Ɛtshɔkɔ waya oma lo lokumu l’ɔlɔlɔ

“[Jehowa] akankiti iso dia dimi sambisha amenyi fono lukumu l’ololo. Ndi akantumi dia dimi nkonoya akanga w’etema wambate, . . .ndu dia samba antu tshe walela.”​—ISAYA 61:1, 2.

1, 2. (a) Yeso akandate ênde, ndo woho wakɔna wakandate dikambo sɔ? (b) Lokumu l’ɔlɔlɔ lakewoya Yeso lakela ɛtshɔkɔ akɔna?

LUSHI lɔmɔtshi la Sabato l’etatelo k’olimu ande, Yeso aki lo shinangɔnga ka la Nazarɛtɛ. Ɔkɔndɔ mbutaka ɔnɛ: “wakawusha buku dia umvutshi Isaya, ku ndi akombola wombo w’afundelu w’ekila, akenyi dihuli diakawafundi ati: Nyuma ka Khumadiondjo kambumbahema, ne dia ndi akankidia dia dimi nsambisha akanga a weula lukumu l’ololo.” Yeso kokomɛ lâsɔ, nde akadia avɛsa efula wele l’awui wa prɔfɛsiya. Oma lâsɔ, nde akadjasɛ ndo akate ate: ‘Ɛlɔ kɛnɛ, dui di’oma l’Afundelo diomanyu la mboka sɔ diamboshila kotshama.’​—Luka 4:16-21.

² Lo yoho shɔ mbakayaɛnya Yeso ndamɛ oko osambisha wakawatatshi dikambo diande, ombewoyi wa lokumu l’ɔlɔlɔ ndo ɔnɛ lela esambelo. (Mateu 4:23) Yeso aki mɛtɛ la lokumu l’ɔlɔlɔ la mbewoya anto! Nde akatɛ ampokami ande ate: “[Osase] wa la kete mbemi. One landjela, hakendakenda lu udjima, keli ndi ayuyala la [osase w]a lumu.” (Joani 8:12) Nde akate nto ate: “Naka nyu nyayutshikala lu diui diami, keti ambeki ami mete mbenyu. Nyu nyayeya akambu wa mete, ku akambu wa mete wayunyutshungula.” (Joani 8:31, 32) Eelo mɛtɛ, Yeso aki “la aui wa lumu la pundju.” (Joani 6:68, 69) Osase, lɔsɛnɔ, lotshungɔ, wekɔ mɛtɛ ɛtshɔkɔ wahombaso mbɔsa la kɛnɛmɔ k’efula!

3. Naa lokumu l’ɔlɔlɔ lakasambisha ambeki waki Yeso?

³ Lo Pɛntɛkɔsta ka l’ɔnɔnyi 33 T.D., ambeki wakatetemala kamba olimu waki Yeso w’esambishelo. Vɔ wakasambisha ase Isariyɛlɛ ndo ase wedja “lukumu l’ololo . . . la diulelu.” (Mateu 24:14; Etsha 15:7; Romo 1:16) Wanɛ wakalietawɔ wakakondja diaaso dia mbeya Jehowa Nzambi. Vɔ wakatshungɔ oma lo lɔhɔmbɔ la l’ɛtɛmwɛlɔ ndo wakakome anto amɔtshi wa lo wodja w’oyoyo wa lo nyuma, mbut’ate “Isariyele wa [Nzambi],” wele anto wa lɔkɔ wekɔ l’elongamelo ka mbolɛ pondjo pondjo l’olongo vɔ la Nkumɛwɔ, Yeso Kristo. (Ngalatiya 5:1; 6:16; Efeso 3:5-7; Kolosai 1:4, 5; Enyelo 22:2) Ɔsɔ aki mɛtɛ ɛtshɔkɔ wa mamba!

