Tombola Jehowa La Okanda Wakayeke
“One latuyataka, atuyangaka lutumbu landi, keli one layanga lutumbu la one lakûtumi, ndi eko mete.”—JOANI 7:18.
AYA edja efula kambotatɛka wetshelo. Wetshelo wakatatɛ lam’akatonge Jehowa Nzambi, Ombetsha a Woke ndo Ondakanyi, Ɔnande l’enondo. (Isaya 30:20; Kolosai 1:15) Nde mbakakoke ndakanyema oma le Ombetsha a Woke ndamɛ, aha oma lo tshimbo y’onto okina! L’edja ka nunu di’ɛnɔnyi diakinde kâmɛ la She, Ɔna ɔsɔ—ɔnɛ lakayelamɛka ɔnɛ Yeso Kristo—akakondja wetshelo w’ohomba efula lo kɛnɛ k’endana la waonga, l’elimu, ndo l’asangwelo wa Jehowa Nzambi. L’ɔkɔngɔ diko, lam’akinde oko onto lanɛ la nkɛtɛ, Yeso akate ate: “Dimi dime halatshi dikambu, keli latutaka akambu wakambetsha Papa.”—Joani 8:28.
2 Woho akɔna wakakambe Yeso la okanda wakandeke na? L’edja k’ɛnɔnyi esato l’etenyi wakandakambaka olimu ande lanɛ la nkɛtɛ, nde kompekɔ dia kahana l’anto akina kɛnɛ kakandeke. Koko, nde akasalaka dikambo sɔ l’oyango ɔmɔtshi woleki ohomba. Oyango akɔna ɔsɔ na? Nyɛsɔ tênde ɛtɛkɛta wa Yeso wele lo Joani tshapita 7, lɛnɛ akandalembetshiya kiɔkɔ la oyango wa wetshelo ande.
3 Ntondotondo, nyɛsɔ tênde oma lɛnɛ akamɛ dikambo sɔ ndo kɛnɛ kakasalemaka l’etena kakɔ. Aki l’eleko kɔ̂lɔ akatshi, l’ɔnɔnyi 32 T.D., lâsɔ ko ambeta oko ɛnɔnyi esato l’ɔkɔngɔ wa Yeso nongola batismu. Ase Juda wakamɔtɛ la Jerusalɛma lo Difɛstɔ dia Tabɛrnakɛlɛ. Lokumu lakadiangana efula lo dikambo dia Yeso lo nshi y’etatelo ka difɛstɔ diakɔ. Lam’akakome difɛstɔ diakɔ l’atei atei, Yeso akatshu lo tɛmpɛlɔ ko akatatɛ mbetsha anto. (Joani 7:2, 10-14) Oko wakandasalaka nshi tshɛ, nde akayaɛnya ate: Ombetsha a woke mbemi.—Mateu 13:54; Luka 4:22.
4 Divɛsa 15 dia Joani tshapita 7 mbutaka ɔnɛ: “Ku asi Juda wakambi; wakati vati: Ukundi weya untu one mukanda efula, lam’akindi kumbeka?” Wɛ mbokaka lande na kakiwɔ l’okandokando? Yeso kɔmbɔtɔ ndoko kalasa y’ambewi w’ɛlɛmbɛ w’Ase Juda, ɔnkɔnɛ—lo ndjela tokanyi tawɔ—nde kombeka okanda! Koko, Yeso akakokaka mbishola ndo mbala tenyi dimɔtshi dia l’Afundelo w’Ekila aha ndoko l’okakatanu. (Luka 4:16-21) Kɛdikɛdi, otshudi ɔsɔ w’abaya w’Ose Ngalileya akawaetshaka ndo vɔ lawɔ Ɛlɛmbɛ wa Mɔsɛ! (Joani 7:19-23) Woho akɔna wakakoke dikambo sɔ salema na?
5 Oko walaso lo divɛsa 16 la 17, Yeso akalembetshiya ate: “Wetshelu ami aha wami, keli wa one lakantumi. Naka untu ayutsha lulangu la [Nzambi, NW], ndi ayeya wetshelu, kana uma le [Nzambi, NW] mbewo, kana dime kayata.” Vɔ wakalangaka mbeya ɔnɛ laketsha Yeso, ndo nde akâhonwɛ dia Nzambi mbakôlakanya okanda wakandeyaka!—Joani 12:49; 14:10.
