Jehowa ekɔ “Utshungudi” aso
“[Jehowa] atâkimanyiaka, atâtshungulaka.”—OSAM. 37:40.
1, 2. Dikambo dia mɛtɛ diakɔna di’ohomba diendana la Jehowa Ɔnɛ lele kiɔkɔ y’esambelo ndo y’ekeketshelo le so?
ALƐDI waya oma lo wonya hawototshikalaka dihole ɔtɔi. Etena katatshimbe nkɛtɛ, ndo alɛdi tasɛkɔka ndo tatshikitanaka. Koko, Otungi wa nkɛtɛ la wonya hatotshikitanaka. (Mal. 3:6) Bible mbutaka ɔnɛ: “Lende kema okadimuelo, kanga dɛdi di’osekesuelo.” (Jak. 1:17, Dikelemba di’Oyuyu) Dikambo dia mɛtɛ di’ohomba diendana la Jehowa sɔ diekɔ mɛtɛ kiɔkɔ y’esambelo ndo y’ekeketshelo le so, djekoleko etena kahomanaso la ehemba wa wolo ndo l’ekakatanu. Lande na?
2 Oko wakatadiɛnyi lo sawo diakete, Jehowa aki “Utshungudi” lo nshi yakafundamaka Bible. (Osam. 70:5) Nde hatotshikitanaka ndo ôkotaka mɛtɛ nshi tshɛ; diakɔ diele atɛmɔdi ande wa nshi nyɛ wekɔ l’ɛkɔkɔ w’eshika wa ndjaɛkɛ le nde dia nde ‘mbakimanyiya ndo mbatshungola.’ (Osam. 37:40) Ngande watshungola Jehowa ekambi ande wa nshi nyɛ? Ngande wakokande totshungola l’onto ndo l’onto?
Tambotshungɔ oma le atunyi
3. Lande na kakokaso ndjashikikɛ ɔnɛ atunyi hawotoshimba ekambi waki Jehowa dia vɔ sambisha lokumu l’ɔlɔlɔ?
3 Ndoko ɛlɔshɛlɔ w’oma le Satana wakoka shimba Ɛmɛnyi wa Jehowa dia vɔ tɛmɔla paka Jehowa ndamɛ lo yoho yetawɔnde. Ɔtɛkɛta wa Nzambi toshikikɛka ɔnɛ: ‘Ndoko ehomɔ ka ta kayowonyɛmbɛ kayotondoya. Lolemi tshɛ layokotongela dikambo, wɛ ayolidja mananu.’ (Is. 54:17) Atunyi wakahembe dia shimba ekambi waki Nzambi dia vɔ kotsha ɔkɛndɛ awɔ wa sambisha, koko wakakite tatala. Tɔsɛdingole bɛnyɛlɔ pende.
4, 5. Ɔlɔshamelo akɔna wakahomana la ekambi waki Jehowa lo 1918, ndo etombelo akɔna wakonge?
4 Lo 1918, ekambi waki Jehowa wakadiɛnɛ la ɔlɔshamelo wa wolo oma le ewandji w’ɛtɛmwɛlɔ la oyango wa shimba olimu w’esambishelo. Lo Ngɔndɔ ka tanu 7, ewandji wa lɛɛta wa lo wodja wa États-Unis wakadjanga dia vɔ munda J. F. Rutherford, lakalɔmbɔlaka olimu w’esambishelo wa l’andja w’otondo lo etena kɛsɔ ndo anto akina efula wakakambaka lo Mbalasa kenda olimu w’Ɛmɛnyi wa Jehowa wa l’andja w’otondo. Kombeta ngɔndɔ hiende, wakahindɛ ɔnangɛso Rutherford nde l’asekande onongo ndo tuminadi takɔshi yɛdikɔ ya mbadja lo lokanu l’etena k’otale. Onde atunyi wakatondoya dia memadja olimu w’esambishelo lo pondjo lo kamba la tuminadi? Kema!
