Akristo tɛmɔlaka Nzambi lo nyuma la lo mɛtɛ

“[Nzambi] eko Nyuma. Wane watôtemolaka, dieli la wo dia mbôtemola lu nyuma la lu mete.”​—JOANI 4:24.

1. Woho akɔna w’ɔtɛmwɛlɔ wangɛnyangɛnya Nzambi?

YESO KRISTO, Ɔna ɛtɔi laki Jehowa akɛnya hwe woho w’ɔtɛmwɛlɔ wetawɔma le She lele l’olongo. Lam’akandasambishaka womoto ɔmɔtshi l’ose Samariya lo ɛtɛkɔ k’ashi kaki suke l’osomba wa Sukara Yeso akawotɛ ate: “Nyu nyatotemolaka kahanyeyi. Shu tatotemolaka keyasu, ne dia panda keko uma le asi Juda. Keli etena kambukuka, keko kakiane, atemodi wa mete wayotemola Papa lu nyuma la lu mete, ne dia antu wa wuhu oso mbalanga Papa [dia vɔ] ndjala atemodi andi. [Nzambi] eko Nyuma. Wane watôtemolaka, dieli la wo dia mbôtemola lu nyuma la lu mete.” (Joani 4:22-24) Ɛtɛkɛta ɛsɔ atotɛwɔ na?

2. Oma lende akake ɔtɛmwɛlɔ w’ase Samariya etshina?

² Ase Samariya waki la tokanyi ta kashi lo kɛnɛ kendana l’ɔtɛmwɛlɔ. Vɔ waketawɔka paka abuku atanu ato wa ntondo wa l’Afundelo w’Ekila ɔnɛ vɔ mbakasambiyama oma le Nzambi. Ndo paka abuku asɔ waki l’ekadimwelo kawɔ ka Bible kakawelɛka Pentateuque Samaritain. Diɔ diakɔ mɛtɛ diaki ase Samariya kombeyaka Nzambi dimɛna. Koko, ase Juda wakalongola ewo k’Afundelo. (Romo 3:1, 2) Akakokaka di’ase Juda waki la kɔlamelo ndo anto akina mbetawɔma le Jehowa. Ko kakɔna kakawalɔmbamaka dia sala lo dikambo sɔ?

3. Kakɔna kahombama dia tɛmɔla Nzambi “lu nyuma la lu mete”?

³ Kakɔna kakahombe ase Juda vɔ l’ase Samariya, ndo anto akina wakasɛnaka lo nshi yakete sala dia ngɛnyangɛnya Jehowa? Vɔ wakahombe mbɔtɛmɔla “lo nyuma la lo mete.” Sho lawɔ pombaka sala dikambo sɔ. Kânga mbahombaso kambɛ Nzambi l’etete kana l’ohetoheto, ndo tshutshuyama l’otema woludi la ngandji ndo la mbetawɔ, tɛmɔla Nzambi lo nyuma nɔmbaka lo yoho ya lânde dia sho monga la nyuma kande k’ekila ndo mbetawɔ dia tɔ tɔlɔmbɔla. Naka sho mbeka ndo kamba l’Ɔtɛkɛta wa Nzambi, kete tayonga la Nzambi kanyi ɔtɔi. (1 Koreto 2:8-12) Di’ɔtɛmwɛlɔ aso mbetawɔma le Jehowa, sho pombaka nto mbɔtɛmɔla lo mɛtɛ. Vɔ pombaka mbɔtɔnɛ la kɛnɛ kata Ɔtɛkɛta wa Nzambi mbut’ate Bible, lo dikambo diande ndo di’asangwelo ande.

