Nɛmɔ di’efula diele la wetshelo waki Nzambi
‘Dimi lambetawɔ shisha diangɔ tshɛ l’ɔtɛ wa nɛmɔ di’efula diele la ewo ka Kristo Yeso.’—FIL. 3:8.
1, 2. Kakɔna kasɔna Akristo amɔtshi, ndo lande na?
OMA ko dikɛnda diande, Robert aki ombeki wa yimba la kalasa. Etena kakinde l’ɛnɔnyi enanɛi, ombetsha ande ɔmɔtshi akatshu towenda ndo akawotɛ dia nde aki ombeki wele l’akoka wa sala awui tshɛ. Nde akɛnya elongamelo kaki la nde k’ɔnɛ lushi lɔmɔtshi Robert ayokoma dɔkɔtɛlɛ. Lam’akandashidiya kalasa ya sekɔndɛrɛ, nde aki l’akoka wa mbɔtɔ lo waa inivɛrsite wakaleke dimɛna wa lo wodja ande. Koko, Robert akatone kɛnɛ kakɔsaka anto efula oko diaaso diahandakondjaki nto pondjo dia nde kamba olimu w’ombatshi mboka wa pondjo.
2 L’ɛnyɛlɔ kaki Robert, Akristo efula w’akɛnda ndo w’epalanga wekɔ la waaso wa pama lo dikongɛ nɛ di’akambo. Koko, amɔtshi sɔnaka diaha ndeka kamba la waaso asɔ dia vɔ mbesa eyango wa lo nyuma. (1 Kor. 7:29-31) Kakɔna katshutshuya Akristo wele oko Robert dia ndjasha la lolango l’olimu w’esambishelo? Lâdiko dia ngandji kokawɔ Jehowa kele ɔkɔkɔ woleki tshɛ, vɔ mbɔsaka wetshelo waki Nzambi la nɛmɔ. Onde wɛ ambokanyiyaka woho wotonga lɔsɛnɔ layɛ otondonga wɛ kokondja ewo k’akambo wa mɛtɛ? Kana yimba l’ɛtshɔkɔ wa diambo wakondjaso oma lo woho wetshamaso oma le Jehowa ayotokimanyiya dia sho mbɔsa lokumu l’ɔlɔlɔ la nɛmɔ di’efula ndo monga l’ohetoheto dia lisambisha anto akina.
Mbetshama oma le Nzambi ekɔ diɛsɛ dia woke
3. Lande na kakokaso ndjashikikɛ dia Jehowa nangaka mbetsha anto wele kema kokele?
3 Oma l’ɔlɔlɔ ande, Jehowa mbetawɔka dia mbetsha anto wele kema kokele. Lo tɛkɛta dikambo dia prɔfɛsiya kendana l’Akristo w’akitami, Isaya 54:13 mbutaka ɔnɛ: “Ana aye tshe wayetshama le [Jehowa], ku vo wayuyala la ki k’utamanya.” Ɛtɛkɛta ɛsɔ mendanaka ndo la “ekoko ekina” waki Kristo. (Joa. 10:16) Mbokɛmaka hwe dia prɔfɛsiya kɛsɔ kekɔ lo kotshama lo nshi yaso nyɛ. Isaya akɛnyi l’ɛnɛlɔ anto w’oma lo wedja tshɛ waya oya l’ɔtɛmwɛlɔ wa mɛtɛ. Nde mɛnyaka dia vɔ wekɔ lo mbutanɛ lam’asawɔ ɔnɛ: “Nyuyi tumbeli lu ukungu wa [Jehowa], utsha la luudu la [Nzambi k]a Jakoba. Ndi ayututetsha akambu andi. Ku shu tayokendakendaka lu mbuka kandi.” (Is. 2:1-3) Mbetshama oma le Nzambi ekɔ mɛtɛ diɛsɛ dia woke!
4. Kakɔna kalɔmba Jehowa wanɛ wetshande?
4 Kakɔna kahombaso sala dia mbetshamaka oma le Nzambi? Dui dia ntondo dialɔmbama ele monga l’okitshakitsha. Omembi w’esambo Davidi akafunde ate: “[Jehowa] eko ololo ndu uluwanyi. . . . [Nde] atulimbitshiyaka akanga a ndjakitshakitsha mbuka kandi.” (Osam. 25:8, 9) Ndo Yeso akate ɔnɛ: “Papa, uwandji w’ulungu la kete lambukandula, ne dia we akashe akambu ane le akanga a tumba la ewu, ku ambuwashula le tokendakenda.” (Luka 10:21) Onde wɛ hakotwama oya le Nzambi “[k]atushaka wane wayakitshakitsha ngandji ka mamba”?—1 Pet. 5:5.
