Ekimanyielo le waa nkumbo
1. Ngande wakakimanyiyaka lushi la Sabato nkumbo y’ase Isariyɛlɛ dia nkondja wahɔ?
1 Ɔsɛdingwelo wa lushi la Sabato aki yɛdikɔ ya ngandji yakɔshi Jehowa yakakimanyiyaka nkumbo dia nkondja wahɔ. Ase Isariyɛlɛ wakomuyaka oma l’elimu awɔ wa lushi la lushi ndo waki l’etena ka nkana yimba lo ɔlɔlɔ wa Jehowa ndo lo diɔtɔnganelo diasawɔ la nde. Ambutshi wakakokaka nkamba la diaaso sɔ dia nkɔkɔmiya ɛlɛmbɛ wa Jehowa l’etema w’anawɔ. (Euh. 6:6, 7) Lomingu tshɛ, lushi la Sabato lakashaka ekambi waki Jehowa etena ka vɔ ndeka nkana yimba lo diɔtɔnganelo diasawɔ la Jehowa.
2. Kakɔna katetsha lushi la Sabato lo kɛnɛ kendana la Jehowa?
2 Lo mɛtɛ, Jehowa hayɔlɔmba nkumbo dia yɔ sɛdingolaka lushi la Sabato. Koko, ɔlɛmbɛ ɔsɔ tetshaka dui dimɔtshi lo kɛnɛ kendana la Nzambi kaso. Nde ndjakiyanyaka nshi tshɛ lo dikambo dia yônge ya lo nyuma y’ekambi ande. (Is. 48:17, 18) Ɛlɔ kɛnɛ, yoho mɔtshi yɛnya Jehowa ngandji kokande ekambi ande ele oma lo tshimbo y’Ɔtɛmwɛlɔ wa lo nkumbo wa la dikɔlɔ.
3. Oyango akɔna wele la Ɔtɛmwɛlɔ wa lo nkumbo wa la dikɔlɔ?
3 Oyango akɔna wele la Ɔtɛmwɛlɔ wa lo nkumbo wa la dikɔlɔ? Lo Ngɔndɔ ka ntondo 2009, Wekelo wa dibuku wa l’etshumanelo wakatatɛ salema dikɔlɔ diakɔ diamɛ la Kalasa k’olimu wa teokrasi ndo la Losanganya l’olimu. Ɔkɔkɔ ɔmɔtshi wakasalema otshikitanu ɔsɔ ele wa mbisha nkumbo diaaso dia yɔ nkeketsha lonyuma lawɔ lo nsɔna dikɔlɔ dimɔtshi dia shikaa dia yɔ salaka ɔtɛmwɛlɔ wa lo nkumbo lomingu tshɛ. Nkumbo tshɛ kakakeketshama dia tɔ ntatɛ salaka wekelo awɔ wa lo nkumbo la dikɔlɔ diakongaka Wekelo wa dibuku naka kokaka ndo dia nkamba l’etena kɛsɔ dia nkɛtshanya awui wa lo Bible lo yoho ya dimɛna, koko aha lowango lowango ndo dia mbɔtɔnganyiya wekelo la ehomba wa lo nkumbo.
4. Onde nkumbo pombaka mbɔsaka paka wonya ɔtɔi wa tango lo ɔkɛtshanyelo awɔ w’awui wa lo Bible? Lembetshiya.
4 Dia mbɔtɔ lo Wekelo wa dibuku wa l’etshumanelo taki l’ohomba wa mbɔsa etena dia ndɔta, ntshɔ otsha lo losanganya lɔsɔ ndo nsala awui akina. Le efula ka l’atei aso, mbɔtɔ lo losanganya lakɔsaka wonya a tango lɔsɔ akatɔlɔmbaka dia mbɔsa wenya efula dia mbɔtɔ lo losanganya lakɔ. Lo menda otshikitanu wambosalema lo ekongelo ka losanganya laso, tôkoka mbɔsa dikɔlɔ sɔ dia ntɛmɔla Jehowa lo nkumbo. Ɔnkɔnɛ, ɔtɛmwɛlɔ aso wa lo nkumbo hawohombe mbɔsa paka wonya a tango ɔtɔi oto. Koko sho pombaka nkana yimba lo kɛnɛ kendana l’ehomba ndo la elelo wele la nkumbo kaso ndo nshikikɛ wenya engana wayɔsaka Ɔtɛmwɛlɔ wa lo nkumbo lo ndjela awui asɔ.
