Totetemale mfudia ngandji kaso k’onto l’ɔnango

“Nyokendekende lu ngandji, uku akanyulangi Kristu.”​—EF. 5:2.

1. Djembetelo yakɔna y’ohomba yakate Yeso yahomba ambeki ande mbeyama?

ESAMBISHELO ka lokumu l’ɔlɔlɔ la Diolelo diaki Nzambi lo luudu la luudu ekɔ djembetelo mɔtshi yeyama Ɛmɛnyi wa Jehowa. Koko, Kristo Yeso akɛnya dui dikina diahomba mbeyama ambeki ande wa mɛtɛ. Nde akate ate: “Olembe w’uyuyu mbamumunyusha, dia nyu mbukana ngandji. Nyukani ngandji uku akamanyuki ngandji. Uma lu dikambu ne, antu tshe wayeya vati: Ambeki ami mbenyu, naka nyu nyayukana ngandji.”​—Joa. 13:34, 35.

2, 3. Shɛngiya yakɔna yonga la ngandji kaso k’onto l’ɔnango le wanɛ waya lo nsanganya y’Akristo?

² Ndoko anto akina wokana ngandji ka l’asa onto l’ɔnango kɛdimi la kɛnɛ kokana Akristo wa mɛtɛ. Oko watokotolaka ɛngɔ kelɛwɔ ema mbolo, mbele ngandji kakatanyaka ekambi waki Jehowa kâmɛ ndo kotolaka anto wele l’etema w’ɛlɔlɔ oya l’ɔtɛmwɛlɔ wa mɛtɛ. Tɔshi ɛnyɛlɔ kaki Marcelino, pami kɛmɔtshi kadjasɛ lo wodja wa Cameroun kakolɛ washo l’olimu. L’ɔkɔngɔ wa mpokoso kakokomɛ kɛsɔ, lokumu lakekɔ ɔnɛ nde aya tshungu l’ɔtɛ wakinde ose ekanga. Lo dihole dia mbokeketsha, pastɛrɛ ndo ase ɔtɛmwɛlɔ ande wakawotshanya oma l’ɔtɛmwɛlɔ awɔ. Etena kakawelɛ Ɔmɛnyi wa Jehowa ɔmɔtshi lo losanganya, Marcelino konanga ntshɔ nɛ dia nde akokaka wɔma wa mbitshanyema nto.

³ Marcelino akambe efula oma lo kɛnɛ kakawosalɛ lo Mbalasa ka Diolelo. Wakôlongola la wasaso tshɛ ndo nde akakondja esambelo oma lo wetshelo wa lo Bible wakandoke. Nde akatatɛ mbɔtɔ lo nsanganya tshɛ ya l’etshumanelo, akahame lo wekelo ande wa Bible ndo akabatizama lo 2006. Kakianɛ nde ekɔ lo nsambisha ase nkumbo kande ndo asukanyi ande akambo wa mɛtɛ ndo ekɔ lo mbeka l’efula ka l’atei awɔ Bible. Marcelino nangaka di’anto weka lande Bible ndjaoka dia vɔ mbokamaka ngandji woho wakandayaoke l’atei w’ekambi waki Nzambi.

4. Lande na kahombaso nkitanyiya dako diaki Paulo dia ‘nkɛndakɛnda lo ngandji’?

⁴ Ngandji k’onto l’ɔnango kɛsɔ ngɛnyangɛnyaka efula ndo sho tshɛ pombaka nsala la wolo dia kilama. Ohɔsa dia anto wambɔnganya dja dia mboka l’otsho. Naka vɔ hawotetemadi la mbidja kunyi, kete dja shɔ yayodimala. Woho akɔ wâmɛ mbele, diaha dimama dia ngandji dia l’atei w’etshumanelo mbɔla, Okristo tshɛ pombaka nsala la wolo dia dikeketsha. Ngande wakokaso ntsha dikambo sɔ? Ɔpɔstɔlɔ Paulo akakadimola ate: “Nyokendekende lu ngandji, uku akanyulangi Kristu. Ndi akayakimo dikambu dianyu, ulambu la ulambu wa ndjakema weli la upumu w’ololo le [Nzambi].” (Ef. 5:2) Dimbola diakokaso ndjambola diɔ nɛ: Lo toho takɔna takokaso nkɛndakɛnda lo ngandji?

