Esambishelo ka lânde kakasalema la Bulgarie kaki l’etombelo w’ɛlɔlɔ

“Diango dia dinela dieko efula, keli ekambi mbeli tshitshe. Okone nyolombe Khumadiondjo, kanga dinela, keli ndi atumi ekambi lu dinela diandi.”—MAT. 9:37, 38.

ƐTƐKƐTA waki Yeso ɛsɔ wakakotshama lo menda kɛnɛ kakasalema la Bulgarie, wodja wa dimɛna wa la Balkan lo lɛkɛ la lo sidɛ-ɛstɛ ka l’Europe. Ohomba wa lânde wekɔ wa tosambisha anto ndekana miliyɔ esambele wadjasɛ lo wodja akɔ. Apandjudi oko 1 700 mbele la Bulgarie koko vɔ bu l’akoka wa nkindjakindja bɛtshi diawɔ dia nkɛtɛ tshɛ. Diakɔ diele, Olui-walɔmbɔla aketawɔ dia mbelɛ Ɛmɛnyi wa Jehowa watɛkɛta ɔtɛkɛta wa bulgare w’oma lo wedja efula wa l’Europe dia vɔ tosha lonya l’esambishelo ka lânde kakasalema lɛkɔ lo 2009. Esambishelo ka lânde kɛsɔ kakakongɛma l’edja ka mingu esambele ya lo nshi y’ɔwɔ kakayokomɛka la Losanganya la distrikɛ laki l’ɔtɛ a dui ɔnɛ: “Nyotetemale nsungukala,” lakasalema l’osomba wa Sofia Ngɔndɔ k’enanɛi 14-16, 2009.

Anto waketawɔ la wangasanu w’efula

Anangɛso wa lo Bɛtɛlɛ ka l’osomba wa Sofia wakayambolaka dia mbeya lofulo l’anangɛso wayetawɔ leeta lɔsɔ oma lo wodja w’Allemagne, w’Espagne, wa France, wa Grèce, w’Italie ndo wa Pologne. Dui sɔ diakalembetshiyaka di’onto ndamɛ ndjafutɛ lɔkɛndɔ otsha la Bulgarie ndo mbɔsa vakashi dia tosambisha lɛkɔ. Aki mɛtɛ dui di’ɔngɛnɔngɛnɔ dia mɛna dia lomingu la lomingu lofulo l’apandjudi wakalɔmbɛ lotshungɔ dia ntshɔ lɛkɔ dia tosambisha lakatafulanɛka polo ndo lo ndjokoma apandjudi 292. Lofulo l’apandjudi lɔsɔ lakakoke tomama l’esomba esato wa la Bulgarie, mbuta ate Kazanlak, Sandanski ndo Silistra. Emendji w’etshimbedi wa la Bulgarie wakalɔmbɛ ambatshi mboka ndo apandjudi wa lo wodja ɔsɔ dia vɔ lawɔ sukɛ esambishelo ka lânde kɛsɔ. L’ekomelo, apandjudi 382 wakayakimɔ la lolango wakakindjakindja bɛtshi dia nkɛtɛ dia lo wodja ɔsɔ diahawaleke nsambisha lokumu l’ɔlɔlɔ.

Wakalɔmbɛ anangɛso l’akadiyɛso wa lo tshumanelo di’osukanyi dia vɔ nɔngɔsɔla mpango yakahombe apandjudi wakaye ndjohanga. Vɔ wakafutɛ ahole ndo mvudu ya l’ɔtɛlɛ yaki komonga oshinga wolo. Anangɛso l’akadiyɛso wa l’esomba ɛsɔ wakakambe la wolo dia tanɛ apandjudi wakaye ahole wakawahombe mpanga ndo wakâkotshɛ ehomba awɔ. Wakatanɛ anangɛso la akadiyɛso ahole wakawahombe ndjohanga l’esomba akɔ esato. Ɛlɔngɔswɛlɔ wakasalema di’anangɛso wakaye nɔmbɔla nsanganya ya l’etshumanelo. Aki mɛtɛ dui di’ɔngɛnɔngɛnɔ dia mɛna ahole waki komonga ndoko Ɔmɛnyi wa Jehowa, apandjudi 50 wosangana dia ntombola Jehowa.

