Tatonyangiyake nyuma k’ekila kaki Jehowa
‘Tanyonyangiyake nyuma k’ekila kaki Nzambi kakanyadjama djembetelo la tɔ.’—EF. 4:30.
1. Jehowa akandasalɛ miliyɔ y’anto, ndo ɔkɛndɛ akɔna wele la wɔ?
JEHOWA akasalɛ miliyɔ y’anto wasɛna lo andja ɔnɛ w’ofukutanu dikambo dimɔtshi dia lânde. Nde akawasha diaaso dia vɔ ndjasukanya la nde lo tshimbo ya Yeso Kristo, Ɔnande ɛtɔi lakandote. (Joa. 6:44) Naka wɛ amboyakimɔka le Nzambi ndo ekɔ lo nsɛna lo yoho yɔtɔnɛ la ndjakimɔ kakɔ, kete wɛ ekɔ l’atei w’anto asɔ. Oko wakayabatizama lo lokombo la nyuma k’ekila, wɛ pombaka nkɛndakɛnda lo yoho yɔtɔnɛ la nyuma kakɔ.—Mat. 28:19.
2. Ambola akɔna wayangaso nsɛdingola?
2 Sho wanɛ ‘wonɛ lo nyuma’ ndɔtaka lonto l’oyoyo. (Ngal. 6:8; Ef. 4:17-24) Koko ɔpɔstɔlɔ Paulo tolakaka ndo tɔhɛmɔlaka diaha sho nyangiya nyuma k’ekila kaki Nzambi. (Adia Efeso 4:25-32.) Tayanga nsɛdingola kakianɛ dako diaki ɔpɔstɔlɔ Paulo. Kakɔna kakandalange mbuta etena kakandate diaha nyangiya nyuma k’ekila kaki Nzambi? Lo toho takɔna takoka onto lakayakimɔ le Jehowa nyangiya nyuma Kande? Ndo ngande wakokaso mbewɔ dia nyangiya nyuma kaki Jehowa?
Kɛnɛ kakalange Paulo mbuta
3. Ngande wayoyolembetshiya ɛtɛkɛta wele lo Efeso 4:30?
3 Ntondotondo, tende ɛtɛkɛta waki Paulo wele lo Efeso 4:30. Nde akate ate: ‘Tanyonyangiyake nyuma k’ekila kaki Nzambi kakanyadjama djembetelo la tɔ dikambo dia lushi la etshungwelo k’oma lo tshungo.’ Paulo konangaka dia asekande ambetawudi wa ngandji mbidja lonyuma lawɔ lo wâle. La nyuma kaki Jehowa ‘mbakawadjama djembetelo dikambo dia lushi l’etshungwelo k’oma lo tshungo.’ Nyuma k’ekila kaki Nzambi kaki ndo kekɔ djembetelo kana ‘ɔkɔlɛ wa kɛnɛ kakongɛ’ akitami walama olowanyi awɔ. (2 Kor. 1:22) Djembetelo shɔ nembetshiyaka dia vɔ waya anto waki Nzambi ndo wayokondja lɔsɛnɔ la l’olongo. Wanɛ wayodjama djembetelo wayonga tshɛtshɛ anto 144000.—Eny. 7:2-4.
4. Lande na kele ekɔ ohomba sho mbewɔ dia nyangiya nyuma kaki Nzambi?
4 Nyangiya nyuma kokaka monga nna dia ntondo diakoka nkonya onto diaha wolo waki Nzambi wakamba olimu monga kânga la yema ya shɛngiya lo lɔsɛnɔ lande l’Okristo. Kɛnɛ kakate Davidi l’ɔkɔngɔ wa nde nsala pɛkato nde la Batɛshɛba mɛnyaka mɛtɛ ka dikambo sɔ. La ndjatshumoya tshɛ, Davidi akasɛngasɛnga Jehowa ate: “Tumbitshanyaki etali uma la ntundu kaye, tunyaki nyuma k’[ekila] kaye uma le mi.” (Osam. 51:11) Paka akitami watshikala la ‘kɔlamelo polo ndo lo nyɔi’ mbayolongola “dembo dia kusu” dia lɔsɛnɔ lahavu l’olongo. (Eny. 2:10; 1 Kor. 15:53) Akristo wele la elongamelo ka nsɛna la nkɛtɛ vɔ lawɔ wekɔ l’ohomba wa nyuma k’ekila dia vɔ nama olowanyi awɔ le Nzambi ndo nongola woshasha wa lɔsɛnɔ oma lo mbetawɔ kele la wɔ l’olambo wa tshungo waki Kristo. (Joa. 3:36; Romo 5:8; 6:23) Oma lɔkɔ, sho tshɛ pombaka ndjalama diaha nyangiya nyuma k’ekila kaki Jehowa.
