Toyale la solo dia lotutsha l’ɛnyɛlɔ ka Jehowa la Yeso
“Nyɔshi dia solo dia lotutsha dia Nkumɛso diekɔ panda.”—2 PET. 3:15.
NGANDE WAYOYOKADIMOLA?
Ngande wɛnya Jehowa dia nde ekɔ la solo dia lotutsha?
Ngande wakɛnya Yeso solo dia lotutsha l’edja ka nshi efula?
Wanya akɔna wakokaso ntakula dia sho monga la solo dia lotutsha diaki Nzambi?
1. Lo dikambo diakɔna diayakiyanya anto amɔtshi wele la kɔlamelo?
KADIYƐSO kɛmɔtshi ka kɔlamelo kakakikɛ ehemba efula l’edja k’ɛnɔnyi akumi akayambola ate: “Onde layɛna ekomelo k’andja ɔnɛ la ntondo ka dimi mvɔ?” Anto amɔtshi wambokambɛ Jehowa l’edja k’ɛnɔnyi efula ndjambolaka dimbola sɔ. Sho kombolaka mɛna l’asolo walomɔlomɔ etena kayetɛ Jehowa diangɔ tshɛ eyoyo, ko minya akambo wa kɔlɔ wahomana laso kakianɛ. (Ɛny. 21:5) Koko kânga mbeso l’ɛkɔkɔ w’eshika wa mbetawɔ ɔnɛ ekomelo ka dikongɛ nɛ di’akambo diaki Satana kaya kemembe, mbeyaka monga tshondo y’okakatanu dia sho kongɛ lushi lɔsɔ la solo dia lotutsha.
2. Ambola akɔna wendana la solo dia lotutsha diaki Nzambi wayangaso nsɛdingola?
2 Bible tɔlɔmbaka dia sho monga la solo dia lotutsha. L’ɛnyɛlɔ k’ekambi waki Nzambi w’edjedja, tayoyokondja kɛnɛ kakalake Jehowa paka naka sho mbongi la mbetawɔ ka wolo ndo kongɛ la solo dia lotutsha tshɛ etena kayokotshama alaka ande asɔ. (Adia Hɛbɛru 6:11, 12.) Jehowa ndamɛ okongaka la solo dia lotutsha. Nde kokaka nkomiya akambo wa kɔlɔ tshɛ l’etena tshɛ kalangande, koko nde ekɔ lo nkonga dia nsala dui sɔ l’etena kakandashikikɛ. (Rɔmɔ 9:20-24) Ko lande na kele Jehowa la solo dia lotutsha? Ngande wakokoya Yeso solo dia lotutsha diaki Nzambi ndo wakandatotshikɛ ɛnyɛlɔ ka dimɛna? Naa ɛlɔlɔ waya lo monga la solo dia lotutsha l’ɛnyɛlɔ kaki Nzambi? Ekadimwelo wa ambola asɔ koka tokimanyiya dia sho monga la solo dia lotutsha ndo la mbetawɔ ka wolo, kânga mbakokadiɔ mɛnama oko Jehowa ambotshimbatshimba dia mbela ekomelo ka dikongɛ nɛ.
LANDE NA KELE JEHOWA LA SOLO DIA LOTUTSHA?
3, 4. a) Lande na kele Jehowa la solo dia lotutsha dia nkotsha sangwelo diande lo dikambo dia nkɛtɛ? b) Ngande wakakadimola Jehowa lo ambola wendana l’ɔtɔmbɔkwɛlɔ wakonyiyama l’ekambɔ k’Ɛdɛna?
3 Jehowa ekɔ l’ɛkɔkɔ w’eshika wa monga la solo dia lotutsha. Ekɔ mɛtɛ dia nde mbele la lowandji lâdiko dia diangɔ tshɛ; koko ɔtɔmbɔkwɛlɔ waki Adama l’Eva l’ekambɔ k’Ɛdɛna wakonyiya ambola efula wendana la lowandji lande. Jehowa ekɔ la solo dia lotutsha nɛ dia nde mbeyaka di’ekɔ etena kayondosha ekadimwelo wa ambola asɔ lo yoho ya dimɛna. Lam’ele nde mbeyaka etsha ndo tokanyi ta ditongami diande dia l’olongo kana dia la nkɛtɛ, nde ekɔ lo nsala akambo lo wahɔ aso.—Hɛb. 4:13.