Ohetoheto waki l’anangɛso wakaye oma lo wedja ekina wakaleke fulanɛ. Lo nshi y’ɔwɔ, tshitshi komaka polo lo yɛdikɔ ya 40°C lo wodja wa Bulgarie. Koko, ndoko dikambo diakakoke nshimba anangɛso l’akadiyɛso asɔ waki l’ohetoheto dia vɔ mbisha lonya l’esambishelo ka lânde kɛsɔ. Anangɛso l’akadiyɛso wakasambisha dimɛna efula l’edja ka mingu shato y’etatelo l’osomba wa Silistra wele l’anto ndekana 50 000 watanema l’omamu w’ɔkɛdi wa Danube. Etombelo waki la dikambo sɔ ele, anangɛso l’akadiyɛso wakaleke mbidja welo dia nsambisha anto wa lo ngelo yakasukana l’osomba ɔsɔ polo la Tutrakan ngelo katanema lo kilɔmɛtɛlɛ 55 lo owɛstɛ wa Silistra. Mbala tshɛ, vɔ wakatatɛka nsambisha lo 9:30 wa pindju. Mbala efula l’ɔkɔngɔ wa ndɛ yangɔ la midi, vɔ wakatetemalaka nsambisha polo ndo lo 7:00 wa dikɔlɔ. Woho akɔ wâmɛ mbele, esambishelo kakasalema l’osomba wa Kazanlak ndo wa Sandanski kakakome polo lo tongelongelo ndo l’esomba wakasukana lawɔ l’ɔtɛ w’ohetoheto waki l’anangɛso ndo l’akadiyɛso wakayakimɔ la lolango.

Etombelo akɔna wakonge l’esambishelo ka lânde kɛsɔ?

Esambishelo ka lânde kɛsɔ kakasalema l’edja ka mingu esambele. Oko wakawadite lo nshi y’apɔstɔlɔ, anto wa l’esomba ɛsɔ wakakoke mbuta ɔnɛ: ‘Nyambolodia esomba aso la wetshelo anyu.’ (Etsha 5:28) Anangɛso l’akadiyɛso wakasambisha, wakakahanya periodikɛ oko 50 000 ndo wakatatɛ mbeka Bible l’anto 482. Dui di’ɔngɛnɔngɛnɔ ko, lo Ngɔndɔ ka divwa 1, 2009, etshumanelo k’oyoyo kakatema la Silistra ndo ekɔ elui ekina wakakengama la Kazanlak ndo la Sandanski. Ekɔ dui di’ekeketshelo dia mɛna anto wakoke lokumu l’ɔlɔlɔ mbala ka ntondo l’esambishelo ka lânde kɛsɔ wasala ehamelo wa lo nyuma w’amɛna efula.

Lo lomingu la ntondo lakasalema esambishelo ka lânde kɛsɔ, kadiyɛso kɛmɔtshi kele ombatshi mboka wa lânde katɛkɛta ɔtɛkɛta wa bulgare kakaye oma lo wodja w’Espagne akasambisha Karina, mama kɛmɔtshi kakasondjaka tojurnalɛ lo shinga. Karina akatatɛ ndjasha ndo akatatɛ ndja lo losanganya. Esadi eto, nde aketawɔ dia mbeka Bible. Omɛnde ekɔ onto lahetawɔ ɔnɛ Nzambi ekɔ, diakɔ diakalɔmbɛ Karina dia vɔ tekaka Bible lo dihole dialamawɔ waa nyama. Nde akekaka Bible kâmɛ l’anande ahende wa wamato. Ɔnande l’enondo le Daniela akɛnya lowando l’efula laki la nde l’akambo wa mɛtɛ wa lo Bible. Nde akadia dibuku Bible etshatɔ l’edja ka lomingu ɔtɔi ndo aha la ntshimbatshimba nde aketawɔ kɛnɛ kata Bible diaha nkamba l’esato l’atei w’ɔtɛmwɛlɔ. Oma lâsɔ, nde akatatɛ nsambisha angɛnyi ande akambo wa mɛtɛ. Paka mingu shato tsho l’ɔkɔngɔ wa nde mbɔtɔ lo losanganya mbala ka ntondo, nde akatɛ kadiyɛso kakekaka lande Bible ate: “Lekɔ lo ndjaoka oko ɔmɔtshi la l’atei anyu. Kakɔna kahombami nsala dia dimi lawɔ ntatɛ nsambisha?” Daniela ekɔ lo ntetemala nsala ehamelo wa lo nyuma w’amɛna nde la nyango, kâmɛ la kosɛnde ka womoto.

