Ambola w’oma le ambadi aso

Onde Diolelo diaki Nzambi diekɔ l’otema ayɛ?

Ɛlɔ kɛnɛ anto efula fɔnyaka dia okadimwelo wa dimbola sɔ ekɔ eelo. Ɛnyɛlɔ, Dibuku dimɔtshi (The Catholic Encyclopedia) mbutaka ɔnɛ: “Diolelo diaki Nzambi nembetshiyaka . . . woho walɔmbɔla Nzambi lo etema aso.” Mbala efula, ewandji w’ɛtɛmwɛlɔ mbetshaka kanyi shɔ. Onde Bible mbetshaka mɛtɛ dia Diolelo diaki Nzambi diekɔ lo etema w’anto?

Anto amɔtshi fɔnyaka dia Yeso ndamɛ mbakakeketsha ntondo kanyi y’ɔnɛ Diolelo diaki Nzambi diekɔ l’etema w’anto. Yeso akate ate: ‘Diolelo diaki Nzambi diekɔ l’atei anyu.’ (Luka 17:21) Dikadimwelo dimɔtshi dia Bible mbutaka lo dikambo sɔ ɔnɛ: “Diolelo diaki Nzambi diekɔ l’etei anyu” kana “l’etema anyu.” Onde dikadimwelo sɔ diakakadimola ɛtɛkɛta waki Yeso ɛsɔ dimɛna? Onde nde mɛtɛ akalange mɛnya dia Diolelo diaki Nzambi diekɔ l’etema w’anto?

Ntondotondo, tɔsɛdingole ele otema w’onto. Etena katɛkɛta Bible dikambo di’otema wa didjidji, vɔ nembetshiyaka lonto la letei, kiɔkɔ ya tokanyi, ya waonga ndo ya nsaki y’onto. Kanyi yɔnɛ ɛngɔ kɛmɔtshi ka diambo kele oko Diolelo diaki Nzambi kekɔ l’otema w’onto, lo yoho yakokatɔ ɛnyɛlɔ tshikitanya ndo ndowanya onto, mbeyaka ngɛnyangɛnya onto, ko onde ekɔ ɔkɔkɔ ɔmɔtshi wasukɛ kanyi shɔ?

Bible totɛka ɔnɛ: “Utema ndeka diango tshe lukesu, vo weko kolo efula.” (Jeremiya 17:9) Yeso ndamɛ akate ate: “Uma l’etema w’antu katutumbaka tukanyi ta kolo, munanyi, evi, diakanelu, seka, okomiya, akambu wa kolo.” (Mako 7:20-22) Tende yema: Shi efula ka pâ yɛnaso lo andja ɛlɔ kɛnɛ ndja oma l’etema wa kɔlɔ wele l’anto? Lâsɔ ngande wakoka Diolelo dia kokele diaki Nzambi ndja oma l’otema na? Lo mɛtɛ, otema w’onto hawokoke pondjo tondja Diolelo diaki Nzambi oko wahakoke ahangola kɔyi tondja elowa wa tɔmwɛmwɛ.​—Mateu 7:16.

Dui dia hende, tende weho w’anto wakahokamɛka Yeso etena kakandatɛkɛta ɛtɛkɛta wele lo Luka 17:21. Divɛsa diele la diko dia divɛsa sɔ mbutaka ɔnɛ: “Lam’akambula Afarise Jesu vati: Etena kakona kayuya diulelu dia [Nzambi]? Ndi akâkaluya dui.” (Luka 17:20) Waa Afarisɛ waki atunyi wa Yeso. Yeso akate dia Afarisɛ asɔ waki ase dungi pende takawahombe mbɔtɔ lo Diolelo diaki Nzambi. (Mateu 23:13) Naka Afarisɛ takawahombe mbɔtɔ lo Diolelo diaki Nzambi, onde Diolelo diaki Nzambi diakakoke monga l’etema awɔ? Ndooko! Ko Yeso akandalange mbuta?

Lo kadimola ɛtɛkɛta waki Yeso ɛsɔ, akadimodi efula wa Bible wa tomanamana kambaka la weho w’ɛtɛkɛta watanema lo Traduction du monde nouveau. Amɔtshi mbutaka vate Diolelo diekɔ “l’atei anyu.” Ngande waki Diolelo diaki Nzambi l’atei w’anto wa l’etena kɛsɔ, mbidja ndo Afarisɛ? Yeso mbaki onto lakasɔnama oma le Jehowa Nzambi dia monga Nkumekanga ka Diolelo. Oko Nkumekanga kakasɔnama, Yeso aki l’atei w’anto asɔ. Nde akawaetsha awui wendana la Diolelo diaki Nzambi ndo akakome polo lo sala ahindo, lo mbaɛnya lo yɛdikɔ ya tshitshɛ kɛnɛ kayosala Diolelo. Lâsɔ, lo yoho ya shikaa, Diolelo diaki l’atei awɔ.

Mbokɛmaka hwe dia ndoko divɛsa diasukɛ kanyi y’ɔnɛ Diolelo diaki Nzambi diekɔ l’etema w’anto. Koko diɔ diekɔ lowandji la mɛtɛ layela etshikitanu wa diambo la nkɛtɛ, oko wakadite aprɔfɛta.​—Isaya 9:6, 7; Danyele 2:44.