Wetshelo wakondjaso oma le Yeso

Lo kɛnɛ kendana la lɔsɛnɔ la nkumbo

Ngande wahomba atshukanyi mbɔsa diwala woho wa nkumbo monga l’ɔngɛnɔngɛnɔ?

Diwala diekɔ dimama di’ekila. Etena kakawawombola dia kana diwala kokaka ndjakema, Yeso akate ate: “Nyu nyatali nyati: One lakâtungi l’etatelu, akâtungi umi la wadi? Ndu mbakandati ati: Aha dia dikambu ne mbayutshika untu shi la nyangu, mbayundumamana la wadendi, ku vo ahendi wayuyala untu otoi? Okone vo kema antu ahendi ntu, wambuyala untu otoi. Untu tamamitulaki kene kakamamanya [Nzambi]. . . . Untu tshe layukimo wadendi, naka aha lu dikambu dia luseka, ku ndi ntshuka ukina, ndi ambunana.” (Mateu 19:4-6, 9) Naka atshukanyi ndjela dako diaki Yeso sɔ ndo ntshikala la kɔlamelo lam’asawɔ, kete ase nkumbo tshɛ wayonga la lotui tshitshi ndo l’ɔngɛnɔngɛnɔ.

Lande na kele mboka Nzambi ngandji kimanyiyaka dia nkumbo monga l’ɔngɛnɔngɛnɔ?

Yeso akate ate: “Ulangi Khumadiondjo [Nzambi k]aye l’utema aye tshe, la lumu laye tshe, ndu la yimba yaye tshe. Olembe oso, mbeli olembe wuleki wuki ndu wa ntundu.” Naa ɔlɛmbɛ wa hende woleki woke? Yeso akate ate: “Ulangi unyaye [mbidja ndo anto wasɛna suke suke la yɛ, mbuta ate ase nkumbo kayɛ] uku ayalangaye.” (Mateu 22:37-39) Ɔnkɔnɛ, di’ase nkumbo monga l’ɔngɛnɔngɛnɔ, vɔ pombaka monga la diɔtɔnganelo dia dimɛna lam’asawɔ la Nzambi l’ɔtɛ wa ngandji kawokawɔ katotshutshuya dia sho mbokana ngandji k’onto l’ɔnango.

Kakɔna kahomba wadi l’omi nsala di’onto l’onto ngɛnyangɛnya wonyande?

Waomi ngɛnyangɛnyaka wadiɛwɔ etena kayelawɔ ɛnyɛlɔ kaki Yeso. Nde akokaka wadɛnde la didjidji, mbuta ate etshumanelo ngandji ka ndjahombia. (Efeso 5:25) Yeso akate ate: “Ndu On’a untu, kundja dia antu mbukambela ulimu, keli akayi dia mbakambela ulimu.” (Mateu 20:28) Yeso komonga kanga hiadi kana kanga awui wolo otsha le anto wakandakokɛka, koko nde akâkeketshaka. (Mateu 11:28) Ɔnkɔnɛ, waomi pombaka nkamba la lowandji lawɔ dimɛna ndo lo yoho yakoka ase nkumbo tshɛ nkondja wahɔ.

Wamato wotshukami vɔ lawɔ kondjaka wahɔ oma lo ɛnyɛlɔ kaki Yeso. Bible mbutaka ɔnɛ: “Ote a Kristu eli [Nzambi].” Tɔ mbutaka nto ɔnɛ: “Ote a umuntu eli pami.” (1 Koreto 11:3) Yeso kɔmbɔsaka dia ekɔ dui dia sɔnyi nɛmbɛ lowandji laki Nzambi. Nde akalɛmiyaka She efula. Yeso akate ate: “Dimi latutshaka akambu watôngenyangenyaka nshi tshe.” (Joani 8:29) Womoto lalɛmbɛlɛ lowandji laki omɛnde l’ɔtɛ wa ngandji kokande Nzambi ndo woho wɔlɛmiyande kimanyiyaka efula dia nkumbo monga la lɔsɛnɔ l’ɔngɛnɔngɛnɔ.

Wetshelo akɔna wakoka ambutshi nkondja oma le Yeso lo woho wakandɔsaka ana w’akɛnda?

Yeso aketshaka wenya efula kâmɛ la ana w’akɛnda ndo akayashaka efula lo tokanyi ndo lo nsaki yawɔ. Bible mbutaka ɔnɛ: “Jesu akawaete; akati ati: Nyete tokendakenda wayi le mi.” (Luka 18:15, 16) Lo diaaso dimɔtshi, anto wakɔnyɔla ana w’akɛnda lo woho wakawɛnya mbetawɔ kawɔ otsha le Yeso. Koko Yeso akandola ana w’akɛnda ndo akatɛ wanɛ wakawaɔnyɔlaka ate: “Nyu nyatali nyati: We akaluwanya diandu l’enyo wa ana w’ashashi la waloma?”—Mateu 21:15, 16.

Wetshelo akɔna wakoka ana w’akɛnda nkondja oma le Yeso?

Yeso akatshikɛ ana w’akɛnda ɛnyɛlɔ k’ɔlɔlɔ lo woho wakandayashaka lo akambo wa lo nyuma. Etena kakinde l’ɛnɔnyi 12, wakôtane “lu etemwelo, udjashi l’atei w’embetsha, uka aui awo la awambula embula.” Dui sɔ diaki l’etombelo akɔna? Bible mbutaka ɔnɛ: “Wane wakuki aui andi, wakambi dia yimba yandi la ekadimwelu kandi ka embula.” (Luka 2:42, 46, 47) Koko ewo kaki la Yeso kombokonya dia nde monga kanga otako. Lo dihole dia nsala ngasɔ, tɔ kakokonya dia nɛmiya ambutshi ande. Bible mbutaka ɔnɛ: “[Nde] akakitanyiaka aui awo.”—Luka 2:51.

Dia mbeya awui efula lo kɛnɛ kendana la lɔsɛnɔ la nkumbo l’ɔngɛnɔngɛnɔ, enda tshapita 14 ya dibuku Bible etshatɔ mɛtɛ?a

[Nɔtɛ ka l’ɛse ka dikatshi]