Woho wakokayɛ shihodia Bible

3. Etawɔ ekimanyielo k’oma le anto akina

Etena kakande onyangiyangi Edward John Eyre lɔkɛndɔ l’oswe wa Nullarbor, ase ngelo wakawotɛ woho wakandakoke tshima dia kondja ashi kana woho wakandakoke kondja ashi oma l’esongo welɛwɔ eucalyptus. Woho wakandetawɔ ekimanyielo k’oma le wanɛ wakashihodiaka oswe ɔsɔ akashimbɛ lɔsɛnɔ laki yɔnɛ Eyre.

OKO wadiɛnya ɛnyɛlɔ kɛsɔ, dia tondoya dia sala dui dimɔtshi dia wolo pombaka nyanga ekimanyielo k’oma le onto ɔmɔtshi lele la diewo. Dui sɔ diekɔ mɛtɛ lo kɛnɛ kendana la wadielo wa Bible.

Yeso konongamɛka di’ambeki ande shihodia Bible aha l’ekimanyielo k’anto akina. Lo diaaso dimɔtshi, “Jesu akadihula etema awo dia vo mana afundelu fundu.” (Luka 24:45) Yeso akeyaka dia ambadi wa Bible wayonga l’ohomba w’ekimanyielo k’oma le anto akina dia shihodia wetshelo wa l’Afundelo.

Waa na wakoka tokimanyiya?

Yeso akasha ambeki ande wa mɛtɛ ɔkɛndɛ wa mbisha anto ekimanyielo kɛsɔ. La ntondo ka nde mbidɛ l’olongo, Yeso akawadjangɛ ɔnɛ: “Okone nyutshu, nyete wedja tshe ambeki. . . . Nyuwaetshaki dia ntsha akambu tshe wamumunyutela.” (Mateu 28:​19, 20) Olimu wa ntondo w’Akristo ele wa mbetsha, mbuta ate nembetshiya woho wakoka onto kamba l’atɔndɔ wa lo Bible lushi la lushi. Akristo wa mɛtɛ kimanyiyaka anto akina dia vɔ shihodia Bible.

Yema tshitshɛ l’ɔkɔngɔ wa Yeso mbisha ambeki ande ɔkɛndɛ ɔsɔ, dui dimɔtshi dia diambo diakasalema. Bible tɛkɛtaka di’ɔlɔhɛ ɔmɔtshi w’ose Etiyɔpiya wakayadiaka prɔfɛsiya ka Isaya. Nde akadia divɛsa dimɔtshi diakawodje l’okandokando. Divɛsa diakawodje l’okandokando sɔ mbutaka ɔnɛ: “Ndi akalombwama utsha lu dihuli diatuwudiakaka nyama uku okoko; uku ona okoko ambolembohala la ntundu k’uhimbudi a diosa. Okone ndi kunfula unyo andi. Uma l’ekitshakitshamelu kandi, wakanya elumbwelu kandi. Akona ayokondwela wa lu lolonga landi? Ne dia wakôkosola lumu uma la kete.”​—Etsha 8:​32, 33; Isaya 53:​7, 8.

Ɔlɔhɛ ɔsɔ akambola Filipɛ laki ombetsha w’Okristo wambohokɔ akambo wa l’Afundelo ɔnɛ: “Umvutshi akona watandi? Ndame, kana untu ukina?” (Etsha 8:34) Ose Etiyɔpiya laki l’otema w’ɔlɔlɔ ɔsɔ akatshu la Jerusalɛma dia tɔtɛmɔla ndo ondo nde akalɔmbɛ Nzambi dia nde mbokimanyiya. Mɛnamaka dia nde akadiaka la yimba y’ɔlɔlɔ. Koko, ɔlɔhɛ ɔsɔ kokoka shihodia divɛsa sɔ. L’okitshakitsha tshɛ, nde akalɔmbɛ Filipɛ dia mbokimanyiya. Elembetshiyelo wakasha Filipɛ wakangɛnyangɛnya pami kɛsɔ efula ndo nde akatshutshuyama dia koma Okristo.​—Etsha 8:​35-39.

