Onde wɛ ekɔ la kɔlamelo lo akambo tshɛ?
“One leli la kolamelu lu diango diuleki tshitshe, eko la kolamelu ndu lu diango diuleki efula.”—LUKA 16:10.
1. Naa yoho mɔtshi yele Jehowa la kɔlamelo?
ONDE wɛ ambɛnaka kɛnɛ kakomɛ dɛdi di’osongo etena katawande wonya? Eelo, woke adiɔ tatshikitanaka ndo diɔ tengesɔka! Mbala efula welo wadja anto ndo alaka awɔ tatshikitanaka oko dɛdi. Koko, Jehowa Nzambi hatshikitana. Ombeki Jakɔba akate lo dikambo diande ate: “Shi yanyi, lahakadimo leli pupu pundju [kana, “oko watotshikitanaka dɛdi lo tengesɔ”].” (Jakoba 1:17) Jehowa hatshikitana ndo hendɛ le onto, oyadi lo akambo woleki totshitshɛ. Nde ekɔ ‘Nzambi ka kɔlamelo.’ —Euhwelu k’Elembe 32:4.
2. a) Lande na kahombaso ndjasɛdingola shoamɛ dia menda kana tekɔ la kɔlamelo? b) Ambola akɔna wendana la kɔlamelo wayangaso sɛdingola?
2 Ngande wɔsa Nzambi kɔlamelo ya atɛmɔdi ande? Nde mbaɔsaka woho wakawaɔsaka Davidi, lakate lo dikambo diawɔ ate: “Ashu ami weko le akanga wa kolamelu wa lu [nkɛtɛ], dia vo mbidjaseka la mi. One latokendakendaka lu mbuka k’ololo kayuyala ukambi ami.” (Osambu 101:6) Eelo, Jehowa ngɛnangɛnaka kɔlamelo yaki ekambi ande. Diɔ diakɔ diakafunde ɔpɔstɔlɔ Paulo ate: “Ntu li alami, dieli la untu l’untu dia ndjala la kolamelu.” (1 Koreto 4:2) Alembetshiya monga la kɔlamelo? Lo akambo akɔna wa lo lɔsɛnɔ wahombaso monga la kɔlamelo? Ɛtshɔkɔ akɔna waya oma lo ‘kɛndakɛnda lo mboka k’ɔlɔlɔ’?
Kɛnɛ kalembetshiya monga la kɔlamelo
3. Kakɔna kashikikɛ dia kana tekɔ la kɔlamelo?
3 Heberu 3:5 mbutaka ɔnɛ: “Mose aki la kolamelu . . . uku ukambi.” Kakɔna kakakonya ɔprɔfɛta Mɔsɛ dia nde monga la kɔlamelo? Lo wokelo wa tabɛrnakɛlɛ, “Mose akatshi; akambu tshe wakawutela [Jehowa], mbakandatshi.” (Etumbelu 40:16) Oko weso atɛmɔdi waki Jehowa, sho mɛnyaka kɔlamelo yaso lo mbokambɛ olimu la okitanyiya tshɛ. Dui sɔ mendanaka nto la woho watshikalaso la kɔlamelo le Jehowa kânga l’atei w’ekakatanu kana w’ehemba wa wolo. Koko, tondoya ehemba wa weke kema dui diamɛ diashikikɛ kɔlamelo yaso. Yeso akate ate: “One leli la kolamelu lu diango diuleki tshitshe, eko la kolamelu ndu lu diango diuleki efula. One leli la lukesu lu diango diuleki tshitshe, eko la lukesu ndu lu diango diuleki efula.” (Luka 16:10) Sho pombaka tshikala la kɔlamelo kânga l’akambo wɛnama oko totshitshɛ efula.
4, 5. Kakɔna kɛnya kɔlamelo yaso lo “diango diuleki tshitshe”?
