Oyangelo wa ‘didi di’oshinga wolo’
Ɛlɔ Kɛnɛ “Lukumu l’ololo lone la diulelu layusambishama lu kete tshe, uku omenyi le wedja tshe.”—MATEU 24:14.
1, 2. a) Kakɔna kakakanyiyaka ase Juda wa lo nshi ya Yeso lo dikambo dia Diolelo diaki Nzambi? b) Kakɔna kakasale Yeso dia mbasha eokelo ka dimɛna kendana la Diolelo, ndo dikambo sɔ diaki la etombelo akɔna?
DIOLELO diaki Nzambi aki dikambo diakaleke ase Juda ndjasha lɔkɔ etena kakaye Yeso la nkɛtɛ. (Mateu 3:1, 2; 4:23-25; Joani 1:49) Koko ntondotondo, efula ka l’atei awɔ koshihodia dimɛna woho wakahombe pama Diolelo diakɔ ndo wolo wakahombe monga la Diolelo sɔ. Vɔ koshihodia nto dia diɔ diekɔ lowandji la l’olongo. (Joani 3:1-5) Kânga amɔtshi wakakome ambeki waki Yeso koshihodia dimɛna ele Diolelo diaki Nzambi kana kɛnɛ kakawahombe sala dia kondja diɛsɛ dia tolɛ kâmɛ la Kristo.—Mateu 20:20-22; Luka 19:11; Etsha 1:6.
2 L’edjedja ka wonya, Yeso aketsha ambeki ande akambo efula la solo dia lotutsha, mbidja ndo wɛla wa didi di’oshinga wolo wakatasɛdingola lo sawo dietshi, lo mbaɛnya ohomba wa vɔ ndjaketembola dia nyanga Diolelo dia l’olongo. (Mateu 6:33; 13:45, 46; Luka 13:23, 24) Kɛsɔ akananda mɛtɛ etema awɔ efula nɛ dia kombeta edja vɔ wakakome esambisha wa lokumu l’ɔlɔlɔ la Diolelo wahahekɔ ndo wele la dihonga lo tokoma ta nkɛtɛ, akambo watɛkɛtama dimɛna lo dibuku dia Etsha.—Etsha 1:8; Kolosai 1:23.
3. Kakɔna kakate Yeso lo dikambo dia Diolelo lo kɛnɛ kendana la nshi yaso nyɛ?
3 Ko kayotota ɛlɔ kɛnɛ? Miliyɔ y’anto wekɔ lo sambishama dia wayokondja ɛtshɔkɔ lo paradiso ka la nkɛtɛ lo ɛlɔmbwɛlɔ ka Diolelo. Lo prɔfɛsiya kande k’ohomba kendana la “ekumelu k’etena kene,” Yeso akate lo yoho ya lânde ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:3, 14; Mako 13:10) Nde akate nto dia olimu w’ohomba ɔsɔ wayokambema kânga l’atei wa wekamu wa wolo, l’atei w’ekakatanu ndo l’atei wa ɛhɛnyɔhɛnyɔ. Koko nde akasha eshikikelo kɛnɛ ate: “One latetemala edja ndu l’ekumelu, ayushimbamela.” (Mateu 24:9-13) Akambo asɔ tshɛ nɔmbaka dia monga la yimba ya ndjahombia ndo ya ndjakimɔ yele oko nyɛ yaki la omindji w’okanda wa lo wɛla waki Yeso. Onde ekɔ anto amɔtshi ɛlɔ kɛnɛ wɛnya woho wa mbetawɔ ndo ohetoheto wa ngasɔ lo oyangelo wa Diolelo?
