Shihodia Bible ekɔ dui diakoka kosha ɔngɛnɔngɛnɔ

BIBLE kekɔ la akambo wa mɛtɛ w’ohomba efula w’oma le Nzambi. Tɔ totɛka dikambo di’oyango wa lɔsɛnɔ, ɔkɔkɔ wasowa anto, ndo dikambo dia nshi yayaye y’anto. Tɔ tetshaka woho wakokaso monga la ɔngɛnɔngɛnɔ, woho wa monga la angɛnyi, ndo woho wakokaso kandola ekakatanu watokomɛ. Kɛnɛ koleki ohomba ele, tɔ tetshaka awui wendana la Shɛso lele l’olongo, mbuta ate Otungi aso, Jehowa. Ewo kɛsɔ toshaka ɔngɛnɔngɛnɔ ndo mbishaka nsɛnɔ yaso oyango.

Bible mbɛdikaka okondjelo wa ewo ka Nzambi la olelo. Yeso akate ate: “Untu hayala la lumu ne dia ma tu, keli ayuyala la lo ne dia aui tshe watumba uma l’unyo wa [Jehowa].” (Mateu 4:4; Heberu 5:12-14) Oko wele dia onto nsɛna nde pombaka ndɛka lushi tshɛ, woho akɔ wâmɛ mbele ekɔ ohomba mbadiaka Bible mbala la mbala dia sho ndjokondja wahɔ oma lo daka diaki Nzambi dia lɔsɛnɔ la pondjo.

Sho ngɛnangɛnaka olelo nɛ dia Nzambi akatotonge la akoka wa monga la ɔngɛnɔngɛnɔ wonya walɛso ndo nɛ dia olelo kotshaka ohomba ɔmɔtshi. Koko, tekɔ la ohomba okina wele paka sho kole ko sho monga la ɔngɛnɔngɛnɔ. Yeso akate ate: ‘Wanɛ weya ehomba awɔ wa lo nyuma wekɔ la ɔngɛnɔngɛnɔ.’ (Mateu 5:3) Ɔngɛnɔngɛnɔ koka monga mɛtɛ, nɛ dia ehomba ɛsɔ wa lo nyuma koka kotshama lo shihodia Ɔtɛkɛta wa Nzambi.

Anto amɔtshi fɔnyaka ɔnɛ shihodia Bible bu dikambo dia tshitshɛ. Ɛnyɛlɔ, wɛ koka monga l’ohomba wa ekimanyielo dia shihodia avɛsa watɛkɛta dia mbekelo mɔtshi yahateye kana wele la ɛtɛkɛta wa didjidji. Ekɔ nto prɔfɛsiya yakafundama la ɛtɛkɛta wa didjidji yele dia sho ndjioka paka sho mboki sso lo avɛsa akina wa lo Bible watɛkɛta dikambo diakɔ. (Danyele 7:1-7; Enyelo 13:1, 2) Kânga mbediɔ ɔsɔku, wɛ mɛtɛ koka shihodia Bible. Ngande wakokɛ ndjashikikɛ dia onto koka shihodia Bible?

Ɔngɛnɔngɛnɔ wakoka monga la anto tshɛ

Bible ekɔ Ɔtɛkɛta wa Nzambi. Nzambi tɛnyaka lolango lande lɔkɔ. Onde Nzambi akakoke tosha dibuku diahatakoke mboka, kana diele paka wanɛ wakeke mukanda efula ato mbakoka dioka? Kema, Jehowa hakoke sala akambo aha la lɔsɛngɔ. Yeso Kristo akate ate: “Untu akona l’atei anyu leli umbutshi a pami, lam’ayolomba on’andi la pami lusi, ku ndi mbusha ului lu dihuli dia lusi? Kana ndi ayôlomba ukili, ku ndi mbusha kutu? Okone, naka nyu antu wa kolo, mbeyaka mbisha an’anyu eshasha w’ololo, Shenyu le l’ulungu huleka mbisha wane wôlomba nyuma k’[ekila]?” (Luka 11:11-13) Ɔnkɔnɛ, wɛ koka ndjashikikɛ ɔnɛ wɛ koka shihodia Bible ndo ɔnɛ naka wɛ nɔmba Nzambi l’otema ɔtɔi, kete nde ayokosha ekimanyielo keyɛ l’ohomba dia kishihodia. Ɔnkɔnɛ, kânga ana koka shihodia wetshelo w’etatelo wa lo Bible.​—2 Timote 3:15.

Kânga mbele nɔmbamaka dia sho mbidja welo dia shihodia Bible, sala dikambo sɔ koka monga l’etombelo w’ɔlɔlɔ ndo wakeketsha. L’ɔkɔngɔ w’eolwelo kande, Yeso akɛnama le ambeki ande ahende ndo akatɛkɛta la wɔ dia prɔfɛsiya ya lo Bible. Ɔkɔndɔ wa Luka mbutaka ɔnɛ: “Ku ndi akatatela uma le Mose, la uma le amvutshi tshe, akâmanya akambu andi fundu lu afundelu tshe.” Etombelo akɔna wakayala? La dikɔlɔ diakɔ, lam’akawakanaka yimba la kɛnɛ kakawoke, ambeki akɔ wakambwana vate: “Undi, etema asu kompeta lam’akandateketaki la su lu mbuka, ndu lam’akandatumanyaki afundelu fundu?” (Luka 24:13-32) Oshihodielo w’Ɔtɛkɛta wa Nzambi akawasha ɔngɛnɔngɛnɔ nɛ dia dikambo sɔ diakakeketsha mbetawɔ kawɔ lo alaka waki Nzambi ndo diakawasha kanyi y’ɔlɔlɔ lo dikambo dia nshi yayaye.

Shihodia Ɔtɛkɛta wa Nzambi bu dikambo dia wotsho, koko di’ekɔ dikambo dia dimɛna ndo tokondjiyɛka wahɔ, ndo toshaka ɔngɛnɔngɛnɔ wele oko onto lalɛ diangɔ di’amɛna efula. Ahombayɛ sala dia wɛ monga la eokelo kɛsɔ? Sawo diayela mɛnyaka woho wakokayɛ ngɛnangɛna lo ‘ewo k’oshika kaki Nzambi.’​—Tukedi 2:1-5.

[Osato wa lo lɛkɛ 4]

Oko ombutshi wele la ngandji, Jehowa toshaka nyuma k’ekila dia tokimanyiya dia sho shihodia Bible