4 Sangwelo diaki Jehowa aki dia tokanula t’Adama l’Eva ndola lo nkɛtɛ k’otondo. Koko kânga etena kakayâkesa Satana ndo kakawatɔmbɔkwɛ Jehowa, Nzambi kotshikitanya sangwelo diande. Nde kopomba kɛnɛ ka nsala, kɔmbɔsa yɛdikɔ l’esasesase, kosala akambo lo yoho ya tshambandeko ndo nde kokalɛ nkumbo k’anto. Lo dihole dia nde nsala ngasɔ, nde akakongɛ akambo lo yoho kina dia nkotsha sangwelo diande diendana l’anto ndo la nkɛtɛ. (Iza. 55:11) Dia nkotsha sangwelo diande sɔ ndo nyindja lowandji lande, Jehowa akakɛnɛmɔla memakana ndo solo dia lotutsha, lo nkonga l’edja k’ɛnɔnyi nunu di’akambo amɔtshi wendana la sangwelo diande kotshama lo yoho ya dimɛna.
5. Naa ɛtshɔkɔ wakokaso nkondja diɛsɛ la solo dia lotutsha diaki Jehowa?
5 Ɔkɔkɔ okina wakonga Jehowa la solo dia lotutsha tshɛ ele, di’anto efula ndjokondja lɔsɛnɔ la pondjo. Polo ndo kakianɛ, nde ekɔ lo nsala kɛnɛ kahombama dia shimbɛ “olui a woke w’anto.” (Ɛny. 7:9, 14; 14:6) Lo tshimbo y’olimu w’esambishelo, Jehowa ekɔ lo ntshumanya anto, lo mbaelɛ dia vɔ ndjeka akambo wendana la Diolelo ndo la atɔndɔ ande wosembwe. Losango la Diolelo lekɔ “lokumu l’ɔlɔlɔ” le anto. (Mat. 24:14) Onto tshɛ lakotwama oma le Jehowa mongaka l’etshumanelo ka l’andja w’otondo k’Akristo wa mɛtɛ walanga akambo wosembwe. (Jni. 6:44-47) Nzambi kaso ka ngandji kimanyiyaka anto asɔ dia vɔ mbetawɔma le nde. Ndo nto, nde ekɔ lo nsɔna wanɛ wahomba tolɛ kâmɛ la Yeso l’olongo. L’ɔkɔngɔ wa vɔ nkondja diɛsɛ sɔ, Akristo w’akitami asɔ wayokimanyiya anto wele l’okitanyiya dia vɔ nkoma kokele ndo ndjokondja lɔsɛnɔ la pondjo. Mbokɛmaka dia kânga mbâkandakonge, Jehowa ekɔ lo nsala la wolo dia nkotsha alaka ande dia wahɔ aso.
6. a) Lo yoho yakɔna yakɛnya Jehowa solo dia lotutsha lo nshi ya Nɔa? b) Ngande wɛnya Jehowa solo dia lotutsha lo nshi yaso nyɛ?
6 Jehowa mongaka la solo dia lotutsha kânga etena katanemande la ntondo k’akambo wa wolo, oko wadiɛnya kɛnɛ kakandasalɛ anto wa kɔlɔ la ntondo ka Mvula k’elola. Nkɛtɛ k’otondo kakalole l’awui wa mindo, wa ngala ndo Jehowa “akanyangi efula” l’ɔtɛ w’akambo wa kɔlɔ asɔ. (Etat. 6:2-8) Ko lam’ele nde kombetawɔ di’akambo wa kɔlɔ asɔ ntetemala, Jehowa akɔshi yɛdikɔ ya ndjaka anto wa kɔlɔ lo Mvula k’elola. Bible mbutaka ɔnɛ: “Etena kakakongaka Nzambi la solo dia lotutsha tshɛ lo nshi ya Nɔa,” Jehowa akɔshi tɛdikɔ tahombama dia nshimbɛ Nɔa nde la nkumbo kande. (1 Pet. 3:20) Lo etena kahombama, Jehowa akewoya Nɔa yɛdikɔ yakandɔshi ndo akawosha ɔkɛndɛ wa nde nsɛla waato. (Etat. 6:14-22) Lâdiko dia lâsɔ, Nɔa aki “osambisha w’akambo w’ɛlɔlɔ,” nɛ dia nde akatetemala mbutɛ anto wa lo nshi yande dikambo di’elanyelo k’anto wa kɔlɔ. (2 Pet. 2:5) Yeso akatatshi ɔnɛ nshi yaso nyɛ yayɔfɔna la nshi ya Nɔa. Jehowa amboshilaka nshikikɛ etena kayondolanya dikongɛ di’akambo dia kɔlɔ nɛ ndo ndoko onto leya ‘lushi kana wonya.’ (Mat. 24:36) Koko l’etena kɛnɛ, tekɔ la diɛsɛ dia nkamba olimu wakatosha Nzambi wendana la mbewola ndo mɛnya anto kɛnɛ kahombawɔ nsala dia vɔ ndjoshimbamɛ.
