Ɛlɔngɔlɔngɔ la esekaseka, nyohɔ Otungi anyu a woke oma ko kakianɛ
‘Nyohɔ Otungi anyu a Woke lo nshi yanyu y’ɛlɔngɛlɔngɔ la y’esekaseka oma ko kakianɛ.’—UND. 12:1.
1. Ngande wɛnya Jehowa wɛkamu ande le atɛmɔdi ande wele ɛlɔngɔlɔngɔ la esekaseka?
JEHOWA mbɔsaka ɛlɔngɔlɔngɔ la esekaseka w’Akristo la nɛmɔ ndo oko apɔpɔ wa lɔpɔpɔ wa tshitshi yɔɔ. Lo mɛtɛ, nde akatewoyisha ɔnɛ lo nshi ya “alimbi” w’Ɔnande, ɛlɔngɔlɔngɔ la esekaseka “wayuyakimo l’ongenongeno,” lo olimu wa Kristo. (Osam. 110:3) Prɔfɛsiya kɛsɔ kakahombe kotshama lo etena kele anto lo tshɛ kawɔ takawalɛmiyaka Nzambi ndo komongaka la okitanyiya. Koko, Jehowa akeyaka dia ɛlɔngɔlɔngɔ la esekaseka wakɔ̂tɛmɔlaka wakahombe monga la dionga diotshikitanyi. Ande wɛkamu wende lawɔ le nyu, nyu ɛlɔngɔlɔngɔ la esekaseka lee!
2. Mbohɔ Jehowa nembetshiyaka na?
2 Tokanyiya ɔngɛnɔngɛnɔ wahomba Nzambi monga lawɔ etena kɛnande ɛlɔngɔlɔngɔ la esekaseka wawohɔ oko wende Otungi awɔ a Woke. (Und. 12:1) Lo mɛtɛ, mbɔhɔ Jehowa nembetshiyaka akambo efula koko aha paka kanyiyaka tsho awui wendana la nde. Dikambo sɔ nembetshiyaka mbɔsa yɛdikɔ mɔtshi, mbuta ate, sala kɛnɛ kɔ̂ngɛnyangɛnya lo mbetawɔ dia ɛlɛmbɛ ndo atɔndɔ ande tɔlɔmbɔlaka lo lɔsɛnɔ laso la lushi la lushi. Dikambo sɔ nembetshiyaka nto kitsha wɛkamu aso le Jehowa, lo mbeya dia nde tokombolɛka kɛnɛ koleki dimɛna. (Osam. 37:3; Is. 48:17, 18) Onde kanyi shɔ mbele lanyu lo dikambo dia Otungi anyu a Woke?
‘Nyɛkamake Jehowa la otema anyu tshɛ’
3, 4. Ngande wakɛnya Yeso woho wakandayaɛkɛka le Jehowa ndo lande na kele ekɔ ohomba sho ndjaɛkɛ le Jehowa ɛlɔ kɛnɛ?
3 Ɛnyɛlɔ koleki dimɛna ka ɔnɛ lakayaɛke ele ka Yeso Kristo. Nde akasɛnɛ lo yoho yɔtɔnɛ la ɛtɛkɛta wele lo Tukedi 3:5, 6 wata ɔnɛ: ‘Nyɛkamake Jehowa la otema anyu tshɛ ndo tanyɛkamake yimba yanyu hita. Nyowetawɔke lo akambo anyu tshɛ, ko nde ayonyɔlɔngɔswɛla mboka yanyu.’ Yema tshitshɛ l’ɔkɔngɔ wa batismu kande, Satana akasawola la Yeso ndo akasale la wolo dia nde mbetawɔ lowandji ndo lotombo la l’andja ɔnɛ. (Luka 4:3-13) Yeso kokesama. Nde akeyaka dia “ekundji, nemo la lumu” wekɔ “difutu dia ndjakitshakitsha la woma wa [Jehowa].”—Tuk. 22:4.