Esambishelo kasalema ɛlɔ kɛnɛ

4. Lo yoho yakɔna yakotshama olimu w’esambishelo ka lokumu l’ɔlɔlɔ ɛlɔ kɛnɛ?

⁴ Ɛlɔ kɛnɛ, Akristo w’akitami w’esɔ wele lo sukamɛ oma le “limba la wuki” l’“ekoko ekina,” latatetemala la fula tsho, wekɔ lo tetemala la kotsha olimu wa prɔfɛsiya wakawasha Yeso ntondo. (Enyelo 7:9; Joani 10:16) Etombelo wamonga ele lokumu l’ɔlɔlɔ lambosambishama lo yɛdikɔ yelɔ latasambishamaka ndoko lushi. Lo wedja 235 ndo bɛtshi dia nkɛtɛ, Ɛmɛnyi wa Jehowa wakatshu dia “sambisha amenyi fono lukumu l’ololo. . . . nkonoya akanga w’etema wambate, dia mvutela fumbi dia vo ndjala la ndjadjasela, la dia mvutela asi lukanu dia vo ntshungo; dia nsanyia antu di’eleku ka ngandji ka mamba ka [Jehowa] la dia lushi l’esombweyo ka [Nzambi k]asu, ndu dia samba antu tshe walela.” (Isaya 61:1, 2) Ɔnkɔnɛ, olimu w’esambishelo w’Akristo wekɔ lo tetemala la mbela wane wele “lu asui tshe” ɛtshɔkɔ ndo esambelo ka mɛtɛ.​—2 Koreto 1:3, 4.

5. Lo kɛnɛ kendana l’esambishelo ka lokumu l’ɔlɔlɔ, ngande wotshikitanyi Ɛmɛnyi wa Jehowa l’ɛtɛmwɛlɔ wa lo Lokristokristo?

⁵ Ekɔ mɛtɛ di’ɛtɛmwɛlɔ wa lo Lokristokristo wekɔ lo sukɛ weho ɛmɔtshi w’esambishelo. Efula tomaka wa misiɔnɛrɛ dia tetɛka anto ambetawudi lo wedja ekina. Ɛnyɛlɔ, jurunalɛ mɔtshi y’ase ɔtɛmwɛlɔ w’Ɔrtɔdɔksɛ (The Orthodox Christian Mission Center Magazine) tɛkɛtaka dikambo di’olimu wa wa misiɔnɛrɛ y’ase ɔtɛmwɛlɔ ɔsɔ lo wodja wa Madagascar, w’Afrique du Sud, wa Tanzanie, ndo lo wodja wa Zimbabwe. Koko, l’Ɔtɛmwɛlɔ w’ase Ɔrtɔdɔksɛ, ndo l’ɛtɛmwɛlɔ ekina wa lo Lokristokristo, efula k’anto wakenga ɛtɛmwɛlɔ ɛsɔ hawosha lonya l’olimu ɔsɔ. Koko, otshikitanyi l’anto asɔ, Ɛmɛnyi wa Jehowa tshɛ wamboyakimɔka le Nzambi salaka la wolo dia sambisha. Vɔ mbeyaka dia sambisha lokumu l’ɔlɔlɔ ekɔ djembetelo ya mbetawɔ kawɔ ka mɛtɛ. Paulo akate ate: “Ne dia untu letawo l’utema andi, atuyindjamaka; la one lashula l’unyo andi, atushimbamelaka.” Mbetawɔ kahatshutshuya onto l’etsha, ekɔ mbetawɔ kambovɔ.​—Romo 10:10; Jakoba 2:17.

Lokumu l’ɔlɔlɔ lela ɛtshɔkɔ wa pondjo

6. Naa lokumu l’ɔlɔlɔ lele lo sambishama ɛlɔ kɛnɛ?

⁶ Ɛmɛnyi wa Jehowa wekɔ lo sambisha lokumu l’ɔlɔlɔ loleki tshɛ dimɛna. Vɔ mbifolaka Bible yawɔ ndo mɛnyaka wanɛ wetawɔ losango lawɔ ɔnɛ Yeso akalambola lɔsɛnɔ lande dia ndiholɛ anto mboka ka vɔ ndjasukanya la Nzambi, kondja edimanyielo ka pɛkato, ndo nongamɛ kondja lɔsɛnɔ la pondjo. (Joani 3:16; 2 Koreto 5:18, 19) Vɔ mbewoyaka dia Diolelo diaki Nzambi diakashile la shikikɛma l’olongo l’ɛlɔmbwɛlɔ ka Yeso Kristo, Nkumekanga k’okitami w’esɔ, ndo ɔnɛ kem’edja, diɔ diayonya akambo wa kɔlɔ tshɛ oma la nkɛtɛ ndo mbela Paradiso. (Enyelo 11:15; 21:3, 4) Lo ndjela ekotshamelo ka prɔfɛsiya k’Isaya, vɔ mbewoyaka anyawɔ anto dia kakianɛ tekɔ l’“eleku ka ngandji ka mamba ka [Jehowa]” mbut’ate, etena kakakoke anto mbetawɔ lokumu l’ɔlɔlɔ. Vɔ mbewolaka anto nto dia kem’edja “lushi l’esombweyo ka [Nzambi],” mbut’ate etena kayolanya Jehowa atshi wa kɔlɔ tshɛ wahayatshumoya layanga ndja.​—Osambu 37:9-11.