6 Woho akɔna wakakambaka Yeso la okanda wakandeke na? Oko wofundamidiɔ lo Joani 7:18, Yeso akate ate: “One latuyataka, atuyangaka lutumbu landi, keli one layanga lutumbu la one lakûtumi, ndi eko mete; kolo kema l’utema andi.” (Sho mbɛnganyisha alɛta ango.) Mɛtɛ, Yeso akasale dimɛna efula dia kamba la okanda wakandeke dia tombola Jehowa, “Ɔnɛ lele la ewo ka kokele.”—Jɔbɔ 37:16, NW.
7 Ɔnkɔnɛ, wetshelo w’ohomba wakondjaso oma le Yeso v’ɔnɛ—sho pombaka kamba la okanda wakateke, aha dia ndjatombola shamɛ, koko dia tombola Jehowa. Paka ɔsɔku mbakokaso kamba la okanda wakateke lo yoho yoleki ɔlɔlɔ. Ko lâsɔ, woho akɔna wakokayɛ kamba la okanda wakayeke dia tombola Jehowa na?
8 Mbetsha okanda kɛdikɛdi: “ndowanya oma l’olakanyelo wa la kalasa ndo oma lo tshelo yɔlɔmbwami djekoleko lo dikoka dimɔtshi, l’olimu ɔmɔtshi, kana lo lutumu lɔmɔtshi.” Kakianɛ, nyɛsɔ tɔsɛdingole eyango ɛnɛi w’ohomba wa kalasa k’ɔlɔlɔ ndo woho wakokaso kamba l’ɔm’ɔmɔ a l’atei w’eyango akɔ dia tombola Jehowa. Kalasa k’ɔlɔlɔ pombaka tokimanyiya (1) dia sho mbala dimɛna, (2) dia sho funda ɔlɔlɔ, (3) dia sho mɔmbɔ wɔɔngɔ ndo ndowana dionga, ndo (4) dia sho mbeya djimulimu mɔtshi yele ohomba lo lɔsɛnɔ la lushi la lushi.
Mbeya Mbala Dimɛna
9 Oyango wa ntondo ele mbeya mbala dimɛna. Lande na kele ekɔ ohomba efula di’onto monga ombadi w’ɔlɔlɔ na? Ansiklopedi ɔmɔtshi (The World Book Encyclopedia) wekɔ lo nembetshiya ɔnɛ: “Walelo . . . ekɔ dikambo dioleki ohomba di’onto mbeka ndo ɔtɔi ɔmɔtshi l’atei w’akoka woleki ohomba lo lɔsɛnɔ la lushi la lushi. . . . Ambadi w’eshika tokimanyiyaka dia sho kenga tshunda di’ɔngɔnyi ndo diatahame. L’etena kakɔ kâmɛ, vamɛ mpokɔka akambo efula, ndo mongaka la nsɛnɔ y’ɔngɛnɔngɛnɔ.”
10 Ko naka walelo, lo tshɛ kawɔ, kokaka tokimanyiya dia sho ‘mpokɔ akambo efula, ndo monga la nsɛnɔ y’ɔngɛnɔngɛnɔ,’ kete hoke walelo wa Dui dia Nzambi! Walelo wa ngasɔ mɔmbɔlaka wɛɔngɔ aso l’otema aso dia sho mpotɔ tokanyi ta Jehowa l’asangwelo ande, ndo naka sho shihodia akambo asɔ, kete nsɛnɔ yaso yayoyala l’oyango ɔmɔtshi. Ndo nto, Heberu 4:12 mbutaka ɔnɛ: “Diui dia [Nzambi, NW] dieko la lumu, la wangasanu.” Naka sho mbalaka Dui dia Nzambi ndo kanaka ladiɔ yimba, kete tayosukana la ɔnɛ lele Kiɔkɔ yadiɔ, ndo tayotshutshuyama dia sala etshikitanu ɛmɔtshi lo nsɛnɔ yaso dia sho ndeka mbɔngɛnyangɛnya. (Ngalatiya 5:22, 23; Efeso 4:22-24) Etema aso totshutshuyaka la wolo tshɛ dia sho kahana l’anto akina mɛtɛ y’ohomba efula yâlaso. Akambo asɔ tshɛ tombolaka Jehowa Nzambi, Ombetsha a Woke. Mɛtɛ, paka ɔsɔku mbakokaso kamba la dikoka diaso dia mbala lo yoho yoleki ɔlɔlɔ!