5 Tohɔ daka diaki Jehowa diayela nɛ: ‘Ndoko ehomɔ ka ta kayowonyɛmbɛ kayotondoya.’ Lam’akatshikitana akambo la shashimoya lo Ngɔndɔ ka sato 26, 1919, mbuta ate ngɔndɔ divwa l’ɔkɔngɔ wa ɔnangɛso Rutherford la asekande nongola dilanya, anangɛso waki lo lokanu wakatshungɔ lo tshanda mɔtshi. Ɔnɔnyi wakayele, lo Ngɔndɔ ka tanu 5, 1920, tuminadi takawanyɛ akambo wa kashi wakawâhindɛ. Anangɛso wakakambe la lotshungɔ laki lawɔ dia kamba olimu w’esambishelo ka Diolelo l’ohetoheto. Etombelo akɔna wakonge? Ohamelo wa diambo wakasalema tatɛ oma k’etena kɛsɔ! “Utshungudi” aso mbahomba nongola lotombo l’ɔtɛ w’ohamelo ɔsɔ.—1 Kor. 3:7.
6, 7. a) Ngande wakalɔsha Hitler Ɛmɛnyi wa Jehowa lo wodja wa Allemagne, ndo etombelo akɔna wakayala? b) Ɔkɔndɔ w’ekambi waki Jehowa wa nshi nyɛ mbishaka djembetelo ya dui diakɔna?
6 Tɔsɛdingole kakianɛ ɛnyɛlɔ ka hende. Lo 1934, Hitler akatshibe dia shila Ɛmɛnyi wa Jehowa wa lo wodja wa Allemagne oshiki. Nde akasangoyaka dia sala akambo efula oleki kɛnɛ kakandate. L’ɔkɔngɔ wa nde mbuta dui sɔ, Ɛmɛnyi wa Jehowa wakandama ndo wakadjama lo nkanu. Nunu di’Ɛmɛnyi wa Jehowa wakahɛnyahɛnyama ndo nkama wakadiakema lo mpango ya nkanu. Onde Hitler akatondoya dia shila Ɛmɛnyi wa Jehowa oshiki? Onde nde akemadja esambishelo ka lokumu l’ɔlɔlɔ lo wodja wa Allemagne? Ndoko kânga yema tshitshɛ! Lo nshi yakawahɛnyahɛnyamaka, anangɛso wakatetemalaka sambisha lo woshɛshɛ. L’ɔkɔngɔ wa lowandji l’ase Nazi nkɔ, vɔ wakakambe la lotshungɔ laki lawɔ dia tetemala sambisha. Ɛlɔ kɛnɛ, wodja wa Allemagne wekɔ la apandjudi wa Diolelo ndekana 165 000. Lo etena kɛsɔ nto, “Utshungudi” akɛnya mɛtɛ ka daka diande di’ɔnɛ: ‘Ndoko ehomɔ ka ta kayowonyɛmbɛ kayotondoya.’
7 Ɔkɔndɔ w’Ɛmɛnyi wa Jehowa wa nshi nyɛ wekɔ la djembetelo yɛnya dia Jehowa hetawɔki dia ekambi ande tshɛ shilama oshiki. (Osam. 116:15) Ko kayotota dikambo diaso l’onto ndo l’onto? Ngande watotshungola Jehowa l’onto ndo l’onto?
Kayotota dikambo dia ekokelo ka lo demba?
8, 9. a) Ngande weyaso dia Jehowa hotokokɛka nshi tshɛ lo demba? b) Dui diakɔna mɛtɛ diahombaso mbetawɔ?
8 Oko weso anto, sho mbeyaka dia Jehowa kôtolaka dia ɔnɛ nde ayotokokɛka nshi tshɛ lo demba. Sho mbɔsaka yɛdikɔ yakɔshi ase Hɛbɛru asato wakatone dia kusamɛ lohingu la fɛsa lakemɛ nkumekanga Nɛbukadinɛza. Ɛlɔngɔlɔngɔ wakokaka Nzambi wɔma ɛsɔ kombuta dia Jehowa ayowakokɛ lo dihindo. (Adia Danyele 3:17, 18.) Oko wakayotshikitanaka akambo, Jehowa akâtshungola oma lo kuka ka dja ka wolo. (Dan. 3:21-27) Koko kânga lo nshi yakafundamaka Bible, etshungwelo ka lo dihindo kakasalemaka paka lo pai. Ekambi waki Jehowa efula wakadiakema oma le antunyi awɔ.—Heb. 11:35-37.
