Tonge l’okitanyiya ndo la dihonga oko Kristo

‘Nyonge la dihonga! Lambodja andja ɔnɛ otshumba.’​—JOA. 16:33.

1. Ngande wakakitanyiya Yeso Nzambi tshɛ lo tshɛ?

YESO KRISTO akasalaka nshi tshɛ lolango laki Nzambi. Ndoko lushi lakandakanyiya diaha kitanyiya She lele l’olongo. (Joa. 4:34; Heb. 7:26) Koko awui wakahomana la nde la nkɛtɛ waketɛ okitanyiya ande dui dia wolo. Oma k’etena kakandatatɛ sambisha, atunyi waki Yeso, mbidja ndo Satana wakayange dia mbetawoya, mbotshutshuya kana mbokesa dia nde tshika monga la kɔlamelo. (Mat. 4:1-11; Luka 20:20-25) Atunyi asɔ wakahɛnyahɛnya Yeso wolo efula lo yimba ndo lo demba. L’ekomelo, vɔ wakayotondoyaka lo mbodiaka l’otamba w’asui. (Mat. 26:37, 38; Luka 22:44; Joa. 19:1, 17, 18) Koko l’atei w’akambo asɔ tshɛ ndo kânga mbakandasowe efula, Yeso akatshikala “la ukitanyia edja ndu lu nyoi.”​—Fil. 2:8.

2, 3. Wetshelo akɔna wakokaso kondja oma lo woho waki Yeso l’okitanyiya kânga mbakandasowe?

² Kɛnɛ kakakomɛ Yeso etena kakinde lanɛ la nkɛtɛ oko onto akawetsha kɛnɛ kalembetshiya monga l’okitanyiya l’atei w’ekakatanu. (Heb. 5:8) Akakoke mɛnama dia ndoko dui diakakoke Yeso mbeka nto lo kɛnɛ kendana la kambɛ Jehowa. Nde aki la lɔngɛnyi la ma ma la Jehowa l’edja ka miliyara y’ɛnɔnyi ndo nde aki “ukambi a komba” waki Nzambi l’etongelo. (Tuk. 8:30) Koko, woho wakandakikɛ la mbetawɔ tshɛ etena kakandasowe akɛnya olowanyi ande wa kokele. Yeso Ɔnaki Nzambi akahame lo nyuma. Wetshelo akɔna wakokaso kondja oma lo kɛnɛ kakokomɛ?

³ Kânga mbakinde onto la kokele, Yeso konyanga dia tshikala l’okitanyiya oma lo wolo ande hita. Nde akalɔmbɛ Nzambi dia nde mbokimanyiya. (Adia Heberu 5:7.) Dia sho monga l’okitanyiya, sho lawɔ pombaka monga l’okitshakitsha ndo nɔmbaka ekimanyielo kaki Nzambi mbala la mbala. L’ɔtɛ wa dikambo sɔ, ɔpɔstɔlɔ Paulo akalake Akristo ɔnɛ: “Nyuyali la yimba nye l’atei anyu yaki ndu le Kristu Jesu, . . . [l]akayala la ukitanyia edja ndu lu nyoi.” (Fil. 2:5-8) Yoho ya lɔsɛnɔ yaki Yeso yakɛnya di’anto kokaka monga l’okitanyiya kânga mbasɛnawɔ l’andja wa kɔlɔ. Yeso aki onto la kokele, ko kayotota dikambo dia sho anto wele bu kokele?

Sho kokaka monga l’okitanyiya kânga mbeso anto wele bu kokele

4. Kakɔna kalembetshiya woho wakatatongama la lotshungɔ la sɔna kɛnɛ kalangaso?

⁴ Nzambi akatonge Adama l’Eva oko ditongami diele la yimba ndo diele la lotshungɔ la sɔna kɛnɛ kalangawɔ. Oko weso tokanula tawɔ, sho tekɔ la dikoka dia sɔna kɛnɛ kalangaso. Dui sɔ alembetshiyadiɔ? Diɔ nembetshiyaka dia sho kokaka sɔna dia sala kɛnɛ kele ɔlɔlɔ kana kɔlɔ. L’ɛtɛkɛta ekina, Nzambi akatosha lotshungɔ la sɔna dia mbokitanyiya kana tona mbokitanyiya. Koko tayoyokoya la Nzambi lo woho wakambaso la lotshungɔ lɔsɔ. Lo mɛtɛ, tɛdikɔ tɔsaso mbeyaka nembetshiya lɔsɛnɔ kana nyɔi. Tɔ tekɔ nto la shɛngiya le anto wotodingi.