Ngande wakoka Okristo nyangiya nyuma?
5, 6. Ngande wakoka Okristo nyangiya nyuma kaki Jehowa?
5 Oko weso Akristo wamboyakimɔka le Nzambi, sho kokaka mbewɔ dia nyangiya nyuma. Sho kokaka nsala dikambo sɔ naka sho ‘ntetemala nkɛndakɛnda ndo nsɛna la nyuma,’ nɛ dia naka sho nsala ngasɔ, kete hatotɔlɛmbiyama la nsaki ya kɔlɔ ya demba ndo hatotɔkɛnɛmɔla waonga wa kɔlɔ. (Ngal. 5:16, 25, 26) Koko awui kokaka ntshikitana. Sho kokaka nyangiya nyuma kaki Nzambi lo yɛdikɔ mɔtshi naka sho mbetawɔ dia monga yema yema la lɔkɛwɔ latona Ɔtɛkɛta wa Nzambi wakasambiyama la nyuma kande tena dimɔtshi aha la sho nshihodia dikambo sɔ.
6 Naka sho ntetemala nsala akambo lo yoho yahɔtɔnɛ la ɛlɔmbwɛlɔ ka nyuma k’ekila, kete tayokinyangiya ndo tayonyangiya Jehowa lele Kiɔkɔ yatɔ. Ɔsɛdingwelo wa Efeso 4:25-32 wayotɛnya woho wahombaso nkɛndakɛnda ndo dui sɔ diayokoka tokimanyiya dia mbewɔ dia nyangiya nyuma kaki Nzambi.
Woho wa mbewɔ diaha nyangiya nyuma
7, 8. Lembetshiya lande na kahombaso mbutaka mɛtɛ.
7 Sho pombaka mbutaka mɛtɛ. Lo ndjela Efeso 4:25, Paulo akafunde ate: “Nyunya kashi, nyutanelaki akambu wa mete, untu la unyandi, ne dia beke dia dimba otoi mbesu, shu tshe untu l’untu.” Lam’ele tekɔ kâmɛ oko “beke dia dimba otoi,” hatohombe mɛtɛ nkesa asekaso atɛmɔdi l’okonda nɛ dia ɔsɔ ekɔ mbatɛ kashi. Onto tshɛ layotetemala monga la lɔkɛwɔ la ngasɔ ayoyoshisha diɔtɔnganelo diasande la Nzambi.—Adia Tukedi 3:32.
8 Ɛtɛkɛta kana ditshelo dia lokeso kokaka ndanya kâmɛ ka lo etshumanelo. Ɔnkɔnɛ, sho pombaka monga anto wakoka anto akina mbɛkɛ etema l’ɛnyɛlɔ k’ɔprɔfɛta Danyɛlɛ lele anto akina kokoka mbotana la munga. (Dan. 6:4) Ndo sho pombaka mbohɔka dako diakasha Paulo Akristo wele la elongamelo k’otsha l’olongo di’ɔnɛ onto tshɛ lakenga “dimba dia Kristu” ekɔ onto laki anto akina tshɛ ndo vɔ pombaka ntshikala kâmɛ l’ambeki waki Yeso w’akitami wata akambo wa mɛtɛ. (Ef. 4:11, 12) Naka tekɔ la elongamelo ka nsɛna pondjo pondjo lo Paradiso ka la nkɛtɛ, kete sho lawɔ pombaka mbutaka mɛtɛ nɛ dia lo nsala ngasɔ mbayotokeketsha kâmɛ ka nkumbo kaso k’onto l’ɔnango ka lo andja w’otondo.
