Ɔtɛkɛta wa Jehowa wekɔ la lɔsɛnɔ
Akambo w’ohomba w’oma lo etenyi ka hende ka dibuku dia Esambu
OKO weso ekambi waki Jehowa, sho nongamɛka dia tayohomana l’ehemba ndo l’ekakatanu. Ɔpɔstɔlɔ Paulo akafunde ate: “Wane tshe walanga ndjala la lumu l’ololo le Kristu Jesu, wayusuwa.” (2 Timote 3:12) Kakɔna kayotokimanyiya dia sho mbikikɛ ehemba ndo ɛhɛnyɔhɛnyɔ, woho wa sho mɛnya kɔlamelo yaso le Nzambi?
Etenyi ka hende ka lo tenyi tanu dia dibuku dia Esambu toshaka ekimanyelo kɛsɔ. Osambu 42 polo 72 tɛnyaka dia naka sho nangaka mbikikɛ ehemba, kete sho pombaka kitsha wɛkamu aso tshɛ le Jehowa ndo kongɛ etshungwelo oma le nde. Ande wetshelo w’ohomba efula le so lee! Lo ɛnyɛlɔ ka tenyi dikina dia l’Ɔtɛkɛta wa Nzambi, losango lele lo etenyi ka hende ka dibuku dia Esambu, lekɔ ‘la lomu ndo la nkudu’ polo ndo ɛlɔ kɛnɛ.—Heberu 4:12.
JEHOWA EKƆ “ESHAMELU KASU LA WULU ASU”
Ose Lɛwi ɔmɔtshi ekɔ lo dawo. Oko wende la lonyangu dia nde hatotshɔ lo ɛtɛmwɛlɔ ka Jehowa dia tɔtɛmɔla, nde ekɔ lo ndjasamba lo mbuta ate: “[Anima] ami, ukundi ambuyolembiama, ukundi ambuyutshutshumala na? Ulungameli le [Nzambi].” (Esambu 42:5, 11; 43:5) Divɛsa nɛ kakatanyaka strɔfɛ shato ya l’Osambu 42 ndo 43 dia kenga pɔɛmɛ ɔtɔi. Osambu 44 ekɔ dɔmbɛlɔ diakasalema lo dikambo dia Juda, wodja waki l’asui, ondo oma lo woho wakawanɛ ase Asuriya dia mbalɔsha lo nshi ya nkumekanga Hɛzɛkiya.
Osambu 45, wele lembo lendana la tshuki dia nkumekanga wekɔ prɔfɛsiya kendana la Mɛsiya Nkumekanga. Esambo esato wayela mɛnyaka Jehowa oko “eshamelu kasu la wulu asu,” “khum’ekanga ka wuki ka kete tshe” ndo “eshamelu” kaso. (Esambu 46:1; 47:2; 48:3) Ɛtɛkɛta w’amɛna efula w’Osambu 49 mɛnyaka dia ndoko onto “leya ntshungula unyandi”! (Osambu 49:7) Ana wa Kɔra mbakafunde esambo enanɛi wotate lo etenyi ka hende ka dibuku dia Esambu. Asafu mbakafunde Osambu wa divwa, mbuta ate Osambu 50.
Ekadimwelo lo ambola w’oma l’Afundelo:
44:19—“Ahuli watetamaka mbulu” akawalembetshiyaka? Ondo omembi w’esambo akatɛkɛtaka dikambo dia dihole dia ata, lɛnɛ ele wanɛ wakavɔka wakayalaka mbo ya ndɛ ya waa mbolo.
45:13, 14a—Ele “ona umuntu a khum’ekanga” “[l]ayolombwama utsha le khum’ekanga”? Ɔsɔ ekɔ ɔna womoto la ‘Nkumekanga ka pondjo,’ mbuta ate Jehowa Nzambi. (Enyelo 15:3) Nde nembetshiyaka etshumanelo ka lotombo ka Akristo 144000, wele Jehowa ekɔ lo mbaɔsa oko anande lo mbakita esɔ ka nyuma kande. (Romo 8:16) “Ona umuntu” la Jehowa ɔsɔ, “[lɔlɔngɔswami] uku utshukami wuyalengi dia ntsho le umendi,” ayɔlɔmbwama otsha le otshuki, mbuta ate Mɛsiya Nkumekanga.—Enyelo 21:2.
