Wetshelo watɔla otsha lo lɔsɛnɔ
1 Ekɔ mɛtɛ ɔtshɔkɔ dia mɛna woho wadihɔ washo w’anto etena kashihodiawɔ akambo wa mɛtɛ wa lo Ɔtɛkɛta wa Nzambi! Ekɔ mɛtɛ dui di’ɔngɛnɔngɛnɔ dia sambiyɛ anto akina ewo ka Nzambi ndo ka sangwelo diande diendana l’anto. Wetshelo wa ngasɔ koka tɔla onto otsha lo lɔsɛnɔ la pondjo.—Joa. 17:3.
2 Lande na kele wetshelo ɔsɔ ndeka ekina: Ɛlɔ kɛnɛ wetshelo mbishamaka lo weho tshɛ wakoka monga ndo l’oseka dui tshɛ. (Und. 12:12) Koko ewo kɛsɔ hakoke mbɛdikama la nɛmɔ diele la ‘awui wa diambo wa Nzambi.’ (Etsha 2:11) Onde wetshelo walongola anto lo andja ɔnɛ koka mbakimanyiya dia vɔ ndeka ndjasukanya la Otungi ndo mbeya sangwelo diande? Onde vɔ wambokimanyiya anto dia shihodia kɛnɛ katomba etena kavɔso kana lande na kele asui efula? Onde vɔ wambosha anto elongamelo? Onde vɔ wambokimanyiya dia nkumbo monga dimɛna? Kema. Paka oma lo tshimbo ya wetshelo washa Nzambi mbakokaso kondja ekadimwelo wa shikaa lo ambola woleki ohomba wa lo lɔsɛnɔ.
3 Wetshelo waki Nzambi mbishaka ɛngɔ kɛmɔtshi kele bu lo andja wa nshi nyɛ, mbuta ate vɔ kimanyiyaka onto dia nde monga la lɔkɛwɔ l’ɔlɔlɔ. Ɔtɛkɛta wa Nzambi minyaka lo pondjo ngandji k’ɔtɛkɔya ka lokoho la demba, ka dioho ndo wodja oma lo etema waki wanɛ wetawɔ ndo wakamba la wetshelo wa lɔkɔ. (Heb. 4:12) Vɔ wambotshutshuya anto dia tshika weho tshɛ w’awui wa ngala ndo ‘ndjâlɔtsha lonto l’oyoyo.’ (Kol. 3:9-11; Mika 4:1-3) Ndo nto, wetshelo waki Nzambi wambosha miliyɔ y’anto wolo wa vɔ minya ditshelo ndo waonga wahangɛnyangɛnya Nzambi.—1 Kor. 6:9-11.
4 Lande na kewɔ ohomba nshi nyɛ: Ombetsha aso wa Woke tewolaka dikambo dia kitshimudi ya tena dieso lo nsɛna. Dombwelo diande dia prɔfɛsiya diekɔ l’awui wahashile nɛmɔ wahomba mbewoyama lo nkɛtɛ k’otondo. (Eny. 14:6, 7) Kristo ekɔ lo mbolɛ l’olongo, tshunda di’ɛtɛmwɛlɔ wa kashi tshɛ wa l’andja w’otondo diayanga ndanyema ndo Diolelo diaki Nzambi diamboyalɔngɔsɔla dia ndanya mandji tshɛ ya la nkɛtɛ. (Dan. 2:44; Eny. 11:15; 17:16) Ɔnkɔnɛ, ekɔ ohomba efula dia anto mbeya Nkumekanga kaki Nzambi kalɔmbɔla kakianɛ ndo tomba oma lo Babilɔna ka Woke la tɛndɛ lokombo la Jehowa la mbetawɔ. (Osam. 2:11, 12; Romo 10:13; Eny. 18:4) Nyɛsɔ tosambishake lo yɛdikɔ yɛdimi l’akoka aso lo mbisha anto akina wetshelo watɔla otsha lo lɔsɛnɔ.