7. Akambo akɔna wɛnya kamɛ kele lam’asa Ɛmɛnyi wa Jehowa, ndo bonde kewɔ la kamɛ ka ngasɔ?

⁷ L’andja ɔnɛ wadiɛnɛ l’akambo wa kandji ndo la mpokoso, ɔsɔ mbele tshɔyi ya lokumu l’ɔlɔlɔ layela anto ɛlɔlɔ wa pondjo. Wanɛ walietawɔ komaka anto wa l’atei wa nkumbo k’Akristo k’anto l’ɔnango kele kamɛ l’andja w’otondo ndo wahetawɔ dia etshikitanu wa wedja, waoho, kana ekondjelo mbakakitola. Vɔ ‘wambɔlɔtaka ngandji, nɛ dia tɔ mbele dimama dia kokele.’ (Kolosai 3:14; Joani 15:12) Dikambo sɔ diakɛnama ɔnɔnyi wetshi lo wedja ɛmɔtshi wa l’Afrikɛ. La pindju kɛmɔtshi, ekoma wakatondɔtondɔ lo kapitalɛ ka wodja ɔsɔ. Wakalangaka mbahola owandji la wolo oma l’okudi. Lam’akayomɛka waoho wotshikitanyi ndjakana l’ɔtɛ wa dikambo sɔ, anto wakatɛkɛta kɔlɔ efula lo dikambo dia nkumbo kɛmɔtshi k’Ɛmɛnyi wa Jehowa lo woho wakawashɛ Ɛmɛnyi wa anyawɔ wa lo dioho dikina. Ase nkumbo kɛsɔ wakakadimola ɔnɛ: “Paka Ɛmɛnyi wa Jehowa ato mbele lo luudu laso.” Le wɔ, etshikitanu wa waoho komonga ohomba nɛ dia ngandji k’Akristo keketshaka wanɛ wele l’ohomba w’ekeketshelo. Onto ɔmɔtshi la lo nkumbo kɛsɔ laki komonga Ɔmɛnyi wa Jehowa akate ate: “Anto wa l’ɛtɛmwɛlɔ ekina tshɛ wakafunge atɛmɔdi wa anyawɔ, onyake Ɛmɛnyi wa Jehowa ato mbaki kosala dikambo sɔ.” Awui efula wa woho ɔsɔ w’oma lo wedja wele l’efukutanu mɛnyaka di’Ɛmɛnyi wa Jehowa wekɔ mɛtɛ la ‘ngandji le nkumbo kawɔ k’otondo k’anto l’ɔnango.’​—1 Petero 2:17.

Lokumu l’ɔlɔlɔ tshikitanyaka anto

8, 9. (a) Etshikitanu akɔna wakasale wanɛ wetawɔ lokumu l’ɔlɔlɔ? (b) Naa bɛnyɛlɔ diɛnya nkudu kele la lokumu l’ɔlɔlɔ?

⁸ Lokumu l’ɔlɔlɔ mendanaka la kɛnɛ kakelɛ Paulo ate ‘lɔsɛnɔ la kakianɛ ndo lɔnɛ layaye.’ (1 Timote 4:8) Lɔ halosha anto elongamelo ka mamba ndo ka shikaa kendana la nshi yayaye keto, koko lɔ ndowanyaka nto ndo ‘lɔsɛnɔ la kakianɛ.’ Lo ɔm’ɔmɔ, Ɛmɛnyi wa Jehowa wekɔ lo nɔmbwama l’Ɔtɛkɛta wa Nzambi, dia mbɔtɔnganyiya nsɛnɔ yawɔ la lolango laki Nzambi. (Osambu 119:101) Woho wakɛnɛmɔlawɔ waonga wele oko losembwe la kɔlamelo, mbakimanyiyaka dia vɔ ndɔta lonto l’oyoyo.​—Efeso 4:24.