4 Monga la okitanyiya lushi tshɛ lo “diango diuleki tshitshe” ekɔ ohomba lo ɛkɔkɔ ehende. Ntondotondo, kɛsɔ mɛnyaka woho wakanyiyaso lo dikambo dia lowandji laki Jehowa. Tokanyiya yema ohemba wendana la kɔlamelo wakakitshama la ntondo ka ambutshi aso wa ntondo, Adama la Eva. Didjango diakawawadjɛ komonga wolo efula le wɔ. Kânga mbakiwɔ la lotshungɔ la ndɛ diangɔ tshɛ diakikɔ lo ekambɔ ka Ɛdɛna, takawahombe ndɛ elowa w’oma lo otamba ɔtɔi oto, mbuta ate: “Utamba wa ewu k’akambu w’ololo ndu k’akambu wa kolo.” (Etatelu 2:16, 17) Kɔlamelo yawɔ lo nɛmiya didjango dia wɔdu sɔ otohomba mɛnya dia atshukanyi wa ntondo asɔ wakasukɛka lowandji laki Jehowa. Kitanyiya wadjango waki Jehowa lo lɔsɛnɔ laso la lushi la lushi mɛnyaka dia tekɔ lo sukɛ lowandji laki Jehowa.
5 Dui dia hende ele, dionga diaso lo “diango diuleki tshitshe” ekɔ la shɛngiya lo woho wayotosala la “diango diuleki efula,” mbuta ate etena kahomanaso la ekakatanu wa weke efula lo lɔsɛnɔ. Lo dikambo sɔ, tɔsɛdingole kɛnɛ kakakomɛ Danyɛlɛ nde la asekande asato w’ase Hɛbɛru, mbuta ate: Hananiya, Mishaɛlɛ ndo Azariya. Vɔ wakatɔlama lo fumbe la Babilɔna l’ɔnɔnyi wa 617 la ntondo ka tena diaso (N.T.D.). Kânga mbakiwɔ weke akɛnda, ondo wele l’ɛnɔnyi dikumi la ɛmɔtshi, ɛlɔngɔlɔngɔ ɛnɛi ɛsɔ wakatɔlama lo mbalasa ka nkumekanga Nɛbukadinɛza. Lɛkɔ, nkumekanga akawadjangɛ dia “[ndɛ] mbu ya nde y’ololo yakandalekaka ndame la lushi la lushi, ndu wanu wakandanokaka. Ndi akati dia vo [ndeshama] deku satu. Ku l’ekumelu ka deku satu, vo kawemali la ntundu kandi.”—Danyele 1:3-5.
6. Ohemba akɔna wakahomana la Danyɛlɛ nde la asekande asato lo luudu la nkumekanga ka la Babilɔna?
6 Koko, mbo ya ndɛ ya nkumekanga ka la Babilɔna, aki tshondo y’ohemba le ɛlɔngɔlɔngɔ ɛnɛi w’ase Hɛbɛru. Ondo l’ɔnɔngɔ wa mbo y’ɛlɔlɔ yakalɛka nkumekanga mbaki ndo mbo ya ndɛ yakasekɛma lo Ɛlɛmbɛ wa Mɔsɛ. (Euhwelu k’Elembe 14:3-20) Nyama kondjakemaka lo yoho ya dimɛna, lâsɔ ndjilɛ otɔnyɔla Ɛlɛmbɛ wa Nzambi. (Euhwelu k’Elembe 12:23-25) Ondo mbo ya ndɛ shɔ yakalambɔmaka nto le dikishi la ntondo ka vɔ ndjilɛ oko olelo wa osanga, oko waki mbekelo k’atɛmɔdi w’ase Babilɔna.
7. Okitanyiya waki Danyɛlɛ nde la angɛnyi ande asato akɛnyaka dikambo diakɔna?
7 Lo mɛtɛ, nkumbo ka nkumekanga ka la Babilɔna kɔmbɔsaka ɛlɛmbɛ wendana la olelo la nɛmɔ efula. Koko, Danyɛlɛ nde la angɛnyi ande wakayashikikɛ l’etema awɔ diaha ndjâlanya la diangɔ dia ndɛ diakasekɛma lo Ɛlɛmbɛ wakasha Nzambi ase Isariyɛlɛ. Ɔsɔ ekɔ dikambo diakendanaka la olowanyi ndo la kɔlamelo yawɔ otsha le Nzambi. Ɔnkɔnɛ vɔ wakalɔmbɛ dia ndɛka akatshikatshi la nɔɔka ashi, ndo kɛnɛ kakawalɔmbɛ kaketawɔma. (Danyele 1:9-14) Le anto efula ɛlɔ kɛnɛ, kɛnɛ kakasale ɛlɔngɔlɔngɔ ɛnɛi ɛsɔ mbeyaka mbɔsama oko dikambo di’anyanya. Koko, okitanyiya awɔ otsha le Nzambi akɛnyaka wedi wakiwɔ lo kɛnɛ kendana la lowandji laki Nzambi.
