Nyɔshi yɛdikɔ ya kambɛ Jehowa kam’ekenyu akɛnda

‘Otetemale lo akambo wakayeke ndo wakawaketawoya.’​—2 TIM. 3:14.

1. Ngande wɔsa Jehowa olimu wôkambɛ ɛlɔngɔlɔngɔ l’esekaseka w’Ɛmɛnyi ande?

OLIMU w’ekila wakamba ɛlɔngɔlɔngɔ l’esekaseka wekɔ ohomba efula le Jehowa diakɔ diakandatshutshuya omembi w’esambo dia funda prɔfɛsiya kɛnɛ: “Lu lushi layuyuyala khum’ekanga, wudja aye wayuyakimo l’ongenongeno, uku alimbi aye wolotshami eloto w’ekila. Ku wulu aye wayuyalaka la kesekese uku lopopo.” (Osam. 110:3) Eelo, Jehowa mbɔsaka la nɛmɔ di’efula ɛlɔngɔlɔngɔ l’esekaseka wôkambɛ la lolango lawɔ.

2. Tɔsɛngiya takɔna tahomana la ɛlɔngɔlɔngɔ l’esekaseka ɛlɔ kɛnɛ lo kɛnɛ kendana la nshi yawɔ yayaye?

² Ɛlɔngɔlɔngɔ l’esekaseka wa lo etshumanelo k’Akristo le, onde nyu nyamboyakimɔka le Jehowa? Ɛlɔngɔlɔngɔ l’esekaseka efula mbeyaka mɛna dia mbɔsa yɛdikɔ ya kambɛ Nzambi ka mɛtɛ ekɔ dikambo dia wolo. Amundji w’okanda, embetsha ndo tena dimɔtshi ase nkumbo ndo angɛnyi tshutshuyaka ɛlɔngɔlɔngɔ l’esekaseka dia ndjadjɛ eyango wa l’emunyi. Etena kayadjɛ ɛlɔngɔlɔngɔ l’esekaseka eyango wa lo nyuma, tena efula anto amɔtshi mbaɔnyɔlaka. Koko kɛnɛ kele mɛtɛ ele, kambɛ Nzambi ka mɛtɛ mbele yoho ya lɔsɛnɔ yoleki dimɛna yakokanyu mbesa. (Osam. 27:4) Lo kɛnɛ kendana la dikambo sɔ, tɔsɛdingole ambola asato anɛ: Lande na kahombanyu kambɛ Nzambi? Ngande wakokanyu tondoya dia kimɔ nsɛnɔ yanyu le Nzambi oyadi kɛnɛ kakoka anto akina mbuta kana sala? Naa waaso w’amɛna wendana la olimu w’ekila wakoka monga la ntondo kanyu?

Kambɛ Jehowa mbele yɛdikɔ ya dimɛna yahombanyu mbɔsa

3. Shɛngiya yakɔna yahomba monga la etongelo kaki Jehowa le so?

³ Lande na kahombanyu kambɛ Nzambi ka mɛtɛ ndo kasɛna? Enyelo 4:11 mbishaka ɔkɔkɔ ɔmɔtshi wa woke, lo mbuta ɔnɛ: “Khumesu, la [Nzambi k]asu, we kukuki dia nungula lutumbu la kenemo la wulu, ne dia we kakatungi diango tshe. Dio diakatungama uma lu lulangu laye.” Jehowa mbele Otungi wa diambo wa ɛngɔ tshɛ kakatongama. Ande dimɛna diele nkɛtɛ lee! Jehowa mbakatonge esongo, alɛmbɔlɛmbɔ, waa nyama, ndjale ya weke, akona ndo ahela w’ashi. Osambu 104:24 mbutaka ɔnɛ: “Kete yambulula too l’ekundji [waki Nzambi].” Sho kokaka mɛtɛ monga la lowando efula lo woho wakatosha Jehowa la ngandji tshɛ demba ndo yimba yatokimanyiya dia sho ngɛnangɛna nkɛtɛ ndo diangɔ diele lɔkɔ! Shi etema woludi la lowando dikambo dia diangɔ dia diambo diakandatonge pombaka totshutshuya dia sho mbôkambɛ?

