‘Tosambisha Ɔtɛkɛta wa Nzambi la dihonga’
‘Vɔ wakalodiama la nyuma k’ekila ndo wakasambishaka Ɔtɛkɛta wa Nzambi la dihonga.’—ETSHA 4:31.
1, 2. Lande na kahombaso nsala la wolo dia monga la etombelo w’ɛlɔlɔ l’olimu w’esambishelo?
NSHI shato la ntondo ka nyɔi kande, Yeso akatɛ ambeki ande ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” La ntondo ka nde mbudɛ l’olongo, Yeso lakolwama akadjangɛ ambeki ande dia ‘mbetɛ anto wa lo wedja tshɛ ambeki ndo mbaetsha dia nkitanyiya awui tshɛ wakandawadjangɛ.’ Nde akâlake dia nde ayoyala la wɔ “nshi tshe, edja ndu ekumelu k’andja.”—Mat. 24:14; 26:1, 2; 28:19, 20.
2 Oko weso Ɛmɛnyi wa Jehowa, sho ndjashaka tshɛ l’olimu ɔsɔ wakatatɛ oma ko ntambe ka ntondo. Ndoko olimu okina wele ohomba ko ndeka olimu washimbɛ nsɛnɔ w’esambishelo ka Diolelo ndo wa mbetɛ anto ambeki. Lâsɔ, ekɔ mɛtɛ ohomba efula dia sho nsala la wolo dia monga la etombelo w’ɛlɔlɔ l’olimu w’esambishelo! Lo sawo nɛ, tayɛna woho wele nɔmbwama la nyuma k’ekila tokimanyiyaka dia sho nsambisha la dihonga. Asawo ahende wayela wayotɛnya woho wakoka nyuma kaki Jehowa tɔlɔmbɔla dia mbeya mbetsha ndo nsambisha la etete.
Tekɔ l’ohomba wa dihonga
3. Lande na kele dia nsambisha Diolelo nɔmbamaka dia sho monga la dihonga?
3 Olimu wakatosha Nzambi wa nsambisha Diolelo ekɔ diɛsɛ dioleki tshɛ. Koko olimu ɔsɔ wekɔ la ekakatanu ɛmɔtshi. Kânga mbele anto amɔtshi mbetawɔka lokumu l’ɔlɔlɔ la Diolelo dia Nzambi esadi eto, anto efula wekɔ oko wanɛ wakasɛnaka lo nshi ya Nɔa. Yeso akate dia vɔ ‘kombidja yimba edja ndo lam’akaye Mvula k’elola ko kakawakumɛ vɔ tshɛ.’ (Mat. 24:38, 39) Ndo nto, anto amɔtshi tɔsɔkaka ndo tɔlɔshaka. (2 Pet. 3:3) Ɔlɔshamelo mbeyaka ndja oma le ewandji wa lɛɛta, asekaso wa la kalasa kana wa l’olimu, kana oma le ase nkumbo kaso. Lâdiko dia lâsɔ, tekɔ la wɛɔdu aso hita wele oko, ɔsɔnyi ndo wɔma wa mɔnywama oma le anto akina. Akambo efula wekɔ wakoka toshimba dia sho ‘mbuta akambo hwe hwe’ ndo nsambisha Ɔtɛkɛta wa Nzambi la “dihunga.” (Ef. 6:19, 20) Dia ntetemala nsambisha Ɔtɛkɛta wa Nzambi, nɔmbamaka dia sho monga la dihonga. Kakɔna kakoka tokimanyiya dia sho monga la dionga sɔ?
4. a) Dihonga kɛdikɛdi na? b) Ngande wakakondja ɔpɔstɔlɔ Paulo dihonga dia nsambisha ase Tɛsalɔnika?
