Tokongɛke lushi la Jehowa la ekikelo
‘Lâdiko dia mbetawɔ kanyu, nyokotsha ekikelo.’—2 PETERO 1:5, 6.
1, 2. Ekikelo kɛdikɛdi na ndo bonde kele Akristo la ohomba atɔ?
LUSHI la woke la Jehowa lambosukana efula. (Joele 1:15; Zefaniya 1:14) Oko Akristo wamboyashikikɛ dia nama olowanyi awɔ le Nzambi, tekɔ lo kongɛ l’asolo walomɔlomɔ etena kɛsɔ kayoyindja Jehowa lowandji lande. Koko etena kakatakongɛ lushi lɔsɔ, sho mpetshamaka, tɛngamaka, pɛnyahɛnyamaka ndo ndjakemaka l’ɔtɛ wa mbetawɔ kaso. (Mateu 5:10-12; 10:22; Enyelo 2:10) Awui asɔ nɔmbaka dia sho monga la ekikelo, dikoka dia shika ekolo la ntondo k’asui. Ɔpɔstɔlɔ Petero tokeketshaka ate: ‘Lâdiko dia mbetawɔ kanyu, nyokotsha ekikelo.’ (2 Petero 1:5, 6) Tekɔ l’ohomba wa ekikelo, nɛ dia Yeso akate ate: “Ɔnɛ layokikɛ polo ndo lo nkomeelo, nde ayoka.”—Mateu 24:13, Dyookaneelo dy’Oyooyo.
2 Sho tataka, mvushaka ndo pomanaka la ekakatanu ekina. Satana ngɛnangɛnaka efula etena kashishaso mbetawɔ kaso! (Luka 22:31, 32) La ekimanyielo ka Jehowa, sho kokaka mbikikɛ ekakatanu wa weho la weho. (1 Petero 5:6-11) Tɔsɛdingole awui amɔtshi wakomɛ anto lo lɔsɛnɔ wɛnya dia sho kokaka kongɛ lushi la Jehowa la ekikelo ndo la mbetawɔ ka nge.
Hemɔ kombashimba
3, 4. Sha ɛnyɛlɔ kɛmɔtshi kɛnya dia sho kokaka kambɛ Jehowa la kɔlamelo kânga talɔshana la hemɔ.
3 Nzambi hatɔkɔnɔla lo dihindo nshi nyɛ, koko nde toshaka wolo wa mbikikɛ hemɔ. (Osambu 41:1-3) Sharon akate ate: “Lo yɛdikɔ yakokami mbohɔ, dimi la kɔsa k’etshimbi taya oko dikaka la nkɛtɛ. Lakotɔ la hemɔ kɛmɔtshi ka l’okandji kakashishɛ ɔngɛnɔngɛnɔ tshɛ watongaka l’ana w’akɛnda.” Mbeya awui wendana la Jehowa ndo la asangwelo ande w’ɔnɛ anto wayonga la yônge ya kokele akasha Sharon elongamelo. Kânga mbatɛkɛtande ndo mbakɛndakɛndande la okakatanu, nde tanaka ɔngɛnɔngɛnɔ l’olimu w’esambishelo. Ambeta oko ɛnɔnyi 15, nde akate ate: “Yônge yami mbeyaka tetemala ndana, koko wɛkamu ndo diɔtɔnganelo diasami la Nzambi mbele awui woleki ohomba le mi. Lekɔ l’ɔngɛnɔngɛnɔ efula dia monga l’atei w’ekambi wa Jehowa ndo dia kondja osukɔ wa mɛtɛ oma le nde!”
4 Ɔpɔstɔlɔ Paulo akakeketsha Akristo wa la Tɛsalɔnika ate: “Nyukikitsha akanga w’etema a weodu.” (1 Tesalonika 5:14) Awui wele oko, lonyangu l’efula kokaka kɔmɔla onto otema. Lo 1993, Sharon akafunde ate: “Kanyi y’ɔnɛ lambokita tatala yakakonya . . . lo ɔkɔmwɛlɔ ɛnɔnyi esato w’etondo. . . . Dikumanyi diakakeketsha ndo diakandake. . . . Oma lo tshimbo ya Tshoto y’Etangelo, Jehowa tolembetshiyaka la ngandji tshɛ woho wonga ɔkɔmwɛlɔ wa wolo. Eelo, Jehowa ndjakiyanyaka dikambo dia ekambi ande ndo mbeyaka woho wayaokawɔ.” (1 Petero 5:6, 7) Sharon ekɔ lo tetemala kambɛ Nzambi la kɔlamelo tshɛ etena kakongɛnde lushi la woke la Jehowa.