8. a) Ohemba akɔna wa wolo wendana la kɔlamelo wakahomana la ase Hɛbɛru asato? b) Etombelo akɔna wakonge la ohemba akɔ, ndo dikambo sɔ ɛnyadiɔ?
8 Mɛnya kɔlamelo lo akambo wakakoke mbɔsama oko totshitshɛ, akalɔngɔsɔla Danyɛlɛ nde la angɛnyi ande asato dia ndjotshikala nge la ntondo k’ehemba wa wolo efula. Fola tshapita 3 ya dibuku dia lo Bible dia Danyele, ndo adia wɛmɛ woho wakafundamɛ ase Hɛbɛru asato nyɔi lo woho wakawatone dia tɛmɔla kimɛta ka paonyi kakemɛ nkumekanga Nɛbukadinɛza. Etena kakawatɔlama la ntondo ka nkumekanga, vɔ wakɛnya eshikikelo kawɔ la wɛkamu tshɛ ɔnɛ: “Ulungi, [Nzambi k]asu, latutotemolaka eko la wulu wa ntushimbela uma lu khuka ka dja; ndu ndi ayutushimbela uma lu anya aye, we khum’ekanga. Kuyanga aha osoku we khum’ekanga, eye wati: Shu hatukhusela ditemolatemola diaye adui, kana ntemola kimeta ka paunyi kene kakayeme.” (Danyele 3:17, 18) Onde Jehowa akashimbɛ? Alami wakokɛ ɛlɔngɔlɔngɔ lo nkuka ka dja wakavu, koko ase Hɛbɛru asato wa kɔlamelo asɔ wakatshikala la lɔsɛnɔ, ndo kânga ahɔndɔ awɔ kombokɛ kânga solo ka dja! Ɛnyɛlɔ kawɔ k’ɔlɔlɔ ka kɔlamelo akâkimanyiya dia vɔ ndjotshikala la kɔlamelo lo ohemba wa wolo ɔsɔ. Onde dikambo sɔ hadiɛnya ohomba wa monga la kɔlamelo l’akambo wa totshitshɛ?
Kɔlamelo lo kɛnɛ kendana la ‘ekundji wa kɔlɔ’
9. Ɛtɛkɛta waki Yeso wa lo Luka 16:10 ningama la awui akɔna?
9 La ntondo ka nde ndjosha tɔndɔ diɛnya dia ɔnɛ lele la kɔlamelo lo diangɔ dioleki tshitshɛ ekɔ la kɔlamelo ndo lo diangɔ dioleki efula, Yeso akalake ampokami ande ate: “Nyuyandeli engenyi uma lu ukundji w’akambu wa kolo. Okone lam’ayushila ukundji ako, vo wayunyulungula lu mvudu yawo ya pundju.” Nde akayotaka ɛtɛkɛta ɛnɛ wendana la monga la kɔlamelo lo kɛnɛ koleki tshitshɛ. Oma lâsɔ, Yeso akate ate: “Ku naka nyu tanyaki la kolamelu l’ukundji wa kolo, akona ayunyukimiya ekundji wa mete? . . . Nduku untu leya nkambela ewandji ehendi ulimu: ne dia ndi ayuhetsha omotshi, ayulanga ukina. Kuku kana ndi ayekama omotshi, ayonyola ukina. Nyu hanyeyi nkambela [Nzambi] la ukundji ulimu.”—Luka 16:9-13.