5. Kakɔna katokimanyiya dia kondja ewo kaki Nzambi?
5 Oko weso ekambi wa Jehowa, onde sho kokaka ndjafuna l’ɔtɛ w’akoka kana lomba lele la so la mbeya akambo wa mɛtɛ? Kema. Lo mɛtɛ, lo shoamɛ hatokokaki pondjo monga l’ewo kaki Nzambi. Yeso akate ate: “Nduku untu leya ndja le mi, tshikima Papa lakantumi kûkutudi.” (Joa. 6:44) Lo tshimbo y’olimu w’esambishelo ndo ya nyuma k’ekila, Jehowa ekɔ lo kotola anto wele oko ɛkɔkɔ, mbuta ate “diango di’ushinga a wulu dia wedja tshe.” (Hang. 2:7) Onde wɛ bu la lowando lo woho weyɛ onto ɔmɔtshi lele Jehowa akôkotola oya le Ɔnande?—Adia Jeremiya 9:23, 24.
Wetshelo w’oma le Nzambi ndowanyaka nsɛnɔ y’anto
6. Shɛngiya yakɔna ya diambo yakoka ‘ewo kaki Jehowa’ monga layɔ le anto?
6 Lo kamba l’ɛtɛkɛta wa dimɛna, prɔfɛsiya ka Isaya mɛnyaka etshikitanu wasalema ɛlɔ kɛnɛ. Anto waki ntondo anto wa ngala wambokoma ɛkɔmi a tshitshi. (Adia Isaya 11:6-9.) Wanɛ wakahetshanaka ntondo lam’asawɔ l’ɔtɛ wa nkoho y’alemba, wedja, waoho kana mbekelo yotshikitanyi wambeka dia mbidjasɛ kâmɛ. Lo yoho ya didjidji, vɔ ‘wambotshula tɔɔmbɔ tawɔ nkongo.’ (Is. 2:4) Kakɔna kele lo kiɔkɔ y’etshikitanu wa diambo ɛsɔ? Ekɔ woho wambokondja anto ‘ewo kaki Jehowa’ ndo wakambawɔ la tɔ lo nsɛnɔ yawɔ. Kânga mbele ekambi waki Nzambi wekɔ anto wele kema kokele, vɔ wambokenga nkumbo ka mɛtɛ k’onto l’ɔnango ka l’andja w’otondo. Woho wangɛnyangɛnya lokumu l’ɔlɔlɔ anto wa l’andja w’otondo ndo etombelo w’ɔlɔlɔ wonga la lɔ mɛnyaka nɛmɔ di’efula diele la wetshelo waki Nzambi.—Mat. 11:19.
7, 8. a) Naa ‘akambo amɔtshi wambonama wolo’ wele wetshelo waki Nzambi tshungolaka anto oma lɔkɔ? b) Kakɔna kɛnya dia wetshelo waki Nzambi tombolaka Jehowa?
7 Ɔpɔstɔlɔ Paulo akɛdika olimu w’esambishelo w’ekambi waki Nzambi la dihomɔ dia ta dia lo nyuma. Nde akafunde ɔnɛ: “Dihumo dia su dia ta diaha dia dimba, keli dio dieko la wulu wa [Nzambi] wa mpandjula wembe wa ta. Shu tatuhandjulaka tukanyi, ndu engo ka ladiku tshe katosemanelaka la ewu ka [Nzambi].” (2 Kor. 10:4, 5) Naa ‘akambo amɔtshi wambonama wolo’ wele wetshelo waki Nzambi tshungolaka anto oma lɔkɔ? Wetshelo wa kashi, dikanyiyakanyiya ndo filozofi y’anto. (Kol. 2:8) Wetshelo waki Nzambi kimanyiyaka anto dia vɔ minya ditshelo dia kɔlɔ ndo kɛnɛmɔla waonga wangɛnyangɛnya Nzambi. (1 Kor. 6:9-11) Vɔ ndowanyaka lɔsɛnɔ la nkumbo. Ndo vɔ kimanyiyaka wanɛ waha l’elongamelo dia vɔ monga l’oyango w’oshika lo lɔsɛnɔ. Ɔsɔ mbele woho wa wetshelo wele anto l’ohomba ɛlɔ kɛnɛ.