5. Onde wenya tshɛ pombaka mbɔsama paka l’ɔkɛtshanyelo wa l’olui? Lembetshiya.
5 Onde wenya tshɛ pombaka mbɔsama paka l’ɔkɛtshanyelo wa l’olui? Etena kakɛtshanya atshukanyi kana nkumbo yele l’ana awui amɔtshi w’oma lo Afundelo kâmɛ, vɔ keketshanaka lam’asawɔ. (Romo 1:12) Ase nkumbo ndekaka monga kâmɛ. Ɔnkɔnɛ, ɔkɛtshanyelo w’awui w’oma l’Afundelo pombaka monga dui dioleki ohomba dia l’Ɔtɛmwɛlɔ wa lo nkumbo wa la dikɔlɔ. Koko, ose nkumbo tshɛ kokaka nto mbetsha yema ya wenya ande lo wekelo w’onto ndamɛ. Ɛnyɛlɔ, l’ɔkɔngɔ w’ɔkɛtshanyelo wa l’olui, nkumbo koka ntshikala kâmɛ etena kele onto l’onto ekɔ lo ntetemala la mbeka lo ndamɛ ondo lo nshidiya nɔngɔsɔla sawo diande dia lo losanganya kana lo mbadia periodikɛ. Nkumbo mɔtshi mɛnaka ɔlɔlɔ diaha ndihola televiziɔ dikɔlɔ sɔ di’otondo.
6. Ngande wakoka nɔmbwama ɔkɛtshanyelo wa lo nkumbo?
6 Ngande wakoka ɔkɛtshanyelo nɔmbwama? Hatami di’ɔnɛ mbala tshɛ ɔkɛtshanyelo ɔsɔ wayosalemaka paka oko ambola la ekadimwelo. Dia pɛtshahɛtsha Ɔtɛmwɛlɔ wa lo nkumbo wa la dikɔlɔ ndo dia vɔ monga dimɛna efula, nkumbo efula yekɔ la ekongelo kafɔna la ka nsanganya yaso ya l’atei wa lomingu. Vɔ kahanyaka ɔkɛtshanyelo awɔ lo totenyi efula ndo nɔmbɔlaka tenyi diakɔ lo toho totshikitanyi. Ɛnyɛlɔ, vɔ kokaka mbadia Bible kâmɛ, nɔngɔsɔla etenyi kɛmɔtshi ka nsanganya ndo nsala wɛnyɛlɔ w’awui wayokamba la wɔ l’esambishelo. Lɛkɛ 6 mbishaka alako amɔtshi.
7. Ambutshi pombaka nsala la wolo di’ase nkumbo ndjaoka woho akɔna etena ka wekelo?
7 Ambutshi pombaka nsala la wolo di’ase nkumbo ndjaoka woho akɔna etena ka wekelo ɔsɔ? Ase nkumbo kayɛ wayoleka mbeka dimɛna naka wekelo wekɔ lo mbeta lo yoho yoludi la ngandji ndo yele onto tshɛ ndjaokaka dimɛna. Tena dimɔtshi, nyu kokaka nsala wekelo ɔsɔ l’andja naka kokaka. Tanyengengake dia mbɔsa yema ya diomuyelo naka ekɔ ohomba. Nkumbo mɔtshi nɔngɔsɔlaka yangɔ ya ndɛ l’ɔkɔngɔ wa wekelo. Kânga mbele ambutshi pombaka mbewɔ dia nkamba l’Ɔtɛmwɛlɔ awɔ wa lo nkumbo wa la dikɔlɔ dia pangwɛ kana mingola ana, vɔ mbeyaka mbɔsa yema y’etena dia ntɛkɛta dikambo dia mbekelo kɛmɔtshi ka shikaa kambowɛna kana dia okakatanu ɔmɔtshi wambotomba. Koko, naka ɔna ambosala dui dimɔtshi dia kɔlɔ, kete ayoleka dimɛna nyu sawola nyu la nde ato l’atei wa lomingu dia mbewɔ dia mbosha sɔnyi la le anango. Ɔtɛmwɛlɔ wa lo nkumbo wa la dikɔlɔ hawohombe monga etshitshitshitshi, koko vɔ pombaka monga diaaso di’ɔngɛnɔngɛnɔ nɛ dia tekɔ lo ntɛmɔla Nzambi k’ɔngɛnɔngɛnɔ.—1 Tim. 1:11.
8, 9. Ngande wahomba ndjalɔngɔsɔla ewandji wa nkumbo?
