Onde wɛ akeyaka?
Lâdiko dia Bible, tolembetelo takɔna tɛnya dia Yeso aki mɛtɛ la lɔsɛnɔ?
▪ Afundji efula wa l’andja ɔnɛ wakasɛnɛ oya lo etena kaki Yeso la lɔsɛnɔ wakatɛkɛta akambo amɔtshi wa shikaa wendana la nde. L’atei awɔ mbaki ndo Tacite, ɔnɛ lakafunde ɔkɔndɔ w’ase Rɔma lo nshi yakolɛka nkumi ya dikanga. Tacite akate dia anto wakataka dia nkumekanga Nɛrɔ mbaki l’onongo wa dja yakatshumbe Rɔma lo 64 T.D. Lo ndjela Tacite, Nɛrɔ akahembe mama olui ɔmɔtshi w’anto wakawelɛka ɔnɛ Akristo onongo ɔsɔ. Lo dibuku diande diele l’ɔtɛ a dui ɔnɛ Annales (XV, 44), Tacite akafunde ate: “Nguvɛrnɛrɛ Pɔnsɔ Pilato lakolɛka lo nshi yakalɔmbɔlaka Tibɛriyo mbakadiakisha Kristo lɔsami lokombo lawɔ.”
Ombewi ɔmɔtshi w’ɛkɔndɔ w’ose Juda welɛwɔ Flavius Josèphe akatɛkɛta nde lawɔ dikambo dia Yeso. Lo dibuku diande diele l’ɔtɛ a dui ɔnɛ Antiquités judaïques (XX, 200 (ix, 1), Josèphe nembetshiyaka akambo wakete lam’asa nyɔi kaki Fɛstɔ, nguvɛrnɛrɛ ka la Judeya k’ose Rɔma oya lo 62 T.D. ndo etena kakɔhɛnɛ Albinus lo mbuta ɔnɛ ɔlɔmbɛdi a lâdiko Ananiya “akɔtɔ lo losanganya nde la toshushi ta l’olui w’ase Sheke ko akalombosha pami kakawelɛka Jakɔba ɔnango Yeso lakawelɛka Kristo ndo anto akina.”
Lande na kakawelɛka Yeso ɔnɛ Kristo?
▪ Evanjiliɔ mbutaka dia etena kakɛnama ondjelo Ngabiriyɛlɛ le Mariya dia mbêwoya ɔnɛ nde ayotshɔ diemi, nde akɔlɔmbɛ dia mbɔlɛ ɔna pami lakandahombe mbota ɔsɔ lokombo ɔnɛ Yeso. (Luka 1:31) Ase Juda efula wa lo nshi yakafundamaka Bible wakɔlamɛka lokombo lɔsɔ. Josèphe ombewi ɔmɔtshi w’ɛkɔndɔ w’ose Juda akafunde dia lâdiko di’anto watɛkɛtama l’Afundelo, anto akina 12 waki la lokombo lɔsɔ. Ɔnaki Mariya akelamɛ ɔnɛ “usi Nazareta” dia mɛnya ɔnɛ Yeso akole la Nazarɛta. (Mako 10:47) Nde akayeyamaka nto lo lokombo la “Kristu” kana Yeso Kristo. (Mateu 16:16) Lokombo lɔsɔ alembetshiyalɔ na?
Lokombo la l’Ɔtɛtɛla “Kristo” ndja oma lo lokombo la lo Grɛkɛ Khri·stosʹ lelɛwɔ Ma·shiʹach lo Hɛbɛru. Nkombo yakɔ hiende nembetshiyaka “Okitami.” Anto efula wakasɛnɛ la ntondo ka Yeso wakasunganaka mbelamɛ lokombo lɔsɔ. Ɛnyɛlɔ Mɔsɛ, Arɔna ndo nkumekanga Davidi vɔ tshɛ wakelamɛka ɔnɛ akitami, mbuta ate vɔ wakasɔnama oma le Nzambi dia monga l’ɛkɛndɛ ndo la lowandji. (Akambu w’Asi Lewi 4:3; 8:12; 2 Samuele 22:51; Heberu 11:24-26) Yeso laki Mɛsiya wakalakema mbaki onyimpala waki Jehowa wakaleke woke. Ɔnkɔnɛ, sunganaka mɛtɛ dia Yeso mbelamɛ ɔnɛ: ‘Kristo Ɔna Nzambi kasɛna.’—Mateu 16:16; Danyele 9:25.
[Osato wa lo lɛkɛ 15]
Sango diaki Flavius Josèphe