Totayangi Diolelo Diaki Nzambi Ntondo—Lo Kimɔka Elambo wa Lotombo Nshi Tshɛ
1 Wanɛ wayanga Diolelo ntondo mangemɛka nshi tshɛ dia tɛkɛta dikambo dia Jehowa la dia Diolelo diakinde. (Osam. 145:11-13) Nshi tshɛ sho kondjaka tena dia tombola lokombo lande ndo dia mbewoya lokumu l’ɔlɔlɔ. (Osam. 96:2) Tombola Jehowa aki dikambo di’ɔlɔ efula le omembi w’esambu lakate ate: “Nzambi mbayototombolaka lushi l’otondo.” (Osam. 44:8, NW) Naka ndo sho ndjâla la saki ka ngasɔ, kete tayokombolaka sambisha Diolelo tena tshɛ.
2 Jehowa koshikikɛ lofulo la wenya wahombaso momba lo dikambo di’olimu wa sambisha; koko, nde ekɔ lo tokeketsha dia sho mbotombolaka “nshi tshe.” (Heb. 13:15) Naka tekɔ l’etena, kete sho pombaka ndjatshutshuya dia mbetshaka wenya lomingu tshɛ lo tombola Jehowa. Naka ɔsɔku mbasalaso, kete ondo sho kokaka ndjalɔngɔsɔla woho wa ndjalaka ombatshi mboka wa tshanda tena la tena kânga lo pondjo. Le wanɛ wôkonga ambatshi mboka wa tshanda, vɔ kokaka nyanga woho wa ndjâla ambatshi mboka wa pondjo.
3 Oyadi akambo wele laso, onde kokaka sho kimɔ olambo ɔmɔtshi wa lotombo woleki woke? Ohetoheto ndjaka oma lo lowando. Lowando pɛtshahɛtshamaka oma lo wekelo w’onto ndamɛ wa Dui dia Nzambi ndo, sanganya ya l’etshumanelo tosokoyaka dia sho mɛnya lowando laso lo woho wasungana. Diokanelo dia ma ma la wanɛ watombola Jehowa l’ohetoheto ‘ayototshutshuya lo ngandji la l’elimu w’ɔlɔlɔ.’ (Heb. 10:24) Naka tayoyela tɛdikɔ tshɛ takɔsɛ etshumanelo, kete tayokoka kimɔ olambo wa lotombo woleki woke.
4 Anna, omvutshi wa omoto, akasha ɛnyɛlɔ ka dimɛna efula l’olimu wa Jehowa. Kânga mbakinde l’ɛnɔnyi 84, nde ‘kombetshaka ndoko lushi lo tɛmpɛlɔ, akamba olimu w’ekila la yanyi ndo l’otsho.’ (Luka 2:37) Nde akakambaka elimu tshɛ wa l’etshumanelo l’anima ande tshɛ, diɔ diakɔ diakandangɛnangɛnaka efula. Ɔkɔndɔ w’oma lo Bible w’olimu ande wa kɔlamelo wekɔ kiɔkɔ mɔtshi y’ekeketshelo le so.
5 Paulo akakeketsha wanɛ ‘wele la wolo dia vɔ mɛmba wɛɔdu wa wanɛ wele kema la wolo.’ (Romo 15:1) Ondo Akristo wele l’ohomba w’ekimanyielo kaso ka ngandji ndo k’ekeketshelo wekɔ l’atei w’etshumanelo kaso. Opandjudi ɔmɔtshi mbeyaka ndjâla paka l’ohomba a leeta loto kana ohomba w’ekimanyielo ka l’emunyi dia nde ntshɔ laso otsha la tosambisha. Okina mbeyaka nɛmba ko ondo tayokoka ndjâla l’akoka dia mbosha ekimanyielo kahombama dia ohetoheto ande l’olimu wa Diolelo pɛtahɛta nto. (1 Tes. 5:14) Ohetoheto aso wa ‘kanɛ ekilami l’ehomba awɔ’ ayɛnya saki kaso ka l’otema ɔtɔi ka nyomoleka tombola lokombo la Jehowa.—Rom. 12:13.
6 Hatotokoka mbadia kɛnɛ tshɛ kakashile Jehowa tosalɛ. Sho hatokokaki mbosha ɛngɔ kɛmɔtshi kɛdimi l’ɛtshɔkɔ ande tshɛ. Ɛkɔkɔ wekɔ efula wahika dia ‘ɛngɔ tshɛ kele la lumu tombola Jehowa!’—Osam. 150:6.