5. Okakatanu akɔna wele la so sho tshɛ, ndo ngande wakokaso mbotondoya?

⁵ Lam’ele takahowɔ eongelo k’anto wele kema kokele, okitanyiya bu dui dia wɔdu. Hatongaka nshi tshɛ dui dia wɔdu dia kitanyiya ɛlɛmbɛ waki Nzambi. Paulo akahomana la dui dia ngasɔ. Nde akafunde ate: “Keli dimi lambushula olembe ukina walo la olembe wa lu yimba yami ta l’atei wa beke dia dimba diami. Olembe ako ambumbete fumbe k’olembe wa kolo keli lu beke diami dia dimba.” (Romo 7:23) Lo mɛtɛ, hatongaka wolo monga l’okitanyiya etena kahalɔmbɛ dui sɔ dia ndjahombia kana kahadiatosha pâ. Ko ngande wayotosala naka nsaki kaso ka monga l’okitanyiya kɔlɔshana la ‘nsaki kaso ka demba ndo ka washo’? Nsaki ya kɔlɔ shɔ ndjaka l’ɔtɛ wa eongelo kaso k’anto wele bu kokele, l’ɔtɛ wa shɛngiya ya ‘yimba y’andja ɔnɛ’ ndo l’ɔtɛ wonga nsaki shɔ la shɛngiya ya wolo le so. (1 Joa. 2:16; 1 Kor. 2:12) Dia ndɔshana la nsaki shɔ, sho pombaka ‘nɔngɔsɔla otema aso’ la ntondo ka sho pomana l’okakatanu kana l’ohemba ndo ndjashikikɛ dia kitanyiya Jehowa oyadi kakɔna tshɛ kayotomba. (Osam. 78:8) Tekɔ la bɛnyɛlɔ efula dia lo Bible di’anto wakatondoya nɛ dia vɔ wakalɔngɔsɔla etema awɔ.​—Ez. 7:10; Dan. 1:8.

6, 7. Sha ɛnyɛlɔ kɛnya woho wakoka wekelo w’onto ndamɛ tokimanyiya dia mbɔsa tɛdikɔ t’amɛna.

⁶ Yoho mɔtshi ya nɔngɔsɔla otema aso ele lo mbekaka l’etete Afundelo ndo ekanda walembetshiya Bible. Ohɔsa dia wɛ ambotanema lo dui diayela nɛ. Tɔshi dia ɔnɛ ekɔ dikɔlɔ diakayalɔngɔsɔla dia salaka wekelo w’onto ndamɛ. Wɛ ambɔlɔmba Jehowa nyuma kande dia tɔ kokimanyiya dia wɛ kamba la kɛnɛ kekayɛ oma l’Ɔtɛkɛta ande. Wɛ akakongɛ dia menda filmɛ kɛmɔtshi lo televiziɔ la dikɔlɔ diayela. Wɛ akoke di’anto efula wekɔ lo minyanya filmɛ kakɔ kânga mbeyayɛ dia kekɔ l’awui wa mindo ndo wa ngala.

⁷ Wɛ ambokana yimba la dako diaki Paulo diele l’Efeso 5:3 diata ɔnɛ: “Munanyi, akambu wa mindu tshe, kana okomiya, akambu aso tawuyalaki l’atei anyu, keli nyuyali uku ekilami.” Wɛ ambohɔ nto dako diaki Paulo diele lo Filipi 4:8. (Adia.) Etena kakanayɛ yimba l’alako wakasambiyama asɔ, wɛ amboyambola ɔnɛ: ‘Naka dimi mbetawɔ dia filmɛ kɛsɔ ndanya otema ndo yimba yami, onde lekɔ lo ndjela ɛnyɛlɔ kaki Yeso ka kitanyiya Nzambi l’akambo tshɛ?’ Kakɔna kayoyosala? Onde wɛ ayɔsa yɛdikɔ ya paka menda filmɛ kɛsɔ?