5. Kakɔna kɛnya dia Akristo kokaka mbikikɛ ekiyanu wa wolo?
5 Akristo amɔtshi wekɔ lo diɛnɛ la ekiyanu wa wolo l’ɔtɛ wa yoho ya lɔsɛnɔ yaki lawɔ ntondo. Harley akɛnyi Ta dia hende di’andja w’otondo dia kɔlɔ efula ndo dui sɔ diakokonya dia mɛnaka alɔ wa kɔlɔ l’otsho. Ndjaka ele lo djɔ, koko ada ekoko ate: “He mɔ! He nya demba!” Etena kakashimɔnde, nde mongaka dungu saso ahetanɛ la lɔhɛngɔ. Koko nde akakoke nsɛna lo yoho yɔtɔnɛ la alako waki Nzambi ndo l’edjedja ka wonya, alɔ wa wɔma asɔ wakayoyɛka paka lo pai.
6. Ngande wakalɔshana Okristo ɔmɔtshi la ekakatanu wa lo tokanyi?
6 Okristo ɔmɔtshi waki la ɔkɔmwɛlɔ woleki tshɛ aki l’okakatanu wa wolo dia sambisha lo soko la soko. Koko nde akatetemala lo olimu ɔsɔ, nɛ dia nde akeyaka dia olimu akɔ wekɔ panda le nde ndo le wanɛ waketawɔka losango lande. (1 Timote 4:16) Tena dimɔtshi nde kokokaka kɔkɔla kânga lo soko, koko nde akate ate: “L’ɔkɔngɔ w’etena kɛmɔtshi yema ya wolo yakakalolaka lo demba, ko dimi ntshɔ lo soko dikina ko dimi mpemba nto. Lo tetemala sambisha, dimi lakonge la lonyuma la dimɛna.” Wɔtwɛlɔ wa nsanganya aki nto tshondo y’okakatanu le ɔnangɛso ɔsɔ, koko nde akeyaka dimɛna ɛlɔlɔ waya lo monga kâmɛ la anango ndo l’akadiyɛnde wa lo nyuma. Ɔnkɔnɛ, nde akadjaka welo wahombama diaha mbetsha nsanganya.—Heberu 10:24, 25.
7. Kânga mbele amɔtshi la wɔma wa tɛkɛta la ntondo k’anto kana mbɔtɔ lo losanganya lɔmɔtshi, ngande wɛnyawɔ ekikelo kawɔ?
7 Akristo amɔtshi wekɔ la wɔma w’otamanya w’awui amɔtshi kana wa diangɔ dimɔtshi. Ɛnyɛlɔ, vɔ mbeyaka mboka wɔma tɛkɛta la ntondo k’anto kana mbɔtɔ lo losanganya lɔmɔtshi. Tokanyiya okakatanu wahomba monga lawɔ dia mbisha kɔmatɛrɛ lo nsanganya y’Akristo kana dia mbisha sawo lo Kalasa k’olimu wa teokrasi! Koko, vɔ wekɔ lo mbikikɛ ndo sho keketshamaka efula lo woho wahawetsha nsanganya ndo washawɔ kɔmatɛrɛ lɔkɔ.
8. Kakɔna katokimanyiya lo yoho ya lânde etena kalɔshanaso la ekakatanu wa lo tokanyi?
8 Diomuyelo di’efula ndo djɔ mbeyaka kimanyiya onto dia mbikikɛ ekakatanu wa lo tokanyi. Ekimanyielo k’aseka enganga mbeyaka monga nto ohomba. Koko, dui dioleki ohomba ele ndjaɛkɛ le Nzambi lo dɔmbɛlɔ. Osambu 55:22 mbutaka ɔnɛ: “Ukitsha wutshu aye le [Jehowa], ku ndi ayukembelawo. Ndi hetawo untu ololo nsutshasutshama.” Lâsɔ, “ekamaki [Jehowa] l’utema aye tshe.”—Tukedi 3:5, 6.
