Onde wɛ âkohɔ?
Onde wɛ akangɛnangɛna wadielo wa numɛlɔ y’eyoyo ya Tshoto y’Etangelo? Enda kana wɛ kokaka kadimola lo ambola wayela anɛ:
• Naa ekakatanu wa welo wakoka Akristo amɔtshi pomana lawɔ l’ɔkɔngɔ wa vɔ tshukana ndo kakɔna kahombawɔ ndjaketembola dia sala?
Akristo amɔtshi mbeyaka ndjɛna dia vɔ la elonganyi awɔ hawoleke sanga lolimi l’akambo efula. Lo mbeya dia odiakelo wa diwala wahasalemi lo ndjela kɛnɛ kata Afundelo hawetawɔma, vɔ pombaka sala la wolo dia kokɛ diwala diawɔ.—15/4, lɛkɛ 17.
• Ekakatanu akɔna wakoka pomana l’Okristo wodjashi lo mvudu yalamawɔ esombe?
Mbeyaka monga ko nde heye etshumanelo ka l’ɛtshi ka nkɛtɛ kele luudu lalamawɔ esombe lodjashinde. Efula k’anto wa lo mvudu shɔ mbeyaka monga la dietawɔ diotshikitanyi ndo vɔ mbeyaka ndjôkonya lo nde ndjatambiya l’awui w’ɛtɛmwɛlɔ awɔ. Ewotɔ w’Akristo ndo ase etshumanelo ka lo ɛtshi ka nkɛtɛ kɛsɔ pombaka mbeya ekakatanu wele la nde ndo mbôkimanyiya.—15/4, lɛkɛ 25-27.
• Naa akambo anɛi wakoka kimanyiya atshukanyi dia kandola ekakatanu?
Nyɔsɔnɛ etena ka kɛtshanya akambo wele lanyu. (Und. 3:1, 7) Nyɔkɛnɛmɔlɛ tokanyi tanyu la mɛtɛ tshɛ ndo la dilɛmiɛlɔ. (Ef. 4:25) Hokamɛ olonganyi ayɛ ndo dja yimba lo nsaki yande. (Mat. 7:12) Nyetawɔ yɛdikɔ yambonyɔsa dia kandola dikambo diakɔ ndo nyokambe kâmɛ dia kotsha yɛdikɔ yakɔ. (Und. 4:9, 10)—1/7, lɛkɛ 20-22.
• Etena kakatokeketsha Yeso dia sho nɔmba Nzambi dia nde tokimwɛ abasa aso, di’abasa akɔna wakandatɛkɛtaka?
Naka sho mbɛdika Mateu 6:12 la Luka 11:4, kete tayɛna hwe diaha di’abasa w’akuta mbakatɛkɛtaka Yeso. Nde akatɛkɛtaka dia pɛkato. Sho pombaka mbokoya Nzambi lo mbetawɔ dimanyiyɛ anto akina.—15/5, lɛkɛ 9.
• Lo kɔmite yakɔna yakamba ase Olui-walɔmbɔla?
Kɔmite kalɔmbɔla; Kɔmite kenda ase Bɛtɛlɛ; Kɔmite ka otondjelo w’ekanda; Kɔmite k’olimu; Kɔmite ka wetshelo; Kɔmite k’ofundelo.—15/5, lɛkɛ 29.
• Ngande wakokaso monga l’eshikikelo dia Mvula k’elola ka lo nshi ya Nɔa kakalɔ lo nkɛtɛ k’otondo?
Yeso aketawɔ dia Mvula k’elola kakalɔ mɛtɛ l’andja w’otondo. Ɛhɛmwɛlɔ wa lo Bible mɛnyaka dia Mvula k’elola kakalɔ mɛtɛ.—1/6, lɛkɛ 8 lo Falase.
• Onde lɔkɛwɔ lɔtɛkɛtami lo Romo 1:24-32 mendanaka la ase Juda kana l’ase Wedja?
Awui wotami lo divɛsa sɔ kokaka mendana la elui akɔ ehende, koko ɔpɔstɔlɔ Paulo akatɛkɛtaka lo yoho ya lânde dikambo di’ase Isariyɛlɛ wa lo nshi y’edjedja wele lo edja ka ntambe efula vɔ kondjelaka Ɛlɛmbɛ. Vɔ wakeyaka atɔndɔ wosembwe waki Nzambi, koko vɔ kɔsɛnaka lo yoho yɔtɔnɛ l’atɔndɔ akɔ.—15/6, lɛkɛ 29.
• Lende ele osomba wa Tel Arad, ndo lande na kewɔ ohomba efula?
Lo dikona dia tshitshɛ dia l’Isariyɛlɛ dia l’owɛstɛ wa Ndjale ka lɛɛhɔ sɔ mbakahikama osomba w’edjedja wa Arad. Lo dikona sɔ, anyangiyangi wakatane mpoke mɔtshi yaki la efundelo. Mɔtshi yekɔ la nkombo yele lo Bible ndo yɔ mɛnyaka di’ekanda w’ase andja ɔnɛ wakakambe la lokombo laki Nzambi.—1/7, lɛkɛ 23-24, lo Falase.
• Lande na kele ndjadjɛ eyango wakokaso kotsha kokaka pamia ɔngɛnɔngɛnɔ aso?
Naka sho sala la wolo dia kotsha eyango weso kema l’akoka wa kotsha oyadi kakɔna katɔlɔmba eyango akɔ dia mbâkotsha, kete tayoyahedja shoamɛ ɔtɛ tshanana. Koko hatohombe ndjasha yema tsho l’esambishelo, lo ndjayangɛ tɛkɛ nɛndɛ.—15/7, lɛkɛ 29.
• Kakɔna kakoka mbidjɛ ambutshi wekamu dia vɔ sawola l’anawɔ waya l’ɛnɔnyi dikumi l’ɛmɔ?
Awui amɔtshi wakoka shimba dia sawo dia dimɛna monga lam’asawɔ mbeyaka monga: diki diele l’ɔna, woho wayande la mposa ka yema ya dipanda ndo woho wahandalange mbutɛ anto akina akambo ande. Ambutshi mbeyaka nyanga waaso amɔtshi wa sawola l’anawɔ waya l’ɛnɔnyi dikumi l’ɛmɔtshi ndo sala la wolo dia mbeya kɛnɛ kele ledia k’ɛtɛkɛta awɔ.—1/8, lɛkɛ 10-11 lo Falase.