8. Lande na kahombaso monga la lɔkɛwɔ la dimɛna efula?

⁸ Ayonga dui di’enginya dia kitshakitsha yɛdikɔ yakatɔshi ya kitanyiya atɔndɔ ndo ɛlɛmbɛ waki Jehowa wendana la lɔkɛwɔ ondo lo mbɔsa dia tekɔ la wolo w’efula wa shika tanga la ntondo ka tɔsɛngiya t’angɛnyi wa kɔlɔ mbidja ndo etena katotshutshuya angɛnyi asɔ dia sho ndjasha l’akambo wa ngala ndo lo tɔkɛnyɔ ta kɔlɔ. Koko, sho pombaka ndjakokɛ ndo kokɛ anaso oma lo tɔsɛngiya taki Satana. Wanɛ wakamba l’ɔrdinatɛrɛ salaka la wolo dia kokɛ ɔrdinatɛrɛ awɔ oma lo diangɔ dimɔtshi dialanya dikongelo diele lɔkɔ ndo vɔ mbidjaka l’ɔrdinatɛrɛ akɔ ekongelo kɛmɔtshi ka wolo kele la dikoka dia ndɔshana la diangɔ dialanya ɔrdinatɛrɛ. Onde sho pombaka tshika dia ndjakokɛ oma lo “kesu” yaki Satana?​—Ef. 6:11.

9. Lande na kahombaso ndjashikikɛ dia kitanyiyaka Jehowa lushi la lushi?

⁹ Suke la lushi tshɛ, sho pombaka sɔna dia kana tayosala akambo lo yoho yangɛnyangɛnya Jehowa kana bu. Dia sho kondja panda, sho pombaka kitanyiya Nzambi ndo nsɛna lo ndjela atɔndɔ ande wosembwe. Lo ndjela ɛnyɛlɔ kaki Kristo ka monga l’okitanyiya “edja ndu lu nyoi,” sho mɛnyaka dia tekɔ la mbetawɔ k’oshika. Jehowa ayotɔtshɔkɔla l’ɔtɛ wa kɔlamelo yaso. Yeso akalake ɔnɛ: “One latetemala edja ndu l’ekumelu, ayushimbamela.” (Mat. 24:13) Mbokɛmaka hwe dia, dui sɔ nɔmbaka dia sho monga la woho wa dihonga diaki la Yeso.​—Osam. 31:24.

Yeso kele ɛnyɛlɔ koleki tshɛ ka dihonga

10. Naa tɔsɛngiya takoka pomana la so, ndo kakɔna kahombaso sala?

¹⁰ Tekɔ l’ohomba wa dihonga diaha sho mbokoya anto wotodingi wele la waonga wa kɔlɔ. Akristo pomanaka la tɔsɛngiya tendana la lɔkɛwɔ, awui wa lo tshunda, awui wa falanga ndo awui w’ɔtɛmwɛlɔ wakoka mbakonya dia vɔ takɔ mboka yosembwe yaki Jehowa. Akristo efula wekɔ lo pomana l’ɔlɔshamelo lo nkumbo. Lo wedja ɛmɔtshi, kalasa yekɔ lo tetemala mbetsha wetshelo w’ohilwelo ndo anto wekɔ lo taleke mbetawɔ wetshelo w’ɔnɛ Nzambi kema. Hatohombe minya yimba oma lo tɔsɛngiya ta ngasɔ, koko sho pombaka mbɔsa yɛdikɔ ya shika tanga ndo ndjakokɛ. Ɛnyɛlɔ kaki Yeso tɛnyaka woho wakokaso tondoya.