7. Onde Jehowa ambotshimbatshimba dia nkotsha alaka ande? Lembetshiya.
7 Lo mɛtɛ, woho wele Jehowa la solo dia lotutsha hɛnya dia nde ayokongaka nshi tshɛ dia nshi tetaka tsho. Ndo hatohombe mfɔnya ɔnɛ solo dia lotutsha diaki Jehowa ekɔ djembetelo yɛnya dia nde hatodje yimba kana hayakiyanya dikambo diaso. Koko, sho mbeyaka monga l’okakatanu dia mbetawɔ dui sɔ etena katatatshunde esombe kana kasowaso lo dikongɛ dia kɔlɔ di’akambo nɛ. Sho mbeyaka nkɔmɔ ndo mfɔnya ɔnɛ Nzambi ambotshimbatshimba dia nkotsha alaka ande. (Hɛb. 10:36) Koko, tatohɛke pondjo dia nde ekɔ l’ɛkɔkɔ w’eshika wa monga la solo dia lotutsha ndo nde ekɔ lo nkamba la etena kambotshikala kɛnɛ lo wahɔ w’ekambi ande. (2 Pet. 2:3; 3:9) Nyɛsɔ tendake woho waki Yeso nde lawɔ la solo dia lotutsha.
NGANDE WAKATOTSHIKƐ YESO ƐNYƐLƆ KA SOLO DIA LOTUTSHA?
8. L’atei w’akambo akɔna wakonge Yeso la solo dia lotutsha?
8 Yeso okosalaka nshi tshɛ lolango laki Nzambi. Etena kakatɔmbɔkɔ Satana, Jehowa akɔshi yɛdikɔ di’Ɔnande ɛtɔi ndja la nkɛtɛ oko Mɛsiya. Ohokanyiya yema kɛnɛ kakalembetshiyaka dui sɔ le Yeso, mbuta ate nde akahombe nkonga l’edja k’ɛnɔnyi nunu polo ndo l’etena kakahombe dui sɔ ndjosalema. (Adia Ngalatiya 4:4.) L’etena kɛsɔ tshɛ, nde kɔkɔma anya, koko nde akasalaka olimu wakawosha Jehowa. Etena kakandayoyaka la nkɛtɛ, nde akeyaka dia nde akahombe ndjodiakema oma le Satana oko wakadiatatami lo prɔfɛsiya. (Etat. 3:15; Mat. 16:21) L’okitshakitsha tshɛ, nde aketawɔ nsala lolango la She, lo mbetawɔ nsowa ndo mvɔ nyɔi ka pâ efula. Nde mɛtɛ aki ɛnyɛlɔ ka kokele ka kɔlamelo le Nzambi. Nde kombidja yimba lo woho w’onto wakinde ndo lo dihole diaki la nde ndo sho lawɔ koka ndjela ɛnyɛlɔ kande kɛsɔ.—Hɛb. 5:8, 9.
9, 10. a) Kakɔna kakasalaka Yeso etena kakandakongɛka dia Jehowa nkitsha atunyi ande l’ɛse k’akaka ande? b) Ngande wahombaso mbɔsa alamanaka waki Jehowa?
9 L’ɔkɔngɔ w’eolwelo kande, Yeso akalongola lowandji oyadi l’olongo kana la nkɛtɛ. (Mat. 28:18) Nde ekɔ lo nkamba la lowandji lɔsɔ dia nkotsha sangwelo diaki Jehowa, lo ndjela etena kakalɔngɔsɔla Nzambi. La solo dia lotutsha tshɛ, Yeso akakongɛka lo lonya l’omi laki Nzambi polo lo 1914 di’atunyi ande kitshama l’ɛse k’akaka ande. (Osa. 110:1, 2; Hɛb. 10:12, 13) Kem’edja nto, Yeso ayanga ndanya dikongɛ di’akambo diaki Satana nɛ. Koko l’etena kɛnɛ, la solo dia lotutsha tshɛ, Yeso ekɔ lo nkimanyiya anto lo mbatɔla otsha lo “ashi wa lɔsɛnɔ.”—Ɛny. 7:17.