Ɔngɛnɔngɛnɔ wa mbishola akambo wa mɛtɛ
4. Shɛngiya yakɔna yele l’akambo wa mɛtɛ wa Diolelo le anto ɛlɔ kɛnɛ?
4 Omundji w’okanda wa lo wɛla waki Yeso aki la ɔngɛnɔngɛnɔ wahadjama anya etena kakandatane kɛnɛ kakandɔshi dia kekɔ ‘didi di’oshinga wolo.’ Ɔngɛnɔngɛnɔ ɔsɔ akotshutshuya dia sala tshɛ kakandakoke sala dia somba didi diakɔ. (Heberu 12:1) Ɛlɔ kɛnɛ, akambo wa mɛtɛ wendana la Nzambi ndo la Diolelo diande wekɔ lo kotola ndo tshutshuya anto. Kɛsɔ toholaka ɛtɛkɛta waki Ɔnangɛso Alexander Macmillan, wakandafunde lo woho wakandayange Nzambi ndo Sangwelo diande lo dikambo di’anto, ɛtɛkɛta wofundami lo dibuku La foi en marche. Nde akate ate: “Kɛnɛ kakamatane, nunu di’anto wekɔ lo tetemala la kitana ɔnɔnyi tshɛ. Ndo vɔ wekɔ anto oko dimi la yɛ, nɛ dia vɔ ndja oma lo wedja tshɛ, oma lo weho wa nkoho y’alemba tshɛ, oma lo weho wa nsɛnɔ tshɛ, ndo wa nɔnga tshɛ. Akambo wa mɛtɛ bu la shɔnɔdi. Vɔ kutolaka weho w’anto tshɛ.”
5. Etombelo akɔna w’amɛna wokondjishaso lo ɔnɔnyi w’olimu wa 2004?
5 Mɛtɛ ka ɛtɛkɛta ɛsɔ kekɔ lo mɛnama lo woho wele ɔnɔnyi la ɔnɔnyi, lokumu l’ɔlɔlɔ la Diolelo lekɔ lo tshutshuya anto nunu nkama wele l’etema w’ɔlɔlɔ dia vɔ nambola Jehowa nsɛnɔ yawɔ ndo dia sala lolango lande. Ndo lo ɔnɔnyi w’olimu 2004 wakatatɛ lo ngɔndɔ ka divwa 2003 polo lo ngɔndɔ k’enanɛi 2004 mbakasalema dikambo sɔ. Lo ngɔndɔ 12 shɔ, anto 262 416 wakɛnya ndjakimɔ kawɔ le Jehowa lo sɛkɛ lo batizama lo ashi. Kɛsɔ kakasalema lo wedja 235, lɛnɛ eka Ɛmɛnyi wa Jehowa la anto 6 085 387 Bible lomingu la lomingu dia kimanyiya weho w’anto tshɛ ndo w’oma lo wedja tshɛ, waoho tshɛ ndo ɛtɛkɛta tshɛ dia vɔ mbeya akambo wa mɛtɛ washa lɔsɛnɔ w’oma l’Ɔtɛkɛta wa Nzambi.—Enyelo 7:9.
6. Kakɔna kele lo kiɔkɔ ya ehamelo katatetemala monga lo edja k’ɛnɔnyi?
6 Kakɔna kakakimanyiya dia akambo asɔ tshɛ salema? Aha la tâmu, Jehowa akakotola anto wele la etema w’ɔlɔlɔ asɔ oya le nde. (Joani 6:65; Etsha 13:48) Koko, hatokoke mɔnyɔla welo waha la lokaki ndo waha mpekɔ wakadje wanɛ wakayasha dia nyanga Diolelo. Lamakinde l’ɛnɔnyi 79, Ɔnangɛso Macmillan akafunde ate: “Tatɛ mbala ka ntondo kakameke alaka wendana la andja ɔnɛ wele la hemɔ ndo wasunyasunya lomu, elongamelo kami lo losango lele lo Bible lɔsɔ katakitakita. Oma l’etena kɛsɔ, dimi lakɔshi yɛdikɔ ya nyomeya awui efula wetsha Bible woho wa dimi monga la akoka wa kimanyiya anto akina wele oko dimi watayange ewo kendana la Jehowa, Nzambi Nkanga-Nkudu-Tshɛ, ndo la asangwelo ande w’amɛna wendana la anto.”