8 Dionga dimɔtshi diatokimanyiya Jehowa dia monga la diɔ ele losembwe, oko wadiɛnya dui diakete nɛ. (Heb. 13:18) Womoto ɔmɔtshi la lo wodja wa Inde aketawɔ mbeka Bible ndo akayokomaka opandjudi wahatabatizama. Lushi lɔmɔtshi, etena kakandayakalolaka oma l’olimu ɔmɔtshi wendana la wokelo wa Mbalasa ka Diolelo, nde akatɔngɔna shɛnɛtɛ ya paonyi yele la nɛmɔ dia dɔlara nkama enanɛi suke la dihole diemala mituka. Kânga mbakinde komonga l’ekondjelo k’efula, nde akatshu la shɛnɛtɛ shɔ le apulushi ndo akawashayɔ dia vɔ nyanga kangayɔ. Owandji w’apulushi akambe heyama! L’ɔkɔngɔ diko, owandji okina w’apulushi akawombola ɔnɛ: “Lande na kahayɔshi shɛnɛtɛ nyɛ?” Nde akokadimola ate: “Wetshelo wa lo Bible wambotshikitanya lɔsɛnɔ lami, dimi laya onto lele la losembwe.” La diambo di’efula, nde akatɛ ekumanyi k’Okristo kakatshindɛ womoto ɔsɔ lo biro k’apulushi ɔnɛ: “Wodja aso wekɔ l’anto ndekana miliyɔ 38. Naka nyu kimanyiya anto dikumi dia vɔ monga oko womoto ɔnɛ, kete nyayosala dui dia mamba.” Etena kakanaso yimba lo miliyɔ ya nsɛnɔ y’anto yambolowanyema oma lo wetshelo waki Nzambi, shi tekɔ l’ɛkɔkɔ efula wa tombola Jehowa?
9. Kakɔna kakimanyiya anto dia vɔ sala etshikitanu wa weke lo nsɛnɔ yawɔ?
9 Wolo wa tshikitanya anto wele l’Ɔtɛkɛta waki Nzambi kâmɛ ndo ekimanyielo kasha Jehowa lo tshimbo ya nyuma kande k’ekila kimanyiyaka anto dia vɔ sala etshikitanu wa weke lo nsɛnɔ yawɔ. (Romo 12:2; Ngal. 5:22, 23) Kolosai 3:10 mbutaka ɔnɛ: ‘Nyɔlɔtɛ lonto l’oyoyo lele l’ekimanyielo ka ewo k’oshika, lambetɛma oyoyo lo ndjela Ɔnɛ lakalitonge.’ Losango lele l’Ɔtɛkɛta wa Nzambi, Bible lekɔ mɛtɛ la wolo wa mɛnya lonto laki onto la l’etei k’otema ndo lɔ kokaka tshikitanya yoho yande ya kana yimba ndo kânga nsaki yande l’akambo amɔtshi. (Adia Heberu 4:12.) Lo kondja ewo ka mɛtɛ k’Afundelo ndo lo nsɛna lo yoho yɔtɔnɛ l’ɛlɛmbɛ wosembwe waki Jehowa, onto kokaka monga ɔngɛnyi wa Nzambi ndo monga l’elongamelo ka kondja lɔsɛnɔ la pondjo.
Jehowa ekɔ lo tɔlɔngɔsɔla dia nshi yayaye
10. a) Lande na kele paka Jehowa mbakoka tokimanyiya dia sho nɔngɔsɔla nshi yayaye? b) Etshikitanu akɔna wa weke wayanga salema lo nkɛtɛ k’otondo?
10 Jehowa mbele onto lâmɛ lakoka tokimanyiya dia sho nɔngɔsɔla nshi yayaye nɛ dia nde mbeyaka kɛnɛ kele la ntondo. Nde mbeyaka woho wayonga nshi yayaye y’anto. (Is. 46:9, 10) Prɔfɛsiya ya lo Bible mɛnyaka dia “lushi la wuki la [Jehowa] laya suki.” (Zef. 1:14) Lo kɛnɛ kendana la lushi lɔsɔ, ɛtɛkɛta wele lo Tukedi 11:4 wayokotshama. Ɛtɛkɛta akɔ mbutaka ɔnɛ: “Ukundji ha[to]kimanyia antu lu lushi la kele. Keli sambu k’ololo katutshungulaka antu uma lu nyoi.” Etena kayolombosha Jehowa andja waki Satana, dui diayoleka ohomba ele mbetawɔma le Nzambi. Falanga yayonga anyanya. Lo mɛtɛ, Ezekiyele 7:19 mbutaka ɔnɛ: “Vo wayukadja fesa yawo l’esese, paunyi yawo yayuyala uku engo ka mindu.” Mbeya akambo asɔ la ntondo kokaka tokimanyiya dia sho sala akambo la lomba ɛlɔ kɛnɛ.
