Ɔtɛmwɛlɔ wa lo nkumbo wekɔ ohomba di’onto ndjoshimbamɛ

OHOKANYIYA wɔma wayoyala l’anto lo ‘ta dia lushi la woke la Nzambi Kanga-Wolo-Tshɛ’! (Eny. 16:14) Lo ɛtɛkɛta wa didjidji, ɔprɔfɛta Mika akafunde ate: “Ekungu wayolelo . . . ndu ekidi wayatate elonge. Uku elungu l’asuki la dja, uku ashi mbambuwutshulula l’ehulula.” (Mika 1:4) Mpokoso kakɔna kayokomɛ wanɛ wahakambɛ Jehowa? Ɔtɛkɛta waki Nzambi mbutaka ɔnɛ: “Wane wayudiakema le [Jehowa], wayukalema kalakala uma la kuma kemotshi ka kete pulu ndu la kuma kekina.”​—Jer. 25:33.

Lo menda ɛhɛmwɛlɔ ɛsɔ, ewandji wa nkumbo wele efula l’atei awɔ wekɔ lo mbodia ana vɔamɛ, pombaka ndjambola onto l’onto lo dikambo di’anawɔ waya l’ɛnɔnyi wa kana yimba ɔnɛ: ‘Onde vɔ wayoka lo ekambokambo kɛsɔ?’ Bible mbishaka eshikikelo k’ɔnɛ vɔ wayoka naka vɔ monga la diɔtɔnganelo dia wolo vɔ la Jehowa lo yɛdikɔ yɛdimi l’ɛnɔnyi awɔ.​—Mat. 24:21.

Ohomba wa monga l’etena ka salaka ɔtɛmwɛlɔ wa lo nkumbo

Oko wenyu ambutshi, nyoyashikikɛ dia salaka kɛnɛ tshɛ kakokanyu sala dia mbodia ananyu “lu elembe la lu wetshelu wa Khumadiondjo.” (Ef. 6:4) Ekɔ ohomba efula dia nyu mbekaka Bible kâmɛ l’ananyu mbala la mbala. Sho nangaka di’anaso monga oko Akristo waki la Filipi wakandola Paulo l’ɔtɛ wakawakitanyiyaka Jehowa la lolango lawɔ. Nde akafunde ate: “Okone, elangimi wa ngandji, uku akanyakitanyiaka diui tena tshe, aha paka lam’atumuyalaka la nyu, keli kakiane nyu nyambuleka nkitanyia efula lam’emi kema la nyu. Nyutshaki ulimu a panda kanyu la woma la lukumba.”​—Fil. 2:12.

Onde ananyu kitanyiyaka ɛlɛmbɛ wa Jehowa etena kenyu bu lawɔ? Kayotota dia etena kewɔ la kalasa? Ngande wakokanyu kimanyiya ananyu dia vɔ mbeya dia ɛlɛmbɛ wa Jehowa wekɔ amɛna woho wa vɔ nɔmbwama la wɔ kânga etena kenyu bu lawɔ?

Diakɔ diele, ɔtɛmwɛlɔ wa lo nkumbo kokaka monga ohomba efula dia keketsha mbetawɔ k’ananyu. Ɔnkɔnɛ, nyɛsɔ tɔsɛdingole awui asato w’ohomba wakimanyiya dia wekelo anyu wa lo nkumbo monga l’etombelo w’ɛlɔlɔ.

Nyosalake wekelo wa Bible wa lo nkumbo mbala la mbala

Bible mɛnyaka dia Nzambi mbelɛka anande wa l’olongo dia mɛnama la ntondo kande lo tena dia shikaa. (Jobo 1:6) Nyosalake ngasɔ nyu l’ananyu. Nyɔsɔnɔlɛ lushi la wonya wahombanyu salaka Ɔtɛmwɛlɔ wa lo nkumbo wa la dikɔlɔ ndo nyɔlɛmiyake ekongelo kɛsɔ. Lâdiko dia lâsɔ, nyɔsɔnɔlɛ lushi lokina dia ndjosalaka wekelo naka nyambohandja lushi lakanyasɔnɔla.