‘Nyu lawɔ, nyodihwane etema’

5, 6. Lande na kakakeketsha Paulo Akristo wa la Kɔrɛtɔ dia vɔ ‘ndihwanɛ etema’?

⁵ Ɔpɔstɔlɔ Paulo akafundɛ Akristo wa la Kɔrɛtɔ k’edjedja ate: “Enyo asu wambudiho uya le nyu, etema asu wambuyala hwe. Nyu kema pika lu etem’asu, keli nyu nyame mbeli pika lu ngandji kanyu. Ne dia nemanya la nyu - lambunyutela uku an’ami - nyudihuli ndu nyu etema anyu hwe.” (2 Kor. 6:11-13) Lande na kakakeketsha Paulo Akristo dia vɔ nanula ngandji kawɔ?

⁶ Tende woho wakatatɛ etshumanelo ka la Kɔrɛtɔ k’edjedja. Paulo akakome la Kɔrɛtɔ oya l’ekomelo ka 50 T.D. Kânga mbakandahomana l’ekakatanu etena kakandatatɛ nsambisha lekɔ, ɔpɔstɔlɔ Paulo kopekɔ. Kombeta edja, anto efula wa l’osomba ɔsɔ waketawɔ lokumu l’ɔlɔlɔ. L’edja ka “utundu w’eleku la ngondo shamalu,” Paulo akayakimɔ dia mbetsha ndo nkeketsha etshumanelo k’oyoyo kɛsɔ. Mbokɛmaka hwe dia nde akokaka Akristo wa la Kɔrɛtɔ ngandji k’efula. (Etsha 18:5, 6, 9-11) Vɔ la wɔ waki mɛtɛ l’ɛkɔkɔ w’eshika wa mbôka ngandji ndo mbɔ̂lɛmiya. Koko, anto amɔtshi wa l’etshumanelo kombowɔtɔka lo demba. Ondo amɔtshi angana kɔngɛnangɛnaka alako ande wakasembɔka tɔɔ lo dikambo. (1 Kor. 5:1–5; 6:1-10) Ndo ondo akina wakahokamɛ awui wa kashi wakataka wanɛ wakayaɔsaka ɔnɛ “atumami wuleki waki” lo dikambo diande. (2 Kor. 11:5, 6) Paulo akakombolaka dia anango l’akadiyɛnde tshɛ mbôka ngandji. Ɔnkɔnɛ, nde akâlɔmbɛ dia vɔ ‘ndihwanɛ etema’ lo ndjasukanya la nde ndo l’asekawɔ ambetawudi.

7. Ngande wakokaso ‘ndihwanɛ etema’ lo nkɛnɛmɔla ngandji k’onto l’ɔnango?

⁷ Ko kayotota dikambo diaso? Ngande wakokaso ‘ndihwanɛ etema’ lo kɛnɛmɔla ngandji kaso k’onto l’ɔnango? Anto wele l’ɛnɔnyi wa woho ɔtɔi kana ase dioho diamɛ bu l’okakatanu dia mbokana ngandji lam’asawɔ. Ndo anto walanga tɔkɛnyɔ ta woho ɔtɔi mbetshaka wenya efula kâmɛ. Koko naka awui wasalaso l’Akristo amɔtshi tokakitolaka l’akina, kete sho pombaka ‘ndihwanɛ etema.’ Ayonga dui dia lomba sho ndjambola ɔnɛ: ‘Onde dimi sambishaka kana salaka awui amɔtshi l’anangɛso l’akadiyɛso akina lâdiko dia wanɛ waleka mbokana la mi? Lo Mbalasa ka Diolelo, onde haloleke nsawola l’eyoyo l’ɔtɛ wafɔnyami di’ɔnɛ wayoyɔtɔ la mi lɔngɛnyi? Onde dimi mbekesanɛka la epalanga ndo la akɛnda l’etshumanelo?’