4, 5. Awui akɔna wakasale Nzambi wakasukanya Jashua la Jehowa?

⁴ Ɔkɔkɔ okina wa kambɛ Jehowa tanemaka lo ɛtɛkɛta wakate Jashua laki ɔnɔmbɔdi w’ase Isariyɛlɛ. Oya l’ekomelo ka lɔsɛnɔ lande, Jashua akatɛ wodja waki Nzambi ate: “Nyu mbeyaka l’etema anyu ndu lu nyumu yanyu tshe nyati: Nduku dikambu diakati [Jehowa, Nzambi k]anyu, lu dikambu dianyu, diahatatshama.” Lande na kakate Jashua ngasɔ?​—Jas. 23:14.

⁵ Oko wakandole l’Edjibito, Jashua akeye dia Jehowa akalake dia mbisha ase Isariyɛlɛ nkɛtɛ yawɔ hita. (Etat. 12:7; 50:24, 25; Etum. 3:8) Oma lâsɔ, Jashua akɛnyi woho wakatatɛ Jehowa kotsha daka sɔ lo mbela asui dikumi l’Edjibito ndo lo tshutshuya Farawɔ laki kanga ɔtɛ wolo dia nde kimɔ ase Isariyɛlɛ. Jashua aki l’atei w’anto wakatshungɔ oma lo ndjale ka Beela ndo nde akɛnyi etena kakavu Farawɔ la alembe ande lo ndjale. Lo lɔkɛndɔ l’otale lakawande ‘l’oswe wa shɛnga wa woke ndo wɔma’ wa Sinai, Jashua akɛnyi woho wakakotshɛka Jehowa ase Isariyɛlɛ ehomba awɔ. Ndoko onto lakavu la ndjala kana la mposa ashi. (Euh. 8:3-5, 14-16; Jas. 24:5-7) Lam’akakoke etena k’ase Isariyɛlɛ nɛndja wedja wa wolo wa Kanana ndo mbɔsa Nkɛtɛ ya daka, Jashua akɛnyi woho wakâsukɛ Jehowa, Nzambi kakawatɛmɔlaka dia nɛndja wedja ɛsɔ.​—Jas. 10:14, 42.

6. Kakɔna kayonyokimanyiya dia monga la nsaki ka kambɛ Nzambi?

⁶ Jashua akeyaka dia Jehowa kotshaka alaka Ande. Oma lɔkɔ, Jashua akate ate: “Dimi la wa lu luudu lami tayotemolaka [Jehowa] ndame.” (Jas. 24:15) Ko kayotota dikambo dianyu? Etena kakananyu yimba lo alaka waki Nzambi ka mɛtɛ wamboshilaka kotshama ndo wanɛ wahatakotshama, onde hanyotshutshuyama dia mbôkambɛ oko wakasale Jashua?

7. Lande na kele batismu ka l’ashi ekɔ nna di’ohomba?

⁷ Menda diangɔ diakatonge Jehowa ndo kana yimba lo alaka ande wa diambo ndo wakoka mbɛkɛ otema pombaka nyotshutshuya diaha nyu ndjakimɔ tsho le Jehowa koko ndo dia nyu mɛnya ndjakimɔ kanyu lo batismu ka l’ashi. Batismu ekɔ nna di’ohomba efula diahomba takola wanɛ walanga kambɛ Nzambi. Dui sɔ mɛnamaka hwe le Yeso lele Ɛnyɛlɔ kaso. La ntondo ka nde tatɛ olimu ande oko Mɛsiya, nde akatshu le Joani Obatizanyi dia tobatizama. Lande na kakatakola Yeso nna sɔ? Nde akayota l’ɔkɔngɔ ate: “Dimi lakayi uma l’ulungu, aha dia ndjutsha lulangu lami, keli lulangu la one lakantumi.” (Joa. 6:38) Yeso akabatizama dia mɛnya woho wakandayakimɔ dia sala lolango la She.​—Mat. 3:13-17.