45:14b, 15—‘Esekaseka wa dimuma’ wekɔ didjidji dia na? Vɔ wekɔ didjidji dia “ului a wuki” w’atɛmɔdi wa mɛtɛ, wanɛ wasangana la atshikadi w’akitami w’esɔ ndo wâsukɛ. Lam’ele vɔ wakatshikala la lumu “uma lu pa ka wuki,” vɔ wayonga lanɛ la nkɛtɛ etena kayosalema diwala dia Mɛsiya Nkumekanga l’olongo. (Enyelo 7:9, 13, 14) Lo diaaso sɔ, vɔ wayonga “l’ongenongeno otekoya.”
45:16—Lo yoho yakɔna yayonga ana l’ahole wa lowandji la watshɛwɔ? Etena kakotɔ Yeso la nkɛtɛ, nde akikɔ la watshɛnde wa la nkɛtɛ. Vɔ wayonga ana ande etena kayondoyowaolola oma lo nyɔi lo Ɛlɔmbwɛlɔ kande k’ɛnɔnyi kinunu. Amɔtshi l’atei awɔ wayoyonga l’atei a wanɛ wayɔsɔnama dia monga ‘ewandji wa lo nkɛtɛ k’otondo.’
50:2—Lande na kakɔsamaka Jerusalɛma oko dihole dia “dimena otekoya”? Aha l’ɔtɛ w’ɛnamelo k’osomba. Koko aki nɛ dia Jehowa akakambe la yɔ ndo nde akayisha lotombo lo woho wakandayetɛ osomba wa tɛmpɛlɔ kande ndo kapitalɛ ka nkumi ya dikanga yakandakitaka esɔ.
Wetshelo le so:
42:1-3. Oko onyango wa lofumbɔ lele l’ahole wele kema ashi, mbele ose Lɛwi aki la mposa k’efula ka Jehowa. Etena kakinde kokokaka tɛmɔla Jehowa lo ɛtɛmwɛlɔ kande, nde akongaka la lonyangu efula. Diakɔ diele asɔi ande ‘wakayala mma dia ndɛ la yanyi ndo l’otsho,’ nde komonga la mposa ka ndɛ. Onde sho lawɔ hatokoke monga la lowando l’oma k’ɛse otema lo woho watɛmɔlaso Jehowa kâmɛ l’asekaso ambetawudi?
42:4, 5, 11; 43:3-5. Naka l’ɔtɛ w’ɛkɔkɔ ɛmɔtshi tayokakitɔna lo tshanda mɔtshi l’etshumanelo ka Akristo, sho koka kondja ekeketshelo naka sho mbohɔ ɔngɛnɔngɛnɔ wakongaka laso etena kakatasangana l’anangɛso. Kânga mbele l’etatelo dui sɔ mbeyaka tosha pâ nɛ dia tayoyaɔsa oko ekalema, diɔ diayotohola nto dia Nzambi ekɔ eshamelo ndo ɔnɛ sho pombaka kongɛ le nde dia kondja esambelo.
46:1-3. Oyadi mpokoso kakɔna kayotokomɛ, sho pombaka monga la wɛkamu wa shikaa ɔnɛ “[Nzambi ekɔ] eshamelu kasu la wulu asu.”
50:16-19. Onto tshɛ lata kashi ndo lasala awui wa kɔlɔ hakoke monga onyimpala waki Nzambi.
50:20. Lo dihole dia sho ndeka tɛkɛta dikambo dia munga y’anto akina, sho pombaka mbadimanyiya.—Kolosai 3:13.
