Nyetsha ananyu

Jeremiya kotshika dia nsambisha

ONDE wɛ atokaka dia wɛ ambɔkɔmɔ ndo ambohekɔ?—a Anto efula ndjaokaka ngasɔ. Ɔlɔngɔlɔngɔ Jeremiya akayaoke ngasɔ. Koko, nde kombetawɔ dia kɛnɛ kakataka kana kakasalaka anto akina mbokonya dia nde mpekɔ. Ɛsɔ tɔsɛdingole woho waki Jeremiya onto la lânde lo washo wa Nzambi, oyadi etena kakandayaokaka oko nde ambohekɔ.

La ntondo ka Jeremiya mbotɔ, Jehowa Nzambi ka mɛtɛ akɔsɔnɛ dia nde monga ɔprɔfɛta dia mpɛmɔla wodja ande ɔnɛ vɔ kɔngɛnyangɛnyaka Nzambi. Onde wɛ mbeyaka kɛnɛ kakatɛ Jeremiya Jehowa ɛnɔnyi ɛmɔtshi l’ɔkɔngɔ?— Nde akate ate: “Dimi haleyi nteketa, ne dia dimi leki dikenda.”

Oko le yɛ, Jehowa akandakadimola Jeremiya?— La ngandji tshɛ nde akôhonwɛ ate: “Tutaki wati: Dimi leki dikenda. We ayutsho le wane tshe wayumukutuma, la we ayuta kene tshe kayumukutela. Tuwaukaki woma.” Lande na? “Ne dia dimi leko kame laye dia nkutshungula,” mbata Jehowa.—Jeremiya 1:4-8. (Sho mbɛnganyisha alɛta ango)

Koko, oko woditshiso la diko, l’ɔkɔngɔ diko Jeremiya akayɔkɔmɔka. Nde akakɔmɔ l’ɔtɛ wakawawɔnyɔlaka ɔnɛ nde ekɔ lo nkambɛ Nzambi. Nde akate ate: ‘Anto tshɛ watɔmbɔlaka lushi l’otondo ndo watɔsɔkaka.’ Ɔnkɔnɛ, nde akɔshi yɛdikɔ yaha nsambisha nto. Nde akate ate: “Dimi haludimula lukumbu la [Jehowa] ntu, dimi haloteketa ntu lu lukumbu landi.” Ko onde nde akatshike dia nsambisha mɛtɛ?

Jeremiya akate ate: ‘Ɔtɛkɛta waki Jehowa mongaka oko dja yahɛta l’otema ndo lo weka ami, ndo dimi lambɔlɛmba dia mbokukɛ.’ (Jeremiya 20:7-9) Kânga mbakidiɔ ngasɔ, lo tena dimɔtshi Jeremiya akoke wɔma koko ngandji kakandokaka Jehowa kakotshutshuyaka diaha nde ntshika dia nsambisha. Ɛsɔ tende woho wakakokamɛ Jeremiya l’ɔtɛ wakinde kotshika dia nsambisha.

Jehowa akatɛ Jeremiya dia nde mpɛmɔla wodja ɔnɛ Jerusalɛma yayolanyema naka vɔ hawotshikitanya mboka yawɔ ya kɔlɔ. Etena kakahɛmɔla Jeremiya wodja, anto wakomala ndo wakate vɔate: “Untu one nkukaka mvo.” Koko, Jeremiya akâsɛngasɛnga ate: “Nyukitanyia diui dia [Jehowa].” Oma lâsɔ, nde akate ate: ‘Nyu pombaka mbeya dia naka nyu ndjakami, kete nyayodiaka onto laha l’onongo nɛ dia Nzambi mbakatome dia dimi nyosambisha.’ Onde wɛ mbeyaka kɛnɛ kakatombe oma lâsɔ?—

Bible mbutaka ɔnɛ: “Ku ewandji la wudja tshe wakatela elombedi la amvutshi vati: Untu one hakuki ndjakema, ne dia ndi akatutedi aui lu lukumbu la [Jehowa, Nzambi k]asu.” Ɔnkɔnɛ, Jehowa akokokɛ nɛ dia Jeremiya kombetawɔ dia wɔma w’anto mbokonya lo nde ntshika dia nsambisha. Ɛsɔ tende kakianɛ kɛnɛ kakakomɛ Uriya, ɔprɔfɛta okina waki Jehowa, ɔnɛ lakasale akambo lo yoho yotshikitanyi.

Bible mbutaka ɔnɛ: ‘Uriya akatetemala mbewoya wodja wa Jerusalɛma ɛtɛkɛta akɔ wâmɛ wakataka Jeremiya.’ Koko, etena kakomalɛ nkumekanga Jɛhɔyakima Uriya, onde wɛ mbeyaka kɛnɛ kakasale Uriya?— Nde akoke wɔma, akatshike dia nsala lolango laki Nzambi ndo akalawɔ otsha l’Edjibito. Ɔnkɔnɛ, nkumekanga akatome anto dia vɔ tôyanga lɛkɔ ndo toya la nde. Etena kakawaye la nde, onde wɛ mbeyaka kɛnɛ kakôsalɛ nkumekanga ka kɔlɔ kɛsɔ?— Nde akadiake Uriya la yɔɔmbɔ!—Jeremiya 26:8-24.

Lande na kakokayɛ mbuta dia Jehowa akakokɛ Jeremiya, koko nde kokokɛ Uriya?— Eelo, ondo Jeremiya aki la wɔma oko waki Uriya lawɔ, koko Jeremiya kotshika dia nde nkambɛ Jehowa ndo nde kondawɔ. Nde kotshika dia nsambisha. Oko le yɛ, wetshelo akɔna wakokaso nkondja oma l’ɛnyɛlɔ kaki Jeremiya?— Lo tena dimɔtshi, sho mbeyaka mɛna dia ekɔ dui dia wolo nsala kɛnɛ katotɛ Nzambi, koko sho pombaka ndjaɛkɛka tena tshɛ le nde ndo mbokitanyiyaka.

[Nɔtɛ ka l’ɛse ka dikatshi]

Ambola:

○ Nzambi akasɔnɛ Jeremiya dia nde ndjokamba olimu akɔna?

○ Lande na kakalange Jeremiya ntshika dia nsambisha?

○ Lande na kakakokamɛ Jeremiya koko Uriya kokokamɛ?

○ Wetshelo akɔna wamboyokondja oma l’ɛnyɛlɔ kaki Jeremiya?