Anto koka mbishola akambo wa mɛtɛ

4. Ngande wɔsa anto amɔtshi akambo wa mɛtɛ?

⁴ Ambeki amɔtshi wa filozofi wakate di’anto hawokoke mbeya akambo wa mɛtɛ wele wekɔ tshɛ mɛtɛ keto. Diakɔ diele, Alf Ahlberg, ofundji ɔmɔtshi w’ose Suède akafunde ate: “Wembola wa filozofi wekɔ wolo heyama, diakɔ diele ndoko onto lakoka mbisha ekadimwelo wa shikaa lo wembola akɔ.” Kânga mbata anto amɔtshi vate ndoko akambo wa mɛtɛ wele tshɛ mɛtɛ keto, onde ɔsɔku mbediɔ mɛtɛ? Yeso Kristo komonga la kanyi shɔ.

5. Lande na kakaye Yeso la nkɛtɛ?

⁵ Toyaɔshi oko anto wena woho weta dikambo nɛ: Tekɔ l’etatelo k’ɔnɔnyi 33 T.D., Yeso memala la ntondo ka Pɔnsɔ Pilato, Nguvɛrnɛrɛ k’ose Rɔma. Yeso ambotɛ Pilato ate: “Dimi lakuto dia dikambu ne. Dia dikambu ne mbakamayi la kete, dia [sambisha] akambu wa mete.” Pilato ambowombola ate: “Mete kedikedi na?” Koko, nde hakongi dia Yeso nyomolembetshiya akambo akina.​—Joani 18:36-38.

6. (a) “Mete” kɛdikɛdi na? (b) Ɔkɛndɛ akɔna wakasha Yeso ambeki ande?

⁶ Lo ndjela diksiɔnɛrɛ Petit Robert “Mɛtɛ” nembetshiyamaka oko, “awui, akambo, ndo tolembetelo tele shikaa.” Ko, onde Yeso akasambisha akambo wa mɛtɛ wendana l’oseka dui tshɛ? Ndooko. Nde aki l’akambo wa mɛtɛ wa lânde lo yimba. Nde akadjangɛ ambeki ande dia sambisha akambo wa mɛtɛ asɔ ndo akawatɛ ate: “Nyete wedja tshe ambeki, nyâbatiza lu lukumbu la Papa ndu l’Ona ndu la [nyuma k’ekila]. Nyuwaetshaki dia ntsha akambu tshe wamumunyutela.” (Mateu 28:19, 20) La ntondo ‘k’ekomelo ka dikongɛ nɛ di’akambo,’ ambeki wa mɛtɛ waki Yeso pombaka sambisha ‘akambo wa mɛtɛ wendana la lokumu l’ɔlɔlɔ’ lo nkɛtɛ k’otondo. (Mateu 24:3; Ngalatiya 2:14) Kɛsɔ kayosalema dia kotsha ɛtɛkɛta wakate Yeso wata ɔnɛ: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:14) Lâsɔ ekɔ ohomba sho mbeya wanɛ wele lo mbetsha wedja tshɛ akambo wa mɛtɛ lo sambisha lokumu l’ɔlɔlɔ la Diolelo.

Woho wakokaso mbeya akambo wa mɛtɛ

7. Ngande wakokayɛ mɛnya dia Jehowa ekɔ Kiɔkɔ y’akambo wa mɛtɛ?

⁷ Jehowa mbele Kiɔkɔ y’akambo wa mɛtɛ wa lo nyuma, mbut’ate akambo wendana la nde ndamɛ ndo la sangwelo diande. Diakɔ diele omembi w’esambo Davidi akelɛ Jehowa ɔnɛ ‘Nzambi k’akambo wa mɛtɛ.’ (Osambu 31:5; 43:3) Yeso akeyaka di’ɛtɛkɛta waki She wekɔ mɛtɛ, ndo nde akate nto ate: “Ambufundama lu afundelu w’Amvutshi ati: Tshe wayetshama uma le [Jehowa]. Untu tshe latukaka ndu lateyaka aui uma le Papa, ndi atuyakaka le mi.” (Joani 6:45; 17:17; Isaya 54:13) Lâsɔ, mbokɛmaka hwe di’anto tshɛ watayange akambo wa mɛtɛ pombaka mbetshama oma le Jehowa lele Ombetsha wa Woke. (Isaya 30:20, 21) Anto watayange akambo wa mɛtɛ pombaka kondja ‘ewo ka shikaa ka Nzambi.’ (Tukedi 2:5) Ndo Jehowa aketsha anto akambo wa mɛtɛ la ngandji tshɛ lo toho totshikitanyi.