4 Anto wa lo andja ɔnɛ wamboleka monga la dionga di’ɔkɔmiya ndo dia lokaki. Lo andja wa ngasɔ, ayonga dui dia lomba naka sho ndjela ɛnyɛlɔ ka Yeso. Ndo nto, tohɔ dia Satana ayosala kɛnɛ tshɛ kakokande sala dia minya ekambi waki Jehowa oma lo mboka ka tshitshɛ katɔla otsha lo lɔsɛnɔ la pondjo. Nde nangaka mɛna onto tshɛ ɔtɔ lo mboka ka woke katɔla otsha lo elanyelo. He tanyokesamake oma le nde! Koko, nyɔshi yɛdikɔ ya mbohɔ Otungi anyu a Woke. Nyoyaɛkɛ tshɛ le nde ndo nyokukute “lumu la mete,” lele shikaa ndo laya lasa onyɔ l’ɔhɛmbɛ.—1 Tim. 6:19.
Ɛlɔngɔlɔngɔ la esekaseka le, nyonge akanga a tomba!
5. Ngande wayaokanyu lo kɛnɛ kendana la nshi yayaye ya andja ɔnɛ?
5 Ɛlɔngɔlɔngɔ la esekaseka wohɔ Otungi awɔ wekɔ akanga a tomba l’atei w’anto wa lo lɔlɔnga lawɔ. (Adia Osambu 119:99, 100.) Oko wewɔ la kanyi yaki Nzambi, vɔ mbeyaka dimɛna ɔnɛ andja ɔnɛ wayanga la mbeta. Kânga mbekenyu la ɛnɔnyi yema tshitshɛ, nyu ɛlɔngɔlɔngɔ la esekaseka mbeyaka dimɛna dia awui wa wɔma ndo w’ekiyanu wekɔ lo tafulanɛ. Naka nyâkɔtɔ kalasa, kete ondo nyakoke woho wambolana hiɛlɛlɛ, wodelo wa djungudungu, lomanu l’esongo l’ekonda ndo ekakatanu wa ngasɔ. Anto wekɔ lo ndjakiyanya efula lo kɛnɛ kendana la akambo asɔ, koko paka Ɛmɛnyi wa Jehowa ato mbeya dimɛna ɔnɛ akambo asɔ wekɔ etenyi kɛmɔtshi ka djembetelo ya ekomelo ka andja ɔnɛ walɔmbɔla Satana.—Eny. 11:18.
6. Ngande wakakesama ɛlɔngɔlɔngɔ la esekaseka ɛmɔtshi?
6 Lonyangu ko, ɛlɔngɔlɔngɔ la esekaseka ɛmɔtshi wakambɛ Nzambi kotetemala sungukala ndo wambohɛ dia andja ɔnɛ wayanga mbeta kem’edja. (2 Pet. 3:3, 4) Akina wamboyokoma polo lo sala pɛkato ya weke lo tshimbo ya angɛnyi wa kɔlɔ kana oma lo wendelo w’esato wɛnyawɔ anto etakataka. (Tuk. 13:20) Ande lonyangu layoyala dia nyu tshika dia mbetawɔma le Nzambi etena kaya ekomelo k’andja ɔnɛ suke lee! Koko, nyokondja wetshelo oma lo kɛnɛ kakakomɛ ase Isariyɛlɛ lo 1473 N.T.D., etena kakawahange lo Ekidi wa Mɔaba, suke la mbɔtɔ lo Nkɛtɛ ya Daka. Kakɔna kakasalema lɛkɔ na?
Vɔ wakatakɔ mboka etena kakiwɔ suke la kondja difuto diawɔ
7, 8. a) Djonga yakɔna yakakambe Satana la yɔ lo Ekidi wa Mɔaba? b) Djonga yakɔna yakamba Satana la yɔ ɛlɔ kɛnɛ?
