Tonge la solo dia lotutsha l’esambishelo
1. Ngande wakɛnɛmɔla Jehowa solo dia lotutsha otsha le anto?
1 Nzambi mɛnyaka solo dia lotutsha lo yoho yasalɛnde anto akambo. (Etum. 34:6; Osam. 106:41-45; 2 Pet. 3:9) Sho kokaka mɛna solo diande dia lotutsha diɔsɔhanyemi la ngandji lo kɛnɛ kendana l’olimu w’esambishelo ka Diolelo wakambema l’andja wotondo. Aya ɛnɔnyi 2 000 wele Jehowa ekɔ lo nkamba l’anto ndo polo kakianɛ nde ekɔ lo ntetemala nkotola anto wele l’etema w’ɛlɔlɔ oya le nde. (Joa. 6:44) Ngande wakokaso nkɛnɛmɔla woho wa solo dia lotutsha diele la Jehowa l’olimu aso w’esambishelo?
2. Ngande wakokaso nkɛnɛmɔla solo dia lotutsha etena kasambishaso l’ɛtshi kaso ka nkɛtɛ?
2 Esambishelo ka lo luudu la luudu: Sho mbokoyaka solo dia lotutsha diaki Jehowa lo nsambisha ‘aha la mpekɔ’ lo bɛtshi dia nkɛtɛ diele anto wa lɔkɔ watɛnya nsaki lo losango laso. (Etsha 5:42) Sho mongaka la solo dia lotutsha etena kahomanaso la wendjodi, diɔnyɔ ndo ɔlɔshamelo l’olimu aso w’esambishelo. (Mako 13:12, 13) Sho kɛnɛmɔlaka nto solo dia lotutsha lo ntetemala mbidja welo lo mbutɛ ashi lo ntɔngɔ y’akambo wa mɛtɛ yonɛso oyadi kânga l’etena kele ekɔ wolo dia ntana anto wɛnya nsaki lawakawɔ.
3. Lande na kele ekɔ ohomba monga la solo dia lotutsha etena katshɔso tosala wendelo w’eyoyo ndo kalɔmbɔlaso wekelo wa Bible?
3 Wekelo wa Bible: Etena konɛso otamba, nɔmbamaka dia sho monga la solo dia lotutsha dia mbokimanyiya dia vɔ mbola. Sho kokaka mbodjɛka ɛtɛtɔ, koko sho bu l’akoka wa mbôdia esadi esadi. (Jak. 5:7) Woho akɔ wâmɛ mbele, ohamelo wa lo nyuma salemaka yema yema ndo lo tenyi tenyi. (Mako 4:28) Anto weka la so Bible kokaka monga l’okakatanu dia ntshika wetshelo wa l’ɛtɛmwɛlɔ wa kashi ndo mbekelo yahɔtɔnɛ l’Afundelo. Hatohombe mbidjangɛ ambeki aso dia vɔ mpama esadi esadi lo mbatshutshuya dia nsala etshikitanu. Sho pombaka monga la solo dia lotutsha l’edja k’etena kakoka dia mbisha nyuma kaki Nzambi diaaso dia tɔ monga la shɛngiya l’otema w’ombeki aso.—1 Kor. 3:6, 7.
4. Ngande wakoka solo dia lotutsha tokimanyiya dia sho nsambisha ewotɔ aso wele kema ambetawudi dimɛna dimɛna?
4 Ewotɔ aso wele kema ambetawudi: Kânga mbakombolaso efula dia ewotɔ aso wele kema ambetawudi mbeka akambo wa mɛtɛ, tayɛnya solo dia lotutsha naka sho nkonga etena k’ɔlɔlɔ kahombaso mbasambisha ndo monga la yewo diaha mbasambisha akambo efula mbala kakɔ ɔtɔi. (Und. 3:1, 7) L’etena kakɔ kâmɛ, sho salaka la wolo dia mbasambisha oma l’ɛnyɛlɔ kaso k’ɔlɔlɔ ndo mongaka suke dia mbasambisha la lotutsha ndo la dilɛmiɛlɔ di’efula. (1 Pet. 3:1, 15) Lo mɛtɛ, naka sho monga la solo dia lotutsha l’olimu w’esambishelo, kete tayonga l’etombelo w’amɛna ndo tayɔngɛnyangɛnya Shɛso lele l’olongo.