8. Lande na kakɔshi Timɔtɛ yɛdikɔ ya tɛmɔla Nzambi, ndo kakɔna kahombayɛ sala?

⁸ Tɔsɛdingole nto ɛnyɛlɔ kaki Timɔtɛ, ɔlɔngɔlɔngɔ w’Okristo wele Jehowa akayowoshaka elimu ndo ɛkɛndɛ efula. Lande na kakɔshi Timɔtɛ yɛdikɔ ya tɛmɔla Nzambi ka mɛtɛ? Bible totɛka dia nde ‘aketshama ndo aketawoyama.’ (2 Tim. 3:14) Naka wɛ ambeka Ɔtɛkɛta wa Nzambi ndo ambetawoyama dia wetshelo wa lɔkɔ wekɔ mɛtɛ, kete woho waki Timɔtɛ mbeyɛ. Kakianɛ wɛ pombaka mbɔsa yɛdikɔ. Lande na kahayatɛ ambutshi ayɛ kɛnɛ kakombolayɛ sala? Kâmɛ la dikumanyi dia l’etshumanelo, vɔ kokaka kokimanyiya dia wɛ shihodia kɛnɛ kalɔmba Afundelo dia onto batizama.​—Adia Etsha 8:12.

9. Etena kɔsayɛ yɛdikɔ ya batizama, shɛngiya yakɔna yakoka monga la dui sɔ le anto akina?

⁹ Batismu ekɔ nna di’ohomba efula dia tatɛ kambɛ Nzambi ka mɛtɛ. Lo takola nna sɔ, wɛ mundaka lɔkɛndɔ l’otale layokosha lɔsɛnɔ la pondjo ndo ɔngɛnɔngɛnɔ waya oma ko kakianɛ lo sala lolango la Nzambi. (Heb. 12:2, 3) Wɛ ayɔngɛnyangɛnya nto ase nkumbo kayɛ ndo angɛnyi ayɛ wa lo etshumanelo k’Akristo wamboshilaka munda lɔkɛndɔ lɔsɔ. Kɛnɛ koleki tshɛ ele, wɛ ayɔngɛnyangɛnya Jehowa. (Adia Tukedi 23:15.) Lo mɛtɛ, mbeyaka monga ko anto akina hawoshihodia lande na kamboyɔsa yɛdikɔ ya tɛmɔla Jehowa ndo vɔ mbeyaka mbɔsa dia yɛdikɔ yayɛ bu dimɛna. Vɔ mbeyaka kânga kɔlɔsha. Koko wɛ kokaka tondoya ekakatanu ɛsɔ.

Etena kɔnyɔla anto akina yɛdikɔ yayɛ kana kakɔlɔshawɔ

10, 11. a) Ambola akɔna wendana la yɛdikɔ yayɛ ya kambɛ Nzambi wakoka anto kombola? b) Wetshelo akɔna wakokayɛ kondja oma lo yoho yakakadimola Yeso ambola wendana la ɔtɛmwɛlɔ wa mɛtɛ?

¹⁰ Yɛdikɔ yayɛ ya kambɛ Jehowa mbeyaka mbidja asekayɛ wa la kalasa, asukanyi ayɛ ndo ewotɔ ayɛ l’okandokando. Vɔ mbeyaka kombola lande na kamboyɔsɔna dia ndjela yoho ya lɔsɛnɔ shɔ ndo vɔ mbeyaka koka ambola wendana la dietawɔ diayɛ. Ngande wahombayɛ mbakadimola? Lo mɛtɛ, wɛ pombaka kana yimba dimɛna dimɛna dia wɛ monga l’akoka wa mbalembetshiya ɛkɔkɔ wɔshiyɛ yɛdikɔ shɔ. Yeso ekɔ ɛnyɛlɔ koleki dimɛna kakokayɛ ndjela etena kakadimolayɛ ambola wendana la dietawɔ diayɛ.