7 Lo etena kɛsɔ, mbokɛmaka hwe dia Satana akayange shimba ase Isariyɛlɛ dia kondja sango diakawalakema. L’ɔkɔngɔ wa ɔprɔfɛta Balama kita tatala dia mbadja mananu, Satana akanyomokamba la djonga kina ya mayɛlɛ efula; nde akahembe dia mbâkonya diaha vɔ tshɔkwama oma le Jehowa. Nde akakambe la wamato w’ase Mɔaba waki la nimi y’ɛsɛlɔ dia vɔ mbanganyiya, ndo lo etena kɛsɔ Diabolo akatondoya lo yɛdikɔ mɔtshi. Anto wakatatɛ mbeyana la ana a wamato w’ase Mɔaba ndo wakatatɛ nkusamɛ Baala-Pɛɔrɛ. Kânga mbakiwɔ suke la kondja sango diawɔ di’oshinga wolo, mbuta ate, Nkɛtɛ ya Daka, yɛdikɔ y’ase Isariyɛlɛ 24 000 wakashisha nsɛnɔ yawɔ. Ɔsɔ aki mɛtɛ dikambo dia kandji efula!—Wal. 25:1-3, 9.
8 Ɛlɔ kɛnɛ, tekɔ lo tasukana esadi esadi dia mbɔtɔ lo nkɛtɛ ya daka ya dimɛna efula, mbuta ate lo dikongɛ di’akambo di’oyoyo. Oko wele mbekelo kande, Satana ekɔ lo kamba la awui wa mindo wa dieyanelo dia minganyiya ekambi waki Nzambi. Atɔndɔ wendana la lɔkɛwɔ hawoyɔsama la nɛmɔ lo woho ɔnɛ wele monanyi kɔsama oko dui dia dimɛna ndo dieyanelo dia lam’asa pami la pami kana womoto la womoto diɔsama oko dikambo diendana la yɛdikɔ y’onto ndamɛ. Okristo ɔmɔtshi wa womoto akate ate: “Anami mbekaka dia dieyanelo dia lam’asa pami la pami kana womoto la womoto ndo dieyanelo dia lo andja wa diwala diekɔ kɔlɔ lo washo wa Nzambi paka la ngelo kana lo Mbalasa ka Diolelo.”
9. Kakɔna kakoka tomba lo ‘nshi yahɛtahɛta dikila di’ɛlɔngɔlɔngɔ kana di’esekaseka,’ ndo ngande wakoka ɛlɔngɔlɔngɔ la esekaseka tondoya okakatanu ɔsɔ?
9 Ɛlɔngɔlɔngɔ la esekaseka wohɔ Otungi awɔ a Woke mbeyaka dia dieyanelo dia lam’asa atshukanyi diekɔ woshasha w’ekila wendana la lɔsɛnɔ ndo la diwotshi. Omalɔkɔ, vɔ mbeyaka dia dieyanelo pombaka salema paka lo yoho yakalɔngɔsɔla Nzambi, mbuta ate l’atei wa diwala. (Heb. 13:4) Koko, lo ‘nshi yahɛtahɛta dikila di’ɛlɔngɔlɔngɔ kana di’esekaseka,’ mbuta ate lo etena kele nsaki yawɔ ya dieyanelo mongaka wolo ndo kokaka fukutanya tɛdikɔ tawɔ, vɔ kokaka monga la okakatanu dia tshikala pudipudi. (1 Kor. 7:36) Kakɔna kakokanyu sala naka tokanyi ta kɔlɔ tambonyoyɛ lo yimba? Nyɔlɔmbɛ Jehowa la otema ɔtɔi dia nde nyokimanyiya dia mbika yimba yanyu lo akambo w’ɛlɔlɔ. Jehowa mpokamɛka nshi tshɛ wanɛ wendɛ le nde l’otema ɔtɔi. (Adia Luka 11:9-13.) Asawo w’ɛlɔlɔ kokaka nyokimanyiya nto dia kawoya timba tanyu lo akambo w’ɛlɔlɔ.