8 Ngande wakoka ewandji wa nkumbo nɔngɔsɔla ɔtɛmwɛlɔ akɔ? Ase nkumbo wayoleka nkondja wahɔ naka owandji wa nkumbo nɔngɔsɔlaka la ntondo Ɔtɛmwɛlɔ tshɛ wa lo nkumbo wa la dikɔlɔ lo nshikikɛ awui wayɔkɛtshanyema ndo yoho yoleki dimɛna yayɔkɛtshanyema awui akɔ (Tuk. 21:5). Ayonga dimɛna dia omi mimbolaka wadɛnde kanyi lo kɛnɛ kendana la dikambo sɔ. (Tuk. 15:22) Ewandji wa nkumbo le, shi ekɔ nto ohomba mimbolaka ana tokanyi tawɔ tena dimɔtshi? Naka nyu nsala dui sɔ, kete nyayeya dimɛna awui wayashawɔ lɔkɔ kana ekiyanu wele la wɔ.
9 Lo mingu efula, hatongaka ohomba di’ewandji wa nkumbo mbɔsa wenya wamboleka lo ɔlɔngɔswɛlɔ wa wekelo. Ondo nkumbo yayɔngɛnangɛna monga la dui dimɔtshi diayowekaka lomingu tshɛ lo dihole dia mbala tshɛ owandji wa nkumbo ndjaka la dui dimɔtshi di’oyoyo. L’ekomelo ka wekelo tshɛ, nde mbeyaka mɛna ɔlɔlɔ nɔngɔsɔla wekelo wa mbala kayaye etena kakandohɔ ehomba wa lo nyuma wa nkumbo kande. Ewandji wa nkumbo ɛmɔtshi fundaka lo tshena pe awui wayekama mbala kayaye lo dikatshi ko dihanɛ lo dihole diakoka ose nkumbo tshɛ mɛna. Dui sɔ kimanyiyaka ase nkumbo dia vɔ kongɛ wekelo ɔsɔ l’asolo walomɔlomɔ ndo mbashaka etena ka vɔ ndjalɔngɔsɔla naka ekɔ ohomba.
10. Ngande wakoka wanɛ wadjasɛ vɔamɛ nsala Ɔtɛmwɛlɔ wa lo nkumbo wa la dikɔlɔ?
10 Ko ayomosala naka lekɔ dimɛ lo nkumbo kami kana dimɛ oto mbele Okristo wa mɛtɛ lo nkumbo? Wanɛ wadjasɛ vɔamɛ kokaka nkamba l’Ɔtɛmwɛlɔ wa lo nkumbo wa la dikɔlɔ dia nsala wekelo w’onto ndamɛ. Ekongelo k’ɔlɔlɔ ka wekelo w’onto ndamɛ pombaka monga ndo la wadielo wa Bible, ɔlɔngɔswɛlɔ wa nsanganya ndo wadielo wa Tshoto y’Etangelo ndo wa Réveillez-vous ! Lâdiko dia lâsɔ, apandjudi amɔtshi mongaka la dui dimɔtshi dia nsala eyangelo lɔkɔ. Tena dimɔtshi, vɔ mbeyaka mɛna ɔlɔlɔ mbelɛ opandjudi kana nkumbo kekina dia ndjosala kâmɛ la wɔ ɔkɛtshanyelo w’awui w’oma l’Afundelo wakeketsha.
11, 12. Naa wahɔ ɛmɔtshi wakondjaso lo salaka Ɔtɛmwɛlɔ wa lo nkumbo wa la dikɔlɔ mbala la mbala?
11 Wahɔ akɔna wakondjaso lo salaka Ɔtɛmwɛlɔ wa lo nkumbo wa la dikɔlɔ mbala la mbala? Wanɛ wayasha l’otema ɔtɔi l’ɔtɛmwɛlɔ wa mɛtɛ ndekaka ndjasukanya la Jehowa. Ndo nto, nkumbo yatɛmɔla kâmɛ keketshaka dimama dia nkumbo. Atshukanyi amɔtshi wakafunde lo kɛnɛ kendana la ɛtshɔkɔ wambowokondja ɔnɛ: “Oko weso ambatshi mboka ndo atshukanyi wele bu l’ana, sho mɛtɛ nongamɛka Ɔtɛmwɛlɔ aso wa lo nkumbo wa la dikɔlɔ l’asolo walomɔlomɔ. Sho mbokaka dia tamboleka ndjasukanya la Shɛso lele l’olongo ndo tamboleka monga la diɔtɔnganelo dia dimɛna lam’asaso. Ɛlɔ kɛnɛ, etena kemɔso lo lushi lakatakongɛ dia mbeka kâmɛ, sho tombɔnaka ɔnɛ: ‘Onde wɛ mbohɔka dikɔlɔ di’ɛlɔ? He tayonga l’Ɔtɛmwɛlɔ wa lo nkumbo wa la dikɔlɔ!’”