8. Lo toho takɔna taketsha Nzambi anto akambo wa mɛtɛ?

⁸ Ɛnyɛlɔ, Nzambi akasha wodja w’Isariyɛlɛ Ɛlɛmbɛ oma lo tshimbo y’andjelo. (Ngalatiya 3:19) Oma l’ekimanyielo k’alɔ, nde akalake Abarahama la Jakɔba ɛtshɔkɔ. (Etatelu 15:12-16; 28:10-19) Lo tena dimɔtshi Nzambi akatɛkɛta oma l’olongo, ɛnyɛlɔ lam’akabatizama Yeso, ɛtɛkɛta ɛnɛ wa diambo wakokɛma la nkɛtɛ: “On’ami la ngandji one, ndi atongenyangenyaka ololo.” (Mateu 3:17) Tekɔ nto la lowando lo woho wakewoya Nzambi anto akambo wa mɛtɛ oma lo tshimbo y’afundji wa Bible wakandasha nyuma kande dia vɔ funda akambo akɔ. (2 Timote 3:16, 17) Ɔnkɔnɛ, lo mbeka akambo oma l’Ɔtɛkɛta wa Nzambi, sho kokaka monga la ‘mbetawɔ l’akambo wa mɛtɛ.’​—2 Tesalonika 2:13.

Akambo wa mɛtɛ ndo ɔna Nzambi

9. Ngande wakakambe Nzambi l’Ɔnande dia mbewoya anto akambo wa mɛtɛ?

⁹ Nzambi akakambe l’Ɔnande Yeso Kristo lo yoho yotshikitanyi dia mbewoya anto akambo wa mɛtɛ. (Heberu 1:1-3) Diakɔ diele Yeso akewoya anto akambo wa mɛtɛ lo yoho yele ndoko onto okina lambosala dikambo sɔ. (Joani 7:46) Kânga l’ɔkɔngɔ wa nde mbudɛ l’olongo, nde akasholɛ anto akambo wa mɛtɛ w’oma le She. Ɛnyɛlɔ, ɔpɔstɔlɔ Joani akalongola “[ɛnɛlɔ] ka Jesu Kristu, kakawusha [Nzambi] dia menya ekambi andi akambu waya ka ndja.”​—Enyelo 1:1-3.

10, 11. (a) Akambo wa mɛtɛ wakasambisha Yeso, mendanaka la na? (b) Ngande wakakotsha Yeso akambo wa mɛtɛ?

¹⁰ Yeso akatɛ Pɔnsɔ Pilato dia nde akaye la nkɛtɛ dia ndjosambisha akambo wa mɛtɛ. Lo nshi yakandakambaka olimu ande, Yeso akɛnya di’akambo wa mɛtɛ asɔ mendanaka l’oyindjamelo wa lowandji laki Jehowa oma lo tshimbo ya Diolelo diande diele Kristo mbele Nkumekanga. Koko, mbewoya akambo wa mɛtɛ akalɔmbaka Yeso akambo efula koko aha tsho sambisha kana mbetsha. Yeso akɛnya shikaa k’akambo wa mɛtɛ lo mbakotsha. Lo dikambo sɔ, ɔpɔstɔlɔ Paulo akafunde ate: “Untu tanyulumbuyaki ne dia mbu ya nde, kana diango dia no, kana dia lushi l’ongenongeno, kana alelu ka ngondo, kana lushi l’ekila. Akambu aso weko uku didjidji di’akambu wayayi, keli dimba dieko dia Kristu.”​—Kolosai 2:16, 17.