“UTEMA AMI ULUNGAMELI PAKA [NZAMBI] LA KI”
Olui w’esambo ɔnɛ tatɛka la dɔmbɛlɔ di’oma k’ɛse otema diakasale Davidi l’ɔkɔngɔ wa nde sala pɛkato nde la Batɛshɛba. Osambu 52 polo 57 mɛnyaka dia Jehowa ayotshungola wanɛ wakitsha wetsho awɔ tshɛ le nde ndo wakongɛ panda oma le nde. Oko wɛnyamidiɔ lo Osambu 58-64, l’edja tshɛ kakinde l’ɔkɛi, Davidi aketɛ Jehowa eshamelo kande. Nde akembe ate: “Utema ami ulungameli paka [Nzambi] la ki, ne dia elungamelu kami keko le ndi.”—Osambu 62:5.
Lɔngɛnyi la shikaa la lam’asaso la Otshungodi aso pombaka totshutshuya dia ‘mbowembɛ ndo tombola lokombo lande.’ (Osambu 66:2) Jehowa tombwamaka oko kanga lokaho lo Osambu 65, oko Nzambi kele l’etsha wa panda lo Osambu 67 ndo 68, ndo oko Otshungodi lo Osambu 70 ndo 71.
Ekadimwelo lo ambola w’oma l’Afundelo:
51:12—Davidi akalɔmbɛ dia sukamɛ la “utema wa lulangu” waki onto akɔna? Kɛsɔ nembetshiyaka woho waketawɔ Nzambi dia kimanyiya Davidi aha la nyuma kande ka ekila koko la yimba yaki Davidi ndamɛ, mbuta ate tokanyi tande hita. Nde akalɔmbaka Nzambi dia nde mbosha nsaki ka sala kɛnɛ kele ɔlɔlɔ.
53:1—Ngande wele onto lahetawɔ ɔnɛ Nzambi ekɔ “enginya”? Enginya katawɔ lanɛ halembetshiya ohombelo wa yimba. Woho wele onto la ngasɔ enginya koka mɛnama oma lo lɔkɛwɔ la kɔlɔ lele l’onto ɔsɔ oko wotamidiɔ lo Osambu 53:1-4.
58:3-5—Lo woho akɔna wele anto wa kɔlɔ oko olui? Kashi katawɔ lo dikambo dia anto akina ekɔ oko lɔlɛngɔ l’olui. Vɔ nanyaka lokumu l’ɔlɔlɔ l’anto oko watolanyaka lɔlɛngɔ l’olui demba di’onto. “Uku kutu ka luhukutui” anto wa kɔlɔ hawetawɔ lohango kana engwelo.
58:7—Ngande wakoka anto wa kɔlɔ ‘shishɔ oko ashi mbambeta’? Ondo Davidi akakanyiyaka dikambo di’ɛkɛdi w’ashi ɛmɔtshi wa lo Nkɛtɛ ya Daka. Kânga mbatɔtɔka elola lo ekidi wa ngasɔ, ɛkɛdi w’ashi ɛsɔ momaka esadi eto ndo vɔ shishɔka. Davidi akalɔmbaka dia anto wa kɔlɔ shishɔ esadi.
68:13—Lo yoho yakɔna ‘yakakombama ahafu wa enga la fɛsa ndo sala yatɔ la paonyi k’ɛlɛsɛlɛsɛ’? Benga dimɔtshi diele la kulɛrɛ k’ɛdɔdɔ diekɔ la kulɛrɛ ka wɛma lo sala yawɔ mɔtshi. Sala yawɔ yekɔ la ɛnamelo kele oko esase a wonya wa ngaingai. Ɔnkɔnɛ, ondo Davidi akɛdika woho wakadjaka epele w’ase Isariyɛlɛ etshumba lo ata la enga, mbuta ate fudu kalawɔ efula ndo kele la ɛnamelo ka ngaingai. Oko wadiɛnya nomb’ewo mɔtshi y’awui wa lo Bible, olembetshiyelo ɔsɔ koka mendana nto la ɛsɛlasɛla kɛmɔtshi, kana dɛmbɔ dia koso diɔsama oko ɛngɔ kambolana. Lo weho akɔ tshɛ, Davidi akatɛkɛtaka dia etshumba wakashaka Jehowa wodja ande l’atei w’atunyi awɔ.