7. Dikambo diakɔna diɛnya ɔngɛnɔngɛnɔ ndo ohetoheto waya oma lo mbishola akambo wa mɛtɛ wele lo Bible?
7 Ohetoheto ɔsɔ wekɔ lo mɛnama nto le ekambi waki Jehowa ɛlɔ kɛnɛ. Tɔ̂shi ɛnyɛlɔ kaki Daniela k’oma lo Vienne, lo wodja w’Autriche. Nde mbutaka ɔnɛ: “Oma ko dikɛnda diami, Nzambi okongaka ɔngɛnyi ami woleki tshɛ. Lakalangaka mbala tshɛ mbeya lokombo lande nɛ dia le mi ‘Nzambi’ komonga onto la mɛtɛ. Koko lakahombe konga polo lam’akamakotsha ɛnɔnyi 17, etena kakaye Ɛmɛnyi wa Jehowa ndjomenda. Vɔ wakanembetshiya ɛngɔ tshɛ kakamalange mbeya lo dikambo dia Nzambi. L’ekomelo, lakayosholaka akambo wa mɛtɛ ndo ɔsɔ aki dui di’ɔngɛnɔngɛnɔ efula! Laki l’ɔngɛnɔngɛnɔ efula ko lakatatɛ sambisha onto tshɛ.” Ndoko edja, asekande wa la kalasa wakatatɛ mbɔ̂nyɔla l’ɔtɛ w’ohetoheto ande. Daniela akate nto ate: “Le mi ekɔ oko lakɛnaka woho wakotshama prɔfɛsiya ya lo Bible, nɛ dia lakeke dia Yeso akate di’ambeki ande wakahombe mpetshama ndo pɛnyahɛnyama l’ɔtɛ wa lokombo lande, laki l’ɔngɛnɔngɛnɔ ndo lakâmbe efula.” Kombeta edja, Daniela akalambola Jehowa lɔsɛnɔ lande, akalongola batismu, ndo akatatɛ ndjadjɛ oyango wa monga misiɔnɛrɛ. L’ɔkɔngɔ wa nde tshukama, Daniela nde la omɛnde Helmut, wakatatɛ sambisha ase Afrikɛ, ase Chine, ase Philippines, ndo ase Inde wakadjasɛka la Vienne. Daniela nde la Helmut wekɔ kakianɛ waa misiɔnɛrɛ lo sidɛ owɛstɛ k’Afrikɛ.
Vɔ hawohekɔ
8. Naa yoho mɔtshi ya dimɛna yɛnya anto efula ngandji kawɔ otsha le Nzambi ndo kɔlamelo yele lawɔ lo Diolelo diande?
8 Eelo, olimu wa misiɔnɛrɛ ekɔ yoho mɔtshi yɛnya ekambi waki Jehowa ɛlɔ kɛnɛ ngandji kokawɔ Nzambi ndo kɔlamelo yawɔ lo Diolelo diande. Oko omindji w’okanda wa lo wɛla waki Yeso, wanɛ wakamba olimu ɔsɔ mbetawɔka dia tshɔ l’ahole wa tale dikambo dia wahɔ wa Diolelo. Ekɔ mɛtɛ dia waa misiɔnɛrɛ hawonde kɛndɔ dia toyanga lokumu l’ɔlɔlɔ la Diolelo; koko vɔ liɛmbɛka anto wasɛna l’ahole wa tale wa la nkɛtɛ, lo mbaetsha ndo lo mbakimanyiya dia vɔ koma ambeki waki Yeso Kristo. (Mateu 28:19, 20) Lo wedja efula, vɔ pombaka mbikikɛ ekakatanu wa wolo efula. Koko wokikelo awɔ mbaelaka ɛtshɔkɔ efula.
9, 10. Akambo akɔna w’ɔngɛnɔngɛnɔ wahomana la waa misiɔnɛrɛ l’ahole wa tale, ɛnyɛlɔ oko lo République centrafricaine?