⁹ Tɔshi ɛnyɛlɔ kaki Franco. Nde akikɔ ɛkɛlɛkɛlɛ. Lo dikambo tshɛ dia kɔlɔ diakatombaka nde akomalaka efula ndo akodiodiaka diangɔ. Wadɛnde akeke Bible nde l’Ɛmɛnyi wa Jehowa, ndo ɛnyɛlɔ kande k’Okristo kakatatɛ kimanyiya Franco yema yema polo ndo lo nde mɛna dia nde pombaka tshikitanya dionga diande. Nde akayokomɛka la mbeka nde la wɔ Bible ndo akayongaka l’akoka wa kɛnɛmɔla elowa wa nyuma oko ki la ndjakimɛ. (Ngalatiya 5:22, 23) Nde aki l’atei w’anto 492 wakabatizama lo wodja wa Belgique l’ɔnɔnyi w’olimu wa 2001. Tɔshi nto ɛnyɛlɔ kaki Alejandro. Ɔlɔngɔ wa pami ɔsɔ akakome fumbe ka nɔnɔ dia wolo diakayokonyaka polo lo nde ndjonga la yoho ya lɔsɛnɔ yoleki tshɛ kɔlɔ. Nde akasondjaka kɛnɛ tshɛ kakandakokaka monga latɔ dia kondja falanga ya somba nɔnɔ dia wolo. Lam’akinde l’ɛnɔnyi 22, Ɛmɛnyi wa Jehowa wakɔlɔmbɛ dia mbeka la nde Bible, ko nde aketawɔ. Nde akadiaka Bible lushi tshɛ, ndo akɔtɔka lo nsanganya. Esadi eto, nde akonge la lɔsɛnɔ la pudipudi, woho ɔnɛ wele la ntondo ka ngɔndɔ shamalo, nde akakoke mbisha lonya l’olimu w’esambishelo, ndo aki l’atei w’anto 10115 wakakambe olimu ɔsɔ lo wodja wa Panama ɔnɔnyi wetshi.

Lokumu l’ɔlɔlɔ lekɔ ɔtshɔkɔ le akanga wa memakana

10. Waa na wetawɔ lokumu l’ɔlɔlɔ, ndo ngande watshikitanyawɔ yoho yawɔ ya mɛna akambo?

¹⁰ Isaya akatatshi dia lokumu l’ɔlɔlɔ layosambishama le akanga wa memakana. Waa na wele akanga wa memakana asɔ? Vɔ mbetawɔ lo dibuku di’Etsha ɔnɛ “wane wakasonwama lu lumu la pundju.” (Etsha 13:48) Vɔ wekɔ anto wele la ndjakitshakitsha wa lo weho w’atshunda w’anto tshɛ, wanɛ wetawɔ losango l’akambo wa mɛtɛ. Anto asɔ mbekaka ɔnɛ sala lolango laki Nzambi mbelaka ɛlɔlɔ woleki kɛnɛ tshɛ kakokawɔ kondja oma l’elimu wa l’emunyi. (1 Joani 2:15-17) Ngande wananda Ɛmɛnyi wa Jehowa etema w’anto l’olimu awɔ w’esambishelo na?

11. Lo ndjela Paulo, ngande wahomba sambishama lokumu l’ɔlɔlɔ?

¹¹ Tɔsɛdingole ɛnyɛlɔ kaki ɔpɔstɔlɔ Paulo, lakafundɛ ase Kɔrɛtɔ ate: “Anyasu, lam’akamayi le nyu dimi kundja la aui wa mamba kana wa yimba, dia ndjunyusambisha diui dia [Nzambi]. Ne dia dimi kunsanguya dia mbeya dikambu dikina l’atei anyu, tshikima dia Jesu Kristu, lakadiakema l’utamba [w’asui].” (1 Koreto 2:1, 2) Paulo konyanga dia mambiya ampokami ande la akambo wakandeke. Nde aketshaka paka akambo wakoshikikɛ Nzambi mbut’ate akambo watanaso ɛlɔ kɛnɛ lo Bible. Tende nto woho wakakeketsha Paulo Timɔtɛ laki onyande osambisha. Nde akokeketsha ate: ‘Osambishake ɔtɛkɛta ndo otshake dikambo sɔ l’etete tshɛ.’ (2 Timote 4:2) Timɔtɛ akahombe sambisha ‘ɔtɛkɛta,’ mbut’ate losango laki Nzambi. Paulo akafundɛ Timɔtɛ nto ate: “Utetemali dia ndjakimo le [Nzambi] uku untu lambuluwana, uku usi ulimu laha la dikambu dia mbutshama sonyi. Enya antu aui wa mete w’usimbwi atu.”​—2 Timote 2:15.