10. Ngande wakokaso mɛnya kɔlamelo lo woho wakambaso la ‘ekundji wa kɔlɔ’?
10 Lo ndjela awui wa lo etenyi kɛsɔ, ɛtɛkɛta waki Yeso wele lo Luka 16:10 mendanaka ntondo la okambelo wa la ‘ekundji wa kɔlɔ,’ mbuta ate diangɔ dia l’emunyi diele laso. Diɔ mbelamɛka ɔnɛ kɔlɔ nɛ dia lomombo la l’emunyi, djekoleko falanga yekɔ lo wolo wa atshi wa pɛkato. Ndo nto, nsaki ka monga la ɔngɔnyi koka konya onto lo ditshelo dia kɔlɔ. Sho mɛnyaka kɔlamelo lo kɛnɛmɔla lomba lo woho wakambaso la diangɔ diaso dia l’emunyi. Lo dihole dia kamba ladiɔ lo eyango wa lokaki, sho kombolaka kamba ladiɔ dia pamia wahɔ wa Diolelo ndo kimanyiya wanɛ wele lo dihombo. Lo monga la kɔlamelo lo yoho shɔ, sho mbɔtɔka lɔngɛnyi la Jehowa Nzambi nde la Yeso Kristo, akanga wa “mvudu . . . ya pundju.” Vɔ wayotolongola lo mvudu shɔ, lo tofuta lɔsɛnɔ la pondjo oyadi l’olongo kana lo Paradiso ka la nkɛtɛ.
11. Lande na kahatahombe mengenga dia nembetshiya atɛkɛtshi aso ɔnɛ sho mbetawɔka weshasha dia sukɛ olimu wakamba Ɛmɛnyi wa Jehowa l’andja w’otondo?
11 Tokanyiya nto diaaso diashaso anto watotoshaka Bible kana ekanda walembetshiya Bible etena kasambishaso losango la Diolelo ndo katotalembetshiyaka ɔnɛ sho mbetawɔka weshasha dia sukɛ olimu wakambema l’andja w’otondo oma le ekambi waki Jehowa. Shi sho mbashaka diaaso dia vɔ kamba la diangɔ diawɔ dia l’emunyi la lomba? Kânga mbele okambelo wa la Luka 16:10 mendanaka ntondo la ekundji wa l’emunyi, tɔndɔ sɔ mendanaka l’akambo akina nto wa lo lɔsɛnɔ.
Losembwe ekɔ mɛtɛ ohomba
12, 13. Lo akambo akɔna wakokaso mɛnya losembwe?
12 Ɔpɔstɔlɔ Paulo akafunde ate: “Shu tambeya shati: teko la khum’utema k’ololo, shu nangaka ndjala la kenemo lu akambu tshe.”(Heberu 13:18) “Akambu tshe” mendanaka mɛtɛ l’awui tshɛ wendana la falanga. Sho futaka abasa aso ndo wa taksɛ yaso esadi eto ndo la losembwe. Lande na? Sho salaka dikambo sɔ nɛ dia nkum’otema kaso ndo ntondotondo oma lo ngandji kokaso Nzambi ndo okitanyiya wele laso lo wadjango ande. (Romo 13:5, 6) Kakɔna katotosalaka etena kɛnaso ɛngɔ kele bu kaso na? Sho toyangaka dia kaloya ɛngɔ kakɔ le kangatɔ. Ayonga esambishelo ka dimɛna mɛtɛ etena kalembetshiyaso onto kɛnɛ katotshutshuya dia sho kaloya ɛngɔ kakɔ le kangatɔ!
13 Monga la kɔlamelo ndo la losembwe l’akambo tshɛ nɔmbaka nto dia sho monga la losembwe l’ahole aso w’olimu. Monga la losembwe lo mbekelo yaso y’olimu kotolaka yambalo y’anto otsha lo woho wa Nzambi katɛmɔlaso. Hatohombe ‘mbiva’ wenya lo monga la nɛndɛ. Koko, sho kambaka olimu la wolo wate kana oko Jehowa mbakambɛso. (Efeso 4:28; Kolosai 3:23) Lo wodja ɔmɔtshi wa lo Erɔpɛ, yɛdikɔ yele oko kasato ɔtɔi ka ase olimu wa ntshɔ le dɔkɔtɛlɛ dia toyanga mukanda wambetsha olimu l’ɔtɛ wa hɛmɔ, kesaka. Ekambi wa mɛtɛ waki Nzambi hawoyange tɛkɛ nɛndɛ dia mbewɔ dia ntshɔ l’olimu. Mbala efula, Ɛmɛnyi wa Jehowa mbidiyamaka l’ahole wa lâdiko nɛ dia ewandji awɔ mɛnaka woho wakambawɔ elimu awɔ la losembwe ndo la etete. —Tukedi 10:4.
