Ɔtɛmwɛlɔ: Ambutshi ami kana dimɛ kasɔna?

LO WODJA wa Pologne, anto efula mbutɛka Ɛmɛnyi wa Jehowa ɔnɛ: “Dimi lakotɔ l’ɔtɛmwɛlɔ ami ndo layovɔ paka lɔkɔ.” Kɛsɔ mɛnyaka dia, le wɔ, ɔtɛmwɛlɔ aya sango diatshikɛ ambutshi anawɔ. Onde anto wa lo ngelo kanyu mbutaka ngasɔ? Mbala efula, etombelo akɔna wele la kanyi shɔ? Ɔtɛmwɛlɔ aya dui di’anyanya ndo aya oko mbekelo kɛmɔtshi ka lo nkumbo. Onde dikambo dia ngasɔ kokaka komɛ Ɛmɛnyi wa Jehowa wakeye akambo wa mɛtɛ lo tshimbo ya ambutshi awɔ kana watshɛwɔ?

Dikambo sɔ kokomɛ Timɔtɛ laketshama oma le nyango ndo tshɛnde ka womoto dia monga la mbetawɔ ndo mboka Nzambi ka mɛtɛ ngandji. Timɔtɛ akeye efundelo w’ekila “umaka dikenda.” L’edjedja ka wonya, Timɔtɛ kâmɛ la nyango la tshɛnde ka womoto wakayoshikikɛ dia awui waketshamaka lo Lokristo aki awui wa mɛtɛ. Nde ‘aketawoyama’ kɛnɛ kakandeke oma l’Afundelo lo dikambo dia Yeso Kristo. (2 Tim. 1:5; 3:14, 15) Ɔnkɔnɛ, kânga mbasala ambutshi w’Akristo la wolo ɛlɔ kɛnɛ dia kimanyiya anawɔ dia vɔ monga ekambi waki Jehowa, ana vɔamɛ pombaka monga la nsaki ka kambɛ Jehowa.​—Mako 8:34.

Onto tshɛ pombaka mbetawoyama l’ekimanyielo ka ekanelo ka yimba k’oshika dia nde kambɛ Jehowa la ngandji ndo nama olowanyi ande oyadi kakɔna tshɛ kayotomba. Oma lâsɔ mbetawɔ kande kayonga nge ndo kayoshikimala dimɛna.​—Ef. 3:17; Kol. 2:6, 7.

Ɔkɛndɛ wele la ana

Alberta lakodiama lo nkumbo k’Ɛmɛnyi wa Jehowa mbutaka ɔnɛ: “Mbala tshɛ, dimi lokɔsaka dia Ɛmɛnyi wa Jehowa wekɔ l’ɔtɛmwɛlɔ wa mɛtɛ, koko l’etena kɛmɔtshi, laki l’okakatanu dia mbetawɔ kɛnɛ kakawataka lo dikambo dia yoho ya lɔsɛnɔ yakamahombe nsɛna.” Naka wɛ ekɔ ɔlɔngɔlɔngɔ kana osekaseka, ondo ndo wɛ lawɔ ekɔ la kanyi ya ngasɔ. Lande na kahayasale la wolo dia mbeya kɛnɛ kalɔmbama dia nsɛna lo yoho yalanga Nzambi dia sho nsɛna ndo ngɛnangɛna dia sala lolango lande? (Osam. 40:8) Albert tetemalaka mbuta ɔnɛ: “Lakatatɛ tsho nɔmba Nzambi. Laki l’okakatanu dia sala dui sɔ l’etatelo. Lakahombe sala la wolo dia tshungola etena ka nɔmbaka. Koko yema tshitshɛ l’ɔkɔngɔ, lakayɛna dia dimi kokaka monga onto la nɛmɔ lo washo waki Nzambi naka dimi sala la wolo dia sala kɛnɛ kele ɔlɔlɔ. Dui sɔ diakambisha wolo wa dimi sala etshikitanu wahombama.” Lo monga la diɔtɔnganelo dia dimɛna lam’asayɛ la Jehowa, wɛ kokaka monga la nsaki ka sala kɛnɛ katɔlɔmbande.​—Osam. 25:14; Jak. 4:8.