12 Yɛdikɔ ya monga la dikɔlɔ dimɔtshi dia salaka ɔtɛmwɛlɔ wa lo nkumbo kimanyiyaka nto nkumbo yele la wesanu efula. Mama kɛmɔtshi kodia ana ahende ndamɛ ndo kele ombatshi mboka wa pondjo akafunde ate: “Lo nshi yakete, sho komongaka la etena ka nsala wekelo aso wa lo nkumbo. Takasalaka wekelo ɔsɔ paka lo pai nɛ dia lakalɛmbaka efula. Dimi kombeyaka woho wa nkongɛ oseka kiambokambo tshɛ. Ɔnkɔnɛ, lambonyofundɛ dia nyokaloya losaka heyama lo yɛdikɔ yendana l’Ɔtɛmwɛlɔ wa lo nkumbo wa la dikɔlɔ. Tambotondoya dia salaka wekelo wa lo nkumbo wa mbala la mbala ndo tekɔ lo nkondja wahɔ oma lɔkɔ.”
13. Dia nkumbo kayɛ nkondja ɛlɔlɔ efula oma lo yɛdikɔ shɔ, dui sɔ nemanɛka la dikambo diakɔna?
13 Lo ɛnyɛlɔ ka lushi la Sabato, Ɔtɛmwɛlɔ wa lo nkumbo wa la dikɔlɔ wekɔ woshasha w’oma le Shɛso lele l’olongo wakoka kimanyiya nkumbo. (Jak. 1:17) Ɛlɔlɔ wa lo nyuma wakakondjaka nkumbo y’ase Isariyɛlɛ wakalemanɛka la yoho yakawakambaka la lushi la Sabato. Woho akɔ wâmɛ mbele, yoho yakambaso la dikɔlɔ diakatasɔnɛ dia salaka Ɔtɛmwɛlɔ wa lo nkumbo wa la dikɔlɔ mbayɛnya dia nkumbo kaso kayokondja ɛlɔlɔ efula kana bu. (2 Kor. 9:6; Ngal. 6:7, 8; Kol. 3:23, 24) Naka wɛ nkamba dimɛna la yɛdikɔ nyɛ, kete nkumbo kayɛ kokaka mbuta oko wakate omembi w’esambo ate: ‘Le mi, ndjasukanya la Nzambi ekɔ dikambo di’ɔlɔlɔ. Le Nkumadiɔndjɔ Jehowa mbayomoyashɛ.’—Osam. 73:28.
[Efundelo wa l’etei w’odingɔ wa lo lɛkɛ 5]
Ɔtɛmwɛlɔ wa lo nkumbo wa la dikɔlɔ hawohombe monga etshitshitshitshi, koko vɔ pombaka monga diaaso di’ɔngɛnɔngɛnɔ nɛ dia tekɔ lo ntɛmɔla Nzambi k’ɔngɛnɔngɛnɔ
[Kiombo ya lo lɛkɛ 6]
OMBA
Alako amɔtshi wendana la Ɔtɛmwɛlɔ wa lo nkumbo wa la dikɔlɔ
Bible:
• Nyadiake kâmɛ etenyi ka wadielo wa Bible wa lomingu la lomingu. Naka kokaka, nyokahane ahole w’anto wɔtɛkɛtshiwɔ l’etenyi kakɔ. Ɔmɔtshi mbeyaka monga oko ɔkɔndɔdi ko akina mbadiaka awui w’anto akina.
• Nyosale oko kɛnyɔ ya etenyi kadianyu lo Bible.
• Lɔmba ose nkumbo tshɛ dia nde tadisha la ntondo totshapita ta Bible tayonyɔsɛdingola ndo dia nde mfunda dimbola ɔtɔi kana ahende wele la nde lo etenyi kɛsɔ. Oma lâsɔ, nyɔsɛdingole ambola w’onto l’onto nyu tshɛ kâmɛ.