Kɔlamelo lo olimu aso w’Okristo
14, 15. Naa toho tɔmɔtshi takokaso mɛnya shoamɛ ɔnɛ tekɔ la kɔlamelo l’olimu w’Okristo?
14 Ngande wɛnyaso kɔlamelo lo olimu wakawatosha? Bible mbutaka ɔnɛ: “Dia dikambu diandi, tukimoki ulambu wa mandulaka [Nzambi] nshi tshe, uku elua uma lu elomo watetawoka lukumbu landi.” (Heberu 13:15) Yoho yoleki dimɛna ya mɛnya kɔlamelo lo olimu aso ele lo sambishaka mbala la mbala. Onde sho pombaka mɛtɛ mbetsha ngɔndɔ k’otondo aha la sho sambisha awui wendana la Jehowa ndo la sangwelo diande? Esambishelo ka mbala la mbala tokimanyiyaka nto dia sho ndowanya akoka aso ndo kondja etombelo w’ɔlɔlɔ.
15 Yoho kina nto ya dimɛna ya mɛnya kɔlamelo yaso l’olimu w’esambishelo ele lo kamba l’alako watoshawɔ lo Tshoto y’Etangelo ndo lo Olimu aso wa Diolelo. Etena kalɔngɔsɔlaso ndo kakambaso la mbɔtwɛlɔ ya lɔkɔ kana nkina y’amɛna, onde hatɛnyi dia olimu aso mongaka la etombelo w’ɔlɔlɔ efula? Etena kahomanaso la onto ɔmɔtshi lɛnya nsaki lo losango la Diolelo, onde sho towesaka nsaki kɛnya onto akɔ aha la tshimbatshimba? Ko kayotota dikambo dia wekelo wa Bible wakokaso tatɛ la anto wakɛnya nsaki na? Onde sho nɔmbɔlaka wekelo wa Bible ɛsɔ mbala la mbala la kɔlamelo ndo l’ɔlɔlɔ tshɛ? Naka sho monga la kɔlamelo l’olimu w’esambishelo, kete sho la wanɛ watohokamɛ tayokoka kondja lɔsɛnɔ la pondjo. —1 Timote 4:15, 16.
Toyakakitole la andja ɔnɛ
16, 17. Lo toho takɔna takokaso mɛnya ɔnɛ tambokakitɔna la andja ɔnɛ?
16 Lo dɔmbɛlɔ diande le Nzambi, Yeso akate lo dikambo di’ambeki ande ate: “Dimi lakawatela diui diaye. Wa la kete wakâhetsha, ne dia vo kema wa la kete, uku wemi kema la la kete. Dimi halombe nti: Uwanya la kete, keli lambukolomba nti: Uwashimbeli uma lu kolo. Vo kema wa la kete, uku wemi kema la la kete.” (Joani 17:14-16) Sho koka mbɔsa yɛdikɔ ndo ndjashikikɛ dia kakitwana la andja ɔnɛ lo akambo wa weke wele oko lomangemange, fɛtɛ ndo mbekelo ya ɛtɛmwɛlɔ ndo lo awui wa mindo. Kayotota lo kɛnɛ kendana l’akambo wa totshitshɛ? Onde mbeyaka monga ko tambotatɛ sɛngiyama la tokanyi ta ase andja ɔnɛ aha la sho mbeya? Ɛnyɛlɔ, naka hatendji ɔlɔlɔ, kete sho mbeyaka sɛngiyama esadi eto la ɛlɔtɔ wahasha nɛmɔ ndo wa kɔlɔ! Monga la kɔlamelo nɔmbaka dia sho monga la “wolamu la memakana” l’awui wendana la ɔlɔtɛlɔ ndo la ɔlɔngɔswɛlɔ wa divo. (1 Timote 2:9, 10) Eelo, “[tato]kitshiyaki untu utamba a ntakanya nduku yema, ne dia ekambelu kasu katukonywama. Keli lu akambu tshe, shu tatuyaenyaka uku ekambi wa [Nzambi].”—2 Koreto 6: 3, 4.