11 Oyadi dikɛnda mbeso kana opalanga, sho pombaka mbeka dia mbeya mbala dimɛna, nɛ dia walelo wekɔ ohomba efula lo lɔsɛnɔ laso l’Okristo. Lâdiko dia walelo wa mbala la mbala wa Dui dia Nzambi, ekongelo k’oshika ka wekelo w’onto ndamɛ pombaka salemaka kâmɛ l’ɔsɛdingwelo w’avɛsa wa lushi la lushi oma lo biukubuku yelɛwɔ ɔnɛ Scrutons les Écritures chaque jour, mbokaka sso lo Tshoto y’Etangelo la Réveillez-vous!, ndo nɔngɔsɔlaka nsanganya y’Akristo. Ko kayotota lo dikambo di’olimu aso w’Okristo na? Mɛtɛ, di’onto sambisha lo sɛkɛ, kalola dia tenda anto, ndo mbeka l’anto Bible, nde pombaka mbeya mbala dimɛna.
Mbeya Funda Ɔlɔlɔ
12 Oyango wa hende wahombaso mbohɔka v’ɔnɛ: kalasa k’ɔlɔlɔ pombaka tokimanyiya dia sho mbeya funda ɔlɔlɔ. Aha paka l’ɔtɛ w’ɔnɛ ofundelo sambiyɛka anto akina tɔtɛkɛta taso la tokanyi taso, koko ofundelo mbalamaka. Ambeta deko efula, apami amɔtshi w’Ase Juda oko 40 wakɔsaka akatshi wa kongo kana dikoho dia nyama dia vɔ funda awui wakayokengaka Afundelo wakasambiyama oma le Nzambi. (2 Timote 3:16) Ɔsɔ mɛtɛ aki efundelo woleki ndo wɛnɛ tshɛ wambofundama polo ndo nshi nyɛ! Aha la tamu, Jehowa akalɔmbɔla ofundelo ndo osangwelo w’awui asɔ w’ekila l’edja ka deko la deko dia vɔ koma polo ndo le so aha l’otshikitanu ɔmɔtshi mbɔtɔ lɔkɔ. Onde sho kema la lowando l’ɔtɛ w’ɔnɛ Jehowa akatshutshuya anto dia vɔ funda awui ande, lo dihole dia sho nongamɛka awui watotewɔ l’onyɔ oto?—Ɛdika la Etumbelu 34:27, 28.
13 Lo nshi ya ntondo, paka elui ɛmɔtshi eto w’anto waki la diɛsɛ, ɛnyɛlɔ oko afundji wa la Mezɔpɔtamiya la wa l’Edjibito, mbakeyaka mbala la funda. Lo yoho yotshikitanyi efula, lo wodja w’Isariyɛlɛ, onto tshɛ akakeketshamaka dia nde mbeya mbala la funda. Didjango diele lo Euhwelu k’Elembe 6:8, 9 diakatɛka Ase Isariyɛlɛ dia vɔ funda awui lo dikɔhɔ dia l’asoko awɔ, kânga mbokɛmadiɔ hwe ɔnɛ ɔsɔ mɛtɛ aki lo yoho ya didjidji, mɛnyaka ɔnɛ vɔ wakeyaka funda. Oma ko tɔkɛndakɛnda, ana wakekaka woho wa vɔ funda. Wa nomb’ewo mɔtshi kanyiyaka ɔnɛ wakɔsaka alamanaka waki Guézer, ɔmɔtshi a l’atei wa kɔpi y’efundelo wa lo Hɛbɛru yoleki edja efula, dia kimanyiya ambeki dia vɔ salanganya wɛɔngɔ awɔ.