9 Ko kayotota dia nshi yaso nyɛ? Oko wende “Utshungudi,” Jehowa kokaka tshungola anto oma l’ekakatanu wa wolo. Onde sho kokaka mbuta la eshikikelo tshɛ dia Jehowa akekɛ kana kombekɛ lonya lo awui amɔtshi wa shikaa? Kema. Koko, anto wakahande oma lo wâle kokaka ndjaoka dia Jehowa akekɛ lonya. Honga dimɛna di’anto akina manya anto asɔ. L’etena kakɔ kâmɛ, sho pombaka mbeya di’Akristo efula wa kɔlamelo wakavu l’ɔtɛ w’ɛhɛnyɔhɛnyɔ, ɛnyɛlɔ oko wanɛ waki lo wodja wa Allemagne lo ɛlɔmbwɛlɔ k’ase Nazi. Anto akina wakavu l’atei wa mpokoso mɔtshi. (Und. 9:11) Sho kokaka ndjambola ɔnɛ: ‘Onde Jehowa kokoka monga “Utshungudi” wa ekambi ande wa kɔlamelo wakavu nyɔi y’esondjo?’ Nde akakoke monga.
10, 11. Lande na kahayashimbɛ onto la ntondo ka nyɔi, ndo kakɔna kakoka Jehowa sala lo dikambo sɔ?
10 Tɔshi ɛnyɛlɔ kɛnɛ: Onto kema l’akoka wa ndjashimbɛ oma lo nyɔi, nɛ dia ndoko onto lakoka “nshimbela lumu landi uma lu Dihuli di’Edu,” kana Hadɛsɛ. (Osam. 89:48) Ko kayotota dikambo dia Jehowa? Kadiyɛso kɛmɔtshi kakake lo ɛhɛnyɔhɛnyɔ waki waa Nazi mbohɔka kɛnɛ kakawotɛ nyango laki Ɔmɛnyi wa Jehowa etena kakawavusha wakiwɔ amɔtshi wa ngandji lo mpango ya nkanu: “Naka nyɔi hakoke kimɔ anto, kete nyɔi ndeka Nzambi wolo, onde mɛtɛ?” Ekɔ mɛtɛ dia nyɔi haleki Kanga-Wolo-Tshɛ lele Kiɔkɔ ya lɔsɛnɔ wolo! (Osam. 36:9) Wanɛ tshɛ wele lo Sheɔlɛ kana Hadɛsɛ wekɔ lo yimba ya Jehowa ndo nde ayotshungola ɔmɔmɔ la l’atei awɔ.—Luka 20:37, 38; Eny. 20:11-14.
11 Koko l’etena kâkatakongɛ dui sɔ, Jehowa ekɔ lo kokɛ atɛmɔdi ande wa kɔlamelo. Nyɛsɔ tɔsɛdingole toho tosato tende mɛtɛ “Utshungudi” aso.
Ekokelo ka lo nyuma
12, 13. Lande na kele ekokelo ka lo nyuma ohomba efula, ndo ngande watosha Jehowa ekokelo ka ngasɔ?
12 Jehowa toshaka ekokelo ka lo nyuma kele ohomba efula le so. Oko weso Akristo wa mɛtɛ, sho mbeyaka di’ekɔ ɛngɔ kɛmɔtshi koleki lɔsɛnɔ la kakianɛ nɛmɔ. Ɛngɔ kakɔ ko diɔtɔnganelo dia nɛmɔ diele lam’asa ɔmɔmɔ la l’atei aso nde la Jehowa. (Osam. 25:14; 63:3) Otondonga sho bu la diɔtɔnganelo sɔ, tshike lɔsɛnɔ laso la kakianɛ kema l’oyango ndo tshike tôtotonga l’elongamelo kendana la nshi yayaye.