9 Tɔ̂shi ɛnyɛlɔ ka République centrafricaine, lɛnɛ ele ɔnɔnyi wetshi anto 16184 wakatɔ lo Eohwelo ka nyɔi ka Kristo, lofulo lele efula k’apandjudi wa lokomu l’ɔlɔlɔ la Diolelo wa lo wodja ɔsɔ ndodia lo esambele. Lamele ahole efula wa lo wodja ɔsɔ bu la kura, anto wekɔ la mbekelo ka salaka elimu awɔ wa lushi la lushi l’andja l’ɛse ka otamba. Waa misiɔnɛrɛ lawɔ ndjelaka lokolo lɔsɔ, vɔ kambaka olimu awɔ wa sambisha yoho yakɔ yâmɛ, mbut’ate vɔ mbekaka l’anto Bible l’andja lo dɛdi dia l’ɛse k’otamba. Dikambo sɔ hakimanyiya tsho di’onto mɛna dimɛna dia mbadia ndo monga lo dihole dia tshitshi, koko diɔ diekɔ la wahɔ okina. Anto nangaka Bible efula, ndo anto sawolaka efula asawo w’akambo w’ɔtɛmwɛlɔ. Mbala efula ambetshetshi mɛnaka woho wasalema wekelo ndo vɔ lawɔ ndjoyatambiyaka lo wekelo.
10 Etena kakekaka misiɔnɛrɛ ɔmɔtshi l’onto Bible l’andja, ɔlɔngɔlɔngɔ ɔmɔtshi wadjasɛ lo wedi okina wa shinga akaye ndo akate dia kânga mbele misiɔnɛrɛ haye lakande dia ndjosawola la nde, nde akelɛ misiɔnɛrɛ dia nde ndja ndjeka la nde Bible. Aha la tâmu, misiɔnɛrɛ aketawɔ l’ɔngɛnɔngɛnɔ tshɛ, ndo ɔlɔngɔlɔngɔ ɔsɔ ekɔ lo tahame esadi esadi. Lo wodja ɔsɔ, apulushi memɛka Ɛmɛnyi lo mboka aha dia mbambola abuku wa lɛɛta, koko dia mbalɔmba Tshoto y’Etangelo kana Réveillez-vous ! weke katomba kana dia mbasha losaka lo sawo dimɔtshi diakawadia diakângɛnyangɛnya efula.
11. Kânga l’atei w’ehemba, kakɔna kakanyiya waa misiɔnɛrɛ wambokamba edja lo dikambo di’olimu awɔ?
11 Efula ka wanɛ wakatatɛ olimu wa misiɔnɛrɛ ambeta ɛnɔnyi 40 kana 50 wekɔ lo tetemala sambisha la kɔlamelo. Ɔsɔ mɛtɛ ekɔ ɛnyɛlɔ ka mbetawɔ ndo ka etete le so! Lo ɛnɔnyi ndekana 42 wetshi, atshukanyi amɔtshi wakakambe kâmɛ oko waa misiɔnɛrɛ lo wedja esato. Omi mbutaka ate: “Takahomana la ekakatanu efula. Ɛnyɛlɔ, takadisowɛ la malaria lo edja ka ɛnɔnyi 35. Koko, sho hatonyange pondjo dikambo dia yɛdikɔ yakatɔshi ya monga waa misiɔnɛrɛ.” Wadi kotshaka ate: “Tokongaka nshi tshɛ la akambo watotshutshuya dia monga la lowando. Olimu w’esambishelo ekɔ olimu w’ɔngɛnɔngɛnɔ efula, ndo bu wolo tatɛ wekelo wa Bible la anto. Etena kɛnayɛ ambeki wa Bible waya lo nsanganya ndo kayangawɔ dia mbeyana lam’asawɔ, ekɔ oko ase nkumbo mbasangana kâmɛ mbala tshɛ.”
Vɔ ‘wakashisha diangɔ tshɛ’
12. Ngande wɛnya onto dia mɛtɛ nde mbɔsaka Diolelo la nɛmɔ?
12 Etena kakatane omundji w’okanda didi di’oshinga wolo, nde “akatusundja kene tshe kaki landi, aka[dis]umbi.” (Mateu 13:46) Mbetawɔ dia shisha kɛnɛ kakoka mbɔsama la nɛmɔ ekɔ tshelo yɛnama le wanɛ wɔsa mɛtɛ Diolelo la nɛmɔ. Oko wakandahombe tôlɛ lo lotombo la Diolelo diaki Nzambi kâmɛ la Kristo, ɔpɔstɔlɔ Paulo akate ate: “Mete, dimi lambete diango so tshe anyanya dia ololo wa nimbitela Kristu Jesu Khumemi. Dimi lakashisha diango tshe dikambu diandi, lambudiala uku diango dia mbikadja, dia dimi kundja Kristu.”—Filipi 3:8.