14 Ko woho akɔna wakokaso kamba l’akoka aso wa funda lo yoho yasungana ndo y’ɔlɔlɔ na? Mɛtɛ, ele lam’ayotofundaka towuiwui tɔmɔtshi lo nsanganya y’Akristo la lo nsanganya ya weke. Mukanda wofundami kânga la “yema y’awui tshitshɛ tsho” kokaka keketsha ɔnɛ latata hemɔ kana mɛnya lowando lele laso otsha le ɔnangɛso ɔmɔtshi kana kadiyɛsɔ kɛmɔtshi kakatosalɛ ɔlɔlɔ kana kakatolongola lakande. (1 Petero 5:12) Naka ose etshumanelo ɔmɔtshi ambovusha onto ɔmɔtshi lokande ngandji, kete mukanda wofundami la yema y’awui tshitshɛ kana kartɛ k’esambelo kokaka ‘mbosamba’ l’ɔtɛ aso. (1 Tesalonika 5:14) Kadiyɛso kɛmɔtshi k’Okristo kakavusha nyango la hemɔ ka kansɛrɛ akalembetshiya ate: “Ɔngɛnyi ami ɔmɔtshi akafundɛ mukanda wa dimɛna efula. Dikambo sɔ mɛtɛ diakakimanyiya efula, nɛ dia lakakokaka mbala mukanda akɔ mbala la mbala.”
15 Yoho mɔtshi y’ɔlɔlɔ yakokaso kamba l’akoka aso wa funda dia tombola Jehowa ele lam’ayotofunda mukanda ɔmɔtshi dia sambisha onto akambo wa Diolelo. Lo tena dimɔtshi, mukanda mbeyaka monga ohomba dia sho tetemala mbɔtɔnɛ l’anto w’eyoyo wayasha lo mɛtɛ, wanɛ wodjashi lo ahole wanganyi la so etale. Hemɔ mbeyaka koshimba lo tshanda mɔtshi dia wɛ ntshɔ dia tosambisha lo luudu la luudu. L’etena kɛsɔ, ondo mukanda kokaka mbuta kɛnɛ kotoyota otondoyala tshondo yayɛ mbotshwe lɛkɔ.
16 Nyɛsɔ tênde ɛnyɛlɔ kɛmɔtshi. Ambeta ɛnɔnyi efula, Ɔmɛnyi wa Jehowa ɔmɔtshi akafunde mukanda ɔmɔtshi, lo mukanda akɔ, nde akasambisha wadi aki odo ɔmɔtshi lele nyɔi k’omɛnde kakewoyama lo jurunalɛ ya lo ngelo kawɔ. Nde konongola ndoko okadimwelo. Ko lo Tshaka Fudu 1994, lâsɔ ko ambeta ɛnɔnyi ndekana 21, Ɔmɛnyi wa Jehowa ɔsɔ akayolongola mukanda ɔmɔtshi oma le ɔn’aki mama kakɔ kakandafundɛ mukanda. Ɔna omoto ɔsɔ akafunde ate:
17 “Lo Mɔmbi 1973, wɛ akafundɛ mama mukanda dia mbosamba l’ɔkɔngɔ wa nyɔi ka papa. Dimi laki l’ɛnɔnyi divwa l’etena kɛsɔ. Mama akeke Bible, koko polo ndo kakianɛ, nde atayala okambi wa Jehowa. Koko, wekelo ande wakayokonyaka dia dimi ndjɔtɔ l’atei w’etshumanelo. L’ɔnɔnyi 1988—lâsɔ ko ambeta ɛnɔnyi 15 l’ɔkɔngɔ wa sho nongola mukanda ayɛ—dimi lakatatɛ mbeka Bible. Dimi lakalongola batismu lo Asase a Ndjoko 9, 1990. Dimi lekɔ la lowando efula l’ɔtɛ wa mukanda ayɛ wambeta ɛnɔnyi efula, ndo lekɔ l’ɔngɛnɔngɛnɔ efula dia kewoya nte ntɔngɔ yakayonɛ yakole oma l’ekimanyielo ka Jehowa. Mama akambisha mukanda ayɛ dia dimi nama, ndo dimi nangaka nkeya. Dimi lambolongamɛ nte mukanda ɔnɛ wayokoma l’anya ayɛ.” Mukanda waki ɔna omoto ɔsɔ, kâmɛ la dihole diodjashinde diakandafunde lɔkɔ la numɛlɔ ya telefɔnɛ, akakome le Ɔmɛnyi wa Jehowa wakafundɛ nyango mukanda ambeta ɛnɔnyi efula. Ohokanyiya woho wakambe osekaseka ɔsɔ lam’akandalongola leeta la lo telefɔnɛ oma le Ɔmɛnyi wa Jehowa ɔsɔ—ɔnɛ latetemala funda mikanda dia kahana l’anto akina elongamelo ka Diolelo!