68:18—Waa na waki ‘apami waki oko weshasha’? Ɔsɔ aki apami waki l’atei a wanɛ wakandama lo fumbe l’etena kakawatalɔshaka dia mbɔsa Nkɛtɛ ya Daka. L’ɔkɔngɔ diko, apami asɔ wakayongaka l’ɔkɛndɛ wa kimanyiya ase Lɛwi l’olimu awɔ.—Ezera 8:20.
68:30—Kakɔna kalembetshiya dɔmbɛlɔ di’ɔnɛ “uhangweli nyama yudjashi l’atei a kombe”? Lo tɛkɛta lo yoho ya didjidji dikambo dia atunyi w’ekambi waki Jehowa oko nyama ya ngala, Davidi akalɔmbɛ Nzambi dia nde mbahangwɛ kana mbidja wekamu lo wolo awɔ diaha vɔ sala kɔlɔ.
69:23—Naa kitshimudi y’etelo k’ɔnɛ ‘ɔyɛkiayɛkia nkende y’atunyi’? Epipa wele l’ɔkɔngɔ wekɔ ohomba efula dia sala olimu a wolo, oko tɔngɔna ndo mɛmba wotsho w’efula. Naka lokende l’onto lambɔyɛkayɛka, kete nde amboshisha wolo ande. Lâsɔ, Davidi akalɔmbaka dia atunyi ande shisha wolo awɔ.
Wetshelo le so:
51:1-4, 17. Osalelo wa pɛkato hatanganya tshɛ lo tshɛ la Jehowa Nzambi. Naka sho ndjatshumoya, kete sho koka monga l’eshikikelo ɔnɛ nde ayotoka kɛtshi.
51:5, 7-10. Naka tambosala pɛkato, sho koka sɛngasɛnga Jehowa dia nde todimanyiya l’ɔtɛ wakatahowɔ pɛkato. Sho pombaka nto mbɔlɔmba dia nde tɛ̂dia, tokeketsha, tokimanyiya dia sho minya tokanyi ta kɔlɔ oma l’etema aso ndo tosha yimba ya shika ekolo.
51:18. Pɛkato kaki Davidi akadje wodja w’otondo lo wâle. Ɔnkɔnɛ, nde akalɔmbɛ dia Nzambi mboka Siɔna kɛtshi. Etena kasalaso pɛkato ka woke, mbala efula tɔ mbishaka lokombo la Jehowa ndo etshumanelo sɔnyi. Sho pombaka nɔmba Nzambi dia nde nɔngɔsɔla kɔlɔ kosadiso.
52:8. Sho koka monga “uku utamba w’uweli la akatshi wa tshududu lu seke dia luudu la [Nzambi],” mbuta ate ndjasukanya la Jehowa ndo ntɔ elowa l’olimu ande lo mbokitanyiya ndo lo mbetawɔ engwelo kande la lolango tshɛ.—Heberu 12:5, 6.
55:4, 5, 12-14, 16-18. Sheke yakawɔtwɛ Abisalɔma w’ɔnande ndo woho wakofunge Ahitɔfɛlɛ ondaki wakandɛkɛka otema le nde akasha Davidi lonyangu heyama. Koko, kɛsɔ kokitshakitsha wɛkamu ande le Jehowa. Hatohombe mbetawɔ dia asui kitshakitsha wɛkamu aso le Nzambi.
55:22. Ngande wakokaso kitsha wotsho aso le Jehowa? Sho kitshaka wotsho aso le Jehowa lo 1) mbotɛ dikambo diatokiyanya lo dɔmbɛlɔ, 2) lo nyanga ɛlɔmbwɛlɔ ndo osukɔ oma l’Ɔtɛkɛta ndo oma lo okongamelo ande, ndo 3) lo sala kɛnɛ tshɛ kakokaso sala dia kandola dikambo diakɔ.—Tukedi 3:5, 6; 11:14; 15:22; Filipi 4:6, 7.
56:8. Jehowa mbeyaka ekakatanu wele laso ndo shɛngiya yele l’ekakatanu akɔ le so.