12. Ngande wakitanyiya Ɛmɛnyi wa Jehowa ɛtɛkɛta waki Paulo ndo wayelawɔ ɛnyɛlɔ kande ɛlɔ kɛnɛ?

¹² Ɛmɛnyi wa Jehowa ndjelaka ɛnyɛlɔ kaki Paulo, ndo kitanyiyaka ɛtɛkɛta ande wakandatɛ Timɔtɛ. Vɔ mbeyaka nkudu kele l’Ɔtɛkɛta wa Nzambi ndo vɔ kambaka la wɔ dimɛna etena kayangawɔ sambisha anyawɔ ɛtɛkɛta w’amɛna wele l’elongamelo ndo l’esambelo. (Osambu 119:52; 2 Timote 3:16, 17; Heberu 4:12) Mɛtɛ, vɔ kambaka dimɛna l’ekanda walembetshiya awui wa lo Bible woho w’anto wayasha kondja ewo k’efula ka Bible etena kewɔ kema l’olimu wa kamba. Koko mbala tshɛ vɔ nyangaka dia mɛnya anto ɛtɛkɛta w’oma l’Afundelo. Vɔ mbeyaka di’Ɔtɛkɛta wa Nzambi wayonanda etema w’anto wele la ndjakitshakitsha. Ndo mbetawɔ kawɔ nto keketshamaka etena kakambawɔ l’Afundelo lo yoho shɔ.

‘Esambelo le wanɛ tshɛ walela’

13. L’ɔnɔnyi 2001, naa akambo wakatombe wakakonya dia esambelo monga ohomba efula le wanɛ walela?

¹³ Mpokoso efula yakatombe l’ɔnɔnyi wa 2001, ndo l’ɔtɛ wa dikambo sɔ, anto efula wakonge l’ohomba w’esambelo. Lo Ngɔndɔ ka Divwa k’ɔnɔnyi wetshi, mpokoso kɛmɔtshi ka woke kakatombe l’États-Unis. L’osomba wa New York waa terroristes wakalanya mvudu hiende ya weke y’etajɛ yelɛwɔ World Trade Center ndo dihole dialɔmbɔla akambo w’asɔlayi dielɛwɔ Pentagon diele suke l’osomba wa Washington. Kɛdi wodja w’otondo w’États-Unis wakahandjɔ wɔɔngɔ. Lo menda akambo asɔ, Ɛmɛnyi wa Jehowa wakasale la wolo tshɛ dia kotsha olimu awɔ wa ‘samba wanɛ tshɛ walela.’ Tayanga shila akambo angana ato wɛnya woho wasalawɔ dikambo sɔ.

14, 15. Lo waaso ahende wotshikitanyi, ngande wakakoke Ɛmɛnyi wa Jehowa kamba l’avɛsa dimɛna dia samba wanɛ waki lo ndela?

¹⁴ Kadiyɛso kɛmɔtshi kakamba olimu wa lo tena tshɛ akasukana oya le osekaseka ɔmɔtshi wakatasambaka la nde mboka ndo akawombola kɛnɛ kakanyiyande lo kɛnɛ kendana la mpokoso ka woke keke katomba l’Amérique. Osekaseka ɔsɔ akatatɛ ndela. Nde akate ate nde hayaoke dimɛna kânga yema ndo akakombola dia kana kadiyɛso kɛsɔ koka mbokimanyiya lo yɛdikɔ mɔtshi. Kadiyɛso kɛsɔ akawotɛ dia Nzambi ndjakiyanyaka dikambo diakiso sho tshɛ, ko akawadiyɛ Isaya 61:1, 2. Ɛtɛkɛta w’oma le Nzambi ɛsɔ wakakotola yambalo y’osekaseka ɔsɔ wakate dia onto tshɛ aki lo delo. Nde aketawɔ traktɛ ndo akalɔmbɛ kadiyɛso kɛsɔ dia nde ndja ndjôsambisha lakande.