Ohokanyiya dia kɛnyɔ mɔtshi yakayakɛnyaka, ɛnyɛlɔ oko longanda kana ponde. Naka wɛ heye ɛlɛmbɛ kana heye kɛnya dimɛna, kete ondo wɛ hatoyaoka dimɛna. Ko naka wɛ mbeka ɛlɛmbɛ ndo koma manyi lo kɛnyɔ shɔ, shi kete wɛ ayɔngɛnangɛna ndjikɛnya ndo ayoyangaka waaso wa ndjikɛnyaka? Ngasɔ mbediɔ ndo lo kɛnɛ kendana la awui wa lo nyuma. Ɔnkɔnɛ, sala la wolo dia nɔngɔsɔlaka nsanganya y’Akristo ndo yasha tshɛ lɔkɔ. Oyadi ɛnɔnyi wele la yɛ, wɛ mbeyaka keketsha anto akina dia vɔ ndjela ɛnyɛlɔ kayɛ!​—Heb. 10:24, 25.

Ngasɔ mbediɔ ndo lo kɛnɛ kendana la mbutɛ anto akina awui wendana la mbetawɔ kayɛ. Dikambo sɔ nto pombaka salema oma lo ngandji, koko aha onto kotshutshuya la wolo. Yambola ɔnɛ: ‘Lande na kahombami mbutɛ anto akina akambo wendana la Jehowa? Ɛkɔkɔ akɔna wele la mi dia mbôka ngandji?’ Wɛ pombaka mbeya Jehowa oko wende Shɛso ka ngandji. Nde akate lo tshimbo ya Jeremiya ate: “Nyu nyayunyangaka, ku nyayumbishula, lam’ayunyunyanga l’utema tshe.” (Jer. 29:13, 14) Kakɔna kayokɔlɔmba dui sɔ? Jakub mbutaka ate: “Lakahombe tshikitanya ekanelo kami ka yimba. Lakɔtɔka lo nsanganya ndo lakatshɔka l’esambishelo oma ko dikɛnda diami, koko awui asɔ wakayokoma tsho oko awui wahombami salaka mbala la mbala. Paka etena kakamayeka dia mbeya Jehowa dimɛna mbakamayonga la diɔtɔnganelo dia ma ma la nde ndo mbakamayoyashaka l’akambo wa mɛtɛ.”

Monga la angɛnyi w’amɛna kokaka kimanyiya onto dia nde ngɛnangɛna olimu w’esambishelo. Yokedi mɔtshi yakasambiyama mbutaka ɔnɛ: “One latengolaka kame la akanga a yimba, atuyalaka kanga yimba.” (Tuk. 13:20) Ɔnkɔnɛ, ɔtɔ lɔngɛnyi la wanɛ wawesa eyango wa lo nyuma ndo wangɛnangɛna olimu waki Jehowa. Jola mbutaka ɔnɛ: “Lakakeketshama lo woho wakamɔtɔ lɔngɛnyi l’esekaseka wayasha efula l’olimu waki Jehowa. Lakatatɛ sambisha mbala la mbala l’ɔngɛnɔngɛnɔ w’efula.”

Ɔkɛndɛ wele la ambutshi

Jola mbutaka ɔnɛ: “Lekɔ la lowando l’efula le ambutshi ami lo woho wakawambetsha awui wendana la Jehowa.” Eelo, ambutshi mbeyaka monga la shɛngiya ya wolo efula lo ɛsɔnwɛlɔ wasala anawɔ. Ɔpɔstɔlɔ Paulo akafunde ɔnɛ: ‘Nyu waa papa, nyodia ananyu l’ɛlɛmbɛ la lo wetshelo waki Jehowa.’ (Ef. 6:4) Dako diakasambiyama sɔ mɛnyaka hwe ɔkɛndɛ wele la ambutshi wa mbetshaka anawɔ mboka yaki Jehowa, koko aha yawɔ hita. Lo dihole dia kɔkɔmiya lo yimba y’ɔnayɛ kɛnɛ kakombolayɛ sala kana kotsha, ayonga dui dia dimɛna efula dia wɛ mbokimanyiya dia nde ndjadjɛ oyango wa nsɛna lo yoho yɔtɔnɛ la asangwelo waki Jehowa!

Wɛ kokaka kɔkɔmiya ɛtɛkɛta waki Jehowa lo timba t’anayɛ ndo “kuwatelakewo, lam’udjashiye lu luudu laye, ndu lam’atayakendakenda lu mbuka, lam’etamiye, ndu lam’etoye.” (Euh. 6:6, 7) Kadiyɛso Ewa nde la Ryszard w’omɛnde wekɔ la ana asato ndo vɔ mbutaka ɔnɛ: “Takatɛkɛtaka efula dikambo dia toho totshikitanyi ta olimu wa lo tena tshɛ.” Etombelo akɔna waki la dui sɔ? “Anaso wakafundja nkombo yawɔ dia mbishaka asawo lo Kalasa k’olimu wa teokrasi lam’akiwɔ weke akɛnda efula, wakakome apandjudi ndo l’ɔkɔngɔ wakayɔsaka yɛdikɔ ya batizama. L’ɔkɔngɔ diko, vɔ wakayokambaka lo Bɛtɛlɛ kana oko ambatshi mboka wa pondjo.”