• Lomingu tshɛ fundaka divɛsa dimɔtshi lo kiatshikatshi ndo nsala la wolo dia nkimɛ divɛsa diakɔ ndo dilembetshiya. Tshumanya tokatshikatshi tɔsɔ tele l’avɛsa ndo vusolakatɔ lomingu la lomingu dia menda avɛsa angana wakayohɔ.
• Hokamɛ wadielo wa Bible wakadjama lo bandɛ kasɛtɛ kana lo CD ko wɛ tayelaka lo Bible kayɛ.
Nsanganya:
• Nyɔlɔngɔsɔlake etenyi kɛmɔtshi ka nsanganya kâmɛ.
• Nyekake esambo wa Diolelo wele l’ekongelo ka lomingu layela.
• Naka ose nkumbo ɔmɔtshi ekɔ la sawo lo Kalasa k’olimu wa teokrasi kana wɛnyɛlɔ lo Losanganya l’olimu, kete nyoshane tokanyi tendana la woho wakokande todisha, kana nde adiohole la ntondo ka nkumbo k’otondo.
Ehomba wa lo nkumbo:
• Nyɔsɛdingole akambo wele lo dibuku Les jeunes s’interrogent kana wele lo dibuku Etshama oma le Ombetsha a woke.
• Nyosale wɛnyɛlɔ wɛnya woho wakokanyu nkandola okakatanu ɔmɔtshi wakoka ntomba la kalasa.
• Nyosale wɛnyɛlɔ wɛnya ambutshi wambɔsa ɔkɛndɛ w’ana ndo ana wambɔsa ɔkɛndɛ w’ambutshi. Ana wambosala eyangelo lo dikambo dimɔtshi, ko oma lâsɔ wokana yimba l’ambutshi.
Olimu w’esambishelo:
• Nyosale wɛnyɛlɔ wendana la mbɔtwɛlɔ yayokamba la nyu lo wikɛndɛ.
• Nyɔkɛtshanya di’eyango shikaa wakoka ase nkumbo ndjadjɛ dia ndeka nsambisha lo nshi ya Eohwelo kana lo nshi ya vakashi.
• Sha ose nkumbo tshɛ minitɛ mɔtshi dia nde nsala eyangelo wendana la woho wa nkadimola ambola wotshikitanyi wakoka mpomana la nde l’esambishelo, oma lâsɔ ko nyu nsala wɛnyɛlɔ ɔmɔtshi.
Alako akina:
• Nyadia kâmɛ sawo dimɔtshi di’oma lo periodikɛ keke katomba.
• Lɔmba ose nkumbo tshɛ dia tadisha la ntondo sawo dimɔtshi diele la wahɔ efula le nde di’oma lo periodikɛ yeke katomba, oma lâsɔ ko wɛ nɔmba onto l’onto dia mbuta dui dimɔtshi diakandatane oma lo wadielo ande.
• Tena dimɔtshi, kelɛke opandjudi kana atshukanyi dia vɔ ndjosala la nyu Ɔtɛmwɛlɔ wa lo nkumbo wa la dikɔlɔ ndo nyu mbeyaka mbâkɔnya awui amɔtshi.
• Nyende ndo nyɔkɛtshanya awui wa lo bandɛ vidɛo kaso kɛmɔtshi.
• Nyɔkɛtshanya kâmɛ awui w’oma lo asawo anɛ “Les jeunes s’interrogent” kana “Apprenons en famille” w’oma lo Réveillez-vous !
• Nyɔkɛtshanya kâmɛ sawo diele l’ɔtɛ a dui ɔnɛ: “Nyetsha ananyu” kana “Dikambo di’ɛlɔngɔlɔngɔ aso” watomba lo Tshoto y’Etangelo.
• Nyadia ndo nyɔkɛtshanya etenyi kɛmɔtshi k’oma lo Annuaire weke katomba kana okanda ɔmɔtshi wakatombe lo Losanganya la distrikɛ l’ɔnɔnyi wetshi.
• L’ɔkɔngɔ wa nyu mbɔtɔ lo Losanganya la distrikɛ kana losanganya lokina la woke, nyovusole akambo w’ohomba w’oma lɔkɔ.
• Nyɔsɛdingole diangɔ dimɔtshi diakatonge Jehowa ndo kɛnɛ katetsha diangɔ diakɔ lo dikambo diande.
• Nyokambe kâmɛ lo dikambo dimɔtshi, ɛnyɛlɔ dia nyu nsanga kartɛ kana tablo kɛmɔtshi.