62:11. Ndoko lakoka mbisha Nzambi wolo, nɛ dia nde mbele kiɔkɔ ya wolo. ‘Wolo wekɔ le nde.’
63:3. ‘Ngandji ka lɔsɛngɔ kaki Nzambi ndeka lomu ɔlɔlɔ’ nɛ dia naka aha tɔ, tshike lɔsɛnɔ kema l’oyango. Ekɔ dui dia lomba sho monga la diɔtɔnganelo di’ɔlɔlɔ la Jehowa.
63:3. Otsho, mbuta ate etena kaha londjo kana ofukutanya ɔmɔtshi, koka monga etena koleki ɔlɔlɔ ka kana yimba.
64:2-4. Vate vate koka ndanya lokumu l’ɔlɔlɔ laki onto. Hatohombe nonga kana dianganya awui wa vate vate.
69:4. Dia sho nama wɔladi, mbeyaka monga ɔlɔlɔ tena dimɔtshi dia ‘tshika dikambo’ kana dimanyiya, oyadi tekɔ l’eshikikelo k’ɔnɛ hatosadi kɔlɔ.
70:1-5. Jehowa mbokaka woho wɔlɔmbaso ekimanyielo. (1 Tesalonika 5:17; Jakoba 1:13; 2 Petero 2:9) Nzambi mbeyaka mbetawɔ dia ohemba tetemala, koko nde ayotosha lomba layotokimanyiya dia sho ndɔshaka l’ohemba akɔ ndo tosha wolo wa sho mbikikɛ. Nde hatetawɔ dia sho pembama woho wahatakoke mbikikɛ.—1 Koreto 10:13; Heberu 10:36; Jakoba 1:5-8.
71:5, 17. Davidi aki la dihonga ndo la wolo nɛ dia lo nshi yande ya dikɛnda nde akakitsha wɛkamu ande le Jehowa, kânga la ntondo ka nde ndɔ la Ngɔliyatɛ, dihoka di’ose Filistiya. (1 Samuele 17:34-37) Ɛlɔngɔlɔngɔ la esekaseka pombaka ndjaɛkɛ le Jehowa lo kɛnɛ tshɛ kasalawɔ.
‘Lotombo lande lalodia nkɛtɛ k’otondo’
Osambu w’ekomelo wa l’etenyi ka hende ka dibuku dia Esambu, mbuta ate Osambu 72 watɛkɛta dikambo dia lowandji laki Sɔlɔmɔna, wakɛnyaka lo didjidji akambo wayoyala lo lowandji laki Mɛsiya. Ɛtshɔkɔ wa diambo nembetshiyama l’etenyi ka hende ka dibuku dia Esambu nɛ. Ɛtshɔkɔ akɔ ko: wɔladi w’efula, ɔsɔkishelo la awui wa ngala wayoshila, ndo nkɛtɛ yayɔngɔnya diangɔ efula. Onde tayonga l’atei w’anto wayɔngɛnangɛna l’ɛtshɔkɔ ɛsɔ ndo ɛtshɔkɔ ekina wa Diolelo? Sho koka monga l’atei w’anto asɔ, naka oko omembi w’esambo tayɔngɛnangɛna dia kongɛ Jehowa, lo mbowetɛ eshamelo ndo wolo aso.
“Alombelo wa Dividi . . . wambukumela” la ɛtɛkɛta ɛnɛ: “[Jehowa Nzambi] atumbwami, [Nzambi k]a Isariyele, ndame katutshaka akambu wa mamba! Lukumbu landi la mamba latumbwami pundju! Kete tshe yaluli la lutumbu landi! Ayali osoku! ayali osoku!” (Osambu 72:18-20) Nyɛsɔ sho lawɔ totombole Jehowa l’otema aso tshɛ ndo totombole lokombo lande la diambo.
[Osato wa lo lɛkɛ 9]
Onde wɛ mbeyaka ɔnɛ lalembetshiya “ona umuntu a khum’ekanga”?
[Osato wa lo lɛkɛ 10]
Onde wɛ mbeyaka lande na kakelamɛka Jerusalema ɔnɛ dihole dia “dimena otekoya”?