Mɔmbɔ Wɔɔngɔ, Ndowana Dionga ndo Pama lo Nyuma
18 Oyango wa sato v’ɔnɛ: kalasa k’ɔlɔlɔ pombaka tokimanyiya dia sho mɔmbɔ wɔɔngɔ ndo ndowana dionga. Lo nshi yakafundamaka Bible, olakanyelo wakɔmbɔlaka wɔɔngɔ ndo wakalowanyaka dionga di’ana wakɔsamaka oko ɔkɛndɛ ɔmɔtshi wa ntondo waki ambutshi. Ana waketshamaka, aha paka dia mbeya mbala la funda tsho, koko kɛnɛ koleki ohomba ele, vɔ waketshamaka Ɛlɛmbɛ wa Nzambi, lo kɛnɛ tshɛ kakawasalaka lo nsɛnɔ yawɔ. Ɔnkɔnɛ, lo wetshelo ɔsɔ wakâlakanyaka ɛkɛndɛ wa l’ɔtɛmwɛlɔ, adjango w’endana la diwala, la diokanelo dia l’atei a nkumbo, ndo dionga di’ɔlɔlɔ l’akambo wa dieyanelo, kâmɛ ndo ɛkɛndɛ awɔ otsha le anyawɔ anto. Wetshelo wa ngasɔ akawakimanyiyaka dia vɔ pama ndo lo nyuma, koko aha paka dia mɔmbɔ wɔɔngɔ oto la ndowana dionga.—Euhwelu k’Elembe 6:4-9, 20, 21; 11:18-21.
19 Kayotota lo nshi yaso nyɛ na? Kalasa k’ɔlɔlɔ ka l’emunyi kekɔ ohomba. Tɔ tokimanyiyaka dia sho mɔmbɔ wɔɔngɔ. Ko lende akokaso ntshɔ dia tɔɔtɔ kalasa kayotɛnya adjango woleki ɔlɔlɔ w’endana la lɔkɛwɔ wahombaso ndjela ndo wayotokimanyiya dia sho pama lo nyuma na? L’atei w’etshumanelo k’Akristo, sho kokaka mbɔtɔ l’ekongelo ka kalasa ka Teokrasi kahatanema l’ahole akina tshɛ lanɛ la nkɛtɛ. Oma l’ekimanyielo ka wekelo aso w’onto ndamɛ wa Bible ndo w’ekanda ekina w’endana la Bible, kâmɛ la wetshelo washama lo nsanganya ya l’etshumanelo, la lo nsanganya ya weke, sho kokaka kondja wetshelo w’ohomba efula ndo watatetemala tsho—wetshelo w’oma le Nzambi—aha la futa falanga! Kakɔna kekaso lo wetshelo akɔ ɔsɔ na?