11. Naa yoho mɔtshi yatokimanyiya wetshelo waki Nzambi dia sho nɔngɔsɔla nshi yayaye?
11 Yoho mɔtshi yatokimanyiya wetshelo waki Nzambi dia sho ndjalɔngɔsɔla lo kɛnɛ kendana la lushi la Jehowa layaye ele lo tokimanyiya dia sho mbidja awui woleki ohomba lo dihole dia ntondo. Ɔpɔstɔlɔ Paulo akafundɛ Timɔtɛ ate: “Ewuli akanga w’engonyi wa l’etena kene, dia vo tawutakulaki, ndu tawulungamelaki efumbofumbo k’ongonyi, keli walungameli [Nzambi].” Oyadi kânga sho bu la falanga efula, sho kokaka kondja wahɔ oma lo dako di’oma le Jehowa sɔ. Kakɔna kalɔmba dui sɔ? Lo dihole dia ndjaombɛ ɛngɔnyi wa l’emunyi, sho pombaka sala la wolo dia ‘sala kɛnɛ kele ɔlɔlɔ’ ndo ‘monga ɛngɔnyi l’elimu w’ɔlɔlɔ.’ Lo mbidjaka akambo wa lo nyuma lo dihole dia ntondo lo nsɛnɔ yaso, sho ‘ndjaombɛka ehikamelo k’ɔlɔlɔ dia nshi yayaye.’ (1 Tim. 6:17-19) Yoho ya lɔsɛnɔ ya ndjahombia ya ngasɔ kɛnɛmɔlaka shɛnɔdi nɛ dia Yeso akate ɔnɛ: “Naka untu ayukundja andja tshe, la nshisha lumu landi, waho andi lend’ewo?” (Mat. 16:26, 27) Lo menda woho wambosukana lushi laki Jehowa, sho tshɛ pombaka ndjambola ɔnɛ: ‘Lende ombami ɛngɔnyi ami? Onde lekɔ lo kambɛ Nzambi kana lekɔ lo kambɛ Ɔngɔnyi?’—Mat. 6:19, 20, 24.
12. Lande na kahatahombe kɔmɔ naka anto amɔtshi wambɔnyɔla olimu aso?
12 L’atei wa ‘elimu w’ɔlɔlɔ’ watɛkɛta Ɔtɛkɛta wa Nzambi dikambo di’Akristo mbele ndo olimu washimbɛ nsɛnɔ wa sambisha Diolelo ndo mbetɛ anto ambeki. (Mat. 24:14; 28:19, 20) Oko wakidiɔ lo ntambe ka ntondo, anto amɔtshi mbeyaka mɔnyɔla olimu aso. (Adia 1 Koreto 1:18-21.) Koko dui sɔ hadiotshikitanya nɛmɔ diele la losango laso ndo diɔ hadiokitshakitsha ohomba wele la lɔ wa mbisha onto tshɛ diaaso dia monga la mbetawɔ lo losango lakɔ kam’eke etena. (Romo 10:13, 14) Etena kakimanyiyaso anto akina dia vɔ kondja wahɔ oma lo wetshelo waki Nzambi, dui sɔ tokimanyiyaka dia sho ndjokondja ɛtshɔkɔ.
Jehowa tshɔkɔlaka ekambi ande etena kayahombiawɔ
13. Kakɔna kakashisha Paulo dikambo dia lokumu l’ɔlɔlɔ?
13 La ntondo ka nde ndjokoma Okristo, ɔpɔstɔlɔ Paulo aketshama woho wa pama lo dikongɛ di’akambo di’ase Juda. Etena kakinde ondo l’ɛnɔnyi 13, nde akonɔ oma l’osomba ande wa lôtɔ wa Taraso otsha la Jerusalɛma dia tetshama ɛlɛmbɛ le Ngamaliyɛlɛ laki ombetsha w’Ɛlɛmbɛ wa manamana. (Etsha 22:3) L’edjedja ka wonya, Paulo akatatɛ minyanyema oma le anto ndo nde akatetemala pama l’ɔtɛmwɛlɔ w’ase Juda. (Ngal. 1:13, 14) Etena kakandetawɔ lokumu l’ɔlɔlɔ ndo kakandatatɛ sambisha, nde aketawɔ dia tshika awui asɔ tshɛ. Onde Paulo akanyange l’ɔtɛ wa yɛdikɔ yakandɔshi? Kema. Nde akafunde ate: “Mete, dimi lambete diango so tshe anyanya dia ololo wa nimbitela Kristu Jesu Khumemi. Dimi lakashisha diango tshe dikambu diandi, lambudiala uku diango dia mbikadja.”—Fil. 3:8.