L’edja katete ngɔndɔ, tanyetawɔke dia ndjonga la mbekelo ka salaka wekelo wa lo nkumbo paka lo pai. Nyohɔ di’ananyu mbele ambeki anyu wa Bible woleki ohomba. Koko Satana nangaka mbanda lo djonga yande. (1 Pet. 5:8) Naka nyu tshika Ɔtɛmwɛlɔ wa lo nkumbo wa la dikɔlɔ w’ohomba ɔsɔ dia sala awui akina wele oko wendelo wa televiziɔ kana awui akina wele bu ohomba efula, kete Satana ayonyodja otshumba.​—Ef. 5:15, 16; 6:12; Fil. 1:10.

Nyeke akambo wakoka kamba la so lo lɔsɛnɔ la lushi la lushi

Ɔtɛmwɛlɔ wa lo nkumbo wa la dikɔlɔ hawohombe monga wekelo wa lâhahɛ. Nyosale la wolo dia mbidja awui wahomanaso la wɔ lo lɔsɛnɔ laso la lushi la lushi. Lo woho akɔna? L’edjedja ka wonya, nyɔsɔnɔlɛ asawo wendana la awui wakoka pomana l’ananyu lo nshi kana lo mingu yayaye. Ɛnyɛlɔ, shi nyu kokaka mbidja tenyi dimɔtshi diendana l’olimu aso? Ɛlɔngɔlɔngɔ l’esekaseka ngɛnangɛnaka sala awui wasalawɔ dimɛna. Mvusolaka kâmɛ la wɔ mbɔtwɛlɔ ndo kanaka la wɔ yimba lo woho wa mbekola wekamu ayowakimanyiya dia vɔ monga la dihonga dia ndjasha lo toho totshikitanyi t’olimu w’esambishelo ka Diolelo.​—2 Tim. 2:15.

Nyu kokaka nto kamba la tenyi diayokimanyiya ananyu dia vɔ tondoya ekakatanu wendana la tɔsɛngiya t’oma le angɛnyi awɔ. Nyu kokaka kamba la tshapita 15 ya dibuku Les jeunes s’interrogent ​— Réponses pratiques, vɔlimɛ 2 lo ɔkɛtshanyelo anyu wa lo nkumbo. Ɛnyɛlɔ, lɛkɛ 132 ndo 133 lekɔ l’ɔtɛ a dui wata ɔnɛ: “Woho wa shika ekolo la ntondo ka tɔsɛngiya t’asekami.” Ɔtɛ a dui akɔ mbishaka ana alako ndo waaso wa vɔ mbisha ekadimwelo wɔtɔnɛ la wɔ. Etelo kɛmɔtshi ka lo lɛkɛ 133 keketshaka ɛlɔngɔlɔngɔ l’esekaseka ɔnɛ: “Nyovusole ekadimwelo anyu kâmɛ l’ombutshi anyu wa pami, wa womoto kana l’ɔngɛnyi anyu ɔmɔtshi wambotshunda.” Shi nyu kokaka mvusolaka tenyi sɔ l’ekongelo kanyu k’Ɔtɛmwɛlɔ wa lo nkumbo wa la dikɔlɔ mbala la mbala?

Ɔtɛmwɛlɔ wa lo nkumbo mbishaka ambutshi diaaso dia tɔtɔmiya wahɔ waya lo ndjadjɛ eyango wa lo nyuma. Lo dikambo sɔ, vɔlimɛ 2 ya dibuku Les jeunes s’interrogent mbishaka awui w’ohomba efula lo tshapita 38 yele l’ɔtɛ a dui ɔnɛ: “Kakɔna kayomosala la lɔsɛnɔ lami?” Etena kakɛtshanyanyu tshapita shɔ, nyokimanyiya ananyu dia vɔ mɛna dia kambɛ Jehowa mbele yoho ya lɔsɛnɔ yoleki dimɛna. Nyokimanyiya ananyu dia monga la nsaki ka kamba olimu w’ombatshi mboka, olimu wa lo Bɛtɛlɛ, mbɔtɔ lo Kalasa k’olowanyelo w’ekambi kana kamba toho tokina t’olimu wa lo tena tshɛ.