¹¹ Etena kakawoke ewandji w’ɛtɛmwɛlɔ w’ase Juda ambola lo kɛnɛ kendana la eolwelo, Yeso akakotola yambalo yawɔ lo divɛsa dimɔtshi diakiwɔ kombidjaka yimba. (Etum. 3:6; Mat. 22:23, 31-33) Etena kakawombola ofundji ɔmɔtshi ɔlɛmbɛ wakaleke woke, Yeso akoshilɛ avɛsa w’oma lo Bible wakadimola dimbola sɔ. Pami kɛsɔ akangɛnangɛna ekadimwelo wakawosha Yeso. (Lew. 19:18; Euh. 6:5; Mako 12:28-34) Woho wakakambe Yeso la Afundelo ndo yoho yande ya tɛkɛta akakonya dia ‘olui w’anto mbatɔna lo dikambo diande’ ndo atunyi ande kokoka mbosalɛ kɔlɔ. (Joa. 7:32-46) Etena kakadimolayɛ ambola wendana la mbetawɔ kayɛ, kamba la Bible ndo kadimola ‘la memakana ndo la dilɛmiɛlɔ di’efula.’ (1 Pet. 3:15) Naka wɛ heye okadimwelo wa dimbola dimɔtshi, kete suya dia wɛ heye ndo lɔmba ɔnɛ lokokidiɔ dia wɛ tosala eyangelo. L’ɔkɔngɔ diko, sala eyangelo lo kamba la Index des publications kana Watchtower Library ka lo CD-ROM naka kekɔ lo ɔtɛkɛta weyayɛ. Naka wɛ ndjalɔngɔsɔla dimɛna, kete wɛ ‘ayeya kadimola.’​—Kol. 4:6.

12. Lande na kahayahombe mbetawɔ dia ɛhɛnyɔhɛnyɔ kɔkɔmɔla?

¹² Aha ambola wendana la dietawɔ diayɛ ato mbakoka pomana la yɛ. Satana Diabolo lele otunyi waki Nzambi mbalɔmbɔla andja. (Adia 1 Joani 5:19.) Tolongamɛke dia oseka onto tshɛ ayokandola kana ayetawɔ yɛdikɔ yayɛ. Anto amɔtshi mbeyaka kânga kɔlɔsha. Ndo akina mbeyaka tetemala ‘tɛkɛta kɔlɔ lo dikambo diayɛ.’ (1 Pet. 4:4) Koko, ohɔ diaha wɛmɛ oto mbahomana la awui wa ngasɔ. Yeso Kristo lawɔ akahɛnyahɛnyama. Ndo ɔpɔstɔlɔ Petero lawɔ akahɛnyahɛnyama. Nde akafunde ate: “Elangemi ami, tanyambaki dia akambu wa wulu [asui] weli l’atei anyu, wambuya le nyu dia nyuhimba, nyati: Dikambu di’uyuyu diambuya le su. Keli nyongenengene, ne dia nyu nyambusuwa la Kristu.”​—1 Pet. 4:12, 13.

13. Lande na kakoka Akristo ngɛnangɛna etena kahɛnyahɛnyamawɔ?

¹³ Mbikikɛ ɛhɛnyɔhɛnyɔ kana ɔlɔshamelo l’ɔtɛ weso Akristo ekɔ dui di’ɔngɛnɔngɛnɔ. Lande na? Nɛ dia mbetawɔma oma le andja ɔnɛ mɛnyaka dia wɛ ekɔ lo nsɛna lo ndjela ɛlɛmbɛ waki Satana koko aha waki Nzambi. Yeso akewola ate: “Fono kayayi le nyu, lam’ayunyandula antu tshe; ne dia watshewo wakandula amvutshi wa kashi wuhu ako.” (Luka 6:26) Ɛhɛnyɔhɛnyɔ mɛnyaka dia Satana la andja ande wekɔ lo koka kɛlɛ, nɛ dia wɛ ekɔ lo kambɛ Jehowa. (Adia Mateu 5:11, 12.) Ndo “[tɛngama] dia lukumbu la Kristu” ekɔ dui diasha ɔngɛnɔngɛnɔ.​—1 Pet. 4:14.

14. Etombelo akɔna w’ɛlɔlɔ wakoka monga naka onto tshikala la kɔlamelo le Jehowa etena kahɛnyahɛnyamande?

¹⁴ Etena katshikalayɛ la kɔlamelo le Jehowa l’ɔlɔshamelo, wɛ kokaka kondja etombelo ɛnɛi w’ɛlɔlɔ. Wɛ mbishaka esambishelo lo dikambo dia Nzambi ndo di’Ɔnande. Woho wakikɛyɛ la kɔlamelo tshɛ, keketshaka ananyɔ la akadiyɛyɛ w’Akristo. Anto amɔtshi wakenda waheye Jehowa mbeyaka tshutshuyama dia mboyanga. (Adia Filipi 1:12-14.) Ndo lam’ayoyɛna woho wakosha Jehowa wolo wa mbikikɛ ehemba, ngandji kawokayɛ kayohama.