9. Lande na kahombaso nkitanyiya dako diele lo Efeso 4:26, 27?
9 Sho pombaka ndɔshana la Diabolo ndo aha mbosha diaaso dia nde ndanya lonyuma laso. (Jak. 4:7) Nyuma k’ekila tokimanyiyaka dia sho nshika tanga la ntondo ka Satana. Ɛnyɛlɔ, sho kokaka nsala dui sɔ lo ndjalama diaha monga la kɛlɛ ka tshambandeko. Paulo akafunde ate: “Nyuki kele, ku tanyutshaki kolo. Unya tadjelaki kele kanyu. Tanyushaki uhimbanyi dihuli.” (Ef. 4:26, 27) Naka tamboka kɛlɛ l’ɔtɛ wa dikambo dimɔtshi dieso la shadiya, kete nsala dɔmbɛlɔ dia l’etei k’otema mbala kakɔ ɔtɔi kokaka tokimanyiya dia monga la ‘yimba ya ki’ ndo la ndjakimɛ lo dihole dia nsala akambo lo yoho yakoka nyangiya nyuma kaki Nzambi. (Tuk. 17:27) Ɔnkɔnɛ, tatotshikalake la kɛlɛ ndo tatoshake Satana diaaso dia nde totshutshuya dia sho nsala dikambo dimɔtshi dia kɔlɔ. (Osam. 37:8, 9) Yoho mɔtshi ya nshika tanga la ntondo kande ele lo kandolaka ekakatanu aha la tshimbatshimba lo yoho yɔtɔnɛ la dako diaki Yeso.—Mat. 5:23, 24; 18:15-17.
10, 11. Lande na kahatahombe mbuva kana monga la lokeso?
10 Tatɔkɔke l’ohemba wa mbuva kana wa monga la lokeso. Lo kɛnɛ kendana la mbuva, Paulo akafunde ate: “One latuvaka, tavaki. Keli ndi akambi ulimu, atshi akambu w’ololo l’anya andi, dia ndi ndjala la diango dia mbisha one lahumba.” (Ef. 4:28) Naka Okristo wakayakimɔ le Nzambi ambova, kete lo mɛtɛ nde ‘ambɔlɔsha lokombo laki Nzambi’ lo lisha sɔnyi. (Tuk. 30:7-9) Kânga wola hasha onto lotshungɔ la mbuva. Wanɛ woka Nzambi ndo wanyawɔ anto ngandji mbeyaka dia mbuva ekɔ kɔlɔ.—Mako 12:28-31.
11 Paulo kotɛnya tsho kɛnɛ kahatahombe nsala, koko nde akatɛnya ndo kɛnɛ kahombaso nsala. Naka tekɔ lɔ nsɛna ndo nkɛndakɛnda la nyuma k’ekila, kete tayosala la wolo dia nkotsha ehomba wa nkumbo kaso ndo dia ndjala “la diango dia mbisha one lahumba.” (1 Tim. 5:8) Yeso nde la apɔstɔlɔ ande wakombaka yema ya dikuta dia kimanyiyaka ase wola, koko Judasɛ Isakariyɔtɛ laki ofungi akavaka yema ya falanga. (Joa. 12:4-6) Nde kɔnɔmbwamaka mɛtɛ la nyuma k’ekila. Sho wanɛ walɔmbwama la nyuma kaki Nzambi ‘mongaka la losembwe l’akambo tshɛ’ l’ɛnyɛlɔ kaki Paulo. (Heb. 13:18) Lo nsala ngasɔ, sho mbewɔka dia nyangiya nyuma k’ekila kaki Jehowa.
Toho tokina ta mbewɔ dia nyangiya nyuma
12, 13. a) Oko wodiɛnyishawɔ lo Efeso 4:29, weho akɔna w’ɛtɛkɛta wahombaso mbewɔ? b) Ngande wahomba monga ɛtɛkɛta aso?
12 Sho pombaka sɔnaka ɛtɛkɛta wa ntondja. Paulo akate ate: “Diui dia kolo tadiutumbaki uma l’enyo anyu, keli paka aui w’ololo, weya mbudia antu uku ahumbawo, ne dia nfudiya wane wuka ngandji ka mamba.” (Ef. 4:29) Lanɛ nto, ɔpɔstɔlɔ kombuta tsho kɛnɛ kahatahombe nsala, koko nde akatotɛ ndo kɛnɛ kahombaso nsala. Lo shɛngiya ya nyuma kaki Nzambi, tayotshutshuyama dia ‘mbuta awui w’ɛlɔlɔ weya mbodia anto dia wanɛ woka awui akɔ kimanyiyama.’ Ndo nto, hatohombe mbetawɔ dia “diui dia kolo” ntomba oma l’enyɔ aso. Tshɛkɛta ya lo Grɛkɛ yokadimɔmi ɔnɛ “kolo” mendanaka la olowa, lose kana mma diambɔhɔnda. Oko watotohetshaka mbo ya ndɛ yambɔhɔnda mbahombaso mpetsha ɛtɛkɛta wɔsa Jehowa dia wekɔ kɔlɔ.
