Onde wɛ ‘amboka edio ndo amboshikimala lo etshina’?

ONDE wɛ atɛnaka otamba wa woke wasutshasutshama la mpɛpɛ ya wolo efula? Otamba ɔsɔ wekɔ lo shikikala kânga l’atei wa mpɛpɛ ya wolo shɔ. Lande na? Nɛ dia vɔ mbika edio awɔ wolo lo nkɛtɛ. Sho kokaka monga oko otamba ɔsɔ. Etena kalɔshanaso l’ekakatanu wa wolo lo lɔsɛnɔ laso, sho lawɔ kokaka tondoya naka sho ‘mbika edio ndo shikimala lo etshina.’ (Ef. 3:14-17) Ele etshina kɛsɔ?

Ɔtɛkɛta waki Nzambi mbutaka dia “Kristu Jesu ndame keli dive dia wuki dia tshuku” dia etshumanelo k’Akristo. (Ef. 2:20; 1 Kor. 3:11) Oko weso Akristo, sho keketshamaka dia ‘kɛndakɛnda kâmɛ la nde, mbika edio ndo shikimala le nde ndo shikimala lo mbetawɔ.’ Naka sho ntsha ngasɔ, kete tayonga l’akoka wa shika tanga la ntondo k’akambo walɔsha mbetawɔ kaso, mbidja ndo ‘ɛtɛkɛta w’ɔsɛlɔ’ waya oma lo “akambu wa kashi.”​—Kol. 2:4-8.

“Wekeki, utali, dungulungu la ohongo”

Ko ngande wakokaso ‘mbika edio’ ndo “shikimala lu mbetawo”? Yoho mɔtshi y’ohomba yakokaso mbika edio wolo lo nkɛtɛ, ele lo mbekaka Ɔtɛkɛta waki Nzambi wakasambiyama l’etete. Jehowa nangaka dia sho ‘shihodia kâmɛ l’ekilami wekeke, dongolongo la ɔhɔngɔ’ w’akambo wa mɛtɛ. (Ef. 3:18) Ndoko Okristo wahomba ngɛnangɛna dia komɛ tsho lo monga l’eokelo ka lâhahɛ kana ngɛnangɛna paka “akambu w’etatelu” wele l’Ɔtɛkɛta waki Nzambi. (Heb. 5:12; 6:1) Koko onto tshɛ la l’atei aso pombaka monga la nsaki ka wolo ka fudia eokelo kande k’akambo wa mɛtɛ wa lo Bible.​—Tuk. 2:1-5.

Lo mɛtɛ, kɛsɔ halange nembetshiya dia ewo k’efula keto mbalɔmbama dia sho ‘mbika edio ndo shikimala’ l’akambo wa mɛtɛ. Ngasɔ mbediɔ nɛ dia ndo Satana mbêya kɛnɛ kele lo Bible. Dui sɔ nɔmbaka akambo efula. Sho pombaka “mbeya ngandji ka Kristu kuleki [ewo].” (Ef. 3:19) Koko, naka sho mbeka l’ɔtɛ wa ngandji kokaso Jehowa ndo akambo wa mɛtɛ, kete eokelo kaso k’akambo wa mɛtɛ kayofula ndo mbetawɔ kaso kayokeketala.​—Kol. 2:2.

Hemba ewo kayɛ

Lande na kahayatatɛ pemba ewo kayɛ k’akambo wa mɛtɛ amɔtshi wele lo Bible oma ko kakianɛ? Ntsha ngasɔ mbeyaka kokimanyiya dia wɛ nyomoleka ndjasha l’etete lo wekelo ayɛ wa Bible w’onto ndamɛ. Ɛnyɛlɔ, adia avɛsa wotate wa lo mukanda wakafundɛ Paulo ase Ɛfɛsɔ. (Enda kiombo yele l’ɔtɛ a dui ɔnɛ: “Mukanda wakafundela Paulo asi Efeso.”) L’ɔkɔngɔ wa wɛ mbadia avɛsa asɔ, yambola ɔnɛ: ‘Onde dimi shihodiaka kitshimudi y’avɛsa wa lo Bible wodjiwɔ lo alɛta wa lolasha lo kiombo nyɛ?’ Nyɛsɔ tɔsɛdingole avɛsa akɔ l’ɔmɔmɔ.