¹⁵ Ɛmɛnyi wa Jehowa ɛmɔtshi ehende, wanɛ waki l’olimu w’esambishelo wakatane pami kɛmɔtshi akamba lo dihole diakande luudu lande. Vɔ wakawɛnya ɛtɛkɛta ɛmɔtshi w’esambelo w’oma l’Afundelo lo kɛnɛ kendana la woho wakahandjɔ mvudu hiende y’etajɛ yelɛwɔ World Trade Center. Nde aketawɔ, ko vɔ wakawadiyɛ 2 Koreto 1:3-7, lɛnɛ atanaso ɛtɛkɛta w’ɔnɛ: ‘Esambelo . . . katoyakaka oma le Kristo.’ Pami kɛsɔ akangɛnangɛna efula lo woho wakatakeketshaka Ɛmɛnyi ɛsɔ anto akina, ndo nde akawatɛ ate: “Nzambi kami anyɔtshɔkɔlɛ l’ɔtɛ w’olimu wa dimɛna efula watanyakambe.”

16, 17. Naa bɛnyɛlɔ dihende diɛnya nkudu kele la Bible dia kimanyiya anto wele la nyangu ndo l’ekiyanu l’ɔtɛ wa mpokoso yatomba?

¹⁶ Ɔmɛnyi ɔmɔtshi wa Jehowa wakatshu dia tembola mama kɛmɔtshi kakɛnya saki akatotana ɔnaki mama kɛsɔ la ngelo. Nde akolembetshiya dia nde aki la kandji efula lo menda kɛnɛ kakasalaka asukanyi ande l’ɔkɔngɔ wa mpokoso kɛnɛ keke katomba. Ɔnaki mama kɛsɔ akâmbe heyama lo woho wakɔshi Ɔmɛnyi wa Jehowa ɔsɔ etena kande dia tembolaka anto ndo mbeya nganɛ wasɛnawɔ. Nde akatɛ Ɔmɛnyi wa Jehowa ɔsɔ dia nde akakambaka suke la mvudu yakɔ ya weke y’etajɛ yelɛwɔ World Trade Center etena kakatombe mpokoso kɛsɔ ndo nde akɛnyi woho wakete dikambo sɔ tshɛ. Lam’akandambola bonde ketawɔ Nzambi di’anto sowaka nganɛ, Ɔmɛnyi wa Jehowa ɔsɔ akawadiyɛ avɛsa amɔtshi oma lo Bible, mbidja ndo Osambu 37:39, wata ɔnɛ: “Keli panda k’antu w’ololo keko uma le [Jehowa], ndi keli usuko awo lu nshi ya pa.” Pami kakɔ akambola l’ɔlɔlɔ tshɛ dia mbeya bonde kakasalaka Ɔmɛnyi wa Jehowa ɔsɔ nde la nkumbo kande ngasɔ, ndo nde akɔ̂lɔmbɛ dia nde nyomoya nto woho wa vɔ ndjosawola, ndo akangɛnangɛna diembwelo diakinde efula.

¹⁷ L’atei wa nunu di’anto wele lo ndela, wakasambema oma le Ɛmɛnyi wa Jehowa l’ɔkɔngɔ wa mpokoso ka woke kɛsɔ, mbaki ndo osekaseka ɔmɔtshi wele, Ɛmɛnyi wa Jehowa wakahomana la nde etena kakawatembolaka asukanyi awɔ. Nde aki la lonyangu loleki tshɛ l’ɔtɛ wa kɛnɛ kakatombe kɛsɔ ndo akahokɛ lotui etena kakadiaka Ɛmɛnyi wa Jehowa ɛsɔ Osambu 72:12-14 wata ɔnɛ: “Ndi kameli uhumbi lam’awulelelandi, ndu usi wula laha la ukimanyidi pupu. Ndi kukaki amenyi fono la asi wula ketshi, kamelaki nyuma ya amenyi fono. Ndi katshunguli nyumu yawo uma le akang’a lukesu la wa ngala. Dikila diawo diayuyala ushinga a wulu lu ashu andi.” Ɛtɛkɛta ɛsɔ wakonge l’etombelo w’amɛna mɛtɛ! Osekaseka ɔsɔ akalɔmbɛ Ɛmɛnyi wa Jehowa dia mbadia avɛsa asɔ nto ndo akalɔmbɛ dia vɔ mbɔtɔ lo luudu lande dia vɔ tetemala la sawo. L’ekomelo ka sawo diawɔ, vɔ wakatatɛ wekelo wa Bible.