4 Tshɛkɛta ya lo Grɛkɛ yokadimɔmi ɔnɛ “dihonga” nembetshiyaka “aha ninga lolemi, mbuta akambo hwe hwe.” Tshɛkɛta shɔ mbelaka kanyi ya “monga la wɛkamu, . . . aha mboka wɔma.” Monga la dihonga halembetshiya monga awui wolo. (Kol. 4:6) Kânga tayonga la dihonga, sho nangaka nto nsɛna l’anto tshɛ ki. (Romo 12:18) Lâdiko dia lâsɔ, etena kasambishaso lokumu l’ɔlɔlɔ la Diolelo dia Nzambi, sho pombaka monga la wɛdimo lam’asa dihonga la yewo diaha sho nyangiya anto amɔtshi aha la sho mbeya. Lo mɛtɛ, dihonga nɔmbaka dia sho monga la waonga walɔmba dia sho mbidja welo efula dia monga la wɔ. Hatokoke monga la dihonga dia ngasɔ oma lo wolo aso hita. L’ɔkɔngɔ w’ɔpɔstɔlɔ Paulo nde l’asekande ‘mbishama sɔnyi la Filipi,’ ngande ‘wakawakondja dihonga’ dia nsambisha ase Tɛsalɔnika? Paulo akate dia aki ‘oma lo ekimanyielo ka Nzambi kaso.’ (Adia 1 Tesalonika 2:2.) Jehowa Nzambi kokaka tonyɛ wɔma wele la so ndo tosha dihonga dia ngasɔ.
5. Ngande wakasha Jehowa Petero, Joani ndo ambeki akina dihonga?
5 Etena kakawalɔshama oma le ‘emboledi w’anto ndo oma le dikumanyi la afundji,’ ɔpɔstɔlɔ Petero nde la Joani wakate ɔnɛ: “Naka eko ololo lu ashu [wa Nzambi] dia nyukela uleki mbukela [Nzambi], nyusambuli nyame. Ne dia shu hateyi ntsha dikambu dikina, paka mvuta akambu wakatenyi la wakatuki.” Lo dihole dia vɔ nɔmba Nzambi dia ɛhɛnyɔhɛnyɔ awɔ nshila, vɔ l’asekawɔ ambetawudi wakalɔmbɛ lo mbuta ɔnɛ: “Khumadiondjo, . . . ulungi aui awo wa dianelu. Usha ekambi aye dia vo mvuta diui la dihunga tshe.” (Etsha 4:5, 19, 20, 29) Ngande wakakadimola Jehowa lo ɛsɛngɔsɛngɔ awɔ? (Adia Etsha 4:31.) Jehowa akâkimanyiya dia monga la dihonga lo ekimanyielo ka nyuma kande. Nyuma ka Nzambi kokaka tokimanyiya ndo sho lawɔ. Ko ngande wakokaso nongola nyuma ka Nzambi ndo nɔmbwama la tɔ l’olimu aso w’esambishelo?
Woho wa monga la dihonga
6, 7. Naa yoho yoleki dimɛna yakokaso nongola nyuma k’ekila kaki Nzambi? Sha bɛnyɛlɔ.
6 Yoho yoleki dimɛna yakokaso nkondja nyuma k’ekila kaki Nzambi ele kilɔmba. Yeso akatɛ ampokami ande ate: “Naka nyu antu wa kolo mbeyaka mbisha an’anyu eshasha w’ololo, Shenyu le l’ulungu huleka mbisha wane wôlomba nyuma k’[ekila]?” (Luka 11:13) Lo mɛtɛ, sho pombaka nɔmba la etete dia nkondja nyuma k’ekila. Naka toho tɔmɔtshi t’esambishelo, ɛnyɛlɔ oko esambishelo ka lo toshinga, ka lo tshakitudi kana esambishelo ka l’ahole wandawɔ okanda totshaka wɔma, kete sho kokaka nɔmba Jehowa nyuma kande ndo dia nde tokimanyiya dia sho monga la dihonga diele la so ohomba.—1 Tes. 5:17.