Wakasɔnwama ‘la ntondo k’etongelo k’andja’

Paulo akafundɛ asekande ambetawudi ate: ‘Nzambi akatɔsɔnɛ la ntondo dia tôta oko ana wa yanyi lo tshimbo ya Yeso Kristo.’ Lo mɛtɛ, Jehowa akɔshi yɛdikɔ ya mbota anto amɔtshi oko ana wa yanyi dia vɔ tônga lo nkumbo kande ka l’olongo k’anto wa kokele. Ana wa yanyi waki Nzambi asɔ wayolɛ oko nkumi ya dikanga ndo ɛlɔmbɛdi kâmɛ la Kristo. (Romo 8:19-23; Eny. 5:9, 10) Etena kakandadje lowandji laki Jehowa tɔfwɛfwɛ mbala ka ntondo, Satana akasɛmɛ dia Nzambi kotonga anto kokele. Mbokɛmaka dia aki ɔlɔlɔ dia Jehowa sɔna anto akɔ wâmɛ wa lo nkumbo k’anto wa la nkɛtɛ dia vɔ monga la ɔkɛndɛ wa minya kɔlɔ tshɛ yele l’andja, mbidja ndo kiɔkɔ ya kɔlɔ, Satana Diabolo. Jehowa kotasɔnyi onto l’onto l’atei wa wanɛ wakahombe ndjonga anande wa yanyi, koko nde akashikikɛ dia olui ɔmɔtshi w’anto wayohomba tolɛ kâmɛ la Kristo l’olongo.​—Eny. 14:3, 4. 

‘Andja’ akɔna wakatɛkɛtaka Paulo etena kakandafundɛ asekande Akristo dia vɔ wakasɔnwama oko olui ‘la ntondo k’etongelo k’andja’? Nde kɔtɛkɛtaka dikambo dia etena kaki la ntondo ka Nzambi tonga nkɛtɛ kana anto. Dikambo sɔ diotosekola tɔndɔ diande diendana la losembwe. Ngande wakakoke Adama la Eva ndjokoya la Nzambi l’ɔtɛ wa ditshelo diawɔ otondonga nde akatashikike la ntondo ka vɔ tongama dia vɔ wayoyosala pɛkato? Ko etena kakɔna kakashikikɛ Nzambi woho wakandahombe ndjɔlɔngɔsɔla dikambo diakatombe etena kakayetaka Adama la Eva lo wedi waki Satana dia vɔ tɔmbɔkwɛ lowandji lande? Jehowa akayosalaka dikambo sɔ l’ɔkɔngɔ w’ambutshi aso wa ntondo mbɔtɔmbɔkwɛ, koko la ntondo k’anto wele kema kokele wakoka tshungɔma mbotɔ.

‘Lo ndjela ɔngɔnyi wa ngandji kande ka mamba’

Lande na kakate Paulo dia tɛdikɔ tatɛkɛtama lo avɛsa w’etatelo wa mukanda wakandafundɛ ase Ɛfɛsɔ takɔsama ‘lo ndjela ɔngɔnyi wa ngandji kande ka mamba’? Nde akate ngasɔ dia mɛnya dia Jehowa kotshutshuyama la wolo dia tshungola anto wakatshe pɛkato.

Oma ko eotwelo kaso, ndoko onto l’atei aso lakoka tshungola onyande. Koko, oma lo ngandji k’otamanya kokande anto tshɛ, Jehowa akɔshi tɛdikɔ ta lânde dia totshungola. Lo sɛdingola eongelo kaso k’anto wele kema kokele ndo wasala pɛkato, Paulo akate dia Nzambi akatotshungola l’ɔtɛ wa ngandji ka mamba katokande.

Sheke y’ekila ya sangwelo diaki Nzambi

L’etatelo, Nzambi kɔmɛnya woho wayondonya awui wa kɔlɔ wakela Satana. Ɔsɔ aki ‘sheke y’ekila.’ (Ef. 3:4, 5) L’ɔkɔngɔ diko, etena kakayoshikimalaka etshumanelo k’Akristo, Jehowa akayɛnyaka akambo efula wendana la woho wayondokotsha sangwelo diande di’oma ko etatelo diendana la anto ndo la nkɛtɛ. Paulo akalembetshiya dia ‘l’ekomelo ka tena diakashikikɛma,’ Nzambi ayokongɛ ‘yoho ya sala akambo,’ yayosala dia ditongami dia yimba tshɛ diaki Nzambi monga kâmɛ.