11. Ngande wakoka kana yimba l’ɛnyɛlɔ kaki Yeso ndeka tosha dihonga?

¹¹ Kristo akatɛ ambeki ande ɔnɛ: ‘L’andja ɔnɛ nyayohomana l’ekakatanu, koko nyonge la dihonga! Lambodja andja ɔnɛ otshumba.’ (Joa. 16:33) Nde akatetemala shika tanga la ntondo ka tɔsɛngiya t’andja ɔnɛ. Ndoko lushi lakandetawɔ di’andja ɔnɛ mboshimba dia nde sambisha kana kitshakitsha yɛdikɔ yakandɔshi ya sukɛ ɔtɛmwɛlɔ wa mɛtɛ ndo monga la lɔkɛwɔ la dimɛna. Kɛsɔ mbahombaso sala ndo sho. Lo dɔmbɛlɔ dimɔtshi diakandasale, Yeso akate lo dikambo di’ambeki ande ɔnɛ: “Vo kema wa la kete, uku wemi kema la la kete.” (Joa. 17:16) Mbeka ndo kana yimba l’ɛnyɛlɔ ka dihonga kaki Kristo kokaka tosha dihonga diahombama dia ndjanganya l’andja ɔnɛ.

Teke woho wa monga la dihonga oma le Yeso

12-14. Sha bɛnyɛlɔ diɛnya woho wa dihonga diaki la Yeso.

¹² Yeso akakɛnɛmɔla dihonga dia mamba l’olimu ande w’esambishelo. Lo kamba la lowandji lande oko wakinde Ɔnaki Nzambi, la dihonga tshɛ nde “akoto l’etemwelo ka [Nzambi]. Ndi akatshanya wane tshe wakasundjaka ndu wakasumbaka lu etemwelo. Ndi akatshulula mesa w’amingudi wa falanga, ndu ekala w’asundjishi wa khudumba.” (Mat. 21:12) Etena kakaye asɔlayi dia ndjonda Yeso l’otsho w’ekomelo wakandetsha lanɛ la nkɛtɛ, la dihonga tshɛ nde akayange dia kokɛ ambeki ande lo mbuta ɔnɛ: “Naka dimi kayanganyu, wane watshu.” (Joa. 18:8) Wenya ɛmɔtshi l’ɔkɔngɔ, nde akayotɛ Petero dia kaloya yɔɔmbɔ lo dihoso ndo lo sala ngasɔ nde akɛnya dia nde akayaɛkɛka aha lo dihomɔ dia ta dia la nkɛtɛ, koko le Jehowa.​—Joa. 18:11.

¹³ La dihonga tshɛ, Yeso akɛnya lo sɛkɛ wetshelo waha la ngandji ndo wa kashi w’embetsha wa lo nshi yande. Yeso akawatɛ ate: “Fono kayayi le nyu, afundji la Afarise, akanga a lukesu! Ne dia nyu nyatudihelaka antu lukuki la diulelu dia l’ulungu. . . . Nyatukaleka akambu wuleki waki lu elembe, uku dialelu di’ololo, ketshi, la mbetawo. . . . Nyatotshaka l’andja a dikoho la donga, keli l’etei awo ambulula too la dihotwanelu la dishi.” (Mat. 23:13, 23, 25) Ambeki waki Yeso waki l’ohomba wa monga la dihonga dia woho akɔ wâmɛ sɔ nɛ dia ewandji w’ɛtɛmwɛlɔ wa kashi wakahombe mbahɛnyahɛnya ndo ndjaka amɔtshi l’atei awɔ.​—Mat. 23:34; 24:9.