13. Ngande wakɛnya onto ɔmɔtshi la lo wodja wa République tchèque ngandji kande otsha lo Diolelo?
13 Lo yoho yakɔ yâmɛ, anto efula ɛlɔ kɛnɛ wekɔ lo mbetawɔ dia sala etshikitanu wa weke lo nsɛnɔ yawɔ dia kondja ɛtshɔkɔ wa Diolelo. Ɛnyɛlɔ, lo Ngɔndɔ ka dikumi 2003, owandji ɔmɔtshi wa kalasa waya la ɛnɔnyi 60 wa lo wodja wa République tchèque akakondja dibuku Ewo katɔla otsha lo lɔsɛnɔ la pondjo, dibuku diatokimanyiya dia mbeka l’anto Bible. L’ɔkɔngɔ wa nde mbadia dibuku diakɔ, nde akayange Ɛmɛnyi wa Jehowa wa lo dihole diadjasɛnde mbala kakɔ ɔtɔi dia vɔ mbeka la nde Bible. Nde akasale ehamelo w’amɛna wa lo nyuma ndo esadi eto nde akatatɛ mbɔtɔ lo nsanganya tshɛ. Ko kayotota di’eyango waki lande wa nyanga dia vɔ mbɔvɔtɛ oko owandji w’osomba ndo l’ɔkɔngɔ nde ndjoyanga dia mbidja elongi dia vɔ mbɔvɔtɛ dia nde koma dipite na? Nde akayongaka la oyango okina, mbut’ate monga osambisha wa Diolelo. Nde akate ate: “Laki la akoka wa kahanya ekanda walembetshiya Bible efula le ambeki ami.” Nde akɛnya ndjakimɔ kande le Jehowa lo batizama lo ashi lo losanganya lakasalema lo ngɔndɔ k’esambele 2004.
14. a) Lokumu l’ɔlɔlɔ la Diolelo lekɔ lo tshutshuya miliyɔ y’anto dia sala dikambo diakɔna? b) Wembola akɔna w’ohomba wakokaso sho tshɛ ndjambola?
14 Miliyɔ nkina y’anto wa l’andja w’otondo wekɔ lo mbetawɔ lokumu l’ɔlɔlɔ la Diolelo lo yoho yakɔ yâmɛ. Vɔ ndja oma l’andja wa kɔlɔ ɔnɛ ndo wekɔ lo kolola l’onto lawɔ l’edjedja, wekɔ lo tshika angɛnyi awɔ w’edjedja, ndo wekɔ lo tshika eyango awɔ wa l’andja ɔnɛ. (Joani 15:19; Efeso 4:22-24; Jakoba 4:4; 1 Joani 2:15-17) Lande na kasalawɔ akambo asɔ tshɛ? Nɛ dia vɔ mbɔsaka dia ɛtshɔkɔ wa Diolelo diaki Nzambi ndeka la fwa ɛngɔ tshɛ kakoka dikongɛ nɛ di’akambo mbasha. Onde yoho yakɔ yâmɛ mbayaokayɛ lo dikambo dia lokumu l’ɔlɔlɔ la Diolelo? Onde wɛ tshutshuyamaka dia sala etshikitanu wahombama dia mbɔtɔnganyiya yoho yayɛ ya lɔsɛnɔ, lɔkɛwɔ layɛ, kana eyango ayɛ la kɛnɛ kalɔmba Jehowa? Sala dikambo sɔ ayokela ɛlɔlɔ kakianɛ ndo lo nshi yayaye.