Nyɔsɔnɛ eyango anyu la lomba tshɛ!
10. Naa tokanyi ta kɔlɔ tahombaso mbewɔ ndo ambola akɔna wakokaso ndjambola?
10 Ɔkɔkɔ ɔmɔtshi wele ɛlɔngɔlɔngɔ la esekaseka efula wa lo andja ɔnɛ bu la ndjakimɛ ndo wekɔ lo ndjasha lo ɛngɛnɔngɛnɔ wa lo demba ekɔ nɛ dia vɔ kema ndoko la “enelo,” mbuta ate ɛlɔmbwɛlɔ kaki Nzambi kana elongamelo ka shikaa lo dikambo dia nshi yayaye. (Tuk. 29:18) Vɔ wekɔ oko ase Isariyɛlɛ wa lo nshi ya Isaya wakatshike dia mbetawɔ ɛlɔmbwɛlɔ kaki Nzambi ndo wayakashaka paka lo ‘ɛngɛnɔngɛnɔ ndo lo deshi di’onatshi la nɔshi dia wanu.’ (Is. 22:13) L’ɔtɛ wa nyu kɔmiya weho w’anto wa ngasɔ, lande na kahanyakanyiya dikambo dia elongamelo ka nɛmɔ kambokitsha Jehowa la ntondo ka ekambi ande wa kɔlamelo? Naka nyekɔ ekambi waki Jehowa w’ɛlɔngɔlɔngɔ kana w’esekaseka, onde nyu kongɛka andja w’oyoyo la asolo walomɔlomɔ? Onde nyu salaka la wolo dia ‘nsɛna la ekanelo k’ɔlɔlɔ etena kakongɛnyu elongamelo k’ɔngɛnɔngɛnɔ’ kakakitsha Jehowa la ntondo kanyu? (Tito 2:12, 13) Okadimwelo wayonyosha lo dimbola sɔ wayonga la shɛngiya lo eyango ndo lo akambo wadjanyu lo dihole dia ntondo.
11. Bonde kahomba ɛlɔngɔlɔngɔ la esekaseka w’Akristo wakɔtɔ kalasa mbidja welo dia mbeka dimɛna?
11 Andja ɔnɛ nangaka dia ɛlɔngɔlɔngɔ la esekaseka shisha welo awɔ lo eyango wa lo demba. Lo mɛtɛ, amɔtshi wa l’atei anyu wâkatetemala mbɔtɔ kalasa pombaka sala la wolo dia kondja wetshelo wa dimɛna. Lo mɛtɛ, oyango wayadjɛnyu kema tsho wa kondja olimu w’oshika, koko ndo wa nyu monga dihomɔ di’ohomba l’atei wa etshumanelo ndo apandjudi wa Diolelo w’eshika. Dia nyu kotsha oyango ɔsɔ, nyu pombaka sawolaka dimɛna la anto akina ndo salaka dui sɔ la solo dia lotutsha ndo la dilɛmiɛlɔ tshɛ. Koko ɛlɔngɔlɔngɔ la esekaseka weka Bible ndo wasala la wolo dia kamba la atɔndɔ atɔ lo nsɛnɔ yawɔ wekɔ lo kondja wetshelo woleki dimɛna tshɛ ndo wekɔ lo ndjalɔngɔsɔlɛ dimɛna nshi yayaye y’ɔngɛnɔngɛnɔ ndo ya pondjo.—Adia Osambu 1:1-3.a
12. Ɛnyɛlɔ kakɔna kahomba nkumbo y’Akristo mbokoya?
