Yasukanya la Nzambi
Otungi wokoki nongola lotombo laso
ONDE wɛ atayambolaka wate: ‘Lɔsɛnɔ lekɔ l’oyango akɔna?’ Wanɛ wetawɔ ɔnɛ diangɔ tshɛ diakahilɔ lohilɔ watakondja okadimwelo lo dimbola sɔ. Koko aha ngasɔ mbediɔ le wanɛ wetawɔ ɔnɛ Jehowa Nzambi mbele Kiɔkɔ ya lɔsɛnɔ. (Osambu 36:9) Vɔ mbeyaka ɔnɛ nde akâtonge l’oyango ɔmɔtshi. Oyango ɔsɔ mbɔtɛkɛtami lo Enyelo 4:11. Nyɛsɔ tɔsɛdingole woho walembetshiya ɛtɛkɛta wakafundama oma le Joani ɛsɔ lande na keso lanɛ la nkɛtɛ.
Joani akatɛkɛta di’olui ɔmɔtshi w’amembi wa nkembo wa l’olongo watombola Nzambi ɔnɛ: “Khumesu la [Nzambi k]asu, we kukuki dia nungula lutumbu la kenemo la wulu, ne dia we kakatungi diango tshe. Dio diakatungama uma lu lulangu laye.” Jehowa oto mbakoka nongola lotombo la ngasɔ. Lande na? Nɛ dia nde “kakatungi diango tshe.” Ko kakɔna katshutshuyama ditongami diande diele la lomba dia sala?
Bible mbutaka dia Jehowa mbakoka dia “nungula,” lotombo, kɛnɛmɔ la wolo. Aha la tâmu, Nde mbele la lotombo, la kɛnɛmɔ ndo la wolo woleki tshɛ l’andja w’otondo. Koko efula k’anto haweye dia nde mbele Otungi wa diangɔ tshɛ. Kânga mbediɔ ngasɔ, ekɔ anto amɔtshi wɛna hwe ‘waonga [waki Nzambi] wahɛnama’ oma lo diangɔ diakandatonge. (Romo 1:20) L’etema woludi la lowando, vɔ tshutshuyamaka dia mbisha Jehowa lotombo la kɛnɛmɔ. Vɔ mbewoyaka anto tshɛ wakoka mbahokamɛ, djembetelo ya diambo yɛnya dia Jehowa mbakatonge diangɔ tshɛ ndo ɔnɛ nde oto mbahombaso mboka wɔma wɔsɔhanyemi la dilɛmiɛlɔ.—Osambu 19:1, 2; 139:14.
Ko ngande walongola Jehowa lotombo oma le atɛmɔdi ande? Lo mɛtɛ, ndoko etongami kakoka mbisha Otungi kanga nkudu tshɛ wolo. (Isaya 40:25, 26) Koko oko wakatatongama lo efanelo ka Nzambi, tekɔ la waonga amɔtshi waki Nzambi, ɛnyɛlɔ oko nkudu. (Etatelu 1:27) Naka sho mandolaka kɛnɛ kambotosalɛ Otungi aso, kete tayotshutshuyama dia kamba la wolo aso dia mbɔlɛmiya ndo mbotombola. Lo dihole dia kamba la wolo aso dia tɔla wahɔ aso hita otsha la ntondo, sho mɛnaka dia Jehowa Nzambi mbakoka dia nongola nkudu tshɛ kele laso etena kokambɛso.—Mako 12:30.
Ko lande na keso lanɛ la nkɛtɛ? Etenyi k’ekomelo ka Enyelo 4:11 kadimolaka ɔnɛ: “Ne dia we kakatungi diango tshe. Dio diakatungama uma lu lulangu laye.” Sho kondjatonga shoamɛ. Tekɔ la lɔsɛnɔ nɛ dia lolango laki Nzambi. Omalɔkɔ, lɔsɛnɔ laso layonga anyanya ndo aha l’oyango, naka sho nsɛna paka dia wahɔ aso shoamɛ. Dia sho monga la ki ka lo yimba, l’ɔngɛnɔngɛnɔ ndo l’ɔlɔ, sho pombaka mbeya ele lolango la Nzambi ndo nsɛna lo yoho yɔtɔnɛ la lolango lakɔ. Paka lo sala ngasɔ mbayoteya oyango wakatatongama.—Osambu 40:8.
[Efundelo wɛnya kanga osato wa lo lɛkɛ 27]
NASA, ESA, ndo A. Nota (STScI)