Dinela diambokoma l’ekomelo kadiɔ
15. Kakɔna kakatama ɔnɛ ekambi waki Nzambi wayokisala lo nshi y’ekomelo?
15 Omembi w’esambo akafunde ate: “Wudja aye wayuyakimo l’ongenongeno, uku alimbi aye.” L’atei wa wanɛ wayakimɔ vɔamɛ mbele ndo ‘olui w’ɛlɔngɔlɔngɔ la esekaseka wele oko apɔpɔ wa longe’ ndo ‘olui wa woke wa wamato wasambisha lokumu l’ɔlɔlɔ.’ (Esambu 68:11; 110:3) Etombelo akɔna wamonga la etete, ndo yimba ya ndjahombia yele la ekambi waki Jehowa, apami, wamato, akɛnda kana epalanga w’anto lo nshi nyɛ y’ekomelo?
16. Sha ɛnyɛlɔ kɛnya welo wasala ekambi waki Nzambi dia kimanyiya anto akina dia vɔ mbeka akambo wendana la Diolelo.
16 Ombatshi mboka ɔmɔ kana opandjudi wa Diolelo wa lo tena tshɛ wa lo wodja wa Inde aki lo ndjakiyanya lo woho wakahombe ase mpoke ndekana miliyɔ hiende wa lo wodja ɔsɔ kimanyiyama dia mbeka awui wa Diolelo. (Isaya 35:5) Nde akɔshi yɛdikɔ ya mbɔtɔ lo kalasa kakawetshaka ɔtɛkɛta w’akanga a mpoke aha la mbɔsa ɛnɔnyi efula la Bangalore. Lɔkɔ, nde aki la akoka wa sambisha akanga a mpoke efula elongamelo ka Diolelo, ndo elui wa wekelo wa Bible wakâtema. L’ɔkɔngɔ wa mingu ngana tsho, anto ndekana 12 wakatatɛ ndja lo nsanganya lo Mbalasa ka Diolelo. L’ɔkɔngɔ diko, lo fɛtɛ kɛmɔtshi ka diwala, ombatshi mboka ɔsɔ akahomana l’ɔlɔngɔlɔngɔ ɔmɔtshi waki ehoke wakaye oma la Calcutta laki la wembola efula ndo lakɛnya nsaki ka mɛtɛ ka nyomeya akambo wendana la Jehowa. Koko, okakatanu ɔmɔtshi wakikɔ. Ɔlɔngɔlɔngɔ ɔsɔ akahombe kalola la Calcutta, lo etale ka kilɔmɛtɛlɛ 1600, dia nde totatɛ mbɔtɔ kalasa, ndo ndoko Ɔmɛnyi wa Jehowa lɛkɔ wakeyaka ɔtɛkɛta w’akanga wa mpoke. Lo mbidja welo wa mamba, nde aketawoya she dia nde mbetawɔ nde tɔɔtɔ kalasa la Bangalore woho wa nde totetemala la wekelo ande wa Bible. Nde akahame dimɛna lo nyuma, ndo l’ɔkɔngɔ w’ɔnɔnyi, nde akalambola Jehowa lɔsɛnɔ lande. Lo wedi ande, nde ekɔ lo mbeka Bible l’ase mpoke efula, mbidja ndo koshɛnde ka pami. Kakianɛ filialɛ ka lo Inde kekɔ lo nɔngɔsɔla di’ambatshi mboka mbeka ɔtɛkɛta w’akanga wa mpoke dia kimanyiya weho w’anto asɔ.
17. Kɔndɔla kɛnɛ kakayɛnyi dia kekɔ ekeketshelo ka lânde lo alapɔlɔ wa ɔnɔnyi w’olimu 2004 wele lo lɛkɛ 21 polo 24.
17 Lo lɛkɛ 21 polo 24 la periodikɛ kɛnɛ, wɛ ayotana alapɔlɔ wa l’andja w’otondo w’olimu w’esambishelo wakakambe Ɛmɛnyi wa Jehowa lo ɔnɔnyi w’olimu 2004. Ɔsa yema ya wenya dia sɛdingola alapɔlɔ akɔ, dia wɛ mɛna wɛmɛ dia ekambi waki Jehowa wa lo nkɛtɛ k’otondo wekɔ lo ndjasha tshɛ dia nyanga ‘didi di’oshinga wolo’ ɛlɔ kɛnɛ.