13 Diɛsɛ ko, Jehowa toshaka sho tshɛ ekimanyielo kele laso ohomba dia monga la diɔtɔnganelo dia ma ma la nde. Tekɔ la Ɔtɛkɛta ande, nyuma kande k’ekila ndo etshumanelo ka lo andja w’otondo dia tokimanyiya. Ngande wakokaso kondja wahɔ oma lo tɛdikɔ tɔsɔ tshɛ? Naka sho mbekaka Ɔtɛkɛta ande mbala la mbala ndo l’etete, kete tayokeketsha mbetawɔ kaso. (Romo 15:4) Naka sho nɔmbaka dia kondja nyuma kande l’otema ɔtɔi, kete tayokondja ekimanyielo dia sho shika tanga la ntondo k’ehemba wendana la lɔkɛwɔ la kɔlɔ. (Luka 11:13) Lo ndjelaka ɛlɔmbwɛlɔ katosha olui w’ɔhɔmbɔ lo tshimbo ya abuku walembetshiya Bible, nsanganya ya l’etshumanelo ndo ya weke, tayoleshamaka ‘mbo ya ndɛ ya lo nyuma lo tena diahombama.’ (Mat. 24:45) Tɛdikɔ tɔsɔ tokokɛka lo nyuma ndo tokimanyiyaka dia sho tshikala suke suke la Nzambi.—Jak. 4:8.
14. Kɔndɔla dikambo dimɔtshi diakete diɛnya woho watokokɛ Jehowa lo nyuma.
14 Dia mɛnya woho watokokɛ Jehowa lo nyuma, tohɔ ambutshi wakatatɛkɛta dikambo diawɔ lo mbɔtwɛlɔ ka sawo diakete. Nshi ngana tsho l’ɔkɔngɔ wa Theresa k’ɔnawɔ la womoto shishɔ, wakalongola losango la lonyangu l’ɔnɛ: Nde akadiakema.a She mbohɔka ɔnɛ: “Lakalɔmbɛ Jehowa dia nde mbokokɛ. Etena kakamayowɛna amboshila mvɔ, dimi lakayambolaka l’etatelo lande na kaki kombetawɔma alɔmbɛlɔ ami. Eelo, dimi mbeyaka dia Jehowa halake dia nde ayokokɛ ɔmɔmɔ la l’atei w’ekambi ande lo yoho ya dihindo. Lakatetemala nɔmba Jehowa dia nde mbishami eokelo. Lakakeketshama lo mbeya dia Jehowa kokɛka ekambi ande lo nyuma, mbuta ate nde toshaka kɛnɛ kele laso ohomba dia nama diɔtɔnganelo diele lam’asaso la nde. Ekokelo ka ngasɔ mboleki ohomba, nɛ dia tɔ kokaka monga la shɛngiya lo lɔsɛnɔ la pondjo layotokondja lo nshi yayaye. Lo yoho shɔ mbele, Jehowa akakokɛ Theresa ndo nde akokambɛka la kɔlamelo polo ndo lo nyɔi kande. Lakakondja wɔladi lo mbeya dia elongamelo kande kendana la lɔsɛnɔ la lo nshi yayaye kekɔ lo anya ande wa ngandji.”
Nde tosukɛka etena keso la hemɔ
15. Lo toho takɔna takoka Jehowa tokimanyiya etena keso baka la hemɔ?
15 Jehowa kokaka tosukɛ lo ‘mbeto ka hemɔ’ oko wakandakokɛ Davidi. (Osam. 41:3) Kânga mbahatotshungola Jehowa lo kɔnɔya hemɔ yaso lo dihindo, nde tokimanyiyaka. Woho akɔna? Atɔndɔ watanaso lo Ɔtɛkɛta ande kokaka tokimanyiya dia sho mbɔsa tɛdikɔ ta lomba lo kɛnɛ kendana la esakelo ndo akambo akina. (Tuk. 2:6) Sho kokaka kondja alako w’ohomba efula ndo wa shikaa oma lo asawo watomba lo Tshoto y’Etangelo ndo Réveillez-vous ! watɛkɛta dikambo dia hemɔ kele la so. Lo tshimbo ya nyuma kande, Jehowa mbeyaka tosha ‘wolo woleki wɔnɛ wokongaka l’onto’ dia sho ndɔshana la ekakatanu aso ndo nama olowanyi aso oyadi kɛnɛ tshɛ kakoka tomba. (2 Kor. 4:7) La ekimanyielo kɛsɔ, sho kokaka mbewɔ dia ndeka kɔmɔ l’ɔtɛ wa hemɔ katataso ko ndjotshika dia ndeka ndjasha lo akambo wa lo nyuma.