20 Etena kamɛso mbeka Bible, sho mbekaka atshina a wetshelo w’oma l’Afundelo, ‘wetshelo w’etatelo.’ (Heberu 5:14) Lam’atatatetemala, sho ndɛka “mbu ya nde ya wulu”—mbuta ate mɛtɛ yoshami etale. (Heberu 6:1) Koko lâdiko dia lâsɔ, sho mbekaka ɛlɛmbɛ wa Nzambi watolakanya dia sho sɛna woho walanga Nzambi. Oko ɛnyɛlɔ, sho mbekaka dia mbewɔ mbekelo la ditshelo ‘diadja demba mindo’ ndo dia sho nɛmiya lowandji ndo nɛmiya demba la diangɔ diakana. (2 Koreto 7:1; Tito 3:1, 2; Heberu 13:4) Ndo nto, sho ndjɛnaka ohomba wa monga la losembwe, wa mbidja tshete l’olimu aso, ndo wa ndjela ɛlɛmbɛ wa Bible lo kɛnɛ k’endana l’akambo wa dieyanelo. (1 Koreto 6:9, 10; Efeso 4:28) Naka sho pama lo kitanyiyaka adjango asɔ, kete tayohama lo nyuma, ndo diokanelo diasaso la Nzambi diayoleka ndowana. Lâdiko dia lâsɔ, lɔkɛwɔ laso l’anto wamamema Nzambi teetɛka ase ngelo w’ɛlɔlɔ, oyadi lo dihole diakɔna tshɛ diodjashiso. Ndo dikambo sɔ mbeyaka tshutshuya anto akina dia vɔ tombola Jehowa Nzambi—Kiɔkɔ ya wetshelo w’oma le Nzambi.—1 Petero 2:12.
Mbeya Djimulimu y’Ohomba lo Lɔsɛnɔ la Lushi la Lushi
21 Oyango wa nɛi wa kalasa k’ɔlɔlɔ ele dia kimanyiya onto dia nde mbeya djimulimu mɔtshi yele ohomba lo lɔsɛnɔ la lushi la lushi. Lo nshi yakafundamaka Bible, ambutshi waketshaka anawɔ ndo tolimulimu tɔmɔtshi. Ana w’amato wakekaka elimu wa lo luudu. Tshapita ya komelo ya Tukedi mɛnyaka ɔnɛ elimu akɔ ɛsɔ waki efula ndo weoho la weoho. Ɔnkɔnɛ, ana wa amato wakeyaka poma ahɔndɔ, mbɛla asaka la tangangɔ tokina, katɛ diangɔ dia ndɛ ndo nɔngɔsɔlaka luudu l’otondo, ntshɔ dia tosomba diangɔ, ndo somba kana sondja bɛtshi dia nkɛtɛ kana dia dikambɔ. Lo ndjela mbekelo kawɔ, ana w’apami wakekaka olimu wa l’emunyi w’ambutshi awɔ w’apami, oyadi okambelo wa dikambɔ kana elimu w’anya. Yeso akeke olimu w’otshudi w’abaya oma le Yɔsɛfu, she ka lôdia; omalɔkɔ, vɔ kômbelɛka paka ɔnɛ “ona utshudi w’abaya” oto koko wakawelɛka ndo ɔnɛ “utshudi [w’abaya, NW].”—Mateu 13:55; Mako 6:3.
22 Ndo ɛlɔ kɛnɛ, kalasa k’ɔlɔlɔ kimanyiyaka onto nto dia nde ndjokotsha ehomba wa nkumbo kande lushi lɔmɔtshi. Ɛtɛkɛta waki ɔpɔstɔlɔ Paulo wofundami lo 1 Timote 5:8 mɛnyaka ɔnɛ ɔkɛndɛ wa kotsha ehomba w’ase nkumbo wekɔ ɔkɛndɛ w’ekila. Nde akafunde ate: “Keli naka untu humbi wane wuto la ndi, djekaleka wa lu khumbu kandi, ndi ambutuna mbetawo kandi, ambuleka untu lahetawo kolo.” Ɔnkɔnɛ, kalasa pombaka nɔngɔsɔla ana dia vɔ ndjeya mɛmba ɛkɛndɛ wayowoyonga lawɔ lo lɔsɛnɔ ndo mbakimanyiya dia vɔ monga anto wakamba olimu efula l’atei wa tshunda.
