Anto angana wambonandema la losango la Yeso Kristo?

OFUNDJI GREGG EASTERBROOK akate ate: “Djembetelo yoleki woke yɛnya dia onto la lomba l’ose Kapɛrnauma aki la lɔsɛnɔ ele woho watetemala losango lande monga la shɛngiya lo timba ndo l’etema w’anto.”a

ƐTƐKƐTA wekɔ la shɛngiya ya wolo. Ɛtɛkɛta wa lomba wɔsɔnami dimɛna kokaka munanda etema w’anto, mbasha elongamelo ndo ntshikitanya nsɛnɔ yawɔ. Ndoko onto lakatɛkɛta ɛtɛkɛta wakonge la shɛngiya ya wolo oko Yeso Kristo. Onto ɔmɔtshi lakahokamɛ Dako dia lo dikona dianyanyema efula akayofunda ate: “Yeeso amboshila ntɛkɛta, anto wakacikala enyɔ hwee waamba olakanyeelo waakinde.”—Mateu 7:28, Dyookaneelo dy’Oyooyo.

Edja ndo ɛlɔ, anto wa l’andja w’otondo mbeyaka ɛtɛkɛta waki Yeso dimɛna efula. Tɔsɛdingole bɛnyɛlɔ dingana di’ɛtɛkɛta w’ohomba efula wakandate.

“Nyu hanyeyi nkambela [Nzambi] la ukundji ulimu.”—Mateu 6:24.

“Okone nyutsheli antu akambu tshe uku alanganyu vo nyutshela.”—Mateu 7:12.

“Nyusha Kayisa diango dia Kayisa; nyusha [Nzambi] diango dia [Nzambi].”—Mateu 22:21.

“Ɔngɛnɔngɛnɔ wa mbisha, ndeka wa nongola.”—Etsha 20:35, Dyookanelo dy’Oyooyo.

Koko Yeso akasale akambo efula lâdiko di’ɛtɛkɛta wa diambo wakandatondja. Losango lakandasambisha laki la nkudu nɛ dia lɔ lakewoyaka akambo wa mɛtɛ wendana la Nzambi, laketshaka anto dia monga la lɔsɛnɔ lele l’oyango ndo lakɛnyaka dia Diolelo diaki Nzambi mbayoshidiya asui tshɛ w’anto. Tayanga mɛna dia losango laki Yeso lekɔ lo ntetemala monga la shɛngiya lo “timba ndo l’etema w’anto” etena kayangaso nsɛdingola losango lakɔ l’asawo wayela.

[Nɔtɛ ka l’ɛse ka dikatshi