16. Ngande wakayalɔngɔsɔla ɔnangɛso ɔmɔtshi dia nde ndɔshana la hemɔ kande?
16 Tɔshi ɛnyɛlɔ k’ɔlɔngɔlɔngɔ ɔmɔtshi wakatatɛkɛta dikambo diande l’etatelo ka sawo dietshi. Lo 1998, wakawoshola la hemɔ kananda eshisha wa lo wɔɔngɔ wakɛndjakɛndja emunyi wa lo demba kakayowɔdjaka demba di’otondo.b Ngande wakandalɔshana la hemɔ kande kɛsɔ? Nde nembetshiyaka ate: “Tena dimɔtshi, laki la pâ efula ndo la lonyangu etena kakameye dia nyɔi mbakongɛ. Etena tshɛ kemi l’ɔkɔmwɛlɔ, dimi nɔmbaka Jehowa dia nde mbishami awui asato anɛ: Ki ka l’otema, solo dia lotutsha ndo ekikelo. Dimi lakoke dia Jehowa akakadimola alɔmbɛlɔ asɔ. Ki ka l’otema kimanyiyakami dia dimi kana yimba lo tokanyi takeketsha, ɛnyɛlɔ oko woho wayonga andja w’oyoyo etena kayomonga l’akoka wa kɛndakɛnda, ndɛ mbo ya ndɛ y’amɛna ndo sawola la ase nkumbo kami nto. Solo dia lotutsha kimanyiyakami dia dimi ndɔshana la ekakatanu waya oma lo woho wambɔla demba diakimi. Ekikelo kimanyiyakami dia dimi nama kɔlamelo ndo diaha dimi shisha wɛdimo ami wa lo nyuma. Dimi kokaka mɛtɛ ndjaɔsa oko omembi w’esambo Davidi, nɛ dia dimi mbokaka dia Jehowa akasukɛ lo mbeto kami ka hemɔ.”—Is. 35:5, 6.
Nde toshaka mbo ya ndɛ
17. Kakɔna kakalake Jehowa dia tosalɛ, ndo kakɔna kalembetshiya daka sɔ?
17 Jehowa akalake dia nde ayotosha diangɔ dia l’emunyi. (Adia Mateu 6:33, 34 ndo Heberu 13:5, 6.) Kɛsɔ hɛnya dia sho pombaka kɔma anya dia kondja diangɔ dia l’emunyi diele laso ohomba kana ɔnɛ sho pombaka tona dia kamba olimu. (2 Tes. 3:10) Daka sɔ nembetshiyaka dia naka sho nyanga Diolelo ntondo lo nsɛnɔ yaso ndo naka sho mbetawɔ dia kamba olimu dia ndjasɛnya, kete sho kokaka mendɛ le Jehowa dia nde tokimanyiya dia sho kondja diangɔ diele laso ohomba dia sho nsɛna. (1 Tes. 4:11, 12; 1 Tim. 5:8) Nde kokaka tosha diangɔ diele laso ohomba lo toho tahatalongamɛ, ondo lo tshimbo ya onyaso ɔtɛmɔdi ɔmɔtshi latosha diangɔ dia l’emunyi kana olimu.