14, 15. Ɛlɔlɔ akɔna wakondjaso oko weso “ekambi kame la [Nzambi]”?
14 L’ɛnyɛlɔ ka Paulo, ɛlɔ kɛnɛ Akristo ndjahombiaka awui amɔtshi dia sambisha lokumu l’ɔlɔlɔ. (Mako 10:29, 30) Onde sho shishaka ɛngɔ kɛmɔtshi etena kasalaso dui sɔ? Robert, lakatatɛkɛtshi dikambo diande l’etatelo akayaoke woho wayaoka anto akina efula etena kakandate ɔnɛ: “Dimi bu kânga la yema ya lonyangu. Olimu wa lo tena tshɛ wambombisha ɔngɛnɔngɛnɔ ndo ɔlɔ ndo vɔ wambokimanyiya dia ‘pemba ndo mɛna dia Jehowa ekɔ ɔlɔlɔ.’ Oyadi kakɔna tshɛ kakamashisha dia mbesa eyango wa lo nyuma, Jehowa ekɔ lo futami nshi tshɛ ndeka ndo kɛnɛ kakamashisha. Ekɔ oko ndoko kakamashisha mɛtɛ. Dimi mbamboleka kondja!”—Osam. 34:8; Tuk. 10:22.
15 Naka aya ɛnɔnyi efula wasambishayɛ ndo wetshayɛ kana eke koditatɛka, kete aha la tâmu wɛ lawɔ ekɔ la diaaso dia pemba ndo mɛna dia Jehowa ekɔ ɔlɔlɔ. Onde ekɔ tena dimɔtshi diakakokimanyiya nyuma kande etena kakayasambishaka anto lokumu l’ɔlɔlɔ? Onde wɛ akɛnyi woho waki onto l’ɔngɛnɔngɛnɔ etena kakadihola Jehowa otema ande dia nde mboka losango laso? (Etsha 16:14) Onde Jehowa ambokokimanyiyaka dia wɛ tondoya wekamu, ɛnyɛlɔ nyanga waaso wa nyomohamia olimu ayɛ? Onde nde ambokosukɛka lo tena dia pâ lo kokimanyiya dia wɛ tetemala mbokambɛ etena kakayoke dia wɛ ambɔkɔmɔ? (Fil. 4:13) Etena katokimanyiya Jehowa lam’asambishaso, nde ndekaka koma onto la mɛtɛ le so ndo sho ndekaka ndjasukanya la nde. (Is. 41:10) Shi ekɔ tshondo y’ɔtshɔkɔ dia monga l’atei w’anto wele “ekambi kame la [Nzambi]” l’olimu wa woke wa wetshelo?—1 Kor. 3:9.
16. Ngande wayaokayɛ lo kɛnɛ kendana la welo wa ndjahombia wadjayɛ dia sambisha?
16 Anto efula nongamɛka dia sala dui dimɔtshi di’ohomba efula lo nshi yekewɔ la lɔsɛnɔ. Tambɛna dia kânga awui w’ohomba efula wakasale anto l’andja ɔnɛ mbohamɛka mbala efula esadi eto. Koko, olimu wakamba Jehowa nshi nyɛ wendana la okidiamelo wa lokombo lande hawohamamɛki pondjo l’ɔkɔndɔ w’ekambi ande. Vɔ wayohɔka olimu ɔsɔ pondjo pondjo. (Tuk. 10:7; Heb. 6:10) Nyɛsɔ tɔsake diɛsɛ diele la so dia mbisha lonya l’olimu wa mbetsha wahohamamɛki pondjo la nɛmɔ.
Ngande wayoyokadimola?
• Kakɔna kalɔmba Jehowa wanɛ wetshande?
• Ngande walowanya wetshelo waki Nzambi nsɛnɔ y’anto?
• Lo toho takɔna takondjaso ɛtshɔkɔ lo kimanyiya anto akina dia vɔ kondja wahɔ oma lo wetshelo waki Nzambi?
[Osato wa lo lɛkɛ 23]
Wanɛ wetshama le Jehowa wekɔ lo nkumbo ka l’andja w’otondo k’onto l’ɔnango
[Osato wa lo lɛkɛ 24]
Shi ekɔ tshondo y’ɔtshɔkɔ dia monga ‘okambi kâmɛ la Nzambi’?