“Suku dia wuki” diambonyodihwamɛ

15. Naa “suku dia wuki” diakadihwama dikambo dia ɔpɔstɔlɔ Paulo?

¹⁵ Lo kɛnɛ kendana la olimu wakandasale l’Ɛfɛsɔ, ɔpɔstɔlɔ Paulo akafunde ate: “Suku dia wuki diambundjihwamela, dia dimi ntsha ulimu.” (1 Kor. 16:8, 9) Ɔsɔ aki diaaso diakakonya lo olimu wa woke wa esambishelo ka lokumu l’ɔlɔlɔ ndo wa mbetɛ anto ambeki salema l’osomba ɔsɔ. Lo mbɔtɔ lo soko sɔ, Paulo akakimanyiya anto efula dia vɔ mbeka akambo wendana la Jehowa ndo Mbɔtɛmɔla.

16. Ngande wakɔtɔ atshikadi w’akitami lo “lukuke” lakadihwama lo 1919?

¹⁶ Lo 1919, Yeso Kristo lakatombwama akadiholɛ atshikadi w’akitami “lukuke.” (Eny. 3:8) Vɔ wakɔtɔ lo soko sɔ ndo wakatatɛ sambisha lokumu l’ɔlɔlɔ, waketsha akambo wa mɛtɛ wa lo Bible la ohetoheto woleki tshɛ. Etombelo akɔna wakayala oma lo olimu awɔ? Kakianɛ, lokumu l’ɔlɔlɔ lambokoma polo lo tokoma ta nkɛtɛ ndo suke la miliyɔ esambele y’anto wekɔ la elongamelo ka ndjokondja lɔsɛnɔ la pondjo lo andja w’oyoyo waki Nzambi.

17. Ngande wakokanyu mbɔtɔ lo ‘soko dia woke dia ntsha olimu’?

¹⁷ Polo ndo ɛlɔ kɛnɛ, ‘soko dia woke dia ntsha olimu’ diekekɔ hwe dikambo dia ekambi waki Jehowa tshɛ. Wanɛ wɔtɔ lo soko sɔ mongaka la ɔngɛnɔngɛnɔ ndo l’ɔlɔ etena kayashawɔ efula lo sambisha lokumu l’ɔlɔlɔ. Ɛlɔngɔlɔngɔ l’esekaseka wakambɛ Jehowa le, ngande wɔsanyu diɛsɛ dia lânde dia kimanyiya anto akina dia vɔ ‘monga la mbetawɔ lo lokumu l’ɔlɔlɔ’? (Mako 1:14, 15) Onde nyambokanaka yimba dikambo dia olimu w’ombatshi mboka wa pondjo kana wa tshanda? Olimu wa wokelo wa Mbalasa ya Diolelo, olimu wa lo Bɛtɛlɛ ndo olimu wa misiɔnɛrɛ ekɔ waaso akina wakoka monga la ntondo k’efula ka l’atei anyu. Lam’ele andja wa kɔlɔ waki Satana wayanga ndanyema, kamba elimu wa Diolelo ɛsɔ ekɔ lo taleke monga ohomba. Onde nyayɔtɔ lo “suku dia wuki” sɔ kam’ekende suke?

‘Nyohembe ko nyayɛna dia Jehowa ekɔ ɔlɔlɔ’

18, 19. a) Kakɔna kakakimanyiya Davidi dia monga la nsaki ka wolo efula ka kambɛ Jehowa? b) Kakɔna kɛnya dia ndoko lushi lakanyange Davidi lo woho wakandakambɛka Nzambi?