18. Kɔndɔla dikambo dimɔtshi diakete diɛnya dia sho kokaka kimanyiyama etena keso lo dihombo.
18 Tohɔ mama kakodiaka ɔnande la womoto ndamɛ kakatatɛkɛta lo mbɔtwɛlɔ ka sawo dietshi. Etena kakawonɔ nde l’ɔnande otsha lo ngelo kekina, nde aki l’okakatanu dia tana olimu. Nde nembetshiyaka ɔnɛ: “Lakatshɔka la pindju tshɛ l’olimu w’esambishelo ndo lakayangaka olimu l’ɔkɔngɔ a midi tshɛ. Dimi mbohɔka lushi lɔmɔtshi lakamatshu lo makashinyi wasondjawɔ diangɔ dia ndɛ dia tosomba yema y’abɛlɛ. Lakemala ko lakendaka afuki, koko dimi komonga la falanga efula dia mbasomba. Ndoko lushi lakamakɔmɔ yoho shɔ lo lɔsɛnɔ lami. Etena kakamakalola la ngelo oma lo makashinyi ɔsɔ lushi lɔsɔ, lakatane dia dɛfu diami dia l’otshimba diakalole la atapa waki tɔɔ la weho tshɛ w’afuki. Akikɔ mbo ya ndɛ efula yakatakoke ndɛ lo edja ka ngɔndɔ efula. Dimi lakalele ndo lakasha Jehowa losaka.” Kadiyɛso kɛsɔ akayeyaka yema tshitshɛ l’ɔkɔngɔ dia ɔnangɛso ɔmɔtshi la lo etshumanelo kawɔ lakonɛka afuki lo jardɛ yande mbakayotshikaka atapa waki l’afuki asɔ. Nde akayôfundɛka l’ɔkɔngɔ diko ate: “Kânga mbakamakosha losaka efula lushi lɔsɔ, dimi lakasha ndo Jehowa losaka lo woho wakandakambe la lɔsɛngɔ layɛ dia mboholami dia nde mbokakami ngandji.”—Tuk. 19:17.
19. Lo fɔnu ka woke, ekambi waki Jehowa wayonga l’eshikikelo kakɔna, ndo kakɔna kahombaso ndjashikikɛ dia ntsha oma ko kakianɛ?
19 Mbokɛmaka hwe dia kɛnɛ kakasale Jehowa lo nshi yakafundamaka Bible ndo kɛnɛ kasalande nshi nyɛ toshaka ɛkɔkɔ w’eshika wa sho ndjaɛkɛ le nde oko wende Okimanyedi aso. Kema edja, lam’ayoya fɔnu ka woke lo andja waki Satana, mbayotoleka monga l’ohomba w’ekimanyielo kaki Jehowa. Koko, ekambi waki Jehowa wayonga l’akoka wa mendɛ le nde l’eshikikelo tshɛ. Vɔ wayedia ɛtɛ awɔ ndo wayɔngɛnangɛna weya dia etshungwelo kawɔ kaya suke. (Luka 21:28) Etena kakatakongɛ awui asɔ, oyadi ehemba wakoka pomana la so, nyɛsɔ toyashikikɛ dia ndjaɛkɛ le Jehowa tele l’eshikikelo ɔnɛ Nzambi kaso kahatshikitana ekɔ mɛtɛ “Utshungudi” aso.
[Nɔte ya l’ɛse ka dikatshi]
a Enda sawo diele l’ɔtɛ a dui ɔnɛ: “Woho wa tondoya mpokoso kɛmɔtshi ka kandji efula,” diele lo Réveillez-vous ! wa Ngɔndɔ k’esambele 22, 2001, lɛkɛ 19-23, lo Falase.
b Enda sawo diele l’ɔtɛ a dui ɔnɛ: “Mbetawɔ kakakimanyiya dia dimi nsɛna la SLA,” diele lo Réveillez-vous ! wa Ngɔndɔ ka ntondo 2006, lɛkɛ 25-29, lo Falase.
Onde wɛ âkohɔ?
• Ngande wakoka Jehowa tshungola wanɛ wakavu nyɔi y’esondjo?
• Lande na kele ekokelo ka lo nyuma mboleki ohomba?
• Kakɔna kalembetshiya daka diaki Jehowa dia kotsha ehomba aso wa l’emunyi?
[Osato wa lo lɛkɛ 8]
L’ɔkɔngɔ wa ɔnangɛso Rutherford nde l’asekande mbidjama lo lokanu lo 1918, wakayakimɔka l’ɔkɔngɔ diko ndo wakawanyɛ awui wa kashi wakawâhindɛ
[Osato wa lo lɛkɛ 10]
Jehowa kokaka tosukɛ ‘lo mbeto kaso ka hemɔ’