Woho wakokayɛ shihodia Bible
1. Lɔmba Nzambi dia nde kokimanyiya
Ninfa, ladjasɛ lo wodja wa Italie mbutaka ɔnɛ: “L’etena kɛmɔtshi lakadiaka Bible la ntondo ka ndala. Lakasalaka ngasɔ nɛ dia lakeyaka dia tɔ kekɔ Ɔtɛkɛta wa Nzambi ndo kânga mbakimi kɔngɛnangɛnaka wadielo akɔ lakalangaka mbeya awui wakafunde Nzambi lo Bible. Lakayadjɛ oyango wa kiadia tshɛ. L’etatelo lakɛnyi dia ekɔ wɔdu, koko etena kakamayokomaka lo tenyi diakamɛnyi dia ekɔ wolo shihodia, lakatshike mbadia.”
ONDE dui diakakomɛ Ninfa sɔ diakakokomɛ ndo wɛ? Kɛsɔ mbakakomɛ anto efula. Koko, oko wakatadiɛnyi lo sawo dietshi, Jehowa Nzambi nangaka dia wɛ shihodia Ɔtɛkɛta ande. Ko, ngande wakokayɛ mboshihodia? Ntondotondo, lɔmba Nzambi dia nde kokimanyiya.
Apɔstɔlɔ waki Yeso wakɔsamaka oko “haweyi mukanda, antu k’antu” nɛ dia vɔ kɔmbɔtɔ kalasa y’ambewi w’ɛlɛmbɛ wa l’ɔtɛmwɛlɔ w’ase Juda. (Etsha 4:13) Koko, Yeso akâshikikɛ dia vɔ wakakoke shihodia Ɔtɛkɛta wa Nzambi. Lo yoho yakɔna? Yeso akate ate: “Ukimanyidi, nyuma k’[ekila], layutuma Papa lu lukumbu lami, ndi ayunyetsha akambu tshe.” (Joani 14:26) Nzambi akakambe la nyuma k’ekila kɛsɔ kana wolo wakamba olimu dia tonga nkɛtɛ ndo diangɔ tshɛ diele lɔkɔ. (Etatelu 1:2) Nde akakambe nto la nyuma kɛsɔ dia kimanyiya anto 40 dia vɔ funda tokanyi tande lo Bible. (2 Petero 1:20, 21) Nyuma kakɔ kâmɛ kɛsɔ kokaka kimanyiya ɛlɔ kɛnɛ wanɛ wayanga dia shihodia Bible.
Ngande wakokayɛ nongola nyuma k’ekila kaki Nzambi? Wɛ pombaka kilɔmba la mbetawɔ. Lo mɛtɛ, mbeyaka monga ohomba dia wɛ mbɔlɔmbatɔ l’etete. Yeso akate ate: ‘Nyotetemale nɔmba, ko wayonyosha. Naka nyu mbeyaka mbisha ananyu weshasha w’ɔlɔlɔ, kete hoke Shɛnyu lele l’olongo hosha nyuma k’ekila le wanɛ wɔlɔmbatɔ!’ (Luka 11:9, 13) La lokaho tshɛ, Jehowa ayosha wanɛ wɔlɔmba nyuma k’ekila l’otema ɔtɔi. Wolo wakamba olimu ɔsɔ kokaka kokimanyiya dia wɛ shihodia ɛtɛkɛta wakasambiyama wakafundama lo Bible deko aha nɛ. Nyuma kaki Nzambi kokaka nto kosha lomba lele la yɛ ohomba dia kamba l’awui wa lo Bible wele la nkudu k’efula lo lɔsɛnɔ layɛ.—Heberu 4:12; Jakoba 1:5, 6.
Etena tshɛ kayoyadiaka Bible, lɔmbaka Nzambi dia nde kosha nyuma k’ekila dia tɔ kokimanyiya dia wɛ shihodia Ɔtɛkɛta ande.