¹¹ Yoho mɔtshi yakakotshama akambo wa mɛtɛ mendanaka la kɛnɛ kakatama ɔnɛ Yeso ayotɔ la Bɛtɛlɛhɛma. (Mika 5:2; Luka 2:4-11) Akambo wa mɛtɛ wakakotshama nto lam’akakotshama ɛtɛkɛta wa prɔfɛsiya waki Danyɛlɛ w’ɔnɛ Mɛsiya ayɛnama lo komelo ka “mingu y’enonyi” 69. Dikambo sɔ diakasalema l’etena kakayaɛnya Yeso le Nzambi lo batismu ndo kakandakitama esɔ ka nyuma k’ekila, paka l’etena kakalakema di’ɔnɛ dikambo sɔ diayokotshama, mbut’ate l’ɔnɔnyi 29 T.D. (Danyele 9:25; Luka 3:1, 21, 22) Akambo wa mɛtɛ wakakotshama nto lo woho wakayasha Yeso l’olimu oko wakinde opandjudi wa Diolelo. (Isaya 9:1, 2, 6, 7; 61:1, 2; Mateu 4:13-17; Luka 4:18-21) Vɔ wakakotshama nto oma lo nyɔi ndo eolwelo ka Yeso.​—Osambu 16:8-11; Isaya 53:5, 8, 11, 12; Mateu 20:28; Joani 1:29; Etsha 2:25-31

12. Lande na kakakoke Yeso mbuta ate ‘dimi lekɔ mɛtɛ’?

¹² Lam’ele akambo wa mɛtɛ wakendanaka la Yeso Kristo, nde akakoke mbuta ate: “Dimi leli mbuka, mete la lumu. Nduku untu laya le Papa, tshikima uma le mi.” (Joani 14:6) Anto kokaka kondja etshungwelo ka lo nyuma naka vɔ ‘mbeta l’akambo wa mɛtɛ wedi’ lo mbetawɔ ɔkɛndɛ wele la Yeso lo sangwelo diaki Nzambi. (Joani 8:32-36; 18:37) Lam’ele anto wele oko ɛkɔkɔ mbetawɔka akambo wa mɛtɛ ndo ndjelaka mbetawɔ kaki Kristo, vɔ wayokondja lɔsɛnɔ la pondjo.​—Joani 10:24-28.

13. Mɛtɛ ka l’Afundelo kendana l’akambo akɔna asato kayangaso sɛdingola?

¹³ Akambo wa mɛtɛ waketsha Yeso nde l’ambeki ande wakatshutshuyama oma le nyuma k’ekila mbakenga mbetawɔ ka mɛtɛ k’Okristo. Ɔnkɔnɛ, wanɛ ‘wakitanyiya akambo wendana la mbetawɔ’ ‘kɛndakɛndaka l’akambo wa mɛtɛ.’ (Etsha 6:7; 3 Joani 3, 4) Lâsɔ, anto akɔna wakɛndakɛnda l’akambo wa mɛtɛ ɛlɔ kɛnɛ? Waa na mɛtɛ wetsha wedja tshɛ akambo wa mɛtɛ? Dia kadimola lo wembola ɛsɔ, tayanga tɛkɛta dikambo di’Akristo wa ntondo ndo sɛdingola mɛtɛ ka l’Afundelo kendana la (1) dietawɔ, (2) yoho ya tɛmɔla, ndo la (3) lɔkɛwɔ l’onto.

Akambo wa mɛtɛ ndo dietawɔ

14, 15. Akokayɛ mbuta lo kɛnɛ kendana la dionga diaki l’Akristo wa ntondo ndo nɛ diele l’Ɛmɛnyi wa Jehowa lo kɛnɛ kendana l’Afundelo?

¹⁴ Akristo wa ntondo wakɔsaka Ɔtɛkɛta wa Jehowa la nɛmɔ efula. (Joani 17:17) Ɔtɛkɛta akɔ mbakawayelaka lo kɛnɛ kendana la dietawɔ ndo la ditshelo diawɔ. Clément ka l’Alexandrie lakasɛnɛ lo ntambe ka hende la ka sato akate ate: “Wanɛ wasala la wolo dia monga la dionga dioleki ɔlɔlɔ hawotohekɔ dia nyanga akambo wa mɛtɛ, edja ndo vamɛ wambokondja djembetelo ya kɛnɛ kewɔ lo mbetawɔ oma l’Afundelo.”