12 Lo Isariyɛlɛ, wetshelo w’ana oma le ambutshi awɔ aki dikambo di’ohomba efula. Wetshelo ɔsɔ wakendanaka suke la akambo tshɛ wa lo lɔsɛnɔ, djekoleko akambo wa lo nyuma. (Euh. 6:6, 7) Diakɔ mbele, ɛlɔngɔlɔngɔ la esekaseka wa lo Isariyɛlɛ wakahokamɛka ambutshi awɔ ndo epalanga wanɛ wakokaka Nzambi wɔma wakakondjaka aha paka ewo keto koko ndo lomba, shɛnɔdi, yimba ndo dikoka dia ekanelo ka yimba, waonga wahaleke mɛnama waya paka oma lo wetshelo waki Nzambi. (Tuk. 1:2-4; 2:1-5, 11-15) Nkumbo y’Akristo ya nshi nyɛ la dia mbidja yimba ya ngasɔ lo wetshelo.
Nyohokame wanɛ wanyoka ngandji
13. Alako wa woho akɔna walongola ɛlɔngɔlɔngɔ la esekaseka ɛmɔtshi ndo lande na kahombawɔ monga la yewo?
13 Ɛlɔngɔlɔngɔ la esekaseka nongolaka alako oma le weho w’anto tshɛ, mbidja ndo alako w’oma le andaki awɔ wa la kalasa, wakanyiya paka woho wakoka onto tondoya lo andja ɔnɛ. Lam’alanganyu, lo ekimanyielo ka dɔmbɛlɔ ndo ka mbo ya ndɛ ya lo nyuma yasha olui w’ɔhɔmbɔ wa kɔlamelo ndo wa kɛsɔ, nyoyange ɛlɔmbwɛlɔ kaki Nzambi. Oma lo wekelo anyu wa Bible, nyu mbeyaka dia Satana ndeka sɔmana la ɛlɔngɔlɔngɔ la esekaseka wahatahokɔ akambo. Ɛnyɛlɔ, lo ekambɔ k’Ɛdɛna, Eva lakikɔ atahokɔ akambo akahokamɛ Satana, ɔnɛ laki ɔngɛndangɛna le nde ndo laki kombôkaka ngandji kânga yema tshitshɛ. Ande otshikitanu wa woke wotoyala, otondongaka nde akahokamɛ Jehowa ɔnɛ lakawɛnya ngandji lo toho totshikitanyi lee!—Etat. 3:1-6.
14. Bonde kahombanyu mpokamɛ Jehowa la ambutshi anyu w’Akristo?
14 Otungi anyu a Woke nyokaka ngandji nyu la wɔ ndo nde salaka ngasɔ la eyango wa pudipudi tshɛ. Nde kombolaka dia nyu monga la ɔngɛnɔngɛnɔ pondjo pondjo, aha paka kakianɛ ato! Omalɔkɔ mbele, oko wende ombutshi woludi tɔɔ la ngandji, nde ekɔ lo nyotɛ nyu, ndo wanɛ tshɛ wɔ̂tɛmɔla ate: “Mbuka keku, nyokendekende loko! Nyokendekende loko!” (Is. 30:21) Naka nyekɔ la ambutshi w’Akristo woka Jehowa ngandji, kete nyekɔ nto la ekimanyielo kekina. La dilɛmiɛlɔ tshɛ, nyohokame alako awɔ etena kasɔnanyu akambo wa mbidja lo dihole dia ntondo ndo eyango anyu. (Tuk. 1:8, 9) Lâdiko di’akambo asɔ tshɛ, vɔ kombolaka dia nyu kondja lɔsɛnɔ, dikambo dioleki ɔngɔnyi ndo lokumu la lo andja ɔnɛ dimɛna la fwa.—Mat. 16:26.
15, 16. a) Eshikikelo kakɔna kakokaso monga la tɔ le Jehowa? b) Naa wetshelo w’ohomba efula wakondjaso oma lo kɛnɛ kakakomɛ Baruka?