Ɛmɛnyi wa Jehowa wekɔ lo tetemala kamba olimu wakakambe Filipɛ ndo Akristo akina wa lo ntambe ka ntondo. Lo wedja ndekana 235, Ɛmɛnyi wa Jehowa wekɔ lo kimanyiya la lolango lawɔ anto akina dia vɔ shihodia kɛnɛ ketsha Bible mɛtɛ. Vɔ salaka dikambo sɔ lo mbekaka l’anto Afundelo. Wekelo wa yema yema wa Bible ɔsɔ salemaka lo sɛdingola kɛnɛ kata Bible lo dikambo dimɔtshi shikaa kana lo ɔtɛ a dui ɔmɔtshi.a​—Enda kiombo yele l’ɔtɛ a dui ɔnɛ: “Ekadimwelo w’eshika wa ambola wa lo Bible.”

“Wakakadimola ambola ami tshɛ”

Steven, Valvanera, ndo Jo-Anne, woshilami lo sawo dia ntondo wakatatɛ mbeka Bible l’Ɛmɛnyi wa Jehowa. Steven mbutaka ɔnɛ: “Aki dui dia diambo le mi dia mɛna dia lo mbɛdika atɔndɔ kana ɛkɔndɔ ɛmɔtshi wa l’Afundelo, mbala efula ekadimwelo wakatanemaka paka lo Bible. La ntondo ka dimi tatɛ mbeka Bible l’Ɛmɛnyi wa Jehowa ndoko onto lakamɛnya woho wa sala dui sɔ. Aki mɛtɛ dui dia dimɛna efula dia mbeya dia Bible mbishaka ekadimwelo w’eshika lo ambola ndo mbutaka akambo wele mɛtɛ lo dikambo dia Nzambi ndo dia Bible tɔamɛ.”

Valvanera suyaka dikambo sɔ. Nde mbutaka ɔnɛ: “Awui tshɛ wakameke mbɔtɔnɛka ndo mbokɛmaka hwe. Awui akɔ waki mɛtɛ aha tsho nɛ dia ɔtɛmwɛlɔ mbawata, koko nɛ dia vɔ waki elembetshiyelo w’amɛna.” Jo-Anne kɔndɔlaka ɔnɛ: “Woho wele wakakadimola ambola ami tshɛ l’ekimanyielo ka Bible akatshutshuya dia monga la dilɛmiɛlɔ di’efula otsha le Nzambi nɛ dia nde akeye la ntondo di’anto wakahombe ndjonga la ambola wakoka mbadja l’okandokando, ɔnkɔnɛ nde akasha ekadimwelo lo Bible.”

Onde wɛ mbeyaka Ɔmɛnyi wa Jehowa ɔmɔtshi? Lande na kahayɔlɔmbɛ dia nde kɛnya woho wasalema wekelo ɔsɔ? Naka wɛ heye kânga Ɔmɛnyi wa Jehowa ɔtɔi, kete toma mukanda lo adrɛsɛ ɔmɔtshi wele lo lɛkɛ 2 la periodikɛ kɛnɛ. L’ekimanyielo ka nyuma k’ekila kaki Nzambi, la yimba y’ɔlɔlɔ ndo l’ekimanyielo k’oma le ombetsha wa manamana wa Bible, wɛ kokaka shihodia Ɔtɛkɛta wa Nzambi. Eelo, wɛ kokaka shihodia Bible!

[Nɔte ka l’ɛse ka dikatshi]

[Kiombo/​Osato wa lo lɛkɛ 7]

Ekadimwelo w’eshika wa ambola wa lo Bible

Awui amɔtshi wetsha Ɛmɛnyi wa Jehowa vɔ anɛ:

• Asangoya Nzambi lo dikambo dia nkɛtɛ?

• Lende ele wanɛ wavɔ?

• Onde tekɔ lo nsɛna lo nshi “y’ekumelu”?

• Lande na katshika Nzambi asui?

• Woho wa monga la lɔsɛnɔ l’ɔngɛnɔngɛnɔ lo nkumbo kayɛ