Naa shɛngiya yele la mbeya mɛtɛ lo dikambo dia ifɛrnɔ le yɛ?
WANƐ wetsha dia ifɛrnɔ ekɔ dihole diasoyama anto tɛkɛtaka kɔlɔ lo dikambo dia Jehowa Nzambi ndo dia waonga ande. Lo mɛtɛ, Bible mbutaka dia Nzambi ayodiaka anto wa kɔlɔ. (2 Tesalonika 1:6-9) Koko, kɛlɛ ka losembwe kema dionga dioleki woke diaki Nzambi.
Nzambi kema onto la kɔlɔ. Nde mumbolaka ɔnɛ: “Undi, dimi layongenangena lu nyoi k’untu a kolo?” (Ezekiyele 18:23) Naka Nzambi hangɛnangɛna nyɔi k’anto wa kɔlɔ, ngande wakokande ngɛnangɛna dia mbaɛnaka wasoyama?
Dionga dioleki woke diaki Nzambi ko ngandji. (1 Joani 4:8) Lo mɛtɛ, “[Nzambi] eli ololo le antu tshe, ndu ngandji kandi keko ladiku dia diango diandi tshe.” (Osambu 145:9) Lo wedi okina, Nzambi nangaka dia sho mbolanga l’otema ɔtɔi.—Mateu 22:35-38.
Onde wɔma w’ifɛrnɔ kana ngandji kokayɛ Nzambi mbakotshutshuya dia sala lolango la Nzambi?
Wetshelo w’ɔnɛ anima soyamaka lo ifɛrnɔ tshutshuyaka anto dia vɔ mboka Nzambi wɔma wa kɔlɔ. Koko, onto leka mɛtɛ lo dikambo dia Nzambi ndo layowokaka ngandji ndjekaka dia mbôka wɔma wa dimɛna. Osambu 111:10 mbutaka ɔnɛ: “Woma wa [Jehowa] weli etatelu ka yimba, waku tshe watulamaka dikambu ne, weko la ewu k’ololo.” Wɔma waki Nzambi ɔsɔ kema wɔma wa kɔlɔ, koko ekɔ wɔma wa dimɛna woludi la dilɛmiɛlɔ le Otungi. Vɔ tokimanyiyaka dia sho monga la wɔma w’oshika waha mbonyangiya.
Tende woho wele mbeya mɛtɛ lo dikambo dia ifɛrnɔ akakimanyiya Kathleen, womoto ɔmɔtshi lele l’ɛnɔnyi 32 lakanɔka dinɔnɔ dia wolo. Lɔsɛnɔ lande lakalole la ɛngɛnɔngɛnɔ, awui wa ngala ndo awui wa mindo. Nde mbutaka ate: “Lakendaka yana yami ya yimato yaki l’ɔnɔnyi ɔtɔi ndo lakakanyiyaka ɔnɛ: ‘Enda nyende kɛnɛ kawosalɛmi! Layolongola lo ifɛrnɔ l’ɔtɛ wa dikambo nɛ.’” Kathleen akahembe dia tshika dinɔnɔ dia wolo koko nde kotondoya. Nde mbutaka ate: “Dimi lakalangaka monga onto l’ɔlɔlɔ, koko kɛnɛ tshɛ kakakomɛka lo lɔsɛnɔ ndo kakasalemaka l’andja kaki paka kɔlɔ keto. Akɛnamaka dia ndoko ohomba monga onto l’ɔlɔlɔ.”
L’ɔkɔngɔ diko, Kathleen akayohomanaka la Ɛmɛnyi wa Jehowa. Nde mbutaka ate: “Dimi lakeye dia dja y’ifɛrnɔ bu. Tolembetelo t’oma l’Afundelo takashikikɛka dui sɔ. Mbeya ɔnɛ dimi hatolongola lo dja y’ifɛrnɔ aki mɛtɛ tshondo y’esambelo.” Koko nde akeye nto daka diaki Nzambi di’ɔnɛ anto kokaka nsɛna pondjo pondjo lo nkɛtɛ kayɛdiama oma l’akambo wa kɔlɔ. (Osambu 37:10, 11, 29; Luka 23:43) Nde akakotsha ate: “Kakianɛ dimi laya la elongamelo ka nsɛna pondjo pondjo lo paradiso!”