13 Ɛtɛkɛta aso pombaka monga amɛna, ɛlɔlɔ ndo “wosohanyimi la leho.” (Kol. 3:8-10; 4:6) Anto pombaka monga la akoka wa mɛna dia sho ntshikitana la anto akina etena kokawɔ ɛtɛkɛta watondjaso oma l’enyo aso. Ɔnkɔnɛ, nyɛsɔ tokimanyiyake anto akina lo tondjaka ɛtɛkɛta “w’ololo, weya mbudia antu.” Ndo nyɛsɔ toyaoke oko wakayaoke omembi w’esambo wakembe ate: “Aui wa unyo ami la tukanyi t’utema ami wayali ololo lu ashu aye, we [Jehowa], Dive diami la Utshungudi ami.”—Osam. 19:14.
14. Lo ndjela Efeso 4:30, 31, sho pombaka minya akambo akɔna?
14 Sho pombaka minya odudu, yɛnyi, ntɛngɔ, ndo awui tshɛ wa kɔlɔ. L’ɔkɔngɔ wa nde tɔhɛmɔla diaha sho nyangiya nyuma kaki Nzambi, Paulo akafunde ate: ‘Nyonya odudu tshɛ la yɛnyi la kɛlɛ la ehangohango la ntɛngɔ kâmɛ ndo awui tshɛ wa kɔlɔ.’ (Ef. 4:30, 31) Oko weso kema kokele, sho tshɛ pombaka nsala la wolo dia mbahemɛ tokanyi ndo ditshelo diaso. Naka sho mbetawɔ dia ‘odudu la yɛnyi la kɛlɛ’ tahemɛ, kete tayonyangiya nyuma kaki Nzambi. Woho akɔ wâmɛ mbele, tayonyangiya nyuma kaki Nzambi naka hatohɛ kɔlɔ kotosalewɔ, mombɛka anto tokumbɛkumbɛ ndo tonaka dia mbokana nto la onto lakatosalɛ kɔlɔ. Naka sho ntatɛ minya yimba l’alako watosha Bible, kete sho mbeyaka ndjonga la waonga wakoka tokonya dia salɛ nyuma k’ekila pɛkato ndo dui sɔ mbeyaka ndjonga la etombelo wa kɔlɔ efula le so.
15. Naka onto ambotosalɛ kɔlɔ kɛmɔtshi, ahombaso nsala?
15 Sho pombaka monga la lɔsɛngɔ, la kɛtshi ndo dimanyiyanaka. Paulo akafunde ate: ‘Nyonge la lɔsɛngɔ ndo la kɛtshi k’efula lam’asanyu ndo nyodimanyiyanake oko wakanyodimanyiya Nzambi oma le Kristo.’ (Ef. 4:32) Oyadi tambonyanga efula l’ɔtɛ wa kɔlɔ kɛmɔtshi kotosalewɔ, nyɛsɔ todimanyiya onto akɔ oko watodimanyiya Nzambi. (Luka 11:4) Tɔshi dia osekaso ombetawudi ambota dikambo dimɔtshi dia kɔlɔ lo lokombo laso. L’oyango wa nkandola dikambo sɔ, sho tambotshɔ dia tosawola la nde. Nde amboyatshumoya l’otema ɔtɔi ndo ambotɔlɔmba edimanyielo. Sho tambôdimanyiya, koko hatohombe komɛ lâsɔ ato. Akambu w’Asi Lewi 19:18 mbutaka ɔnɛ: “Tukaluyaki kolo lu kolo, tuyalaki la ukumba le asi wudja aye. Keli ulangaki unyaye uku ayalangaye. Dimi keli [Jehowa].”
Sho pombaka nsɛna wolo
16. Sha ɛnyɛlɔ kɛnya dia mbeyaka monga ohomba dia sho nsala etshikitanu ɛmɔtshi diaha sho nyangiya nyuma kaki Jehowa.
16 Kânga etena keso shoamɛ, sho kokaka pembama dia nsala dui dimɔtshi diahangɛnyangɛnya Nzambi. Ɛnyɛlɔ, mbeyaka monga ko ɔnangɛso ɔmɔtshi akahokamɛka mishiki wele kɔlɔ le Akristo. L’ɔkɔngɔ diko, nkum’otema kande kowanya l’ɔtɛ wakandɔnyɔla alako w’oma lo Bible watanema lo ekanda watondja ‘ɔhɔmbɔ wa kɔlamelo ndo wa kɛsɔ.’ (Mat. 24:45) Nde mbeyaka nɔmba lo kɛnɛ kendana la dikambo sɔ ndo mbohɔ ɛtɛkɛta waki Paulo wele lo Efeso 4:30. Lo ndjashikikɛ diaha nsala kanga dui ɔtɔi diayonyangiya nyuma kaki Nzambi, nde ambɔsa yɛdikɔ ya mbewɔ mishiki wa kɔlɔ ɛsɔ oma ko kakianɛ. Jehowa ayɔtshɔkɔla dionga diambɔkɛnɛmɔla ɔnangɛso sɔ. Ɔnkɔnɛ, toyalamake nshi tshɛ diaha nyangiya nyuma kaki Nzambi.