15 Wanɛ wohɔ Otungi awɔ a Woke wekɔ la lɔsɛnɔ l’ɔsɛlɛngɛ, wele la eshikikelo ɔnɛ Jehowa howasɛka ‘ndoko yema’ kana mbatshika ‘kânga yema.’ (Adia Heberu 13:5.) Lam’ele lokanyi lɔsɔ lekɔ lo ndɔshana la lɔnɛ la lo andja ɔnɛ, sho pombaka menda ɔlɔlɔ diaha sho sɛngiyama la yimba y’andja ɔnɛ. (Ef. 2:2) Lo dikambo sɔ, tɔshi ɛnyɛlɔ kaki Baruka, laki sekeletɛlɛ kaki Jeremiya lakasɛnɛka lo etena kaki Jerusalɛma lo nshi ya pâ yakayokonyaka dia osomba ɔsɔ ndanyema lo 607 N.T.D.
16 Ondo Baruka akakombolaka dia monga la lɔsɛnɔ la l’emunyi la dimɛna efula. Jehowa akɛnyi dikambo sɔ ndo la ngandji tshɛ nde akewola Baruka diaha nde tetemala ndjayangɛ “akambu a waki.” Baruka akɛnya okitshakitsha ndo lomba, nɛ dia nde akahokamɛ Jehowa ndo akahandɔ oma lo elanyelo ka Jerusalɛma. (Jer. 45:2-5) Lo wedi okina, anto wa lo nshi ya Baruka wakayakondjɛ ‘lomombo’ la l’emunyi lo mbidja ɔtɛmwɛlɔ waki Jehowa lo dihole dia hende wakashisha esadi eto kɛnɛ tshɛ kaki lawɔ oma l’anya w’ase Kaladiya (ase Babilɔna). Efula nto wakashisha nsɛnɔ yawɔ. (2 Ek. 36:15-18) Kɛnɛ kakakomɛ Baruka tokimanyiyaka dia sho mɛna dia diokanelo di’ɔlɔlɔ la Nzambi mboleki ohomba la ntondo ka ɔngɔnyi ndo lokumu la lo andja ɔnɛ.
Nyokoya bɛnyɛlɔ di’amɛna
17. Lande na kele Yeso, Paulo ndo Timɔtɛ bɛnyɛlɔ di’ɛlɔlɔ le ekambi waki Jehowa wa nshi nyɛ?
17 Dia tokimanyiya dia sho kɛndakɛnda lo mboka k’otsha lo lɔsɛnɔ, Ɔtɛkɛta waki Nzambi toshaka bɛnyɛlɔ efula di’ɛlɔlɔ diakokaso ndjela. Ɛnyɛlɔ, Yeso ekɔ onto lakaleke monga la diewo, koko nde akayasha tshɛ lo kɛnɛ kakakoke kimanyiya anto lo pondjo, mbuta ate lo sambisha “lukumu l’ololo la diulelu.” (Luka 4:43) Dia nde mbisha Jehowa kɛnɛ kakaleke dimɛna le nde, ɔpɔstɔlɔ Paulo akatshike olimu wa dimɛna efula wa l’emunyi ndo akakambe la wenya ndo la wolo ande dia sambisha lokumu l’ɔlɔlɔ. Timɔtɛ laki ‘ɔna la mɛtɛ la lo mbetawɔ’ le Paulo, akokoya ɛnyɛlɔ kande ka dimɛna. (1 Tim. 1:2) Onde Yeso, Paulo ndo Timɔtɛ wakanyange l’ɔtɛ wa eyango wakawayadjɛ lo lɔsɛnɔ? Ndoko yema! Lo mɛtɛ, Paulo akate dia nde akɔsaka kɛnɛ kakandakokaka kondja oma lo andja ɔnɛ oko “diango dia mbikadja” lo diɛdika la diɛsɛ dia kambɛ Nzambi diaki lande.—Fil. 3:8-11.