7 Kɛsɔ mbakasale Okristo ɔmɔtshi wa womoto welɛwɔ Rosa.a Lushi lɔmɔtshi, etena kaki Rosa lo dihole diakambande olimu, ombetsha ɔmɔtshi wakakambaka la nde akadiaka alapɔlɔ w’oma la kalasa kekina wendana la woho wakasoyamaka ambeki. Ombetsha ɔsɔ akanyange efula lo kɛnɛ kakandadiaka ndo nde akate la dui dia wolo ate: “Lende atatshu andja ɔnɛ mɛtɛ?” Rosa akakambe la diaaso sɔ dia mbôsambisha. Kakɔna kakandasale dia nkondja dihonga dia ntatɛ sawo? Rosa mbutaka ate: “Dimi lakalɔmbɛ Jehowa dia nde mbishami nyuma kande dia tɔ kimanyiyami.” Nde akonge l’akoka wa nsambisha ombetsha ɔsɔ dimɛna ndo mbokana la nde dia vɔ ndjosawola mbala kekina. Tɔsɛdingole nto ɛnyɛlɔ kaki ɔna womoto ɔmɔtshi l’ɛnɔnyi etanu lelɛwɔ Milane ladjasɛ l’osomba wa New York. Milane mbutaka ate: “La ntondo ka dimi ntshɔ la kalasa, dimi la mama nɔmbaka Jehowa nshi tshɛ.” Kakɔna kalɔmbawɔ? Vɔ nɔmbaka dia Milane mbɔsa yɛdikɔ ya mbeta lo wedi w’akambo wa mɛtɛ ndo nsambisha awui wendana la Nzambi kande! Nyango mbutaka ate: “Kɛsɔ kambokimanyiya Milane dia nde nembetshiya anto yɛdikɔ yande lo kɛnɛ kendana la fɛtɛ ya eotwelo ndo fɛtɛ nkina ndo woho wahandasangana l’asekande lo waaso asɔ.” Shi bɛnyɛlɔ sɔ mɛnyaka ɔnɛ dɔmbɛlɔ kokaka tokimanyiya dia sho monga la dihonga?
8. Wetshelo akɔna wakokaso nkondja oma le Jeremiya lo kɛnɛ kendana la woho wa monga la dihonga?
8 Tende nto kɛnɛ kakakimanyiya ɔprɔfɛta Jeremiya dia nde monga la dihonga. Etena kakɔsɔnɛ Jehowa oko ɔprɔfɛta w’ase wedja, Jeremiya akakadimola ate: “We henyi, dimi haleyi nteketa, ne dia dimi leki dikenda.” (Jer. 1:4-6) Koko l’edjedja ka wonya, Jeremiya akayongaka la etete ndo akasambishaka la wolo tshɛ woho ɔnɛ wele anto efula wakayowɔsaka oko ɔprɔfɛta wewoya paka mpokoso. (Jer. 38:4) L’edja kolekanyi ɛnɔnyi 65, nde akewoyaka dombwelo diaki Jehowa la dihonga tshɛ. Nde akeyamaka dimɛna efula l’Isariyɛlɛ lo woho wakinde kombokaka wɔma ndo wakandasambishaka la dihonga, diakɔ diele l’ɔkɔngɔ w’ɛnɔnyi oko 600, etena kakasambishaka Yeso la dihonga, anto amɔtshi wakafɔnya dia Jeremiya kambolɔ. (Mat. 16:13, 14) Ngande wakayonyaka Jeremiya, ɔprɔfɛta waki la wɔma ntondo ɔsɔ, ɔsɔnyi waki la nde? Nde akate ate: “[Ɔtɛkɛta wa Nzambi] ndjalaka l’utema ami uku dja yadikita, mbambudihama lu weka ami.” (Jer. 20:9) Eelo, Ɔtɛkɛta wa Jehowa wakasha Jeremiya wolo woleki ndo wakotshutshuya dia nde nsambisha.