Woho wa mbikikɛ kandji konga etena kavushaso
9-11. a) Kakɔna kakoka tokimanyiya dia mbikikɛ lonyangu longa laso etena kavɔ lakiso ɔmɔtshi la ngandji? b) Ngande wakoka tokimanyiya ɛnyɛlɔ kaki Ana dia mbikikɛ kandji konga la ovushelo w’onto?
9 Etena kakakitola nyɔi ase nkumbo, dui sɔ mbishaka lonyangu la mamba. Abarahama akalele wadɛnde la ngandji, Sara etena kakandavu. (Etatelu 23:2) Kânga Yeso laki onto la kokele “akalili” etena kakavu ɔngɛnyi ande Lazaro. (Joani 11:35) Lâsɔ kema kɔlɔ monga la lonyangu etena kavɔ lakiso ɔmɔtshi la ngandji. Koko, Akristo mbeyaka dia eolwelo kayoyala. (Etsha 24:15) Ɔnkɔnɛ, vɔ hawonge la “lunyangu uku akina, wane waha la elungamelu.”—1 Tesalonika 4:13.
10 Ngande wakokaso mbikikɛ lonyangu longa laso etena kavushaso? Ɛnyɛlɔ kɛnɛ mbeyaka tokimanyiya. Hatotongaka la lonyangu lahashile etena kanda ɔngɛnyi aso ɔmɔtshi lɔkɛndɔ, nɛ dia sho nongamɛka mɛnana la nde nto etena kayondokalola. Naka sho kamba la ɛnyɛlɔ kɛsɔ lo dikambo dia nyɔi k’Okristo ɔmɔtshi wa kɔlamelo, kete dui sɔ mbeyaka kitshakitsha lonyangu laso nɛ dia sho mbeyaka dia nde ayolɔ.—Undaki 7:1.
11 Ndjaɛkɛ tshɛ le “[Nzambi] k’ekeketshelu tshe” ayotokimanyiya dia mbikikɛ lonyangu latosha ovushelo w’onto. (2 Koreto 1:3, 4) Tayokeketshama nto naka sho kana yimba lo kɛnɛ kakakomɛ Ana, wadi aki odo la lo ntambe ka ntondo. Nde akakome wadi aki odo l’ɔkɔngɔ w’ɛnɔnyi esambele wa diwala eto. Koko lam’akinde la ɛnɔnyi 84, ko nde akatetemala kambɛ Jehowa olimu w’ekila lo tɛmpɛlɔ. (Luka 2:36-38) Woho wakandayakimɔ tshɛ l’olimu w’ekila akokimanyiya dia nde mbikikɛ lonyangu lande ndo woho wakandayaokaka oko etshike. Ndjâkimɔka mbala la mbala lo elimu w’Akristo, mbidja ndo olimu w’esambishelo ka Diolelo kokaka tokimanyiya dia mbikikɛ etombelo wonga la ovushelo w’onto.
Woho wa ndɔshana la ekakatanu wa weho la weho
12. Naa okakatanu wendana la lɔsɛnɔ la nkumbo wakakikɛ Akristo amɔtshi?
12 Akristo amɔtshi mbikikɛka ekakatanu wendana la lɔsɛnɔ la nkumbo. Ɛnyɛlɔ, naka olonganyi ɔmɔtshi ambosala loseka, dui sɔ kokaka monga la etombelo wa kɔlɔ efula le okina! L’ɔtɛ wa kandji ndo lonyangu lele lande, onto lele olonganyi ande ambosala loseka mbeyaka ndala engondo l’otsho ndo tetemala ndela lo yɛdikɔ y’efula. Le onto ɔsɔ, aya kânga tolemulemu tatotshitshɛ mbasalande, nde mbeyaka tisala lo yoho ya kɔlɔ kana ndjahumoya. Onto lele olonganyi ande ambosala loseka mbeyaka shisha mposa ka ndɛ, kokaka la mɔnda ndo tshimba wɔɔngɔ efula. Nde mbeyaka shisha ndo wolo wa ndjasha lo elimu w’Akristo. Ndo dui sɔ kokaka mɛtɛ monga la etombelo wa kɔlɔ efula le ana!