18. Ngande wakakimanyiya Ɔmɛnyi ɔmɔtshi wa Jehowa anyande lam’akawɔlɔmbɛ dia mbasalɛ dɔmbɛlɔ?

¹⁸ Ɔmɛnyi ɔmɔtshi wa Jehowa ekɔ lo kamba lo rɛstora ɔmɔtshi wele lo dihole di’akanga w’ɛngɔnyi lɛnɛ ele anto kondjashaka ntondo lo lokumu l’ɔlɔlɔ la Diolelo. Koko, l’ɔkɔngɔ wa mpokoso kɛsɔ, anto wa lo dihole sɔ wakatshimbe wɔɔngɔ efula. La dikɔlɔ dia Lushi la Tanu, l’ɔkɔngɔ wa mpokoso kɛsɔ, owandji wa rɛstora akalɔmbɛ anto tshɛ dia vɔ tomba yema l’andja wokime wa buji, ndo tshikala ki lo tshanda mɔtshi dia mbohɔ wanɛ wovwe lo mpokoso kɛsɔ. Dia nde nɛmiya kanyi yawɔ, ɔnangɛso ɔsɔ akatombe l’andja nde lawɔ ndo akemala ki lo wedi ɔmɔtshi. Owandji ɔsɔ akeyaka dia nde aki Ɔmɛnyi wa Jehowa, ɔnkɔnɛ, l’ɔkɔngɔ w’anto tshikala ki dia mbohɔ dikambo dia wanɛ wakashisha nyumu yawɔ, nde akalɔmbɛ Ɔmɛnyi wa Jehowa ɔsɔ dia sala dɔmbɛlɔ lo lokombo l’anto tshɛ. Ɔnangɛso ɔsɔ aketawɔ. Lo dɔmbɛlɔ diande, nde akatɛkɛta dikambo di’anto tshɛ walela l’andja w’otondo ndo akate di’anto asɔ hawohombe ndelaka aha la monga l’elongamelo. Nde akatɛkɛta dikambo di’etena kele akambo wa kɔlɔ wa ngasɔ hawotosalema nto, ndo akate di’anto tshɛ kokaka ndjasukanya oya le Nzambi k’esambelo lo kondja ewo k’oshika k’oma lo Bible. L’ɔkɔngɔ wa vɔ mbuta “Amɛ,” owandji ɔsɔ, kamɛ ndo anto ndekana 60 wakatombe l’andja wa rɛstora, wakaye oya le Ɔmɛnyi wa Jehowa ɔsɔ, wakawosha losaka, lo mbuta dia watokaka dɔmbɛlɔ dia dimɛna efula ngasɔ ndoko lushi.