Ɛnyɛlɔ k’ɔlɔlɔ ka ambutshi kekɔ ohomba. Ryszard mbutaka ate: “Takayashikikɛ diaha nsɛna lɔsɛnɔ la dungi pende, mbuta ate monga la yoho mɔtshi ya lɔsɛnɔ la ngelo ko yoho kina l’etshumanelo.” Omalɔkɔ, yambola ɔnɛ: ‘Kakɔna kɛna anami lo lɔsɛnɔ lami? Onde vɔ mɛnaka dia dimi mbokaka Jehowa ngandji ka mɛtɛ? Onde vɔ mɛnaka ngandji kɛsɔ oma lo alɔmbɛlɔ ndo wekelo w’onto ndamɛ wasalami mbala la mbala? Onde vɔ kiɛnaka lo woho wɔsami olimu w’esambishelo, tɔkɛnyɔ, lomombo la l’emunyi ndo kɛnɛ katami lo dikambo dia ase etshumanelo akina?’ (Luka 6:40) Ana wayɔsɛdingolaka yoho yayɛ ya lɔsɛnɔ la lushi la lushi ndo wayɛna otshikitanu wele lam’asa kɛnɛ katayɛ la kɛnɛ kasalayɛ.

Ohokwelo wekɔ ohomba efula dia mbodia ana. Koko, Ɔtɛkɛta wa Nzambi wakasambiyama totɛka ɔnɛ: “Ekiya ona lu mbuka k’ololo kahumbandi ntsho.” (Tuk. 22:6, sho mbɛnganyisha alɛta ango) Ewa la Ryszard tetemalaka mbuta ɔnɛ: “Takɔsaka etena ka mbeka Bible l’ɔna l’ɔna.” Lo mɛtɛ, ambutshi mbahomba shikikɛ lo ndjela ehomba w’ɔna l’ɔna dia kana ekɔ ohomba mbekaka l’ɔna l’ɔna kana vɔ tshɛ kâmɛ. Oyadi yoho yakɔna ya wekelo yayowɔsɔna, pombaka salɛ ɔna l’ɔna akambo lo ndamɛ aha lo vɔ tshɛ. Dui sɔ nɔmbaka dia monga suke dia tshikitanya akambo ndo monga l’ekanelo k’ɔlɔlɔ. Ɛnyɛlɔ, lo dihole dia mbutɛ anayɛ ɔnɛ mishiki ɛmɔtshi wekɔ kɔlɔ, lande na kahayawaɛnya woho wa mbɔsa tɛdikɔ ta lomba ndo atɔndɔ wa lo Bible wɔtɔnɛ la dui sɔ?

Anayɛ kokaka mbeya shikaa kɛnɛ kalongamɛyɛ le wɔ ndo kikotsha. Koko, wɛ pombaka munanda etema awɔ. Tohɛke dia “esangweyu l’utema w’untu eli uku ashi wa dingunda. Keli kanga yimba ayukiduwula.” (Tuk. 20:5) Ongaka la shɛnɔdi, endaka tolembetelo takoka mɛnya okakatanu wakoka monga l’ɔnayɛ ndo ɔsa yɛdikɔ aha la tshimbatshimba. Aha la mbɛndja onongo, ɛnyande dia wɛ ndjakiyanyaka dikambo diande ndo okande ambola wakoka. Koko, onga la yewo diaha mboka ambola wamboleka efula. Woho wayakiyanyayɛ l’otema ɔtɔi ayokokimanyiya dia wɛ munanda otema ande ndo mbokimanyiya.

Ɔkɛndɛ wele la etshumanelo

Oko weyɛ okambi waki Nzambi, onde wɛ kokaka kimanyiya ɛlɔngɔlɔngɔ l’esekaseka wa l’etshumanelo dia vɔ monga la lowando lo sango dia lo nyuma diakawalongola? Kânga mbele ambutshi mbele l’ɔkɛndɛ wa mbetsha anawɔ, ase etshumanelo akina, djekoleko dikumanyi kokaka mbasha lonya lo welo wadjawɔ. Ekɔ mɛtɛ ohomba efula dia kimanyiya nkumbo yambatɔna l’awui w’ɔtɛmwɛlɔ.