8, 9. Ngande wakoka dako diaki Paulo diele lo Romo 15:7 tokimanyiya dia sho mpama lo ngandji kaso k’onto l’ɔnango?

⁸ Lo kɛnɛ kendana la mbishana mɔyɔ, ɛtɛkɛta waki Paulo wele lo mukanda wa Romo kokaka tokimanyiya dia sho monga la kanyi y’ɔlɔlɔ lo dikambo di’asekaso atɛmɔdi. (Adia Romo 15:7.) Tshɛkɛta ya lo Grɛkɛ yokadimɔmi ɔnɛ “nongola” nembetshiyaka “ndjayola onto l’osalosalo tshɛ kana mbetawɔ dia pangia ɔngɛndangɛnda dimɛna.” Lo nshi yakafundamaka Bible, etena kakalongolaka onto ɔmɔtshi angɛnyi ande lakande, nde akawatɛka dia nde aki l’ɔngɛnɔngɛnɔ efula dia mbaɛna. Ngasɔ mbakatolongola Kristo lo yoho ya didjidji ndo sho keketshamaka dia mbôkoya lo nongolaka asekaso atɛmɔdi.

⁹ Etena kashaso anangɛso l’akadiyɛso mɔyɔ lo Mbalasa ka Diolelo kana l’ahole akina, sho kokaka mbidja yimba le wanɛ wahataleke mbeya kana nsawola la wɔ. Lande na kahatɔshi minitɛ ngana dia nsawola la wɔ? Sho kokaka nsala ngasɔ l’anto akina lo losanganya layela. Naka sho nsala ngasɔ kete hatonga edja tayosawola suke l’anangɛso l’akadiyɛso tshɛ. Kema ohomba sho ndeka ndjakiyanya naka hatongi la diaaso dia nsawola l’oseka onto tshɛ lushi lâmɛ. Ndoko onto lahomba nyanga naka hatongi l’akoka wa mboshaka mɔyɔ lo losanganya tshɛ.

10. Diaaso diakɔna dia dimɛna efula diele l’anto tshɛ wa l’etshumanelo, ndo ngande wakokaso nkamba la diɔ?

¹⁰ Mbisha anto akina mɔyɔ mbele ena ka ntondo ka mbalongola. Ndo ena kɛsɔ kokaka nkonya l’asawo w’amɛna ndo lɔngɛnyi la dimɛna. Ɛnyɛlɔ, etena kayaeyanya wanɛ wɔtɔ lo nsanganya ya weke l’anto akina ndo katatɛwɔ nsawola, vɔ nongamɛka dia ndjɛnana la wɔ mbala kekina. Wanɛ wayakimɔ la lolango lo wokelo wa Mbalasa ya Diolelo ndo wanɛ wakamba olimu wa nkimanyiya anto akina ndjokomaka mbala efula angɛnyi w’eshika nɛ dia vɔ ndjeyaka waonga w’ɛlɔlɔ wele l’asekawɔ oma lo woho wakambawɔ kâmɛ. Tekɔ la waaso efula wa nkenga lɔngɛnyi l’oshika l’okongamelo waki Jehowa. Naka sho ‘ndihwanɛ etema,’ kete tayonga l’angɛnyi efula, tayofudia ngandji katokakatanya kâmɛ l’ɔtɛmwɛlɔ wa mɛtɛ.

Todjake anto lo demba

11. Oko wadiɛnya Mako 10:13-16, ɛnyɛlɔ kakɔna kakatshike Yeso?

¹¹ Akristo tshɛ koka nsala la wolo dia mbidja anto lo demba oko wakasale Yeso. Tɔsɛdingole kɛnɛ kakasale Yeso etena kakahembe ambeki ande nshimba ambutshi diaha vɔ ndja la an’awɔ le nde. Nde akate ate: “Nyete tokendakenda wayi le mi, tanyâsikeki, ne dia diulelu dia [Nzambi] dieli dia antu uku vo.” Oma lâsɔ, “Ndi akâlele l’anya andi, akâtshokola, akawahe anya.” (Mako 10:13-16) Ohokanyiya ɔngɛnɔngɛnɔ wakahombe monga l’ana asɔ lo menda woho wakayasha Ombetsha a Woke la ngandji tshɛ le wɔ!