13, 14. a) Ekeketshelo kakɔna kakondjaso oma lo dɔmbɛlɔ diaki Sɔlɔmɔna etena kakasapɔma tɛmpɛlɔ? b) Lande na kalɔmbaso dia kondja nyuma k’ekila?
13 Etena kahomanaso la ekakatanu wa ngasɔ, Jehowa toshaka ekimanyielo keso latɔ ohomba. (Osambu 94:19) Dɔmbɛlɔ diendana la osapwelo wa tɛmpɛlɔ ka Jehowa diakasale nkumekanga Sɔlɔmɔna mɛnyaka dia Jehowa mbokaka alɔmbɛlɔ wa ekambi ande. Sɔlɔmɔna akalɔmbɛ Nzambi ate: “Naka untu otoi, kana wudja aye wa Isariyele tshe, leya sui dia utema andi, ambeme anya lu luudu lone lu dombelo, kuwaukeli l’ulungu uma lu dihuli diudjashiye, kuwadimanyia. Kutsheli untu l’untu uku ditshelu diandi, ne dia we mbeyaka utema andi (ne dia we weme kalimbitela etema w’antu tshe), ku vo wayukukaka woma nshi tshe yudjashiwo lu kete yakayasha washesu.”—1 Khumi ya Dikanga 8:38-40.
14 Kokaka monga ohomba efula tetemala nɔmba nyuma k’ekila. (Mateu 7:7-11) L’atei w’elowa wa nyuma mbele ndo ɔngɛnɔngɛnɔ la wɔladi. (Ngalatiya 5:22, 23) Sho kondjaka ekeketshelo k’efula etena kakadimola Shɛso lele l’olongo alɔmbɛlɔ aso, mbuta ate ɔngɛnɔngɛnɔ ndjɔsaka dihole dia lonyangu ndo wɔladi dihole dia ɔkɛi!
15. Avɛsa akɔna wakoka tokimanyiya dia kitshakitsha lonyangu laso?
15 Sho pombaka nongamɛ dia monga la okiyanu lo yɛdikɔ mɔtshi etena kahombaso mbikikɛ okakatanu wa woke. Koko okiyanu ɔsɔ mbeyaka kitakita yema naka sho mbohɔ ɛtɛkɛta waki Yeso wata ɔnɛ: “Tanyuyakananyaki dia nyumu nyati: Ayutole na? kana, ayutono na? kana dia alimba anyu nyati: Ayutolota na? . . . Keli ntundu nyutayangi diulelu la ololo wa [Nzambi], ku diango so tshe diayuyala dianyu.” (Mateu 6:25, 33, 34) Ɔpɔstɔlɔ Petero tokeketshaka dia ‘kitsha ekiyanu aso tshɛ le Nzambi, nɛ dia nde atotokanɛka.’ (1 Petero 5:6, 7) Ekɔ ɔlɔlɔ mbidja welo dia kandola okakatanu wele laso. Koko l’ɔkɔngɔ wa sho sala kɛnɛ kakokaso sala, lonyangu halohombe mbɔsa dihole dia dɔmbɛlɔ. Omembi w’esambo akembe ate: “Uyakimo le [Jehowa], ekamaki le ndi, ku ndi ayukutshela dikambu diako.”—Osambu 37:5.
16, 17. a) Lande na kahatatshungwe tshɛ lo tshɛ oma lo ekiyanu? b) Kakɔna kayotɛna naka sho kamba la Filipi 4:6, 7?
16 Paulo akafunde ate: “Tanyuyakananyaki, keli lu akambu tshe, nyuti ehumba anyu le [Nzambi] lu dombelo la osengosengo kame la eukelu ka lusaka. Okone ki ka [Nzambi], kuleki yimba tshe, ayulama etema anyu la tukanyi tanyu le Kristu Jesu.” (Filipi 4:6, 7) Lo mɛtɛ, oko wewɔ kema kokele, tokanula taki Adama hawohandwe tshɛ lo tshɛ oma lo ekiyanu. (Romo 5:12) Wadi waki Esau w’ase Hiti “wakanyangia” Isaka la Rɛbɛka, ambutshi waki Esau wakokaka Nzambi wɔma. (Etatelu 26:34, 35) Ondo hemɔ akanyangiya Akristo amɔtshi, oko Timɔtɛ la Torofimo. (1 Timote 5:23; 2 Timote 4:20) Paulo akayakiyanyaka dikambo di’asekande ambetawudi. (2 Koreto 11:28) Jehowa ‘Latokaka dɔmbɛlɔ’ ekɔ wonya tshɛ suke dia kimanyiya wanɛ wawoka ngandji.—Osambu 65:2.