17. Kakɔna kakoka tokomɛ naka hatɔsɛnɛ wolo ndo hatɔlɔmbɛ?
17 Naka hatɔsɛnyi wolo ndo hatɔlɔmbi, kete sho kokaka ndjɔkɔ lo tshelo mɔtshi ya mindo kana ya kɔlɔ yakoka nyangiya nyuma. Lam’ele nyuma k’ekila tokimanyiyaka dia sho monga la waonga wakɛnɛmɔla lonto laki Shɛso lele l’olongo, etena kakinyangiyaso, sho nyangiyaka Nzambi. Hatokombola mɛtɛ dia nsala dui dia ngasɔ. (Ef. 4:30) Afundji w’ase Juda wa lo ntambe ka ntondo wakate lo yoho ya kɔlɔ dia Yeso akasalaka ahindo lo wolo waki Satana. (Adia Mako 3:22-30.) Atunyi waki Kristo asɔ ‘wakatɛngɛ nyuma k’ekila,’ ɔnkɔnɛ wakasale pɛkato kahakoke dimanyiyama. Tatokombolake dia dikambo dia ngasɔ tokomɛ pondjo!
18. Ngande wakokaso ndjashikikɛ dia hatosadi pɛkato kahakoke dimanyiyama?
18 Lam’ele hatokombola nsala dikambo diakoka tokonya suke la nsala pɛkato kahakoke dimanyiyama, sho pombaka mbohɔ kɛnɛ kakate Paulo diaha nyangiya nyuma. Ko kayotota naka tambosalaka munga ka woke? Naka tamboyatshumoya ndo tambokimanyiyama oma le dikumanyi, kete sho kokaka mbuta dia Nzambi ambotodimanyiya ndo ɔnɛ hatosale nyuma k’ekila pɛkato. L’ekimanyielo kaki Nzambi, sho kokaka nto mbewɔ dia nyangiya nyuma lo yoho yakɔna tshɛ.
19, 20. a) Naa akambo amɔtshi wahombaso mbewɔ? b) Sho pombaka ndjashikikɛ dia nsala na?
19 Nzambi kambaka la nyuma kande k’ekila dia nkimanyiya ekambi ande dia vɔ monga la ngandji, ɔngɛnɔngɛnɔ ndo kâmɛ. (Osam. 133:1-3) Ɔnkɔnɛ, sho pombaka mbewɔ dia nyangiya nyuma lo ntondja ɛtɛkɛta wa kɔlɔ wɛnya dia hatɔlɛmiya alami wakasɔnama oma le nyuma k’ekila. (Etsha 20:28; Jude 8) Lo dihole dia nsala ngasɔ, sho pombaka nkeketsha kâmɛ ndo dilɛmiɛlɔ dia lam’asaso lo etshumanelo. Lo mɛtɛ, hatohombe nkeketsha yimba ya diatɔnelo l’atei w’ekambi waki Nzambi. Paulo akafunde ate: “Anyasu, dimi lambunyosengasenga lu lukumbu la Khumesu Jesu Kristu, dia nyu tshe mvuta diui otoi, diaha nyu mbatana, keli dia nyu nduwanyema lu yimba ndu lu tukanyi kame.”—1 Kor. 1:10.
20 Jehowa kombolaka ndo ekɔ la akoka wa tokimanyiya dia sho mbewɔ dia nyangiya nyuma kande. Nyɛsɔ totetemalake nɔmba nyuma k’ekila ndo toyashikikɛ diaha kinyangiya. Nyɛsɔ totetemale ‘monɛ lo nyuma’ lo nyangaka ɛlɔmbwɛlɔ katɔ oma ko kakianɛ ndo pondjo pondjo.
Ngande wayoyokadimola?
• Kakɔna kalembetshiya nyangiya nyuma kaki Nzambi?
• Ngande wakoka onto lakayakimɔ le Jehowa nyangiya nyuma Kande?
• Toho takɔna takokaso mbewɔ dia nyangiya nyuma k’ekila?
[Osato wa lo lɛkɛ 30]
Tokandolake ekakatanu aha la tshimbatshimba
[Osato wa lo lɛkɛ 31]
Ɛtɛkɛta ayɛ ndekaka fɔna la olowa akɔna?