23 Polo ndo lende ahombaso komɛ la mbɔtɔ kalasa ka l’emunyi na? Dikambo sɔ mbeyaka tshikintana lo wodja la wodja. Ko naka lo dihole dieyɛ, dia wɛ kondja olimu wɛ pombaka mbɔtɔ kalasa kolekanyi yɛdikɔ yalɔmba ɛlɛmbɛ wa lɛɛta, kete ɔsɔ ekɔ ɔkɛndɛ w’ambutshi dia vɔ nɔmbɔla anawɔ dia mbɔsa yɛdikɔ y’endana la kalasa ya la diko, vɔ pombaka mbɛdikola ɛlɔlɔ la kɔlɔ kele lo kalasa shɔ ya la diko. Ko saki kakɔna kahomba onto monga latɔ lam’alangande nyomɔtɔ kalasa naka dikambo sɔ diambɛnama ohomba efula na? Mɛtɛ, aha saki ka ngɔna, ka ndjayangɛ lokumu, kana ka ndjatombola. (Tukedi 15:25; 1 Timote 6:17) Ohɔ wetshelo wakatakondja oma l’ɛnyɛlɔ ka Yeso—sho pombaka tombola Jehowa la okanda wakateke. Naka tambolanga nyomɔtɔ kalasa, kete saki kaso pombaka monga ka sho monga la yema y’ekondjelo ka l’emunyi kakoka dia sho kambɛ Jehowa lo yɛdikɔ y’efula ndo la wolo aso tshɛ l’olimu w’Okristo.—Kolosai 3:23, 24.
24 Ɔnkɔnɛ, nyɛsɔ totetemale mbidja weolo dia mbeka okanda w’ɔlɔlɔ wa l’emunyi. Nyɛsɔ tokambake la ekongelo ka kalasa ka Nzambi katatetemala tsho dia sho kondja wahɔ tshɛ watomba oma lɔkɔ, kalasa kakɔ kɛsɔ tanemaka l’atei w’ɔlɔngɔswamelo wa Jehowa. Ndo tatohɛke wetshelo w’ohomba wakatakondja oma l’ɛnyɛlɔ ka Yeso Kristo, ɔnɛ lakeke okanda woleki wɔnɛ tshɛ wambeka onto ɔmɔtshi la lanɛ la nkɛtɛ—sho pombaka kamba la okanda wakateke, aha dia sho ndjatombola shamɛ, koko dia tombola Jehowa Nzambi, Ombetsha woleki woke tshɛ!
Lo losanganya la distrikɛ la l’ɔnɔnyi 1995/96 laki l’ɔtɛ a dui w’ɔnɛ: “Totombole Nzambi l’Ɔngɛnɔngɛnɔ,” la Société Watch Tower akatondja biukubuku y’oyoyo yelɛwɔ ɔnɛ: Les Témoins de Jéhovah et l’instruction. Biukubuku shɔ yele la ndjɛkɛ 32 ndo yoludi l’esato w’amɛna yakatondjama djekoleko lo dikambo di’embetsha. Polo ndo l’etena kɛnɛ, yɔ yambokadimwama l’ɛtɛkɛta 58.
Lande na kakawatondjɛ embetsha biukubuku shɔ na? Dia mbakimanyiya woho wa vɔ shihodia tokanyi t’ambeki wele ana w’Ɛmɛnyi wa Jehowa. Awui akɔna wele lo biukubuku yakɔ? Lo yoho yokɛma hwe ndo yakeketsha onto, yɔ nembetshiyaka tokanyi taso l’akambo wele oko: kalasa ya lâdiko, afɛstɔ w’eohwelo ka nshi y’eotwelo, Nɔɛlɛ ndo dilɛmiɛlɔ dia dalapo. Ndo nto, biukubuku shɔ shikikɛka embetsha ɔnɛ sho nangaka anaso kondja wahɔ woleki ɔlɔlɔ oma lo kalasa kɔtɔwɔ ndo ɔnɛ sho nangaka kimanɛ l’embetsha l’otema ɔtɔi, lo kimanyiyaka anaso lo wekelo awɔ.
Woho akɔna wakokaso kamba la biukubuku Instruction na? Lam’ele yɔ yakalɔngɔswama lo dikambo di’embetsha, toyikahanyake le embetsha, le ɛlɔhɛ la le ewandji ekina wa kalasa. Sho kombolaka dia biukubuku shɔ kimanyiya embetsha tshɛ dia vɔ shihodia tokanyi taso la wetshelo aso ndo lande na kalangaso ndjatshikitanya l’anto tena dimɔtshi. Ambutshi wambokeketshama dia kamba la biukubuku shɔ oko ehomɔ k’ohomba wonya wasawolawɔ l’embetsha walakanya anawɔ.