10 L’ɛnyɛlɔ ka Yeso, onde wɛ ambɛna woho wahombayɛ mbɔsa alamanaka waki Jehowa, mbuta ate tena diakandashikikɛ dia nsala akambo? Aha la tâmu, Yeso akasalaka kɛnɛ tshɛ kakɔlɔmbaka She; nde akakongɛka nto di’akambo tshɛ salema paka l’etena kakasɔnɛ Nzambi. Ndo sho lawɔ ɛlɔ kɛnɛ, tonge la solo dia lotutsha diaki Nzambi etena kakongɛso elanyelo ka dikongɛ dia kɔlɔ diaki Satana nɛ ndo tatetawɔke pondjo dia mbeta la ntondo k’ɛlɔmbwɛlɔ kaki Nzambi kana ntshika nsala kɛnɛ kele ɔlɔlɔ etena kakɔmɔso. Ko kakɔna kayotokimanyiya dia monga la solo dia lotutsha diaki Nzambi?
NGANDE WAKOKASO MONGA LA SOLO DIA LOTUTSHA DIAKI NZAMBI?
11. a) Diɔtɔnganelo diakɔna diele lam’asa mbetawɔ la solo dia lotutsha? b) Lande na keso l’ɛkɔkɔ wa monga la mbetawɔ ka wolo?
11 La ntondo ka Yeso ndja la nkɛtɛ, aprɔfɛta ndo ekambi ekina waki Nzambi wa kɔlamelo wakatotshikɛ ɛnyɛlɔ ka dimɛna, lo mɛnya ɔnɛ kânga anto wele kema kokele kokaka monga la solo dia lotutsha. Mbetawɔ mbakâkimanyiya dia vɔ monga la solo dia lotutsha. (Adia Jakɔba 5:10, 11.) Otondonga vɔ komonga la kɔlamelo ndo la mbetawɔ lo kɛnɛ kakawatɛ Jehowa, onde vɔ mɛtɛ wotokoka kongɛ la solo dia lotutsha tshɛ dia mɛna ekotshamelo k’alaka ande? Mbala la mbala, vɔ wakahomanaka l’ekakatanu ndo l’ehemba, koko vɔ waki l’eshikikelo ɔnɛ kotamba kolembɔ, Jehowa ayokotsha kɛnɛ kakandalake. (Hɛb. 11:13, 35-40) Sho lawɔ keketshamaka dia monga la mbetawɔ ka wolo nɛ dia Yeso ekɔ lo nkamba kakianɛ oko “Owandji wa mbetawɔ kaso.” (Hɛb. 12:2) Lam’ele Yeso akakotsha prɔfɛsiya ndo akeyanya asangwelo waki Nzambi, dui sɔ toshaka ɛkɔkɔ w’eshika wa monga la mbetawɔ.
12. Akokaso nsala dia monga la mbetawɔ?
12 Naa awui amɔtshi wahombaso nsala dia nkeketsha mbetawɔ kaso ndo monga la solo dia lotutsha? Dui dia ntondo ele, nkamba l’alako watosha Nzambi. Ɛnyɛlɔ, ohokana yimba lo ɛkɔkɔ wakotshutshuya dia mbetsha Diolelo lo dihole dia ntondo. Onde wɛ salaka la wolo dia nkamba la dako diele lo Mateo 6:33? Ondo dui sɔ kokaka kɔlɔmba dia wɛ mbetshaka wenya efula l’esambishelo kana ntshikitanya awui amɔtshi wa lo lɔsɛnɔ layɛ. Koko, tohɛke woho wakakokimanyiya Jehowa, oma ko nshi y’edjedja polo ndo nshi nyɛ. Ondo nde akakosha akoka wa wɛ nɔmbɔla wekelo wa Bible w’oyoyo kana wa monga la “wɔladi wa Nzambi woleki tokanyi tshɛ.” (Adia Filipɛ 4:7.) Ɔnkɔnɛ, naka wɛ ntetemala mbohɔ wahɔ wakayakondja l’ɔtɛ wakayayele alako waki Jehowa, kete wɛ ayoleka monga la lowando otsha le nde lo monga la solo dia lotutsha.—Osa. 34:8.