9. Lande na kakoka Ɔtɛkɛta wa Nzambi monga la shɛngiya le so woho wakiwɔ la shɛngiya le Jeremiya?
9 Lo mukanda wakandafundɛ ase Hɛbɛru, ɔpɔstɔlɔ Paulo akafunde ate: ‘Nɛ dia Ɔtɛkɛta wa Nzambi wekɔ la lɔsɛnɔ ndo la wolo; vɔ wekɔ la mpɛmɔ koleki yɔɔmbɔ ya mpɛmɔ wedi ehende ndo vɔ nyɔngɔmɛka polo ndo lo vɔ nkakitola anima la yimba, asɔnga la ehihɔ awɔ, ndo vɔ kokaka nembetɛ tokanyi la nsaki ya l’otema.’ (Heb. 4:12) Losango kana Ɔtɛkɛta wa Nzambi kokaka monga la shɛngiya le so oko wakiwɔ la shɛngiya le Jeremiya. Koko tohɔ dia kânga mbele anto mbakafunde Bible, tɔ bu dibuku diele la lomba l’anto nɛ dia tɔ kakasambiyama oma le Nzambi. Lo 2 Petero 1:21, sho mbadiaka ɔnɛ: “Nduku diui di’amvutshi diakayi uma lu lulangu la antu, keli antu wakati diui uma le [Nzambi], wakasukuyama uma le nyuma k’[ekila].” Naka sho mbɔsa etena ka nsala wekelo wa Bible w’onto ndamɛ wa dimɛna dimɛna, kete timba taso tayolodiama la losango lakasambiyama oma le nyuma k’ekila. (Adia 1 Koreto 2:10.) Losango lɔsɔ kokaka monga oko “dja yadikita” l’etema aso, woho ɔnɛ wele tayotshutshuyama dia liewoya anto akina.
10, 11. a) Ngande wahombaso mbekaka Bible naka sho nangaka sambishaka la dihonga? b) Shila kânga nna ɔtɔi diahombayɛ ntakola dia ndowanya wekelo ayɛ w’onto ndamɛ.
10 Dia wekelo wa Bible w’onto ndamɛ monga la shɛngiya ya wolo le so, vɔ pombaka salemaka lo yoho yakoka losango la lo Bible nkoma l’etei k’etema aso, mbuta ate munanda lonto laso la l’etei k’otema. Ɛnyɛlɔ, ɔprɔfɛta Ezekiyɛlɛ akalongola ɛnɛlɔ kakawɔlɔmbɛ dia nde ndɛ wɔɔmbɔ wa buku waki la losango la wolo lakandahombe mbewoya anto waki la wendjudi. Ezekiyɛlɛ akahombe mbeshesha losango lɔsɔ ndo likonya etenyi kɛmɔtshi ka lonto lande. Nsala dui sɔ akahombe mbokimanyiya dia nde ngɛnangɛna mbewoya losango lɔsɔ, mbuta ate lɔ lakahombe nkoma mpɛ oko osanga le nde.—Adia Ezekiyele 2:8–3:4, 7-9.
11 Sho lawɔ tekɔ la ntondo ka woho wa dikambo diakahomana la Ezekiyɛlɛ. Ɛlɔ kɛnɛ, anto efula hawolange mpokamɛ kɛnɛ kata Bible. Dia sho ntetemala nsambisha Ɔtɛkɛta wa Nzambi, ekɔ ohomba sho mbeka Afundelo lo yoho nyɛ yakoka tokimanyiya dia sho mbeshesha losango la lɔkɔ. Sho pombaka monga la mbekelo ka mbekaka mbala la mbala, koko aha lo pai. Sho pombaka monga la nsaki kele oko kɛnɛ kaki l’omembi w’esambo lakembe ɔnɛ: “Aui wa unyo ami la tukanyi t’utema ami wayali ololo lu ashu aye, we [Jehowa], Dive diami la Utshungudi ami.” (Osam. 19:14) Ekɔ mɛtɛ ohomba dia sho mbɔsaka etena ka nkana yimba la kɛnɛ kadiaso, di’akambo wa mɛtɛ wa lo Bible nshikimala l’etema aso! Lo mɛtɛ, sho pombaka nsala la wolo dia ndowanya wekelo aso w’onto ndamɛ.b
12. Lande na kele nsanganya y’Akristo tokimanyiyaka dia sho nɔmbwama la nyuma k’ekila?
12 Yoho kina yakokaso nkondja wahɔ oma le nyuma k’ekila kaki Jehowa ele lo ‘kananɛka onto l’onto dia keketshanaka lo ngandji ndo l’elimu w’ɔlɔlɔ, aha la mbohɛ sanganaka kâmɛ.’ (Heb. 10:24, 25) Toho t’amɛna ta mɛnya ɔnɛ sho nɔmbwamaka la nyuma ele mbɔtɔka lo nsanganya y’Akristo mbala la mbala, mpokamɛka la yambalo tshɛ ndo kambaka la kɛnɛ kekaso. Shi oma lo tshimbo y’etshumanelo mbatɔlɔmbɔla nyuma kaki Jehowa?—Adia Enyelo 3:6.