Nyonge la yewo: Ekɔ ohomba mbohɔka dia ambutshi amɔtshi wakombolɛ anawɔ lokolo l’ɔlɔlɔ ndekaka ndjasha l’eyango walangawɔ anawɔ kotsha woho ɔnɛ wele vɔ hawandola anawɔ l’ɔtɛ w’awui w’amɛna wasalawɔ. Lo mɛtɛ, ekɔ ohomba keketsha ana dia vɔ ndjadjɛ eyango w’amɛna wele oko kamba olimu wa lo Bɛtɛlɛ ndo olimu wa misiɔnɛrɛ. Koko etena kasalanyu dui sɔ, nyonge la yewo diaha nyu ndjotamba olelo lo kɛnɛ kalongamɛnyu di’ananyu sala ko nyu ndjânyangiya. (Kol. 3:21) Nyohɔke nshi tshɛ di’ananyu pombaka nanga Jehowa l’etema awɔ hita, koko aha l’ɔtɛ wakombolanyu dia vɔ mbôlanga. (Mat. 22:37) Lâsɔ, nyoyange waaso wa nyu mandola ananyu lo akambo w’ɛlɔlɔ wasalawɔ ndo nyewɔ dia mbikaka washo paka lo akambo wahawasale. Nyâkimanyiya dia vɔ mandola kɛnɛ tshɛ katosalɛ Jehowa. Oma lâsɔ, nyotshike di’ananyu mɛnya l’etema awɔ dia vɔ mandolaka ɔlɔlɔ wa Jehowa.

Nyosale dia wekelo wa lo nkumbo monga dui di’ɔngɛnɔngɛnɔ

Dikambo dia sato di’ohomba efula dia kondja etombelo w’ɛlɔlɔ lo Ɔtɛmwɛlɔ wa lo nkumbo wa la dikɔlɔ ele, sala dia vɔ monga dui di’ɔngɛnɔngɛnɔ. Ngande wakokanyu sala dui sɔ? Ondo lo tena dimɔtshi, nyu kokaka mpokamɛ adramɛ wa lohokamɛ tsho kana menda ndo kɛtshanya awui wa lo vidɛo yakatondjama oma le Ɛmɛnyi wa Jehowa. Kana nyu kokaka mbadia kâmɛ etenyi kɛmɔtshi ka lo Bible kana mbishaka onto tshɛ la lo nkumbo ɔkɛndɛ wa mbadia avɛsa amɔtshi.

Ekɔ asawo efula wele lo Tshoto y’Etangelo ndo Réveillez-vous ! wele l’awui wakokaso kɛtshanya lo nkumbo. Ɛnyɛlɔ, nyu kokaka kamba l’awui wa lo lɛkɛ 31 la numɛlɔ tshɛ ka Réveillez-vous ! lele l’ɔtɛ a dui ɔnɛ: “Ngande wayoyokadimola?” Lo numɛlɔ mɔtshi ya Tshoto y’Etangelo y’anto tshɛ, sho tanaka sawo diele l’ɔtɛ a dui ɔnɛ: “Dikambo di’ɛlɔngɔlɔngɔ l’esekaseka aso.” Lo asawo asɔ, sho tanaka ndo ɔtɛ a dui okina wendana l’ana w’akɛnda wata ɔnɛ: “Nyetsha ananyu.”

Sawo diele l’ɔtɛ a dui ɔnɛ: “Les jeunes s’interrogent” diatomba lo Réveillez-vous ! diayonga ohomba efula le ambutshi wele l’ana weke ɛlɔngɔlɔngɔ kana esekaseka oko wayonga dibuku Les jeunes s’interrogent, vɔlimɛ 2. Etena kayonyokambaka la dibuku nɛ, tanyohɛke kiombo yele l’ɔtɛ a dui ɔnɛ: “Akanayɛ?” yele l’ekomelo ka tshapita tshɛ. Kiombo shɔ bu tsho dikambo di’ovuswelo. Nyu kokaka kamba la ambola wele lo kiombo yakɔ dia sala ɔkɛtshanyelo wa lo nkumbo.