Lo Pɛntɛkɔsta 33 T.D. mbakatatɛ ntondo monga kâmɛ kɛsɔ, mbuta ate etena kakatatɛ Jehowa tshumanya wanɛ wayotolɛ la Kristo l’olongo. (Etsha 1:13-15; 2:1-4) Oma lâsɔ, ko otshumanyelo wa wanɛ wayodjasɛ lo Paradiso ka la nkɛtɛ l’ɛlɔmbwɛlɔ ka Diolelo diaki Mɛsiya. (Eny. 7:14-17; 21:1-5) Etelo k’ɔnɛ ‘yoho ya sala akambo’ hendana la Diolelo diaki Mɛsiya nɛ dia Diolelo sɔ diakayoshikikɛma lo 1914. Koko etelo kɛsɔ mendanaka la woho walɔmbɔla Nzambi akambo dia kotsha sangwelo diande dia kaloya kâmɛ lam’asa ditongami diande tshɛ.

‘Nyokome epalanga lo akoka wa eokelo’

Lo mɛtɛ, monga la mbekelo y’ɛlɔlɔ ya wekelo w’onto ndamɛ ayokokimanyiya dia shihodia dimɛna dimɛna “wekeki, utali, dungulungu la ohongo” w’akambo wa mɛtɛ. Koko, ekɔ mɛtɛ dia woho weso l’awui efula wa sala lo lɔsɛnɔ kokaka ndjokonya dia Satana kitshakitsha kana toshishɛ mbekelo yaso ya wekelo y’ɛlɔlɔ. Tetawɔke dia Satana kokonya dia wɛ sala ngasɔ. Kamba la ‘yimba’ yakakosha Nzambi dia wɛ koma ‘opalanga lo akoka wa eokelo.’ (1 Joa. 5:20; 1 Kor. 14:20) Yashikikɛ dia wɛ shihodiaka lande na ketawɔyɛ kɛnɛ ketawɔyɛ dia wɛ monga l’akoka wa mbewoya “elungamelu keli [l’otema ayɛ].”​—1 Pet. 3:15.

Ohɔsa dia wɛ aki l’Ɛfɛsɔ etena kakadiema mukanda wa Paulo mbala ka ntondo. Shi ɛtɛkɛta ɛsɔ wotohomba kotshutshuya dia kombola dia pama lo ‘ewo k’oshika k’Ɔna Nzambi’? (Ef. 4:13, 14) Eelo! Ɔnkɔnɛ, etawɔ di’ɛtɛkɛta wa Paulo wakasambiyama monga la shɛngiya yâmɛ le yɛ ɛlɔ kɛnɛ. Mboka Jehowa ngandji k’efula ndo monga la ewo k’oshika k’Ɔtɛkɛta ande ayokokimanyiya dia wɛ ‘mbika edio [wolo] ndo shikimala lo etshina’ ka Kristo. Lo ntsha ngasɔ mbayoyonga l’akoka wa shika tanga la ntondo k’ehemba akɔna tshɛ wakoka kêla Satana la ntondo k’ekomelo ka dikongɛ dia kɔlɔ di’akambo nɛ ndja.​—Osam. 1:1-3; Jer. 17:7, 8.

[Kiombo/​Osato wa lo lɛkɛ 27]

“Mukanda wakafundela Paulo asi Efeso”

‘Ɔtshɔkɔ wayale le Nzambi, She Nkumɛso Yeso Kristo, lakatɔtshɔkɔla l’ɛtshɔkɔ tshɛ wa lo nyuma l’ahole wa l’olongo kâmɛ la Kristo, oko wakandatɔsɔnɔla kâmɛ la nde la ntondo k’etongelo k’andja, dia sho monga ekila ndo aha la vadi la ntondo kande lo ngandji. Nɛ dia nde akatɔsɔnɛ la ntondo dia tôta oko ana wa yanyi lo tshimbo ya Yeso Kristo, lo ndjela lolango lande l’ɔlɔlɔ, lo lotombo la ngandji kande ka mamba koludi la lotombo kakandatoke lo tshimbo y’ɔnande la ngandji. Oma lo dikila diakandakimɔ oko tshungo mbambotokondja etshungwelo ndo edimanyielo ka pɛkato yaso, lo ndjela ɔngɔnyi wa ngandji kande ka mamba. Nde akakifudia le so lo lomba tshɛ ndo lo yimba y’ɔlɔlɔ, dia tosholɛ sheke y’ekila ya lolango lande. Nde akasangoya dia kongɛ yoho ya sala akambo l’ekomelo ka tena diakashikikɛma l’ɔtɛ wa lolango lande l’ɔlɔlɔ, mbuta ate tshumanya diangɔ tshɛ kâmɛ le Kristo, oyadi diangɔ dia l’olongo kana dia la nkɛtɛ.’​—Ef. 1:3-10.