Ɛlɔlɔ waya lo monga la dihonga
13. Wetshelo akɔna wakondjaso oma lo olimu w’esambishelo wakakambe Akristo wa lo ntambe ka ntondo?
13 Nyuma k’ekila ekɔ wolo woleki tshɛ l’andja w’otondo ndo tɔ kokaka mbisha onto wolo dia nsala lolango la Jehowa. Lo shɛngiya yatɔ, Akristo wa lo ntambe ka ntondo wakasambisha lo yoho ya diambo efula. Vɔ wakasambisha lokumu l’ɔlɔlɔ ‘le ditongami tshɛ dia l’ɛs’olongo.’ (Kol. 1:23) Etena kɛnaso dia efula ka l’atei awɔ ‘kombeyaka mukanda ndo waki anto k’anto,’ mɛnamaka hwe dia vɔ wakatshutshuyama oma le wolo ɔmɔtshi woleki tshɛ.—Etsha 4:13.
14. Kakɔna kakoka tokimanyiya dia sho ‘mpɛtahɛta la nyuma’?
14 Etena kasɛnaso lo yoho yɔtɔnɛ la ɛlɔmbwɛlɔ ka nyuma k’ekila, sho tshutshuyamaka dia nkamba olimu w’esambishelo la dihonga tshɛ. Ɛlɔlɔ tshɛ wakondjaso lo nɔmbaka mbala la mbala dia nkondja nyuma k’ekila, lo salaka wekelo w’onto ndamɛ wa l’etete ndo wa lotshimola, lo kanaka yimba lo dɔmbɛlɔ la kɛnɛ kadiaso ndo lo mbɔtɔka lo nsanganya y’Akristo mbala la mbala kokaka tokimanyiya dia sho ‘mpɛtahɛta la nyuma.’ (Romo 12:11) Lo kɛnɛ kendana la “usi Juda omotshi, lukumbu landi Apolo, lakuto l’Alesanderiya, [l]akayi l’Efeso,” Bible mbutaka ɔnɛ: ‘Lam’ele nde akahɛtahɛtaka la nyuma, nde akasambishaka ndo aketshaka anto akambo wendana la Yeso ɔlɔlɔ.’ (Etsha 18:24, 25) Lo ‘mpɛtahɛta la nyuma,’ sho kokaka monga la dihonga di’efula etena kasambishaso lo luudu la luudu ndo lo tshakitudi.—Romo 12:11.
15. Wahɔ akɔna wakondjaso lo nsambisha la dihonga di’efula?
15 Monga la dihonga di’efula l’esambishelo mongaka la shɛngiya y’ɔlɔlɔ le so. Sho ndowanyaka dionga diaso nɛ dia sho shihodiaka dimɛna ohomba ndo wahɔ waya oma l’olimu aso w’esambishelo. Waasaso aso mfulaka nɛ dia sho mongaka la ɔngɛnɔngɛnɔ w’efula etena kakondjaso etombelo w’ɛlɔlɔ l’esambishelo. Ndo sho keketshaka ohetoheto aso nɛ dia sho mbeyaka di’olimu aso pombaka kambema la shamanya.