17 Etena kakongɛso lushi la Jehowa, sho kondjaka osukɔ ndo ekeketshelo oma le ‘Nzambi ka wɔladi.’ (Filipi 4:9) Jehowa ekɔ kanga “ketshi ndu ngandji ka mamba,” nde ekɔ “ololo, katetawoka nyimanyia antu kolo,” ndo ‘nde tohɔka dia tekɔ ditshu.’ (Etumbelu 34:6; Osambu 86:5; 103:13, 14) Ɔnkɔnɛ, nyɛsɔ ‘towɔlɔmbake kɛnɛ keso l’ohomba,’ nɛ dia dui sɔ mbayotosha ‘wɔladi waki Nzambi,’ mbuta ate kii kahakoke onto mana fundo.
18. Oko wadiɛnya Jobo 42:5, ngande wakoka onto ‘mɛna’ Nzambi?
18 Etena kakadimɔma alɔmbɛlɔ aso, sho mbeyaka dia Nzambi ekɔ kâmɛ la so. L’ɔkɔngɔ wa Jɔbɔ mbikikɛ ekakatanu waki lande, nde akate ate: “Dimi lakukaka lukumu l’akambu aye [Jehowa] lu atui, keli kakiane lambukena la ashu ami.” (Jobo 42:5) La washo wa eokelo, la mbetawɔ ndo la lowando tshɛ, sho kokaka kana yimba lo yoho yatosalɛ Nzambi akambo ndo sho kokaka ‘mbɛna’ woho weso tatawɛnaka ndoko lushi. Lɔngɛnyi la ngasɔ telaka wɔladi wa l’otema ndo wa lo yimba!
19. Kakɔna kayotomba naka sho ‘kitsha ekiyanu aso tshɛ le Jehowa’?
19 Naka sho ‘kitsha ekiyanu aso le Jehowa,’ kete sho kokaka mbikikɛ ekakatanu la kii ka l’etei k’otema kakokɛ otema ndo akoka aso w’ekanelo ka yimba. Oma k’ɛse otema aso wa didjidji, hatotonga la ekiyanu, esasesase kana la ekombakomba kɛmɔtshi. Yimba yaso hayototshimba kana sho ndjakiyanya.
20, 21. a) Kɛnɛ kakakomɛ Stɛfano ɛnyatɔ lo kɛnɛ kendana la kii ka lo yimba konga laso etena keso lo ɛhɛnyɔhɛnyɔ? b) Shila ɛnyɛlɔ kɛmɔtshi ka nshi nyɛ k’onto laki kii etena kakinde lo mbikikɛ ekakatanu.
20 Ombeki Stɛfano akonge la kii ka lo yimba etena kakinde lo mbikikɛ ohemba a woke wa mbetawɔ. La ntondo ka nde mbuta dui dia komelo, ase Sheke tshɛ “wakenyi elundji kandi uku ka ondjelo.” (Etsha 6:15) Nde kosaka lokomba, mbuta ate nde aki la dihonga oko ondjelo, kana dikɛndji diaki Nzambi. L’ɔkɔngɔ wa Stɛfano mbaɛnya onongo awɔ lo kɛnɛ kendana la nyɔi kaki Yeso, toshushi “wakaluli too la ududu, wakayalumata lu dikambu diandi.” Stɛfano “akaluli la [nyuma k’ekila], akendi l’ulungu tee, akenyi lutumbu la [Nzambi], la Jesu emadi lu lunya la pami la [Nzambi].” Oko wakokeketsha ɛnɛlɔ kɛsɔ, Stɛfano akatshikala la kɔlamelo polo lo nyɔi. (Etsha 7:52-60) Kânga mbahatayɛna waɛnɛlɔ, sho kokaka monga la kii ka lo yimba kasha Nzambi etena kahɛnyahɛnyamaso.