12. Kakɔna kakoka toshimba dia nsawola l’anto akina?

¹² Okristo tshɛ pombaka ndjambola ɔnɛ: ‘Onde dimi mbidjaka anto lo demba, kana mbala efula dimi mɛnyaka dia lekɔ la wesanu efula?’ Mbekelo mɔtshi yele bu kɔlɔ lo yamɛ koka mbidja wekamu dia nsawola l’anto akina lo tena dimɔtshi. Ɛnyɛlɔ, naka sho pinyahinyaka telefɔnɛ kaso wonya tshɛ kana mbidjaka ɛkɔdi l’atui dia mpokamɛka mishiki wonya tshɛ lale anto akina, kete vɔ wayɔsa dia hatolange nsawola la wɔ. Naka anto tɛnaka mbala la mbala takamba la ɔrdinatɛrɛ aso wa l’anya etena keso lalewɔ, kete vɔ mbeyaka mbɔsa dia hatolange nsawola la wɔ. Lo mɛtɛ, “etena ka nembohala” kekɔ. Koko wonya wongaso lale anto akina, ɔsɔ mongaka mbala efula “etena ka nteketa.” (Und. 3:7) Anto amɔtshi mbeyaka mbuta ɔnɛ: “Dimi nangaka ndjatshikalɛ dimɛ” kana “dimi halange ntɛkɛta la pindju.” Koko, nsawola l’angɛnyi aso kânga etena kahatangɛnangɛna dia nsala dui sɔ ekɔ djembetelo ya ‘ngandji kahayange paka wahɔ ande hita.’​—1 Kor. 13:5.

13. Dionga diakɔna diakakeketsha Paulo Timɔtɛ dia monga la diɔ otsha le anangɛso l’akadiyɛso w’Akristo?

¹³ Paulo akakeketsha ɔlɔngɔlɔngɔ Timɔtɛ dia nde nɛmiya anto tshɛ wa l’etshumanelo. (Adia 1 Timote 5:1, 2.) Sho lawɔ pombaka mbɔsa Akristo w’epalanga oko anyangɛso la washɛso ndo Akristo w’akɛnda oko anangɛso l’akadiyɛso w’otema ɔtɔi. Etena kongaso la dionga dia ngasɔ, ndoko ɔnangɛso kana kadiyɛso kayoyaoka oko ɔngɛndangɛnda l’atei aso.

14. Wahɔ akɔna wakondjayɛ lo sawolaka dimɛna l’anto akina?

¹⁴ Etena kasawolaso l’anto akina asawo wakeketsha, sho mbishaka lonya dia vɔ mpama lo nyuma ndo dia vɔ ndjaoka dimɛna. Ɔnangɛso ɔmɔtshi lakamba lo Bɛtɛlɛ mbohɔka l’ɔngɛnɔngɛnɔ tshɛ wenya waketshaka anangɛso akina wambokamba edja lo Bɛtɛlɛ dia nsawola la nde mbala la mbala lo nshi yakinde eke kakoma lo Bɛtɛlɛ. Ɛtɛkɛta awɔ wakeketsha wakokimanyiya dia nde mbeya ɔnɛ ndo nde mbele ose nkumbo ka Bɛtɛlɛ. Ɛlɔ kɛnɛ, nde ekɔ lo mbaokoya lo sawolaka l’anangɛso w’eyoyo waya lo Bɛtɛlɛ.