[Study Questions]
1. Etena kakɔna ndo woho akɔna wakatatɛ kalasa?
2-4. (a) Lo ndjela kɛnɛ kofundami lo Joani tshapita 7, kakɔna kakasalemaka lam’akatshu Yeso lo Difɛstɔ dia Tabɛrnakɛlɛ dia l’ɔnɔnyi 32 T.D.? (b) Lande na kakakandakandaka Ase Juda lam’akawɛnyi woho wakalakanyaka Yeso?
5, 6. (a) Woho akɔna wakalembetshiya Yeso kiɔkɔ ya wetshelo ande? (b) Woho akɔna wakakambe Yeso la okanda wakandeke?
7, 8. (a) Woho akɔna wahombaso kambaka la okanda wakateke? (b) Naa eyango ɛnɛi wa kalasa k’ɔlɔlɔ?
9. Lande na kahomba onto mbeya mbala dimɛna?
10. Woho akɔna watokimanyiya walelo wa Dui dia Nzambi dia sho mpokɔ akambo efula, ndo monga la nsɛnɔ y’ɔngɛnɔngɛnɔ?
11. Kakɔna kahombaso mbidjaka l’atei w’ekongelo ka dimɛna ka wekelo w’onto ndamɛ?
12. (a) Lande na kele ekɔ ohomba di’onto mbeya funda ɔlɔlɔ? (b) Naa efundelo woleki ndo wɛnɛ tshɛ wambofundama polo ndo nshi nyɛ?
13. Kakɔna kɛnya ɔnɛ Ase Isariyɛlɛ wakeyaka funda?
14, 15. Naa weoho ɛmɔtshi wakokaso kamba l’akoka aso wa funda lo yoho y’ɔlɔlɔ ndo yasungana?
16, 17. (a) Ɛnyɛlɔ kakɔna kɛnya ohomba wa fundaka mukanda ɔmɔtshi dia sambisha onto akambo wa Diolelo? (b) Onde wɛ kokaka kɔndɔla ɔkɔndɔ ɔmɔtshi wa ngasɔ?
18. Lo nshi yakafundamaka Bible, woho akɔna wakasalaka ambutshi dia mbisha anawɔ wetshelo wa mbaɔmbɔla wɔɔngɔ ndo dia vɔ ndowana dionga?
19. Lende akokaso tana kalasa kayotɛnya adjango woleki ɔlɔlɔ w’endana la lɔkɛwɔ wahombaso ndjelaka ndo watokimanyiya dia sho pama lo nyuma?
20. Kakɔna kekaso lo wetshelo w’oma le Nzambi, ndo etombelo akɔna waya oma lɔkɔ?
21. Lo nshi yakafundamaka Bible, tolimulimu takɔna takawetshaka ana?
22, 23. (a) Kalasa pombaka nɔngɔsɔla ana lo dikambo diakɔna? (b) Saki kakɔna kahombaso monga latɔ lam’alangaso nyomɔtɔ kalasa naka dikambo sɔ diambɛnama ohomba?
24. Wetshelo akɔna wakatakondja oma l’ɛnyɛlɔ ka Yeso wahatakoke mbohɛ?
[Caption]
[Wembola]
[Caption on page 16]
[Diombwɛlo di’osato wa lo lɛkɛ 16]
Kalasa kakɔsamaka la nɛmɔ efula l’Isariyɛlɛ w’edjedja
[Caption on page 20]
Okonde Ayôkadimola Na?
◻ Woho akɔna wakakambaka Yeso la okanda wakandeke?
◻ Lande na kele ekɔ ohomba dia mbeya mbala dimɛna?
◻ Woho akɔna wakokaso kamba l’akoka aso wa funda dia sho tombola Jehowa?
◻ Woho akɔna watokimanyiya kalasa ka Nzambi dia sho mɔmbɔ wɔɔngɔ ndo pama lo nyuma
◻ Kalasa k’ɔlɔlɔ pombaka nto kimanyiya onto dia nde mbeya woho akɔna wa djimulimu?
[Caption on page 19]
[Box on page 19]
Ekimanyielo K’oshika Le Embetsha