¹⁴ Yeso aki la dihonga kânga la ntondo k’ɛdiɛngɛ. Lo diaaso dimɔtshi, nde akahomana la pami kɛmɔtshi kaki l’ɛdiɛngɛ waki la wolo wele ndoko onto lakakoke mbokeleka mɔlɔla. Aha la mboka wɔma, Yeso akatshanya lokema l’ɛdiɛngɛ wakahɛnyahɛnyaka pami kɛsɔ. (Mako 5:1-13) Ɛlɔ kɛnɛ, Nzambi hasha Akristo wolo wa sala ahindo wa ngasɔ. Koko, l’olimu aso w’esambishelo ndo wa wetshelo, sho pombaka ndɔsha Satana ‘lambetɛ anto wahetawɔ oko totshungu’ ta dia lo nyuma. (2 Kor. 4:4) Oko wakidiɔ lo dikambo diaki Yeso, dihomɔ diaso dia ta “diaha dia dimba, keli dio dieko la wulu wa [Nzambi] wa mpandjula wembe wa ta,” mbuta ate wetshelo wa kashi wa l’ɛtɛmwɛlɔ wambohikama l’etema w’anto. (2 Kor. 10:4) Etena kɛmbaso dihomɔ dia ta sɔ, sho kondjaka wetshelo oma l’ɛnyɛlɔ kaki Yeso.

15. Oma lo na akaye dihonga diaki la Yeso?

¹⁵ Dihonga diaki la Yeso kondja oma lo lokalo laki la nde, koko oma lo mbetawɔ. Ngasɔ mbahomba monga ndo dihonga diaso. (Mako 4:40) Ngande wakokaso monga la mbetawɔ k’oshika? Ɛnyɛlɔ kaki Yeso kayotokimanyiya ndo lo dikambo sɔ. Yeso akakɛnɛmɔla ewo k’efula kaki la nde k’Afundelo ndo woho wakandayaɛkɛ tshɛ lɔkɔ. Oko ehomɔ ka ta, Yeso kokamba la yɔɔmbɔ ya mɛtɛ mɛtɛ, koko nde akakambe la yɔɔmbɔ ya nyuma, mbuta ate Ɔtɛkɛta wa Nzambi. Mbala la mbala, nde akɛnyaka dia wetshelo ande tomba oma l’Afundelo. Mbala efula, nde akatatshiyaka ditelo diande lo mbuta ɔnɛ: “Akafundama ati,” mbuta ate l’Ɔtɛkɛta wa Nzambi.a

16. Ngande wakokaso ndeka monga la mbetawɔ?

¹⁶ Dia monga la mbetawɔ kakoka tokimanyiya dia shika tanga l’atei w’ehemba wakoka tokomɛ oko weso ambeki waki Yeso, sho pombaka mbadiaka ndo mbekaka Bible lushi la lushi, mbɔtɔka lo nsanganya y’Akristo ndo kakatshiya akambo wa mɛtɛ wele kiɔkɔ ya mbetawɔ kaso lo timba taso. (Romo 10:17) Sho pombaka nto kanaka yimba efula la kɛnɛ kekaso ndo mbetawɔ dia tɔ monga la shɛngiya l’otema aso. Paka mbetawɔ ka ngasɔ kele la lɔsɛnɔ mbakoka totshutshuya dia sala akambo la dihonga. (Jak. 2:17) Ndo sho pombaka nɔmba nyuma k’ekila nɛ dia mbetawɔ ekɔ dionga dimɔtshi dia l’olowa atɔ.​—Ngal. 5:22.

17, 18. Ngande wakɛnya kadiyɛso kɛmɔtshi k’osekaseka dihonga la kalasa?

¹⁷ Kadiyɛso kɛmɔtshi k’osekaseka kelɛwɔ Kitty akahomana la dui dimɔtshi diɛnya dia mbetawɔ ka mɛtɛ mbishaka dihonga. Oma ko dikɛnda diande, nde akeyaka dia ‘hatohombe mboka lokumu l’ɔlɔlɔ sɔnyi’ la kalasa ndo nde akakombolaka mɛtɛ dia sambisha asekande wa la kalasa dimɛna. (Romo 1:16) Ɔnɔnyi tshɛ, nde akɔsaka yɛdikɔ ya sambisha anto akina lokumu l’ɔlɔlɔ, dikambo nde komongaka la dihonga dia sala dikambo sɔ. Etena kakinde l’ekomelo k’ɛnɔnyi dikumi l’ɛmɔtshi, nde akatɔtɔ lo kalasa nkina. Nde akate ate: “Ɔnɛ ekɔ etena ka dimi kamba la tɔ dia nyanga waaso wakimi kokamba la wɔ dia sambisha.” Kitty akalɔmbɛ dia monga la woho wa dihonga ndo shɛnɔdi yaki la Kristo ndo akakondja diaaso dia dimɛna.