13. Sha ɛnyɛlɔ kɛnya woho wakoka mbetawɔ tokimanyiya dia sho monga la solo dia lotutsha.
13 Dia nshihodia dui sɔ dimɛna, tɔshi ɛnyɛlɔ k’okambi wa dikambɔ. Mbala tshɛ kangɔnyande diangɔ efula, nde ndekaka monga l’ɔngɛnɔngɛnɔ dia ndjokamba ɔnɔnyi okina. Kânga mbahombande nkonga etena ka dinela la solo dia lotutsha tshɛ, kɛsɔ hahombe mbokaloya ɛkɔngɔkɔngɔ dia nde nkamba ekonda wa weke ndo monɛ diangɔ efula oleki woho wokondonɛka ɛnɔnyi tshɛ nɛ dia nde ekɔ l’eshikikelo ɔnɛ nde ayoyona diangɔ efula. Woho akɔ wâmɛ mbele, etena katolaka Jehowa, kayelaso alako ande ndo kakondjaso wahɔ oma lɔkɔ, wɛkamu aso otsha le nde fulaka. Mbetawɔ kaso keketalaka ndo dui sɔ tokimanyiyaka dia sho kongɛ ɛtshɔkɔ walongamɛso.—Adia Jakɔba 5:7, 8.
14, 15. Kanyi yakɔna yahombaso monga la yɔ lo kɛnɛ kendana l’asui wele l’anto?
14 Dui dia hende diakoka tokimanyiya dia sho nkeketsha mbetawɔ kaso ndo monga la solo dia lotutsha ele, nsɛdingola woho wahombaso mbɔsa andja ɔnɛ ndo ekakatanu aso hita. Sho keketshamaka dia mɛna akambo woho wawaɛna Jehowa. Ɛnyɛlɔ, tokanyiya yema lo kɛnɛ kendana la woho wɔsa Jehowa asui wele l’anto. Nde nyangaka etena kɛnande anto wasowa; koko nde kombetawɔ di’akambo asɔ mboshimba dia nde nsala kɛnɛ kele ɔlɔlɔ. Nde akatome Ɔnande ɛtɔi dia “ndanya akambo wa Diabolo” ndo ndjonya asui tshɛ woye oma le Satana. (1 Jni. 3:8) Lo mɛtɛ, asui tshɛ wele la so ɛlɔ kɛnɛ wekɔ paka lo tshanda mɔtshi tsho, koko kɛnɛ kayosala Nzambi kayotshikala pondjo pondjo. Diakɔ mbele, lo dihole dia sho ndeka ndjakiyanya l’ɔtɛ w’akambo wa kɔlɔ wasalema l’andja waki Satana ɔnɛ kana mɛna di’ekomelo kamboviya, nyɛsɔ totetemala mbika washo l’akambo wahatasalema ndo wayotshikala pondjo pondjo. Jehowa amboshikikɛka etena kayondokomiya akambo tshɛ wa kɔlɔ ndo nde ayosala dui sɔ paka l’etena kakɔ.—Iza. 46:13; Nah. 1:9.
15 Lo nshi y’ekomelo ya wolo yasɛnaso nyɛ, sho mbeyaka mpomana l’ekakatanu ndo l’ehemba efula. Koko, lo dihole dia sho nsala akambo la nkɛlɛ etena katanemaso la ntondo k’okakatanu ɔmɔtshi kana katata wakiso wa ngandji, sho pombaka ntetemala ndjaɛkɛ tshɛ le Jehowa. Ekɔ mɛtɛ wolo dia sho nsala dui sɔ nɛ dia tekɔ anto wele kema kokele. Koko tohɔ dia Yeso akadisale oko wɛnyamidiɔ lo Mateo 26:39.—Adia.