Okitshakitsha tokimanyiyaka dia mbidja wɔladi

15. Kakɔna kɛnya dia ekakatanu kokaka ntomba kânga lam’asa atɛmɔdi wa mɛtɛ?

¹⁵ Ondo Ewadiya la Sutukɛ, akadiyɛso ahende w’Akristo waki l’etshumanelo ka la Filipi k’edjedja waki l’okakatanu dia nshidiya owanu ɔmɔtshi waki lam’asawɔ. (Fil. 4:2, 3) Owanu wa wolo waki lam’asa Paulo la Baranaba wakeyama lo sɛkɛ woho ɔnɛ wele vɔ wakayokakitɔnaka lo tshanda mɔtshi. (Etsha 15:37-39) Ɛkɔndɔ ɛsɔ mɛnyaka dia ekakatanu kokaka ntomba kânga lam’asa atɛmɔdi wa mɛtɛ. Jehowa tokimanyiyaka dia sho nkandola ekakatanu ndo kaloya lɔngɛnyi. Koko nde tɔlɔmbaka dui dimɔtshi.

16, 17. a) Ohomba akɔna wele l’okitshakitsha dia nkandola okakatanu? b) Ngande wɛnya ɔkɔndɔ waki Jakɔbɔ nde la Esau ohomba w’okitshakitsha?

¹⁶ Ohɔsa dia wɛ l’ɔngɛnyi ayɛ nyekɔ lo nanga minda lɔkɛndɔ lo mututu. La ntondo ka nyu monɛ, wɛ pombaka nkamba la sapi ka kɔtakɛ dia mpɛtsha mututu. Dia nkandola ekakatanu wele lam’asaso nɔmbamaka dia monga la sapi kɛmɔtshi. Sapi kɛsɔ ko okitshakitsha. (Adia Jakoba 4:10.) Oko wɛnyamidiɔ lo ɛnyɛlɔ k’oma l’Afundelo kayela kɛnɛ, sapi kɛsɔ akakimanyiya wanɛ waki l’okakatanu lam’asawɔ dia ntatɛ nkamba l’atɔndɔ wa lo Bible.

¹⁷ Ɛnɔnyi akumi ahende wakete ntatɛ lam’aki Esau la nkɛlɛ k’efula l’ɔtɛ wakandashisha lotshungɔ lande l’ɔna enondo, nde akayangaka dia ndjaka Jakɔbɔ ya diasa diande. Wasa asɔ waki suke la mpomana nto l’ɔkɔngɔ w’etena kɛsɔ ndo “Jakoba akuki woma efula, akasaki lukumba.” Nde akɔshi dia lo weho akɔ tshɛ, Esau ayowodiaka. Koko lam’akawahomana, Jakɔbɔ akasale dui dimɔtshi diaki Esau konongamɛka. Nde ‘akakusama la nkɛtɛ’ etena kakandatasukanaka le ɔnango. Kakɔna kakatombe oma lâsɔ? “Esau akalawo la ntuhumana la ndi, akûkhumbatela, akûdingi anya lu kingu, akanonana la ndi. Ku vo ahendi wakaleli.” Esau kombosalɛ kɔlɔ oko wakandafɔnyaka. Okitshakitsha waki Jakɔbɔ akakimanyiya dia nshidiya nkɛlɛ k’efula kaki la Esau.​—Etat. 27:41; 32:3-8; 33:3, 4.

18, 19. a) Lande na kele ekɔ ohomba dia sho ntatɛ mbɔsa yɛdikɔ lo ndjela alako wa l’Afundelo etena katomba ekakatanu? b) Lande na kahatahombe mpekɔ oyadi l’etatelo welo wodjishaso hawongi l’etombelo w’ɛlɔlɔ?

¹⁸ Bible kekɔ l’alako w’amɛna efula wakimanyiya dia nkandola ekakatanu. (Mat. 5:23, 24; 18:15-17; Ef. 4:26, 27)a Koko, naka hatongi l’okitshakitsha wa nkamba l’alako asɔ, kete ayonga wolo dia wɔladi monga. Nkonga di’onto okina mɛnya okitshakitsha etena keso la dikoka dia nsala dui sɔ, bu yoho ya dimɛna ya nyanga wɔladi.