Kakɔna kakoka dikumanyi sala dia kimanyiya ɛlɔngɔlɔngɔ l’esekaseka dia vɔ mboka Jehowa ngandji ndo ndjaoka dia etshumanelo kekɔ l’ohomba awɔ ndo mbaɔsaka la nɛmɔ? Mariusz lele ekumanyi l’etshumanelo kɛmɔtshi ka la Pologne mbutaka ɔnɛ: “Dikumanyi pombaka sawolaka mbala la mbala l’ɛlɔngɔlɔngɔ l’esekaseka. Vɔ hawohombe salaka dikambo sɔ paka etena katomba ekakatanu, koko vɔ kokaka disala lo waaso wele oko etena kasambishawɔ, l’ɔkɔngɔ wa nsanganya kana etena kasangawɔ lonya la wɔ.” Lande na kahanyambola ɛlɔngɔlɔngɔ l’esekaseka woho wayaokawɔ l’etshumanelo? Asawo w’amɛna wa ngasɔ kotolaka ɛlɔngɔlɔngɔ oya l’etshumanelo ndo mbakimanyiyaka dia vɔ ndjaoka dia ndo vɔ mbakenga etshumanelo.

Naka wɛ ekɔ ekumanyi, onde wɛ salaka la wolo dia mbeya ɛlɔngɔlɔngɔ l’esekaseka wa l’etshumanelo kanyu? Kânga mbayande nshi nyɛ ekumanyi l’etshumanelo, Albert lakatatɛkɛtshi dikambo diande la diko akahomana la ehemba efula lo nshi yakinde ɔlɔngɔlɔngɔ. Nde akate ate: “Etena kakimi leke ɔlɔngɔlɔngɔ, laki l’ohomba wa dikumanyi ndjaka ndjomenda.” Dikumanyi kokaka mɛnya nto dia vɔ ndjashaka le ɛlɔngɔlɔngɔ l’esekaseka lo nɔmba Nzambi dia vɔ pama lo nyuma.​—2 Tim. 1:3.

Ekɔ dui dia dimɛna efula dia ɛlɔngɔlɔngɔ l’esekaseka ndjasha l’awui wa l’etshumanelo. Naka hawosadi ngasɔ, kete wayoyasha l’eyango wa l’andja ɔnɛ. Esombe le, onde nyu kokaka sambisha ndo mbɔtɔ lɔngɛnyi la wɔ? Mbetshaka wenya wa diomuyelo kâmɛ l’ɛlɔngɔlɔngɔ l’esekaseka, kimanyiyaka dia vɔ ndjaɛkɛ le yɛ ndo mbɔtɔ la yɛ ɔngɛnyi. Jola mbutaka ɔnɛ: “Kadiyɛso kɛmɔtshi k’ombatshi mboka akayashaka efula le mi. Mbala kakamasambisha la nde mbaki mbala kami ka ntondo ka dimi sambisha l’ɔngɛnɔngɛnɔ.”

Ɔsɔnwɛlɔ ayɛ

Ɛlɔngɔlɔngɔ l’esekaseka le, onto l’onto ayambole ɔnɛ: ‘Eyango akɔna wambomoyadjɛ? Naka latabatizama, onde lamboyadjɛ oyango ɔsɔ?’ Yɛdikɔ ya batizama pombaka ndja oma lo ngandji k’efula koka onto Jehowa, koko aha dui diahomba paka ose nkumbo tshɛ sala.

Eelo, Jehowa onge ɔngɛnyi ayɛ wa mɛtɛ ndo ɔsaka akambo wa mɛtɛ la nɛmɔ di’efula. Jehowa akate lo tshimbo y’ɔprɔfɛta Isaya ɔnɛ: “Tuyakiyanyaki, dimi keli [Nzambi k]aye.” Jehowa ayotetemala monga la yɛ edja tshɛ kayoyongaka ɔngɛnyi ande. Lo mɛtɛ, nde ayokokeketsha ndo “[a]yukusukela ololo la lunya la[nde] la pami.”​—Is. 41:10.

[Nɔte ka l’ɛse ka dikatshi]

[Osato wa lo lɛkɛ 4]

Yanga dia mbeya kɛnɛ kele l’otema w’ɔnayɛ

[Osato wa lo lɛkɛ 6]

Yɛdikɔ ya batizama ndjaka oma lo ngandji k’efula koka onto Jehowa