L’osomba wa Kazanlak, Orlin ɔnangɛso ɔmɔtshi l’ose Bulgarie l’akaye oma l’Italie dia ndjosha lonya l’esambishelo ka lânde kɛsɔ, akatakalolaka otsha lɛnɛ akandadjasɛka l’ɔkɔngɔ w’esambishelo. Lam’akandatakalolaka, Orlin akasambisha ɛlɔngɔlɔngɔ ehende wakadjasɛ l’okala lo dihole dialamawɔ waa nyama. Nde akawasha dibuku Bible etshatɔ ndo wakokana dia nde ndjowaenda lushi lakayele. Lo wendelo ɔsɔ, Orlin akatatɛ mbeka Bible nde la Svetomir, wekelo wakatatɛ paka la wedi a pindju. L’edja ka nshi divwa, Orlin akeke nde la Svetomir mbala enanɛi. Svetomir akawotɛ ate: “Nshi hiende la ntondo ka dimi mpomana la yɛ, lakalɔmbɛ Nzambi dia nde kimanyiyami dia dimi mbêya. Ndo lakôlake dia naka nde kimanyiyami, kete layohomba mbolambola lɔsɛnɔ lami.” L’ɔkɔngɔ wa Orlin nkalola lo wodja w’Italie, anangɛso wa lo ngelo kɛsɔ wakatetemala mbeka la Svetomir ndo nde akatetemala mpama l’akambo wa mɛtɛ.

Wanɛ wakayahombia wakakondja ɛtshɔkɔ efula

Ngande wakayaoke anangɛso l’akadiyɛso wakakambe la wenya awɔ ndo la nshi yawɔ ya vakashi la lokaho tshɛ lo munda nkɛndɔ la falanga yawɔ vwamɛ dia ntshɔ lo wodja okina dia tosambisha lokumu l’ɔlɔlɔ? Ekumanyi kɛmɔtshi ka lo wodja w’Espagne akate ate: “Esambishelo ka lânde kɛsɔ kakakimanyiya di’anangɛsɔ l’akadiyɛso wa la Bulgarie la wa l’Espagne monga kâmɛ. Dikambo sɔ diakonge la shɛngiya ya wolo le anangɛso l’akadiyɛso wakayasha l’esambishelo ka lânde kɛsɔ.” Atshukanyi amɔtshi wakaye oma l’Italie wakate ɔnɛ: “Ɔsɔ aki mɛtɛ ngɔndɔ ka lânde lo lɔsɛnɔ laso.” Vɔ wakakotsha ɔnɛ: “Esambishelo ka lânde kɛsɔ kakatshikitanya lɔsɛnɔ laso! Kakianɛ tambotshikitana l’anto akina.” Atshukanyi asɔ wakatatɛ kanyiya wolo lo kɛnɛ kendana la diaaso dia monɔ lo pondjo la Bulgarie dia tokamba lɛnɛ ele ohomba w’efula w’apandjudi. Carina kadiyɛso k’onyemba kele ombatshi mboka wa pondjo akaye oma lo wodja w’Espagne dia ndjosukɛ esambishelo ka lânde kɛsɔ l’osomba wa Silistra. L’ɔkɔngɔ diko, nde akatshike olimu wakandakambaka l’Espagne ndo akonɔ la Bulgarie dia tosukɛ etshumanelo k’oyoyo kakâtema lo wodja ɔsɔ. Nde akombe falanga efula yakakoke mbokimanyiya dia nde mbidjasɛ ɔnɔnyi w’otondo la Bulgarie. Lo kɛnɛ kendana la yɛdikɔ yakandɔshi, Carina mbutaka ate: “Lekɔ l’ɔngɛnɔngɛnɔ lo woho waketawɔ Jehowa dia dimi ndjokamba lanɛ la Bulgarie, ndo lekɔ lo nongamɛ dia layonga l’akoka wa ntshikala lanɛ l’etena k’otale. Lamboshila nkondja anto atanu weka lami Bible, ndo asato l’atei awɔ wekɔ lo mbɔtɔ lo nsanganya.”

Kadiyɛso kɛmɔtshi ka l’Italie akakombola ndjosukɛ esambishelo ka lânde kɛsɔ, koko nde aki oma la ntatɛ nkamba olimu w’oyoyo ndo aki atonge la nshi ya vakashi. Aha la nde nkɔmɔ, nde akalɔmbɛ dia nde ndjokamba ngɔndɔ ɔtɔi aha la vɔ mbofuta ndo aki suke la mimɔ oma l’olimu naka owandji ande hetawe kɛnɛ kakandɔlɔmbaka. La shashimuya, owandji ande w’olimu akawotɛ ate: “Kawɔ, wɛ koka ntshɔ koko l’ɔtɛ wa dikambo ɔtɔi: Lam’ayoyokalola oma la Bulgarie kombela wombo.” Kadiyɛso kɛsɔ akashikikɛ dia Jehowa akakadimola alɔmbɛlɔ ande.