¹⁵ L’ɛnyɛlɔ k’Akristo wa ntondo, Ɛmɛnyi wa Jehowa mbɔsaka Bible la nɛmɔ di’efula. Vɔ mbetawɔka dia ‘Afundelo tshɛ wakasambiyama oma le Nzambi ndo wekɔ ɔlɔlɔ dia mbetsha anto.’ (2 Timote 3:16) Nyɛsɔ tɔsɛdingole akambo amɔtshi angana waketawɔka Akristo wa ntondo kele towaɛdike la kɛnɛ keka Ɛmɛnyi wa Jehowa wa nshi nyɛ nɛ dia vɔ kambaka la Bible oko dibuku diâlɔmbɔla.

Mɛtɛ lo kɛnɛ kendana l’anima

16. ‘Kakɔna kele mɛtɛ lo kɛnɛ kendana l’anima na?

¹⁶ Lam’ele vɔ waketawɔka kɛnɛ kata Afundelo, Akristo wa ntondo waketsha anto akambo wa mɛtɛ wendana l’anima. Vɔ wakeyaka di’‘onto akakome anima wasɛna’ lam’akôtonge Nzambi. (Etatelu 2:7) Ndo nto, vɔ waketawɔka di’onto mbele anima ndo anima mvɔka. (Ezekiyele 18:4; Jakoba 5:20) Vɔ wakeyaka nto dia ‘anto wambovɔ haweye ndoko dikambo.’​—Undaki 9:5, 10.

17. Ngande wakokayɛ nembetshiya elongamelo kele l’anto wakavu?

¹⁷ Koko, ambeki wa Yeso wa ntondo waki l’elongamelo ka shikaa k’ɔnɛ anto wakavu wohɔma le Nzambi wayolɔ, kana wayonga la lɔsɛnɔ nto. Paulo akatɛkɛta hwe dia elongamelo kɛsɔ ate: “Dimi lambulungamela [Nzambi dia]. . . . Eulwelu k’antu w’ololo la antu wa kolo uma lu nyoi kayuyala.” (Etsha 24:15) Kânga Minucius Felix lakayataka ate Okristo mbende, akayofunda l’ɔkɔngɔ ate: “Naa enginya kana onto lahɛnyi etale lakoka mbidja tâmu dia Nzambi hakoke nyomokenga onto nto oko wakandokenge mbala ka ntondo na?” L’ɛnyɛlɔ k’Akristo wa ntondo, Ɛmɛnyi wa Jehowa mbetawɔka akambo wa mɛtɛ w’oma l’Afundelo wendana l’anima, nyɔi ndo la eolwelo. Nyɛsɔ kakianɛ tɔsɛdingole dia mbeya Nzambi nde la Kristo.

Akambo wa mɛtɛ ndo Losato l’Osanto

18, 19. Lande na kakokaso mbuta dia Losato l’Osanto bu wetshelo w’oma l’Afundelo?

¹⁸ Nzambi, Kristo, ndo nyuma k’ekila kɔmbɔsamaka oko Losato l’Osanto le Akristo wa ntondo. Encyclopédie britannique mbutaka ɔnɛ: “Oyadi tshɛkɛta Losanto l’Osanto kana wetshelo ɔsɔ hatanema lo Dikelemba di’Oyoyo, ndo Yeso l’ambeki ande kosangoya dia mɔnyɔla awui anɛ, mbut’ate [dɔmbɛlɔ dia lo Hɛbɛru] dia lo Dikelemba di’Edjedja diaketawɔmaka le ase Juda diata ɔnɛ: ‘Isariyɛlɛ le: Nkumadiɔndjɔ Nzambi kaso ekɔ Nkumadiɔndjɔ kakɔ kamɛ’ (Eohwelo k’Ɛlɛmbɛ 6:4).” Akristo kɔtɛmɔlaka jambizambi y’etondo esato y’ase Rɔma kana tozambizambi tokina. Vɔ waketawɔka ɛtɛkɛta waki Yeso w’ɔnɛ Jehowa ndamɛ mbahomba tɛmɔma. (Mateu 4:10) Ndo nto vɔ waketawɔka ɛtɛkɛta waki Kristo w’ɔnɛ: “Papa ambundeka.” (Joani 14:28) Ndo ɛlɔ kɛnɛ, Ɛmɛnyi wa Jehowa mbetawɔka akambo asɔ.