17 La nsaki ka tombola Jehowa, sho ndɔtaka lo yoho yele la kɛnɛmɔ lo nsanganya yaso ya l’etshumanelo. Woho akɔ wâmɛ mbatotosalaka lam’atshumanaso anto efula lo nsanganya yaso ya weke. Sho pombaka ndɔta dimɛna ndo la kɔmba. Dui sɔ diekɔ esambishelo le anto akina watɔsɛdingola. Kânga andjelo mɛnaka olimu aso, oko wakawasale lo dikambo dia Paulo ndo dia asekande Akristo. (1 Koreto 4:9) Ɔnkɔnɛ, mbala tshɛ sho pombaka ndɔtaka lo yoho ya dimɛna. Le amɔtshi, monga la kɔlamelo lo ɔsɔnwɛlɔ wa ɔlɔtɔ mbeyaka mbɔsama oko dikambo dia tshitshɛ, koko lo washo wa Nzambi ɔsɔ ekɔ dikambo di’ohomba.
Ɛtshɔkɔ waya oma lo kɔlamelo
18, 19. Ɛtshɔkɔ akɔna waya lo monga la kɔlamelo?
18 Akristo wa mɛtɛ mbelamɛka ɔnɛ “alami w’ololo wa wehu efula wa ngandji ka mamba ka [Nzambi].” Ɔnkɔnɛ, vɔ ‘nongamɛka wolo watoshaka Nzambi.’ (1 Petero 4:10, 11) Ndo nto, oko weso alami, wakatosha diangɔ diele aha diakiso mbediɔ, mbuta ate djembetelo ya ngandji ka mamba ka Nzambi, mbidja ndo olimu w’esambishelo. Lo mɛnya shoamɛ dia tekɔ alami w’ɛlɔlɔ, sho mendɛka lo wolo washa Nzambi, mbuta ate ‘wolo woleki wɔnɛ wokongaka la onto.’ (2 Koreto 4:7) Ande wetshelo wa dimɛna watokimanyiya dia ndjɔlɔshana la weho tshɛ w’ehemba wakoka tokomɛ lo nshi yayaye lee!
19 Omembi w’esambo akembe ate: “Nyu ekilami tshe, nyuki [Jehowa] ngandji. [Jehowa] atulamaka kanga kolamelu.” (Osambu 31:23) Nyɛsɔ toyashikikɛ dia monga la kɔlamelo, tele la eshikikelo tshɛ ɔnɛ Jehowa ekɔ “Ushimbedi w’antu tshe, djekaleka le [“akanga wa kɔlamelo,” NW].”—1 Timote 4:10.
Onde wɛ âkohɔ?
• Lande na kahombaso monga la “kolamelu lu diango diuleki tshitshe”?
• Ngande wakokaso mɛnya kɔlamelo
lo kɛnɛ kendana la losembwe?
lo olimu w’esambishelo?
lo kakitɔna la andja ɔnɛ?
[Esato wa lo lɛkɛ 13]
Kɔlamelo lo kɛnɛ koleki tshitshɛ; kɔlamelo nto lo kɛnɛ koleki efula
[Osato wa lo lɛkɛ 16]
‘Nyonge la losembwe l’akambo tshɛ’
[Osato wa lo lɛkɛ 16]
Yoho mɔtshi ya dimɛna ya mɛnya kɔlamelo ele lo ndjalɔngɔsɔlaka dimɛna di’olimu w’esambishelo
[Osato wa lo lɛkɛ 17]
Tonge la wɛdimo l’ɔlɔtɔ ndo lo yoho ya nɔngɔsɔla divo