¹⁸ Omembi w’esambo akasambiyama dia mbelɛ anto akina dia vɔ ‘pemba ko wayɛna dia Jehowa ekɔ ɔlɔlɔ.’ (Osam. 34:8) Lam’akalamaka nkumekanga Davidi ka lo Isariyɛlɛ w’edjedja ɛkɔkɔ etena kakinde dikɛnda, Jehowa akawotsha oma le nyama ya ngala. Nzambi akosukɛ lo ta diakandalɔ la Ngɔliyatɛ ndo akawotsha oma lo mpokoso nkina efula. (1 Sam. 17:32-51; Osam. 18, efundelo wa la diko dia tshapita) L’ɔtɛ wa ngandji ka lɔsɛngɔ k’efula kaki Nzambi, Davidi akatshutshuyama dia funda ɔnɛ: “We [Jehowa, Nzambi k]ami, akambu wa mamba wakayatshi, la tukanyi takayakani lu dikambu diasu, weko efula; nduku ledimi la ye.”​—Osam. 40:5.

¹⁹ Ngandji kakokaka Davidi Jehowa kakahame efula ndo nde akalange mbotombola l’otema ande tshɛ ndo la yimba yande tshɛ. (Adia Osambu 40:8-10.) Lam’akatetaka ɛnɔnyi, ndoko lushi lakanyange Davidi lo woho wakandetsha lɔsɛnɔ lande dia tɛmɔla Nzambi ka mɛtɛ. Omamemelo ande le Nzambi aki dui diakaleke ohomba le nde, mbuta ate aki kiɔkɔ y’ɔngɛnɔngɛnɔ wahakoke mbɛdikama. Lam’akandakome osombe, Davidi akate ate: “Khumadiondjo, [Jehowa], we keli elungamelu kami, dimi latukekamaka uma ka dikenda. [Nzambi] li, tonsekaki lam’ayami usumbi la ote aya kasa la ndjui.” (Osam. 71:5, 18) Wɛkamu waki Davidi le Jehowa ndo lɔngɛnyi laki lam’asawɔ lakakome wolo kânga mbakatakitakitaka wolo ande wa demba.

20. Lande na kele kambɛ Jehowa mbele yoho ya lɔsɛnɔ yoleki tshɛ dimɛna?

²⁰ Lɔsɛnɔ la Jashua, Davidi ndo Timɔtɛ ekɔ tolembetelo tokina tɛnya dia kambɛ Jehowa ekɔ yoho ya lɔsɛnɔ yoleki tshɛ dimɛna. Ɛlɔlɔ wa lo tshanda mɔtshi waya oma lo elimu wa l’emunyi wa l’andja ɔnɛ hawokoke mbɛdikama la ɛlɔlɔ wa pondjo waya oma lo ‘kambɛ Jehowa la otema ayɛ tshɛ ndo la anima ayɛ tshɛ.’ (Jas. 22:5) Naka wɛ atayâkimɔ le Jehowa lo dɔmbɛlɔ, kete yambola wate: ‘Kakɔna kashimba dia dimi koma Ɔmɛnyi wa Jehowa?’ Naka wɛ amboshilaka monga ɔtɛmɔdi waki Jehowa wambobatizamaka, onde wɛ nangaka pamia ɔngɛnɔngɛnɔ ayɛ wa lo lɔsɛnɔ? Naka ɔsɔku, kete hamia olimu ayɛ w’esambishelo ndo tetemala pama lo nyuma. Sawo diayela diayokɛnya woho wakokayɛ pama lo nyuma lo ndjela ɛnyɛlɔ k’ɔpɔstɔlɔ Paulo.

Ngande wayoyokadimola?

• Sha ɛkɔkɔ ehende wahombaso kambɛ Nzambi.

• Kakɔna kakakimanyiya Timɔtɛ dia nde mbɔsa yɛdikɔ ya kambɛ Nzambi?

• Lande na kahombayɛ tshikala nge la ntondo ka ɛhɛnyɔhɛnyɔ?

• Waaso akɔna w’olimu wakoka monga la ntondo kayɛ?

[Osato wa lo lɛkɛ 18]

Kambɛ Jehowa ekɔ yoho ya lɔsɛnɔ yoleki tshɛ dimɛna

[Osato wa lo lɛkɛ 19]

Onde wɛ kokaka kadimola ambola wendana la mbetawɔ kayɛ?