Totetemale ‘nyanga ntondo Diolelo’
18. Akambo akɔna waki Yeso kɔtɛkɛta lo wɛla w’omundji w’okanda, ndo lande na?
18 Naka sho nyomɔsɛdingola nto wɛla waki Yeso w’omundji w’okanda, kete tayɛna dia Yeso kɔtɛkɛta dia woho wakatetemala omundji w’okanda ɔsɔ nsɛna l’ɔkɔngɔ wa nde sondja diangɔ diande tshɛ. Anto amɔtshi koka mɛtɛ ndjambola ɔnɛ: ‘Ngande wakahombe omundji w’okanda tana diangɔ dia ndɛ, ahɔndɔ, luudu la ndala lam’ele nde aya ndoko kanga la ɛngɔ? Naa ohomba wakahombe monga la didi di’oshinga wolo sɔ le nde?’ Ngasɔ mbediɔ naka sho menda akambo lo yoho ya lo demba. Ko onde Yeso kondaka ambeki ande ɔnɛ: “Keli ntundu nyutayangi diulelu la ololo wa [Nzambi], ku diango so tshe diayuyala dianyu”? (Mateu 6:31-33) Kɛnɛ koleki ohomba lo wɛla ɔsɔ ele ohomba wa mɛnya ndjasha ka l’otema ɔtɔi le Nzambi ndo monga l’ohetoheto dikambo dia Diolelo. Onde sho koka kondja wetshelo ɔmɔtshi lo dikambo sɔ?
19. Wetshelo akɔna w’ohomba wakokaso kondja oma lo wɛla waki Yeso wa didi di’oshinga wolo?
19 Oyadi eke esadi wamboteka lokumu l’ɔlɔlɔ la diambo kana aya ɛnɔnyi efula wambotoyanga Diolelo ndo wewoyaso anto ɛtshɔkɔ wayodiela, sho pombaka tetemala mbɔsa Diolelo oko dikambo dioleki ohomba diangɛnangɛnaso ndo diadjaso yimba lɔkɔ. Tekɔ lo sɛna lo tena dia wolo, koko tekɔ la ɛkɔkɔ w’eshika wa mbetawɔ dia kɛnɛ katatayange ekɔ ɛngɔ ka mɛtɛ ndo ndoko ɛngɔ kekina kɛdimi la tɔ, l’ɛnyɛlɔ ka didi di’oshinga wolo diakatane omundji w’okanda. Akambo weta l’andja ndo ekotshamelo ka prɔfɛsiya ya lo Bible ekɔ tolembetelo ta shikaa tɛnya dia tekɔ lo sɛna ‘l’ekomelo ka dikongɛ nɛ di’akambo.’ (Mateu 24:3) Lo ɛnyɛlɔ k’omundji w’okanda, nyɛsɔ tɛnya ohetoheto wa l’otema ɔtɔi dikambo dia Diolelo diaki Nzambi ndo tɔngɛnangɛnake diɛsɛ diele laso dia sambisha lokumu l’ɔlɔlɔ.—Osambu 9:1, 2.
Onde wɛ akohɔ?
• Kakɔna kambokimanyiya lo edja k’ɛnɔnyi dia ohamelo monga l’atei w’atɛmɔdi wa mɛtɛ?
• Dionga diakɔna diɛnama le wanɛ wakamba oko waa misiɔnɛrɛ?
• Etshikitanu akɔna wakasale anto amɔtshi l’ɔtɛ wa lokumu l’ɔlɔlɔ la Diolelo?
• Wetshelo akɔna w’ohomba wakokaso kondja oma lo wɛla waki Yeso wa didi di’oshinga wolo?
[Tablo ka lo lɛkɛ 21-24]
ALAPƆLƆ W’OLIMU W’ƐMƐNYI WA JEHOWA WA L’ANDJA W’OTONDO L’ƆNƆNYI 2004
(Enda okanda)
[Esato wa lo lɛkɛ 26]
L’ɛnyɛlɔ k’omundji w’okanda, waa misiɔnɛrɛ wekɔ lo kondja ɛtshɔkɔ efula ɛlɔ kɛnɛ
[Osato wa lo lɛkɛ 27]
“Wudja aye wayuyakimo l’ongenongeno”