Ele Nzambi?
NGANDE wakokayɛ kadimola lo dimbola sɔ? Anto amɔtshi fɔnyaka ɔnɛ vɔ mbeyaka Nzambi dimɛna, mbuta ate nde ekɔ ɔngɛnyi awɔ w’oshika. Akina mbɔsaka dia Nzambi mangana la wɔ etale. Vɔ mbetawɔka ɔnɛ nde ekɔ, koko haweye awui efula lo dikambo diande. Ko naka wɛ mbetawɔka Nzambi, ngande wakokayɛ kadimola lo ambola wele l’ɛse anɛ?
1. Onde Nzambi ekɔ onto la mɛtɛ?
2. Onde Nzambi ekɔ la lokombo?
3. Onde Yeso ekɔ Nzambi Kanga-Wolo-Tshɛ?
4. Onde Nzambi ndjakiyanyaka dikambo diami?
5. Onde Nzambi mbetawɔka weho tshɛ w’ɛtɛmwɛlɔ?
Naka wɛ nɔmba anto akina dia kadimola lo ambola asɔ, kete wɛ ayamba dikambo di’ekadimwelo wotshikitanyi wayowokosha. Koko toshimu ndo tokanyi ta kɔlɔ tambodiangana efula lo dikambo dia Nzambi.
Ekadimwelo wa ambola asɔ wekɔ ohomba efula
Etena kakandasawolaka la womoto ɔmɔtshi lakayashaka l’awui w’ɔtɛmwɛlɔ l’ɛtɛkɔ k’ashi, Yeso Kristo akake epole ɔsɛkɛ l’ohomba wa mbeya akambo wa mɛtɛ wendana la Nzambi. Womoto ɔsɔ l’ose Samariya aketawɔ dia Yeso aki ɔprɔfɛta ɔmɔtshi. Koko dikambo dimɔtshi diakokiyanyaka. Ɔtɛmwɛlɔ waki Yeso wakatshikitana la wande. Etena kakandɛnya okiyanu ande lo dikambo sɔ, Yeso akawotɛ hwe ate: “Nyu nyatotemolaka kahanyeyi.” (Joani 4:19-22) Oma l’ɛtɛkɛta ɛsɔ, sho kokaka mɛna dia Yeso aketsha diaha anto tshɛ wayasha l’awui w’ɔtɛmwɛlɔ mbeya Nzambi.
Onde ɛtɛkɛta waki Yeso ɛsɔ nembetshiyaka dia ndoko onto lakoka mbeya Nzambi mɛtɛ? Ndooko. Yeso akatɛ womoto ɔsɔ nto ate: “Atemodi wa mete wayotemola Papa lu nyuma la lu mete, ne dia antu wa wuhu oso mbalanga Papa ndjala atemodi andi.” (Joani 4:23) Onde wɛ ekɔ l’atei w’anto watɛmɔla Nzambi “lu nyuma la lu mete”?
Ekɔ ohomba le yɛ dia wɛ shikikɛ okadimwelo wa dimbola sɔ. Lande na? Nɛ dia Yeso akake epole ɔsɛkɛ l’ohomba wa kondja ewo k’oshika etena kakandalɔmbɛ ate: “Lumu la pundju lone, eli [weke dia] nkêya, weme [Nzambi ka] mete, la Jesu Kristu, lakayatumi.” (Joani 17:3) Eelo, elongamelo kayɛ ka lo nshi yayaye mendanaka efula la ewo kayɛ k’akambo wa mɛtɛ wendana la Nzambi!
Onde onto kokaka mɛtɛ mbeya akambo wa mɛtɛ wendana la Nzambi? Eelo! Ko ngande wakokayɛ kondja ewo kɛsɔ? Yeso akate lo dikambo diande ndamɛ ate: “Dimi leli mbuka, mete la lumu. Nduku untu laya le Papa, tshikima uma le mi.” (Joani 14:6) Nde akate nto ate: “Nduku untu leya Ona, tshikima Papa. Ndu nduku leya Papa, tshikima Ona, ku ona ayuwenya untu tshe lalangandi.”—Luka 10:22.
Ɔnkɔnɛ, onto kokaka mbeya Nzambi oma lo tshimbo ya wetshelo waki Yeso Kristo, Ɔna Nzambi. Diakɔ diakalake Yeso ate: “Naka nyu nyayutshikala lu [wetshelo ami], keti ambeki ami mete mbenyu. Nyu nyayeya akambu wa mete, ku akambu wa mete wayunyutshungula.”—Joani 8:31, 32.
Ngande wotokadimola Yeso lo ambola atanu wakambɔmi l’etatelo ango na?
[Osato wa lo lɛkɛ 4]
Onde wɛ tɛmɔlaka Nzambi kahayeye mɛtɛ?