¹⁹ Ambeki waki Yeso wa ntondo wakeyaka dimɛna otshikitanu wele lam’asa Nzambi, Kristo, ndo nyuma k’ekila. Vɔ wakabatizaka anto (1) lo lokombo la Papa, (2) lo lokombo l’Ɔna, ndo (3) lo lokombo la nyuma k’ekila, koko aha lo lokombo la Losato l’Osanto. Ɛmɛnyi wa Jehowa lawɔ mbetshaka akambo wa mɛtɛ w’oma l’Afundelo wɛnya otshikitanu wele lam’asa Nzambi, Ɔnande, la nyuma k’ekila.​—Mateu 28:19.

Akambo wa mɛtɛ ndo batismu

20. Wanɛ walanga nongola batismu pombaka monga l’ewo kakɔna?

²⁰ Yeso akadjangɛ ambeki ande dia mbetɛ anto ambeki lo mbaetsha akambo wa mɛtɛ. Di’onto batizama, nde pombaka monga l’ewo k’atshina w’akambo wa l’Afundelo. Ɛnyɛlɔ, nde pombaka mbeya dihole ndo lowandji lele la Papa ndo dihole la lowandji lele l’Ɔnande, Yeso Kristo. (Joani 3:16) Wanɛ walanga nongola batismu lawɔ pombaka shihodia dia nyuma k’ekila bu onto koko tɔ kekɔ wolo waki Nzambi wakamba olimu.​—Etatelu 1:2, nɔtɛ ka l’ɛse ka dikatshi.

21, 22. Lande na kakokayɛ mbuta ɔnɛ batismu kekɔ paka dikambo di’ambetawudi?

²¹ Akristo wa ntondo wakabatizaka paka anto waketshama, wakayatshumoya ndo wakayakimɔ tshɛ le Nzambi dia sala lolango lande. Ase Juda ndo ambetawudi w’ase wedja wakasangana lushi la Pɛntɛkɔsta ka l’ɔnɔnyi 33 T.D., wakashile monga l’ewo k’Afundelo w’ase Hɛbɛru. L’ɔkɔngɔ wa vɔ pokamɛ kɛnɛ kakate ɔpɔstɔlɔ Petero lo dikambo dia Yeso Mɛsiya, yɛdikɔ y’anto 3000 “waketawo diui diandi” ndo “wakabatizama.”​—Etsha 2:41; 3:19–4:4; 10:34-38.

²² Ambetawudi mbahomba nongola batismu k’Akristo. Ase Samariya waketawɔ akambo wa mɛtɛ, ndo “lam’akawetawo Filipo lakâsambishaka dia lukumu l’ololo la diulelu dia [Nzambi] la lukumbu la Jesu Kristu, apami la amantu wakabatizama.” (Etsha 8:12) Oko wakinde ose wodja laki l’ewo kaki Jehowa ndo lakayashaka l’awui w’ɔtɛmwɛlɔ, ɔlɛnga w’ose Etiyɔpiya aketawɔ ntondo kɛnɛ kakawotɛ Filipɔ lo dikambo di’ekotshamelo ka prɔfɛsiya kendana la Mɛsiya ko l’ɔkɔngɔ diko nde akabatizama. (Etsha 8:34-36) Oma lâsɔ, Petero akatɛ Kɔnɛliyo ndo ase Wedja akina dia “[Nzambi] mbetawoka [anto] wa lu wedja tshe, wane wawuka woma la watsha akambu w’ololo” ndo ɔnɛ onto tshɛ lele la mbetawɔ le Yeso Kristo ayodimanyiyama pɛkato yande. (Etsha 10:35, 43; 11:18) Kɛsɔ tshɛ mbɔtɔnɛka la didjango dia Yeso diata ɔnɛ: ‘Nyetɛ anto ambeki, nyowaetsha dia ntsha akambo tshɛ wakamanyodjangɛ.’ (Mateu 28:19, 20; Etsha 1:8) Ɛmɛnyi wa Jehowa ndjelaka didjango diakɔ diamɛ sɔ, lo batiza paka anto wele l’ewo k’atshina w’akambo wa l’Afundelo ndo anto wamboyakimɔ le Nzambi.