16. Kakɔna kahombaso nsala naka taya kema la ohetoheto efula l’esambishelo?
16 Kayotota naka tamboshisha ohetoheto waki la so l’esambishelo? Etena kɛsɔ sho la dia ndjasɛdingola l’otema ɔtɔi. Paulo akafunde ate: “Nyuyaunganel[ak]i nyame, kana nyu la mbetawo; nyuyaedik[ak]i nyame.” (2 Kor. 13:5) Yambola wate: ‘Onde dimi lakahɛtahɛta la nyuma? Onde dimi nɔmbaka Jehowa nyuma kande? Onde alɔmbɛlɔ ami mɛnyaka dia dimi ndjaɛkɛka le nde dia nsala lolango lande? Onde vɔ wekɔ l’ɛtɛkɛta wɛnya dia dimi mandolaka olimu wakandatosha? Ngande wele mbekelo yami ya wekelo w’onto ndamɛ? Wenya engana wetshami dia nkana yimba la kɛnɛ kadiami ndo kokami? Ngande wayashami lo nsanganya ya l’etshumanelo?’ Nkana yimba la ambola asɔ kokaka kokimanyiya dia mbeya wɛɔdu wele la yɛ ndo tɛdikɔ tahombayɛ mbɔsa dia ndjalowanya.
Tetawɔ dia nyuma ka Nzambi tosha dihonga
17, 18. a) Polo lo yɛdikɔ yakɔna yambokambema olimu w’esambishelo ɛlɔ kɛnɛ? b) Ngande wakokaso mbuta ‘akambo hwe hwe’ etena kasambishaso lokumu l’ɔlɔlɔ la Diolelo dia Nzambi?
17 Yeso lakolwama akatɛ ambeki ande ate: “Nyayulungula wulu lam’ayuya nyuma k’ekila le nyu. Nyu nyayuyala emenyi ami lu Jerusalema, lu Judiya tshe la Samariya edja ndu l’ekumelu ka kete.” (Etsha 1:8) Olimu wakatatɛ l’etena kɛsɔ wekɔ lo kambema ɛlɔ kɛnɛ lo yɛdikɔ yewɔ watakambemaka. Ndekana miliyɔ esambele y’Ɛmɛnyi wa Jehowa wekɔ lo nsambisha losango la Diolelo lo wedja ndekana 230, ndo wekɔ lo mbetsha wenya suke la miliyara 1,5 ɔnɔnyi tshɛ l’olimu w’esambishelo. Tekɔ la ɔngɛnɔngɛnɔ efula dia ndjasha la ohetoheto tshɛ l’olimu ɔsɔ wahakambemaki nto pondjo!
18 Oko wakidiɔ lo ntambe ka ntondo, olimu w’esambishelo wakambema l’andja w’otondo ɛlɔ kɛnɛ wekɔ lo salema lo ɛlɔmbwɛlɔ ka nyuma ka Nzambi. Naka sho ndjela ɛlɔmbwɛlɔ ka nyuma kɛsɔ, kete tayota ‘akambo hwe hwe’ l’olimu aso w’esambishelo. (Etsha 28:31) Ɔnkɔnɛ, nyɛsɔ tɔlɔmbwamake la nyuma etena kasambishaso lokumu l’ɔlɔlɔ la Diolelo dia Nzambi!
[Nɔtɛ ya l’ɛse ka dikatshi]
a Nkombo yakatshikitanyema.
b Dia ndeka nkondja wahɔ oma lo wadielo ayɛ wa Bible ndo oma lo wekelo w’onto ndamɛ, enda dibuku Kondja wahɔ oma lo Kalasa k’olimu wa teokrasi, lo totshapita tele l’ɛtɛ w’awui ɛnɛ: “Yasha lo wadielo” ndo “Ɛlɔlɔ w’oma lo wekelo,” lɛkɛ 21-32.
Kakɔna kamboyeka?
• Lande na keso l’ohomba wa dihonga dia nsambisha Ɔtɛkɛta wa Nzambi?
• Kakɔna kakakimanyiya Akristo wa ntondo dia nsambisha la dihonga?
• Ngande wakokaso monga la dihonga?
• Ɛlɔlɔ akɔna wakondjaso lo monga la dihonga?
[Osato wa lo lɛkɛ 7]
Ngande wakoka ambutshi nkimanyiya anawɔ dia vɔ monga la dihonga?
[Esato wa lo lɛkɛ 8]
Dɔmbɛlɔ dia lo tshena pe kokaka tokimanyiya dia monga la dihonga l’esambishelo