21 Tende woho wakayaoke Akristo amɔtshi wakadiakema oma l’anya w’aseka Nazi lo Ta dia hende di’andja w’otondo. Ɔmɔtshi l’atei awɔ akakɔndɔla kɛnɛ kakokomɛ lo tuminadi lo mbuta ate: “Wakafundɛ nyɔi. Dimi lakahokamɛka lam’akawafundɛka nyɔi, ndo oma lâsɔ, lakate ɛtɛkɛta wata ɔnɛ ‘Onga la kɔlamelo polo lo nyɔi’ ndo ɛtɛkɛta ekina waki Nkumɛso, ɔsɔ mbaki komelo k’awui tshɛ. Koko kɛsɔ aya bu ohomba. Lekɔ la wɔladi ndo la kii ka lo yimba kahanyakoke fɔnya!” Okristo ɔmɔtshi w’ɔlɔngɔlɔngɔ wakiwɔ suke la ndjaka lo mbohembola ɔtɛ, akafundɛ ambutshi ande ate: “Midi k’otsho ambeta. Lekekɔ la etena ka tshikitanya yɛdikɔ yami. Ko onde layokoka kondja ɔngɛnɔngɛnɔ lo andja ɔnɛ naka dimi manguna Nkumɛso? Kema! Kakianɛ, nyu kokaka ndjashikikɛ dia layanga tshika andja ɔnɛ, lele la ɔngɛnɔngɛnɔ ndo la wɔladi.” Aha la tâmu, Jehowa sukɛka ekambi ande wa kɔlamelo.
Sho kokaka mbikikɛ!
22, 23. Naa eshikikelo kakoka monga laso etena kakongɛso lushi la Jehowa la ekikelo?
22 Mbeyaka monga ko ekakatanu ɛmɔtshi wɔsɛdingodiso lanɛ watatokomɛ. Koko, Jɔbɔ lakokaka Nzambi wɔma aki la shadiya ya mbuta ate: “Untu akuto uma le umuntu! Lumu landi leli mundumundu, halukimo nsutshasutshama.” (Jobo 14:1) Ondo tekɔ ombutshi ɔmɔtshi wasala la wolo dia mbisha anaso ɛlɔmbwɛlɔ ka lo nyuma. Vɔ pombaka mbikikɛ ekakatanu la kalasa, koko sho mɛtɛ mongaka l’ɔngɛnɔngɛnɔ efula etena ketawɔ lo wedi wa Jehowa ndo kasukɛwɔ atɔndɔ ande wosembwe! Ondo tekɔ lo ndɔshana la ekakatanu ndo la ehemba lo dihole di’olimu. Koko sho kokaka mbikikɛ akambo asɔ ndo akina, nɛ dia ‘Jehowa tɛmbɛka wetsho aso lushi la lushi.’—Osambu 68:19.
23 Sho mbeyaka ndjaɔsa oko anto w’anyanya, koko tohɔ dia Jehowa hohɛki pondjo olimu aso ndo ngandji kɛnyaso lo lokombo lande. (Heberu 6:10) La ekimanyielo kande, sho kokaka mbikikɛ ehemba wa mbetawɔ. Ɔnkɔnɛ, lo alɔmbɛlɔ ndo lo tɛdikɔ taso, todjake ndo dia osalelo wa lolango la Nzambi. Etena kɛsɔ, sho kokaka ndjashikikɛ dia etena kakongɛso lushi la Jehowa la ekikelo, nde ayotɔtshɔkɔla ndo ayotosukɛ.
Ngande wayoyokadimola?
• Bonde kele Akristo la ohomba wa ekikelo?
• Kakɔna kakoka tokimanyiya dia mbikikɛ hemɔ ndo kandji konga etena kavushaso?
• Ngande watokimanyiya dɔmbɛlɔ dia mbikikɛ ehemba?
• Lande na kakokaso kongɛ lushi la Jehowa la ekikelo?
[Osato wa lo lɛkɛ 17]
Ndjaɛkɛ le Jehowa tokimanyiyaka dia mbikikɛ kandji konga etena kavushaso