Stanislava kadiyɛso kɛmɔtshi k’osekaseka k’oma l’osomba wa Varna lo wodja wa Bulgarie kakakambaka olimu wakawɔsɛka wenya tshɛ wakawôfutaka dimɛna, akatshu dia tosukɛ esambishelo ka lânde l’osomba wa Silistra. Etena kakandɛnyi ɔngɛnɔngɛnɔ waki l’ambatshi mboka efula wakaye oma l’ahole wa tale dia ndjosambisha lokumu l’ɔlɔlɔ lo wodja ande, nde akakɛdia asɔi. Nde akatatɛ nkanyiya dia kɛnɛ kakandasalaka lo lɔsɛnɔ lande, mbuta ate woho wakandatawesaka olimu wa l’emunyi. Etena kakandakalola lakande l’ɔkɔngɔ wa mingu hiende, nde akatomɔka oma l’olimu ande ndo akakome ombatshi mboka wa pondjo. Kakianɛ nde ekɔ lo ndjaoka dia nde ekɔ l’ɔngɛnɔngɛnɔ wa mɛtɛ, lo woho wohɔnde Otungi ande lo nshi yande y’osekaseka.—Und. 12:1.

Ekɔ mɛtɛ tshondo y’ɔtshɔkɔ dia ndjasha efula l’olimu wa Jehowa. Ndoko dikambo di’oleki dimɛna diakokayɛ nsala ko ndeka wenya la wolo wetshayɛ l’olimu wa wetshelo ndo w’esambishelo ka lokumu l’ɔlɔlɔ. Onde ekɔ toho tɔmɔtshi takokayɛ nsala dia mpamia olimu ɔnɛ w’esambishelo washimbɛ nsɛnɔ? Ekɔ ahole amɔtshi lo wodja anyu wele l’ohomba w’apandjudi efula. Onde wɛ hakoke monɔ l’ahole wa ngasɔ? Kana, wɛ kokaka mɛna ohomba wa mbeka ɔtɛkɛta okina dia nkimanyiya anto wa lo wodja anyu wele la mposa k’akambo wa mɛtɛ wa lo Bible. Oyadi etshikitanu akɔna wakokayɛ nsala dia mpamia olimu ayɛ, wɛ kokaka ndjashikikɛ dia Jehowa ayokɔtshɔkɔla.—Tuk. 10:22.

[Kiombo/Osato wa lo lɛkɛ 32]

Lushi lahohamamɛki

Efula k’anangɛso l’akadiyɛso wakaye oma lo wedja ekina wa l’Europe dia ndjosha lonya l’esambishelo ka lânde la Bulgarie wakayalɔngɔsɔla dia ndjɔtɔ lo Losanganya la distrikɛ laki l’ɔtɛ a dui ɔnɛ: “Nyotetemale nsungukala,” lakasalema l’osomba wa Sofia. Aki dui di’ekeketshelo le anangɛso l’akadiyɛso wa lo wodja wa Bulgarie dia mpomana l’angɛndangɛnda efula wakaye oma lo wedja wotshikitanyi. Anto 2 039 waki l’ɔngɛngɔngɛnɔ w’efula etena kakewoya ɔnangɛso Geoffrey Jackson ɔtɔi ɔmɔtshi wa lo Olui-walɔmbɔla otombelo wa Bible k’otondo ka Les Saintes Écritures — Traduction du monde nouveau l’ɔtɛkɛta wa bulgare. Anto tshɛ waki lo losanganya lɔsɔ Lushi la tanu wakangɛnangɛna efula ndo wakade saka edja efula. Efula wakakɛdia asɔi w’ɔngɛngɔngɛnɔ. Ekadimwelo kɛsɔ ka shikaa ndo kele l’ɛtɛkɛta wa wɔdu nshihodia kayokimanyiya ase Bulgarie wele l’etema w’ɛlɔlɔ dia vɔ mbeya Jehowa.

[Kartɛ ka lo lɛkɛ 31]

(Dia mbeya awui tshɛ enda l’okanda)

BULGARIE

SOFIA

Sandanski

Silistra

Kazanlak

[Esato wa lo lɛkɛ 31]

Esambishelo ka lânde kakasalema l’edja ka mingu esambele