16. Kakɔna kahombaso mbewɔ lo nshi y’ekomelo yasɛnaso nyɛ?
16 Dui dimɔtshi diakoka todjɛ wekamu dia sho monga la solo dia lotutsha diaki Nzambi ele, monga la kanyi y’ɔnɛ etena kekekɔ. Kakɔna kalanga dui sɔ nembetshiya? Dui sɔ nangaka nembetshiya ɔnɛ onto tshɛ leke la yema ya tâmu ɔnɛ ekomelo kaya suke mbeyaka ntatɛ monga l’ekanelo ka kɔlɔ, ntɛkɛta ɔtɛkɛtatɛkɛta ndo mfɔnya ɔnɛ akambo amɔtshi hawohombe salema woho wata Jehowa. L’ɛtɛkɛta ekina, nde ndjakesaka lo mbuta ɔnɛ: ‘Hafɔnya mɛtɛ dia Jehowa ayokotsha sangwelo diande.’ Oma lâsɔ, nde mbeyaka ntatɛ ndjayangɛ lokumu l’andja ɔnɛ, nyanga dia ndjamɔtshɛ lomombo la l’emunyi lo dihole dia mbetsha Diolelo lo dihole dia ntondo kana mbɔtɔ kalasa y’etale l’oyango wa monga la lɔsɛnɔ la dimɛna l’etena kɛnɛ. Shi onto lasala ngasɔ mɛnyaka dia nde bu la mbetawɔ? Tohɔ dia Pɔɔlɔ akatokeketsha dia sho mbokoya akanga wa kɔlamelo wakakite alaka oma le Jehowa l’ɔtɛ wakiwɔ la “mbetawɔ ndo la solo dia lotutsha.” (Hɛb. 6:12) Jehowa hatetawɔ dia dikongɛ dia kɔlɔ nɛ ntetemala pondjo pondjo ndo nde hotshimbatshimba dia nkotsha sangwelo diande. (Hab. 2:3) Koko l’etena kɛnɛ, sho pombaka mbewɔ mbekelo ka ndjashaka l’olimu waki Jehowa paka yema tshitshɛ tsho. Lo dihole dia nsala ngasɔ, sho pombaka mbeyaka dia tekɔ lo nsɛna lo nshi y’ekomelo ndo ndjasha tshɛ l’olimu w’esambishelo ka lokumu l’ɔlɔlɔ, nɛ dia vɔ toshaka ɔngɛnɔngɛnɔ w’efula kânga nshi nyɛ.—Luka 21:36.
ƐTSHƆKƆ WAYA LO MONGA LA SOLO DIA LOTUTSHA
17, 18. a) Naa diaaso diele la so ɛlɔ kɛnɛ lo monga la solo dia lotutsha? b) Ɛtshɔkɔ akɔna wayotokondja naka sho monga la solo dia lotutsha oma ko nshi nyɛ?
17 Oyadi tambokambɛ Nzambi l’edja ka ngɔndɔ kana k’ɛnɔnyi efula, sho kombolaka dia mbokambɛ pondjo pondjo. Solo dia lotutsha diayotokimanyiya dia sho mbikikɛ polo l’etena kayotoyokondja panda, aha la ndjakiyanya l’edja ka ngande kahombaso kongɛ. Jehowa ekɔ lo tosha diaaso dia sho mɛnya ɔnɛ sho ndjaɛkɛka lo tɛdikɔ tande ndo ntshikala la kɔlamelo le nde kânga mbakokaso soyama l’ɔtɛ wa lokombo lande. (1 Pet. 4:13, 14) Nzambi ekɔ lo tosha nto wetshelo watokimanyiya dia sho monga la solo dia lotutsha diahombama dia sho ndjokondja panda.—1 Pet. 5:10.
18 Yeso akalongola lowandji l’olongo ndo la nkɛtɛ ndo ndoko kakoka mboshimba dia nde kokokɛ, onyake paka wɛmɛ. (Jni. 10:28, 29) Ndoko ohomba mboka nshi yayaye kana nyɔi wɔma. Wanɛ wayokikɛ la solo dia lotutsha tshɛ polo ndo l’ekomelo mbayoshimbamɛ. Ɔnkɔnɛ, hatohombe mbetawɔ di’andja ɔnɛ tokesa kana tokonya diaha sho ntetemala ndjaɛkɛ le Jehowa. Lo dihole dia nsala ngasɔ, tonge la mbetawɔ ka wolo ndo tokambe dimɛna la etena kɛnɛ katɛnya Nzambi solo diande dia lotutsha.—Mat. 24:13; adia 2 Petero 3:17, 18.
[Osato wa lo lɛkɛ 18]
[Esato wa lo lɛkɛ 21]
[Esato wa lo lɛkɛ 21]
Solo dia lotutsha diaki Nzambi diayokokimanyiya dia wɛ mbetsha wahɔ wa Diolelo lo dihole dia ntondo ndo nkondja ɛtshɔkɔ