23, 24. Yoho yakɔna ya dimɛna yabatizama Akristo?

²³ Woho wa batismu kabatizama ambetawudi ekɔ ka dindjama la tshondo tshɛ l’ashi. L’ɔkɔngɔ wa Yeso batizama l’ɔkɛdi wa Jɔrɔdɔna, nde ‘akatombe oma l’ashi.’ (Mako 1:10) Ɔlɛnga w’ose Etiyɔpiya akabatizama ‘l’oduwa ɔmɔtshi w’ashi.’ Nde la Filipɔ “wakoto lu ashi” ndo wakatombe “uma lu ashi.” (Etsha 8:36-40) Woho wakakatanya Afundelo batismu la nyɔi ka didjidji mɛnyaka nto di’onto labatizama pombaka dindjama la tshondo tshɛ l’ashi.​—Romo 6:4-6; Kolosai 2:12.

²⁴ DibukuThe Oxford Companion to the Bible mbutaka ɔnɛ: “Toho ta shikaa talembetshiya Daka di’Oyoyo dikambo dia batismu mɛnyaka di’onto labatizama pombaka dindjama la tshondo tshɛ l’ashi.” Lo ndjela dibuku dia lo Falase dielɛwɔ Larousse du XX^e Siècle (Paris, 1928), “Akristo wa ntondo wakabatizamaka lo dindjama la tshondo tshɛ l’ashi lo dihole tshɛ diakakokaka ashi tanema.” Ndo dibuku After Jesus​—The Triumph of Christianity mbutaka dia: “Lo weho wasalematɔ shikaa, [batismu] nɔmbaka di’onto layanga batizama mbuta etelo ka lo sɛkɛ ka mbetawɔ kande, oma lâsɔ ko nde ndjodindjama la tshondo l’ashi lo lokombo la Yeso.”

25. Kakɔna kayotɔtɛkɛta lo sawo diayela?

²⁵ Akambo wɔsɛdingodiso la diko ango wendana la dietawɔ diotombi oma lo Bible ndo la ditshelo di’Akristo wa ntondo ekɔ tsho bɛnyɛlɔ. Ayonga ɔlɔlɔ shila bɛnyɛlɔ dikina diɛnya diɔtɔnganelo diele lam’asa dietawɔ di’Akristo wa ntondo la nɛ diele l’Ɛmɛnyi wa Jehowa. Lo sawo diayela, tayɔtɛkɛta nto toho tokina takokaso mbeya wanɛ wetsha anto akambo wa mɛtɛ.

Onde wɛ kokaka kadimola?

• Ɔtɛmwɛlɔ wa ngande walɔmba Nzambi?

• Ngande wakakotshama akambo wa mɛtɛ lo tshimbo yaki Yeso Kristo?

• Lembetshiya akambo wa mɛtɛ lo kɛnɛ kendana la anima ndo la nyɔi?

• Ngande wabatizama Akristo, ndo kakɔna kalɔmbama le onto layanga batizama?

[Osato wa lo lɛkɛ 14]

Yeso akatɛ Pilato ate: ‘Dimi lakaye dia ndjosambisha akambo wa mɛtɛ’

[Osato wa lo lɛkɛ 15]

Onde wɛ koka nembetshiya lande na kakate Yeso ate: ‘Dimi lekɔ mɛtɛ’?

[Osato wa lo lɛkɛ 16]

Kakɔna kele mɛtɛ lo kɛnɛ kendana la batismu k’Okristo?