Koko nyewɔ diaha pɔpa ananyu ambola efula lo wekelo wa lo nkumbo. Ɛnyɛlɔ, tanyotshutshuyake ɔna dia nde mbadia la dui dia wolo kɛnɛ kakandafunde lo kiombo yata ɔnɛ: “Jurnalɛ yakimi” kana l’etenyi ka dibuku kalɔmba ɔna dia nde funda tokanyi tande hita. Lo kiombo yele l’ɔtɛ a dui ɔnɛ: “Diewoyelo le ambutshi,” dibuku diakɔ diâmɛ mbutaka lo lɛkɛ 3 ɔnɛ: “Dia nyu keketsha ananyu waya l’ɛnɔnyi dikumi l’ɛmɔtshi dia vɔ funda l’abuku awɔ la dihonga tshɛ, nyetawɔ dia vɔ sala dikambo sɔ lo vɔamɛ. L’ɔkɔngɔ diko, vɔ mbeyaka ndjetawɔ nyotɛ awui wakawafunde.”

Naka nyu sala di’ɔtɛmwɛlɔ anyu wa lo nkumbo salemaka mbala la mbala, mongaka l’akambo wahomana la nyu lo lɔsɛnɔ la lushi la lushi ndo salemaka lo yoho ya dimɛna, kete Jehowa ayɔtshɔkɔla welo wadjanyu. Etena ka lânde ka lo nkumbo kɛsɔ kayokimanyiya wakinyu wa ngandji dia monga nge lo nyuma.

[Kiombo ya lo lɛkɛ 31]

Wekelo tshɛ wongake la dui dimɔtshi di’oyoyo

“Etena kakatekaka l’anaso w’akɛnda wa wamato, dimi l’omɛmi takakɛtshanyaka awui wayekama lo losanganya lɔmɔtshi la l’etshumanelo wakatahombe nɔngɔsɔla, ko oma lâsɔ takalɔmbaka anaso wa wamato dia vɔ sanga sango diɛnya lo tshena pe awui wa lo wekelo akɔ. Mbala mɔtshi, takasalaka kɛnyɔ ya lo tɔjɛstɛ y’awui amɔtshi wa lo Bible kana mvusola mbɔtwɛlɔ yayotokamba la so l’esambishelo. Takasalaka di’awui wa lo wekelo mbɔtɔnɛ l’ɛnɔnyi awɔ, monga awui wayashawɔ lɔkɔ, wakeketsha ndo wawaɔdia yema.”​—J.M., États-Unis.

“Dia kimanyiya ɔnaki ombeki ami ɔmɔtshi wa Bible dia nde shihodia elɛwɔ wɔɔmbɔ wakawakambaka la wɔ lo nshi yakafundamaka Bible, takatondja dibuku di’Isaya lo akatshi, l’ɔkɔngɔ wa sho nimola toshifidi talembetshiya totshapita la avɛsa. Takakakatanya akatshi akɔ dia vɔ tomba oko wɛɔmbɔ wakawakambaka la wɔ lo nshi y’edjedja. Ɔnakɔ akahembe sala kɛnɛ kakasale Yeso etena kakinde lo shinangɔnga la Nazarɛtɛ. Ɔkɔndɔ wa lo Luka 4:16-21 mbutaka dia Yeso ‘akɔmbɔla wɔɔmbɔ w’Isaya, ko akɛnyi’ dihole diakandayangaka. (Is. 61:1, 2) Koko, etena kakahembe dikɛnda diakɔ dia nde sala woho akɔ wâmɛ, nde kokoka mbishola Isaya 61 lo kamba la wɔɔmbɔ wakatasale wakatanya totshapita la avɛsa. Oko wakandambiyama la diewo diaki la Yeso dia mɔmbɔla Afundelo, ɔnakɔ akate ate: ‘Yeso aki pami ka diambo efula.’”​—Y.T., Japon.

[Osato wa lo lɛkɛ 30]

Mvusola tenyi diekinyu koka kimanyiya ananyu dia vɔ ndɔshana la tɔsɛngiya t’oma le angɛnyi awɔ

[Osato wa lo lɛkɛ 31]

Nyosale la wolo dia Ɔtɛmwɛlɔ wa lo nkumbo wa la dikɔlɔ monga dui di’ɔngɛnɔngɛnɔ