Onde Kathleen aki l’akoka wa tshika nnɔ dinɔnɔ dia wolo aha la wɔma wa ntshɔ l’ifɛrnɔ? Nde mbutaka ate: “Etena kakimi la nsaki k’efula ka dinɔnɔ dia wolo, dimi lakasɛngasɛngaka Jehowa Nzambi lo dɔmbɛlɔ dia nde kimanyiyami. Lakayongaka la kanyi yaki Jehowa lo kɛnɛ kendana la mbekelo ya kɔlɔ ndo dimi kokombolaka mbonyangiya. Nde akakadimola alɔmbɛlɔ ami.” (2 Koreto 7:1) Wɔma waha nyangiya Nzambi akakimanyiya Kathleen dia nde tshika nnɔ dinɔnɔ dia wolo.
Eelo, mboka Nzambi ngandji ndo nto mbôka wɔma wa dimɛna, koko aha wɔma wa soyama l’ifɛrnɔ kokaka totshutshuya dia sho sala lolango laki Nzambi dia sho monga la ɔngɛnɔngɛnɔ wa pondjo. Omembi w’esambo akafunde ate: “One tshe latukaka [Jehowa] woma, latokendakendaka lu mbuka yandi, eli la otshoko.”—Osambu 128:1.
[Kiombo/Esato wa lo lɛkɛ 9]
WAA NA WAYOTSHUNGƆ OMA LO IFƐRNƆ?
Dikadimwelo dimɔtshi dia Bible mbidjaka anto l’ohotohoto lo woho wakadimoladiɔ tɔtɛkɛta tohende ta lo Grɛkɛ Geʹen·na ndo Haiʹdes lo tshɛkɛta tshɔi ɔnɛ “ifɛrnɔ.” Lo Bible, tshɛkɛta Geʹen·na nembetshiyaka nyɔi ka pondjo, kahakoke onto mbolɔ oma lɔkɔ. Koko, wanɛ wele lo Haiʹdes, kana Hadɛsɛ wekɔ la elongamelo ka ndjolwama.
Ɔnkɔnɛ, l’ɔkɔngɔ wa nyɔi ndo eolwelo ka Yeso, ɔpɔstɔlɔ Petero akashikikɛ ampokami ande dia Yeso ‘kotshikala lo ifɛrnɔ.’ (Etsha 2:27, 31, 32; Osambu 16:10) Tshɛkɛta yokadimɔmi ɔnɛ ‘ifɛrnɔ’ lo divɛsa nɛ ekɔ tshɛkɛta ya lo Grɛkɛ Haiʹdes. Yeso kotshɔ lo dihole dimɔtshi di’asui. Hadɛsɛ kana ‘ifɛrnɔ’ wakandatshu lɔkɔ aki diombo. Koko Nzambi aha Yeso oto mbakandatshungola oma lo Hadɛsɛ.
Lo kɛnɛ kendana la eolwelo, Bible mbutaka ɔnɛ: ‘Nyɔi la ifɛrnɔ wayotondja edo wele le wɔ.’ (Enyelo 20:13, 14) Otondjelo w’edo oma lo ‘ifɛrnɔ’ ayolembetshiya eolwelo ka wanɛ tshɛ wɔsa Nzambi dia vɔ kokaka mbolɔ. (Joani 5:28, 29; Etsha 24:15) Ande elongamelo ka diambo kele la ntondo kaso, mbuta ate elongamelo ka ndjɛna wakiso wa ngandji watshungɔ oma lo diombo lee! Jehowa, Nzambi kele la ngandji k’otamanya ayosala dikambo sɔ.