“Akambu wa Mete Wayunyutshungula”

“Nyu nyayeya akambu wa mete, ku akambu wa mete wayunyutshungula.” Ngasɔ mbakate Yeso lam’akandetshaka lemba l’anto lo tɛmpɛlɔ la Jerusalɛma. (Joani 8:32) Apɔstɔlɔ waki Yeso wakakoke mbeya esadi eto ɔnɛ Yeso aketshaka akambo wa mɛtɛ. Vɔ wakɛnyi tolembetelo efula takɛnyaka ɔnɛ ombetsha awɔ akatomama oma le Nzambi.

KOKO, ɛlɔ kɛnɛ, amɔtshi koka mɛna wolo dia shihodia akambo wa mɛtɛ asɔ wakatɛkɛtaka Yeso. Oko waki lo nshi y’omvutshi Isaya, ɛlɔ kɛnɛ, anto wekɔ ‘watotaka ɔnɛ ɔlɔlɔ kɔlɔ ndo ɔnɛ kɔlɔ ekɔ ɔlɔlɔ, wanɛ watokadimolaka wodjima osase ndo osase wodjima, ndo watokadimolaka ololo mpɛ, la mpɛ ololo.’ (Isaya 5:20) Lo menda tokanyi t’efula tele l’anto nshi nyɛ, mbidja ndo filozofi la toho ta lɔsɛnɔ tayelawɔ, anto efula fɔnyaka ɔnɛ akambo tshɛ wekɔ l’olelo ndo ɔnɛ ndoko dikambo ɔtɔi diele mɛtɛ.

Lam’akatɛ Yeso ampokami ande ɔnɛ akambo wa mɛtɛ wayonyotshungula, vɔ wakate vate: “Tukanula t’Abarahama mbesu. Shu kundjala fumbi y’untu edja ndu kakiane. Ukundi wataye wati: Nyu nyayutshungo?” (Joani 8:33) Vɔ kɔmɛnaka ohomba w’onto ɔmɔtshi kana ɛngɔ kɛmɔtshi mbatshungola. Koko, l’ɔkɔngɔ Yeso akalembetshiya ate: “Mete, mete kanyutelami nte: Untu tshe latutshaka kolo, eko fumbi ka kolo.” (Joani 8:34) Akambo wa mɛtɛ wakataka Yeso lanɛ kokaka tshungola anto oma lo pɛkato. Yeso akate ate: “Okone naka Ona ayunyutshungula, mete nyu nyayutshungo.” (Joani 8:36) Ɔnkɔnɛ akambo wa mɛtɛ watshungola anto ele akambo wa mɛtɛ wendana la Yeso Kristo, Ɔna Nzambi. Paka onto mongi la mbetawɔ l’olambo wa lɔsɛnɔ la kokele wakakimɔ Yeso ko nde tshungɔ oma lo pɛkato la nyɔi.

Lo diaaso dikina Yeso akate ate: “Uwakidia lu mete, diui diaye dieko mete.” (Joani 17:17) Dui dia Nzambi oko wɛnyamidiɔ lo Bible mbele mɛtɛ kɛnɛ kakoka tshungola onto oma lo dikanyiyakanyiya ndo oma l’ɔtɛmwɛlɔ wa kashi. Bible kekɔ l’akambo wa mɛtɛ wendana la Yeso Kristo, mɛtɛ kɛnɛ kakonya anto lo vɔ monga la mbetawɔ le nde ndo nongamɛ nshi yayaye y’ɔngɛnɔngɛnɔ. Mbeya akambo wa mɛtɛ wele lo Dui dia Nzambi ekɔ dui di’ɔngɛnɔngɛnɔ efula!

Naa ohomba wa mbeya akambo wa mɛtɛ? Kânga mbasɛma ɛtɛmwɛlɔ efula ɛlɔ kɛnɛ ɔnɛ vɔ ndjelaka Bible, efula l’atei awɔ sɛngiyamaka la filozofi y’anto la wetshelo w’ashidi. Mbala efula, ewandji w’ɛtɛmwɛlɔ ndekaka ndjakiyanya paka dia vɔ mbetawɔma le anto oleki ndjakiyanya dia losango lalakanyawɔ monga mɛtɛ. Amɔtshi fɔnyaka ɔnɛ Nzambi mbetawɔka woho w’ɔtɛmwɛlɔ tshɛ, naka onto ndjashaka tshɛ. Koko, Yeso Kristo akalembetshiya ate: ‘Etena kekɔ lo ndjaye, kele atɛmɔdi wa mɛtɛ wayɔtɛmɔla Papa lo yimba la lo mɛtɛ, ne dia antu wa woho ɔsɔ mbalanga Papa ndjala atɛmɔdi ande.’​—⁠Joani 4:⁠23.

Naka sho nangaka tɛmɔla Nzambi lo yoho yetawɔnde, kete sho pombaka mbeya akambo wa mɛtɛ. Ɔsɔ ekɔ dui di’ohomba efula. Ɔngɛnɔngɛnɔ aso wa pondjo nemanɛka la dui sɔ. Omalɔkɔ, onto tshɛ pombaka ndjambola ɔnɛ: ‘Onde lekɔ lo tɛmɔla Nzambi lo yoho yetawɔnde? Onde dimi ngɛnangɛnaka mbeka akambo wa mɛtɛ wa lo Dui dia Nzambi? Kana onde dimi mbokaka wɔma wa kɛnɛ kakoka eyangelo ndjɛnya l’ɔkɔngɔ?’