¹⁹ Naka mɛnamaka dia welo wambotondja mbala ka ntondo dia mbidja wɔladi hawonge l’etombelo w’ɛlɔlɔ l’ɔtɛ w’ɛkɔkɔ ɛmɔtshi, hatohombe mpekɔ. Onto ɔmɔtshi mbeyaka monga l’ohomba wa etena k’otale dia ndjonya lonyangu lele la nde. Anango Yɔsɛfu wakôsalɛ akambo wa kɔlɔ. Ɛnɔnyi efula wakete la ntondo ka vɔ ndjɛnana la nde lâsɔ ko nde aya onto l’ahende lo wodja w’Edjibitu. Koko l’ekomelo, vɔ wakayokadimola etema ndo wakayɔlɔmba edimanyielo. Yɔsɛfu akâdimanyiya ndo ana wa Jakɔbɔ wakayokomaka wodja waki la diɛsɛ dia mɛmba lokombo laki Jehowa. (Etat. 50:15-21) Naka sho mbidja wɔladi lam’asaso l’anangɛso l’akadiyɛso, kete tayosha lonya dia kâmɛ ndo ɔngɛnɔngɛnɔ monga l’etshumanelo.​—Adia Kolosai 3:12-14.

Tokane ngandji “lu ditshelu la lu akambu wa mete”

20, 21. Wetshelo akɔna wakokaso nkondja oma lo woho wakasole Yeso apɔstɔlɔ ande ekolo?

²⁰ Yema tshitshɛ la ntondo ka nyɔi kande, Yeso akatɛ apɔstɔlɔ ande ate: “Dimi lambunyusha djimbitelu ya ndu nyu ntsha, uku unyutshedimi.” (Joa. 13:15) Nde aki oma la nshila la nsola apɔstɔlɔ ande 12 ekolo. Yeso kosala dikambo sɔ lo ndjela tsho mbekelo kɛmɔtshi kana dia mbasalɛ ɔlɔlɔ. La ntondo ka nde nkɔndɔla ɔkɔndɔ wa woho wakasole Yeso apɔstɔlɔ ande ekolo, Joani akafunde ate: “Uku akandalangi antu andi la kete, osoku mbakandâlangi edja ndu l’ekumelu.” (Joa. 13:1) Ngandji kakandokaka ambeki ande mbakatshutshuya Yeso dia nde nsala olimu wakasalaka ɛhɔmbɔ ɔsɔ. Oma lâsɔ, vɔ wakahombe salanɛ akambo l’okitshakitsha tshɛ ndo la ngandji. Eelo, ngandji ka mɛtɛ k’onto l’ɔnango pombaka totshutshuya dia sho ndjasha ndo ndjakiyanya dikambo dia anangɛso l’akadiyɛso w’Akristo.

²¹ Ɔpɔstɔlɔ Petero lakasolama ekolo oma le Ɔna Nzambi akashihodia kitshimudi ya kɛnɛ kakasale Yeso. Nde akafunde ate: “Ne dia nyu nyambedia etema anyu la ukitanyia anyu lu akambu wa mete, dia mbuka anyanyu ngandji mete, okone nyukani ngandji wulu l’etema anyu.” (1 Pet. 1:22) Ɔpɔstɔlɔ Joani lele nde lawɔ akasolama ekolo oma le Nkumadiɔndjɔ akafunde ate: “An’ami wa tshitshe, tatukanaki ngandji lu aui atu la lu nimi, keli tukani ngandji lu ditshelu la lu akambu wa mete.” (1 Joa. 3:18) Etema aso watotshutshuya dia sho mɛnya ngandji k’onto l’ɔnango oma l’etsha.

[Nɔte ka l’ɛse ka dikatshi]

Onde wɛ âkohɔ?

• Lo toho takɔna takokaso ‘ndihwanɛ etema’ lo ngandji kokanaso?

• Kakɔna kayotokimanyiya dia sho mbidja anto akina lo demba?

• Ohomba akɔna wele l’okitshakitsha dia mbidja wɔladi?

• Kakɔna kahomba totshutshuya dia ndjasha dikambo di’asekaso ambetawudi?

[Osato wa lo lɛkɛ 21]

Tolongolake asekaso ambetawudi

[Osato wa lo lɛkɛ 23]

Tatohandjake waaso wa mbidja anto akina lo demba