18. Naa etshikitanu wa weke wakasale ɔnangɛso ɔmɔtshi l’ɔlɔngɔlɔngɔ ndo bonde kende ndoko la lonyangu?
18 Ɛlɔngɔlɔngɔ la esekaseka efula w’Akristo wa nshi nyɛ mbokoyaka mbetawɔ kaki Yeso, Paulo ndo Timɔtɛ. Ɛnyɛlɔ, ɔnangɛso ɔmɔtshi l’ɔlɔngɔlɔngɔ laki l’olimu wakawofutaka falanga efula akafunde ate: “L’ɔtɛ wasɛnami lo yoho yɔtɔnɛ la atɔndɔ wa lo Bible, wakambidiya esadi lo dihole dia lâdiko. Kânga mbakimi la falanga efula, lakashihodia dia lakatatshanyaka lɔpɛpɛ. Etena kakamatɛ wanɛ wakalɔmbɔlaka kɔpanyi kɛsɔ ɔnɛ layanga monga okambi wa lo tena tshɛ, vɔ wakambutɛ esadi eto ɔnɛ wayombudiyɛ difuto walongamɛ dia layotshikala l’olimu. Koko lakɔshi yɛdikɔ ya tshika olimu ɔsɔ. Anto efula kokoka mbeya lande na kakamatshike olimu wakamafutamaka falanga efula ɔsɔ dia tatɛ olimu wa lo tena tshɛ. Okadimwelo ami wele ɔnɛ, dimi nangaka mɛtɛ nsɛna lo yoho yɔtɔnɛ la ndjakimɔ kami le Nzambi. Lam’ele lamboleka ndjasha kakianɛ lo akambo wa lo nyuma, lekɔ la ɔngɛnɔngɛnɔ ndo la ɔlɔ lo yɛdikɔ mɔtshi wele totomokoka kondja lo monga la falanga kana lokumu la woho akɔna tshɛ.”
19. Naa ɛsɔnwɛlɔ wa lomba wambokeketshama ɛlɔngɔlɔngɔ la esekaseka dia sala?
19 Lo andja w’otondo, nunu dia ɛlɔngɔlɔngɔ la esekaseka wekɔ lo sala ɛsɔnwɛlɔ wa lomba wa ngasɔ. Ɔnkɔnɛ, nyu ɛlɔngɔlɔngɔ la esekaseka, etena kakananyu yimba dikambo dia nshi yanyu yayaye, nyolamake lushi laki Jehowa lo timba tanyu. (2 Pet. 3:11, 12) Tanyɔkɔmiyake wanɛ wele ɛngɔnyi lo andja ɔnɛ. Koko, nyohokame wanɛ wanyoka ngandji mɛtɛ. Ndjaombɛ “diango l’ulungu” mbele dikambo dioleki lomba diakokanyu sala ndo diɔ to mbele la ɛtshɔkɔ wa pondjo. (Mat. 6:19, 20; adia 1 Joani 2:15-17.) Eelo, nyohɔke Otungi anyu a Woke. Naka nyu sala ngasɔ, kete Jehowa ayonyɔtshɔkɔla.
[Nɔte ka l’ɛse ka dikatshi]
a Lo kɛnɛ kendana la kalasa y’adidi la olimu, enda lo Tshoto y’Etangelo ya Ngɔndɔ ka dikumi 1, 2005, lɛkɛ 27-32.
Onde wɛ kokaka mbohɔ?
• Ngande wɛnyaso wɛkamu aso le Nzambi?
• Naa wetshelo woleki tshɛ dimɛna?
• Wetshelo akɔna wakokaso kondja oma lo ɛnyɛlɔ ka Baruka?
• Waa na wele bɛnyɛlɔ di’ɛlɔlɔ ndo lande na?
[Esato wa lo lɛkɛ 13]
Jehowa ekɔ lo mbisha wetshelo woleki tshɛ dimɛna
[Osato wa lo lɛkɛ 15]
Baruka akahokamɛ Jehowa ndo akahandɔ oma lo elanyelo ka Jerusalɛma. Wetshelo akɔna wakokanyu kondja oma lo ɛnyɛlɔ kɛsɔ?