¹⁸ Lushi la ntondo lakandatshu lo kalasa, wakalɔmbɛ ambeki tshɛ dia vɔ ndjaeyanya onto l’onto. Ambeki efula wakashile ɛtɛmwɛlɔ awɔ ndo wakakotsha di’ɔnɛ vɔ hawoyasha mɛtɛ lo dietawɔ diawɔ. Kitty akɔshi dia ɔsɔ aki diaaso diakandalɔmbɛ dia kondja. Lam’akakome mbala kande, nde akate la dihonga tshɛ ɔnɛ: “Dimi lekɔ Ɔmɛnyi wa Jehowa ndo Bible mbalɔmbɔla lɔkɛwɔ lami ndo kɛnɛ tshɛ kasalami.” Etena kakandatetemalaka tɛkɛta, ambeki amɔtshi wakatatɛ mbɔsɔka. Koko akina wakohokamɛ la yambalo ndo l’ɔkɔngɔ diko wakayowokaka ambola. Ombetsha akakambe la Kitty oko ɛnyɛlɔ ka dimɛna k’onto lamɛ dietawɔ diande. Kitty ekɔ l’ɔngɛnɔngɛnɔ w’efula lo woho wakandakondja dihonga l’ɛnyɛlɔ kaki Yeso.

Tonge la woho wa mbetawɔ ndo wa dihonga diaki la Kristo

19. a) Kakɔna kalembetshiya monga la mbetawɔ k’oshika? b) Ngande wakokaso ngɛnyangɛnya Jehowa?

¹⁹ Apɔstɔlɔ lawɔ wakɔsaka dia dihonga diawɔ diakahombe ndja oma lo mbetawɔ. Vɔ wakasɛngasɛnga Yeso ɔnɛ: “Ufudia mbetawo kasu.” (Adia Luka 17:5, 6.) Monga la mbetawɔ k’oshika halembetshiya tsho mbetawɔ dia Nzambi ekɔ. Koko, dui sɔ nɔmbaka dia monga la diɔtɔnganelo dia dimɛna la Jehowa, mbuta ate woho wa diɔtɔnganelo dionga lam’asa ɔna la tshitshɛ la she ka ngandji. L’ekimanyielo ka nyuma, Sɔlɔmɔna akafunde ate: “On’ami, naka we ambuyala la yimba, ku utema ami ayulula l’ongenongeno. Utema ami ayongenangena lam’ayutaka elomo aye akambu w’usimbwi.” (Tuk. 23:15, 16) Woho akɔ wâmɛ mbele, woho wasukɛso atɔndɔ wosembwe la dihonga tshɛ ngɛnyangɛnyaka Jehowa ndo dui sɔ toshaka dihonga di’efula. Ɔnkɔnɛ, nyɛsɔ tokoyake nshi tshɛ ɛnyɛlɔ kaki Yeso lo sukɛka atɔndɔ wosembwe la dihonga tshɛ!

[Nɔte ka l’ɛse ka dikatshi]

Onde wɛ kokaka nembetshiya?

• Kakɔna kayotokimanyiya dia monga l’okitanyiya kânga mbeso anto wele bu kokele?

• Mbetawɔ ka mɛtɛ ndja oma lo na, ndo ngande wakoka dui sɔ tokimanyiya dia sho monga la dihonga?

• Ɛlɔlɔ akɔna wayotokondja oma lo monga l’okitanyiya ndo la woho wa dihonga diaki la Kristo?

[Osato wa lo lɛkɛ 13]

Onde wɛ ‘ambɔlɔngɔsɔla otema ayɛ’ dia shika tanga la ntondo k’ehemba?

[Osato wa lo lɛkɛ 15]

L’ɛnyɛlɔ kaki Yeso, sho kokaka monga la dihonga dioye oma lo mbetawɔ