Wekɔ tshondo y’ɔtshɔkɔ le anto

19. Naa ɛnyɛlɔ kɛmɔtshi kɛnya di’anto mbeyaka ɛlɛmbɛ wa lâdiko w’Ɛmɛnyi wa Jehowa?

¹⁹ Djekoleko lo nshi hiende nyɛ, atshunda w’anto wele Ɛmɛnyi wa Jehowa wekɔ lo kamba olimu lɛkɔ wekɔ lo kondja wahɔ efula oma le wɔ, oko wamboshola anto efula dikambo sɔ. Eelo mɛtɛ, anto asɔ watadje wɔladi, wele la losembwe ndo la lɔkɛwɔ l’ɔlɔlɔ wekɔ la shɛngiya y’ɔlɔlɔ le anyawɔ anto. Lo wodja ɔmɔtshi wa lo Asie centrale, Ɛmɛnyi wa Jehowa wakahomana l’owandji ɔmɔtshi w’asɔlayi wambolongolaka pasiɔ wa lo tshunda dimɔtshi diendana l’akambo wa lotui tshitshi. Nde akate dia wakɔlɔmbɛ mbala kɛmɔtshi dia nde sala eyangelo lo kɛnɛ kendana l’ɛlɔngɔswɛlɔ w’ɛtɛmwɛlɔ wotshikitanyi. Koko lam’akandasale eyangelo lo kɛnɛ kendana l’Ɛmɛnyi wa Jehowa, nde akâmbe heyama lo menda losembwe ndo lɔkɛwɔ l’ɔlɔlɔ lele lawɔ. Nde akandola mbetawɔ ka nge kele lawɔ ndo woho ɔnɛ wele wetshelo awɔ tomba oma l’Afundelo. Pami kɛsɔ aketawɔ mbeka Bible.

20. (a) Alapɔlɔ w’Ɛmɛnyi wa Jehowa w’ɔnɔnyi wetshi ɛnyawɔ? (b) Kakɔna kɛnya di’olimu efula wa kamba wekekɔ ndo ngande wɔsaso diɛsɛ diaso dia sambisha?

²⁰ Oma lo bɛnyɛlɔ dingana to dioshidiso lo sawo nɛ, l’atei wa nunu dia bɛnyɛlɔ diakokaso kɔndɔla, tambɛna di’Ɛmɛnyi wa Jehowa wakakambe lotumu l’efula l’ɔnɔnyi w’olimu wa 2001.a Vɔ wakasawola la miliyɔ y’anto, wakasambe anto efula waki lo ndela, ndo olimu awɔ w’esambishelo wakatshɔkwama. Anto 263 431 wakayakimɔ le Nzambi lo nongola batismu. L’andja w’otondo, lofulo l’esambisha lakadɛ pursa 1,7. Ndo woho ɔnɛ wele anto 15 374 986 wakɔtɔ lo Eohwelo ka nyɔi ka Yeso kasalema ɔnɔnyi tshɛ mɛnyaka dia olimu efula wa kamba wekekɔ. (1 Koreto 11:23-26) Nyɛsɔ totetemale la nyanga akanga wa memakana wetawɔ lokumu l’ɔlɔlɔ. Ndo edja tshɛ kakatatetemala ɔnɔnyi wa ngandji ka mamba waki Nzambi, nyɛsɔ totetemale la samba “akanga w’etema wambate.” Tekɔ lo kamba mɛtɛ olimu wa dimɛna efula! Lo mɛtɛ, sho tshɛ ngɛnangɛnaka ɛtɛkɛta ɛnɛ waki Isaya wata ɔnɛ: “Dimi layongenangena le [Jehowa]. Utema ami ayutamanya ngenangena le [Nzambi k]ami.” (Isaya 61:10) Nzambi atetemale kamba la so etena kende lo kotsha ɛtɛkɛta ɛnɛ wa prɔfɛsiya w’ɔnɛ: “Osoku mbayomenya Khumadiondjo [Jehowa] panda la lutumbu la ntundu ka wedja tshe.”​—Isaya 61:11.

[Nɔtɛ ka l’ɛse ka dikatshi]

Onde wɛ akohɔ?

• Ngande wakatshɔkwama akanga wa memakana la lokumu l’ɔlɔlɔ lakasambisha Yeso?

• Ɛtshɔkɔ akɔna wakalongola wanɛ waketawɔ esambishelo k’ambeki wa Kristo wa lo ntambe ka ntondo?

• Ngande wambɔtshɔkwama wanɛ wetawɔ lokumu l’ɔlɔlɔ ɛlɔ kɛnɛ?

• Ngande wɔsaso diɛsɛ diaso dia monga esambisha?

[Tablo ka lo lɛkɛ 29-32]

ALAPƆLƆ W’OLIMU W’ƐMƐNYI WA JEHOWA WA L’ANDJA W’OTONDO L’ƆNƆNYI 2001

(Enda okanda)

[Esato wa lo lɛkɛ 25]

Ɛmɛnyi wa Jehowa hawohɛ pondjo ɔkɛndɛ awɔ wa sambisha

[Esato wa lo lɛkɛ 27]

Wanɛ wetawɔ lokumu l’ɔlɔlɔ komaka anto wa lo nkumbo ka l’andja w’otondo k’anto l’ɔnango