Ambola w’oma le ambadi
Kakɔna katshutshuya “diango di’ushinga a wulu dia wedja tshe” dia ndja lo “luudu” l’ɔtɛmwɛlɔ wa mɛtɛ?—Hangai 2:7.
Oma lo tshimbo y’ɔprɔfɛta Hangai, Jehowa akate ate: “Dimi layusutshasutsha wedja tshe dia diango di’ushinga a wulu dia wedja tshe ndja. Ku dimi layuludia luudu lone la lutumbu.” (Hangai 2:7) Onde osutshesutshelo wa “wedja tshe” mbakotola “diango di’ushinga a wulu” dia wedja, mbuta ate anto wele la etema w’ɛlɔlɔ oya l’ɔtɛmwɛlɔ wa mɛtɛ? Kema.
Tɔsɛdingole kɛnɛ kasutshasutsha wedja ndo etombelo wele la osutshesutshelo ɔsɔ. Bible mbokaka dimbola nɛ ɔnɛ: “Okoko wana wadja asi wedja sheki, ndu watsha atunyi fyungi anyanya?” (Osambu 2:1) “Fyungi [y’]anyanya” yatetemala ‘mbidja’ wedja, ekɔ woho wasalawɔ dia tetemala nɔmbɔla. Kɛnɛ kaleka mbasutshasutsha ele kɛnɛ kadja mandji yawɔ lo wâle.
Losango lasambisha Ɛmɛnyi wa Jehowa l’andja w’otondo lendana la Diolelo diaki Nzambi diamboshikikɛmaka mbele mɛtɛ kɛnɛ kadja mandji ya wedja lo wâle. Ɔnkɔnɛ, Diolelo diaki Nzambi diakakimɔma l’anya waki Yeso Kristo “diayulanya waulelu [w’ana w’anto] ako tshe.” (Danyele 2:44) Losango la elombwelo latatasambisha sutshasutshaka wedja. (Isaya 61:2) Ndo etena kataleke pama olimu ɔsɔ mbataleke sutshasutshama wedja. Osutshesutshelo wa wedja wakatama lo Hangai 2:7 ekɔ djembetelo yakɔna?
Lo Hangai 2:6, sho mbadiaka ɔnɛ: “Ne dia [Jehowa] Kanga lulimbilimbi kata ati: Etena otoi kambutshikala, etena ka tshitshe, ku dimi layusutshasutsha ulungu la kete, ashi a waki la kete y’ufumbu.” Lo vusola ɛtɛkɛta w’oma lo divɛsa nɛ, ɔpɔstɔlɔ Paulo akafunde ate: “Keli kakiane ndi ambutulaka ati: Etena kekina ntu layumusutshasutsha kete, aha kete tshu, keli ndu ulungu. La diui ne ati: Etena kekina ntu, diambutenya ati: Diango diakasutshasutshama diayunyema, uku diango diakatungama, ne dia diango diahasutshasutshama [mbuta ate Diolelo] diatshikali.” (Heberu 12:26, 27) Eelo, dikongɛ di’otondo di’akambo nɛ diayanga ndanyema dia tshikɛ andja w’oyoyo waki Nzambi dihole.
Anto wele la etema w’ɛlɔlɔ kotwamaka oya l’ɔtɛmwɛlɔ wa mɛtɛ aha nɛ dia wedja wekɔ lo sutshasutshama. Kɛnɛ kakotola anto oya le Jehowa ndo oya l’ɔtɛmwɛlɔ ande ekɔ kɛnɛ kasutshasutsha wedja, mbuta ate esambishelo kasalema lo andja w’otondo kendana la Diolelo diaki Nzambi diamboshikikɛmaka. Wewoyelo wa ‘nsango y’ɔngɛnɔngɛnɔ ya lokumu l’ɔlɔlɔ la pondjo’ kotolaka anto wele la etema w’ɛlɔlɔ oya l’ɔtɛmwɛlɔ wa mɛtɛ waki Nzambi.—Enyelo 14:6, 7.
Losango la Diolelo ekɔ losango la elanyelo ndo la panda. (Isaya 61:1, 2) Esambishelo ka losango la Diolelo lo andja w’otondo kekɔ la etombelo ehende: osutshesutshelo wa wedja ndo oyelo wa diangɔ di’oshinga wolo dia ndjotombola Jehowa.