketshama oma l’olimu ande wa kɔlamelo wamondokamba ɛnɔnyi akumi, ndo vɔ mɛnaka dia naka hawôkimanyiyisha, kete vɔ bu la lowando le nde.”
[Osato wa lo lɛkɛ 14]
Onde sho kɛnɛmɔlɛka la lokaho tshɛ ambutshi aso waya esombe ngandji kawaokaso?
[Osato wa lo lɛkɛ 16]
Ase etshumanelo tshɛ koka kɛnɛmɔla ngandji kokawɔ asekawɔ ambetawudi w’Akristo waya esombe